”Sai marhaposan tu Jahowa ma ho jala ulahon na denggan . . . jala radoti haburjuon.”PSALMEN 37:3.

ENDE: 49, 18

1. Tingki manompa jolma, aha do na dilehon Jahowa tu nasida?

TINGKI manompa jolma, dilehon Jahowa do hasurungan. Dilehon do pingkiran tu hita, na mangurupi hita pasaehon parsoalan dohot mamingkirhon ari na naeng ro. (Poda 2:11) Dilehon do tu hita huaso, na mambahen hita boi mangulahon lomo ni rohanta dohot na tatuju. (Plp. 2:13) Dilehon do panggora ni roha, i ma pamotoan taringot tu na denggan dohot na roa. On mangurupi hita pasidingkon dosa, asa unang mangulahon hasalaan.Rom 2:15.

2. Aha do na dihirim roha ni Jahowa laho taulahon taringot silehonlehonNa?

2 Lomo roha ni Jahowa asa tu na denggan tapangke sude silehonlehon i. Boasa? Ala holong rohaNa tu hita, jala diboto Ibana las do rohanta molo tapangke  silehonlehon i. Umpamana, di Angka Buku Heber, tajaha do, ”Sangkapsangkap ni halak na padot manjadihon hadumaon situtu,” jala ”manang aha na jumpang tanganmu siulaonmu, ula ma i sian nasa gogom”. (Poda 21:5; Pjm. 9:10) Di Angka Buku Junani, tajaha do, ”Binsan sadihari dope, taulahon ma na denggan di saluhut halak,” jala ”masipatureturean ma hamu, ganup marguru tu asiasi na jinalona”. (Gal. 6:10; 1 Ptr. 4:10) Lomo roha ni Jahowa asa taulahon ulaon na marlaba tu hita dohot tu na asing.

3. Aha do na so boi diulahon angka jolma?

3 Lomo roha ni Jahowa tapangke gogo dohot pingkiranta, nang pe diboto Ibana ndang sude boi taulahon. Umpamana, ndang boi tapasiding hagaleon, dosa, dohot hamatean. (1 Raj. 8:46) Ndang boi hita mangarajai halak, ala lomo ni ganup halak do mamillit. Ndang soal sadia godang parbinotoan dohot pengalamanta, ndang boi hita dos songon Jahowa.Jes. 55:9.

Molo adong sitaononmuna, ’marhaposan ma tu Jahowa jala ulahon na denggan’

4. Aha do na laho taulas di artikel on?

4 Tapaloas ma Jahowa manogunogu hita, pos ma rohanta na urupanNa do hita, jala boi do ulahononNa na so boi taulahon. Lomo roha ni Jahowa molo tapingkirhon cara pasaehon parsoalan dohot mangurupi na asing. (Jaha Psalmen 37:3.) Porlu do hita ’marhaposan tu Jahowa jala mangulahon na denggan’. Ingkon olo ma hita ’mangaradoti haburjuon’. Songon dia  carana? Tatiru ma si Noak, si Daud, dohot na asing na marhaposan tu Jahowa. Taida ma, adong do na so boi diulahon nasida, alai marsitutu do nasida mangulahon na boi diulahon.

TINGKI GOK HAJAHATON DI HUMALIANGTA

5. Paboa ma na masa di tingki ni si Noak.

5 Si Noak mangolu di portibi na ”gok hajahaton” dohot parmainanon. (1 Mus. 6:4, 9-13) Nang pe diboto na laho ripashonon ni Jahowa portibi na jahat di tingki i, tontu sogo do roha ni si Noak mangida ulaon ni angka halak. Tingki i, diboto si Noak adong do na so boi diulahon ibana. Alai, diboto do aha na boi ulahononna.

Ambatambat tingki marbarita (Ida paragraf 6-9)

6, 7. (a) Aha do na so boi diulahon si Noak? (b) Songon dia do situasinta sarupa dohot di tingki ni si Noak?

6 Na so boi diulahon si Noak: Marsitutu do si Noak pasahathon sipasingot sian Jahowa, alai ndang dipaksa ibana angka halak manangihon barita i. Ndang dihirim rohana asa hatop ro Aek na Sumar i. Pos do roha ni si Noak diingot Jahowa do janjiNa laho mangaripashon parjahat, jala porsea do ibana nunga ditontuhon Debata tingkina.1 Mus. 6:17.

7 Saonari, hita mangolu di portibi na gok hajahaton, na laho ripashonon ni Jahowa. (1 Joh. 2:17) Alai, ndang boi tapaksa angka halak manjangkon ”barita na uli on na taringot tu Harajaon”.  Jala ndang boi tapaksahon asa hatop ro hasusaan bolon i. (Mat. 24:14, 21) Songon si Noak, ingkon togu do haporseaonta. Pos rohanta ripashonon ni Debata nama hajahaton. (Ps. 37:10, 11) Pos do rohanta ndang olo Jahowa paloashon hajahaton tongtong di portibi on.Hab. 2:3.

Songon si Noak, ingkon togu do haporseaonta. Pos rohanta ripashonon ni Debata ma hajahaton

8. Aha do na diulahon si Noak? (Ida gombar di mula ni parsiajaran.)

8 Na boi diulahon si Noak: Ndang sai dipingkirhon si Noak na so boi diulahon, alai marsitutu do ibana mangulahon na boi diulahon. Dipasahat do sipasingot sian Jahowa. (2 Ptr. 2:5) On mambahen haporseaonna tongtong togu. Asing ni i, diihuthon si Noak do tudutudu sian Jahowa laho mambahen parau.Jaha Heber 11:7.

9. Songon dia do hita maniru si Noak?

9 Songon si Noak, marsitutu do hita ”di bagasan ulaon ni Tuhan i”. (1 Kor. 15:58) Ra, taurupi do ulaon pajongjongkon Bale Harajaon dohot Bale Kebaktian, gabe relawan di kebaktian, karejo di kantor cabang manang di kantor penerjemahan jarak jauh. Alai na rumingkot, ringgas ma hita marbarita jala on patoguhon pangkirimonta. Sahalak donganta borua mandok, tingki dipaboa ibana tu na asing taringot pasupasu sian Harajaon ni Debata, diboto ma ndang adong pangkirimon ni angka jolma jala didok rohanasida, ndang na laho salpu sitaonon i. Songon hatana i, adong do pangkirimonta, jala lam togu do i tingki tapaboa tu na asing. Pangkirimon on mangurupi hita tongtong di dalan tu hangoluan!1 Kor. 9:24.

TINGKI MARDOSA HITA

10. Paboa ma na masa tu si Daud.

10 Halak na marsihohot do Raja Daud, jala mansai holong roha ni Jahowa tu ibana. (Ul. 13:22) Alai, mangalangkup do si Daud dohot si Batseba, jala dosa na balga do on. Marsangkap do si Daud laho mambunu si Uria, tungganedoli ni si Batseba. Si Uria do disuru si Daud manaruhon surat na mandok asa tarbunu si Uria di parporangan! (2 Sam. 11:1-21) Ujungna, tarboto ma dosa ni si Daud. (Mrk. 4:22) Tingki masa i, songon dia do pangkilalaan ni si Daud?

Dosa di tingki naung salpu (Ida paragraf 11-14)

11, 12. (a) Dung mardosa, aha do na so boi diulahon si Daud? (b) Aha do na diulahon Jahowa molo marhamubaon hita?

11 Na so boi diulahon si Daud: Ndang tarpauba si Daud be naung hea masa. Ingkon ditaon ibana do hasusaan alani dosana. (2 Sam. 12:10-12, 14) Alani i, ingkon marhaporseaon do ibana. Ingkon pos rohana, molo marhamubaon, salpuhonon ni Jahowa do hasalaanna jala diurupi mangadopi hasusaanna i.

 12 Mardosa do hita sude. Alai, olo do ra taulahon hasalaan na balga, jala ndang boi tapauba aha naung taulahon. Ingkon tataon do hasusaan alani ulaonta. (Gal. 6:7) Alai pos do rohanta tu janji ni Debata, molo marhamubaon hita, urupanNa do hita mangadopi hasusaan i, nang pe i alani salanta sandiri.Jaha Jesaya 1:18, 19; Ulaon ni Apostel 3:19.

13. Songon dia do si Daud padengganhon paralealeonna tu Jahowa?

13 Na boi diulahon si Daud: Lomo do roha ni si Daud asa denggan muse paralealeonna tu Jahowa. Songon dia carana? Dijalo do pangurupion dohot sipasingot ni Jahowa marhite si Natan. (2 Sam. 12:13) Martangiang do si Daud tu Jahowa, jala diangkui do dosana. On patuduhon lomo rohana mardame tu Jahowa. (Ps. 51:3-19) Ndang olo si Daud gabe gale, alai marsiajar do ibana sian hasalaanna. Ndang olo be ibana mangulahon dosa sisongon i. Marsihohot do ibana sahat tu na mate, jala diingot Jahowa do ibana.Heb. 11:32-34.

14. Aha do na boi taparsiajari sian si Daud?

14 Aha na boi taparsiajari sian si Daud? Molo taulahon dosa na balga, ingkon marhamubaon do hita, taangkui ma, jala mangido hasesaan ni dosa. (1 Joh. 1:9) Mangkatai ma tu sintua, ala boi do nasida mangurupi hita padengganhon paralealeonta tu Jahowa. (Jaha Jakobus 5:14-16.) Molo tajalo pangurupion ni Jahowa, on patuduhon pos rohanta na laho sesaonNa do dosanta. Marsiajar ma sian hasalaanta jala marlas ni roha manomba Jahowa.Heb. 12:12, 13.

SITUASI NA ASING

Marsahit (Ida paragraf 15)

15. Aha do na taparsiajari sian si Hanna?

15 Tarimangi ma taringot tu naposo ni Jahowa na tongtong marpos ni roha tingki mangulahon na tolap diulahon di situasi na maol. Umpamana si Hanna, ndang boi ibana marianakhon. Ndang boi tarpauba ibana i. Alai, pos do rohana tu pangapulion sian Jahowa. Laho do ibana tu tabernakel jala martangiang paboahon pangkilalaanna. (1 Sam. 1:9-11) Sitiruon na denggan do on tu hita! Molo marsahit manang masa hasusaan na so tarpauba, tapasahat ma holso ni rohanta tu Jahowa, dung i pos ma rohanta parrohahononNa do hita. (1 Ptr. 5:6, 7) Marsitutu ma hita asa mandapot laba sian parpunguan dohot sian na pinarade ni organisasi ni Jahowa.Heb. 10:24, 25.

Pos do roha ni si Hanna tu Jahowa, laho do ibana tu tabernakel jala martangiang

Ianakhon ndang be manomba Jahowa (Ida paragraf 16)

16. Aha do na diparsiajari angka natuatua sian si Samuel?

16 Songon dia do molo ianakhonta ndang be manomba Jahowa?  Ndang dipaksa si Samuel ianakhonna asa tongtong marsihohot tu Debata. (1 Sam. 8:1-3) Dipasahat ibana do parsoalan i tu Jahowa. Alai, tongtong do marsihohot ibana tu Debata jala palashon rohaNa. (Poda 27:11) Saonari, godang do natuatua mangadopi situasi na sarupa. Porsea do nasida, songon ama di tudosan ni Jesus taringot anak na mago, sai rade do Jahowa manjangkon angka halak na marhamubaon. (Luk. 15:20) Alani i, ingkon tongtong do natuatua marsihohot tu Jahowa jala mangkirim sai anggiat sitiruon sian nasida mangonjar roha ni ianakhonna mulak tu Jahowa.

Susa di parhepengon (Ida paragraf 17)

17. Boasa sitiruon sian ina na mabalu boi patoguhon rohanta?

17 Sitiruon na asing, i ma ina na mabalu na pogos di tingki ni Jesus. (Jaha Lukas 21:1-4.) Ndang boi dipasiding ibana korupsi na diulahon halak di bagas joro jala ndang boi dipasiding hapogosonna i. (Mat. 21:12, 13) Alai, haporseaonna na togu tu Jahowa mangonjar rohana mangalehon silehonlehon sian ias ni rohana. Marbasa ni roha do ibana jala dilehon do ”dua rimis”, nang pe holan i hepengna. Marhaporseaon situtu do ibana tu Jahowa. Diboto ibana do, molo dijumolohon ulaon partondion, lehonon ni Jahowa do angka na dihaporluhon. Suang songon i ma hita, molo tajumolohon Harajaon ni Debata, lehononNa do na tahaporluhon.Mat. 6:33.

18. Paboa ma taringot sahalak donganta na denggan pamingkirionna.

18 Saonari, godang donganta na patuduhon pos ni roha na sarupa tu Jahowa. Ndang diulahon nasida na so boi diulahon, alai na boi diulahon do na diulahon. Pingkirhon ma taringot donganta na margoar si Malcolm, na marsihohot sahat tu na mate taon 2015. Saleleng rap ibana dohot tungganeboruna manomba Jahowa, dihilala nasida do las ni roha, alai olo do sipata dihilala nasida hasusaan. Didok ibana, ”Ndang taboto aha na laho masa di ngolunta on, jala maol do sipata mangadopi i. Alai, sai dipasupasu Jahowa do angka halak na marhaposan tu Ibana.” Aha do poda sian si Malcolm? Didok muse, ”Ringgas ma hita martangiang jala taulahon ma ulaon di partondion sian nasa gogonta. Ulahon ma nasa na boi ulahononmuna.” *

19. (a) Boasa ayat na dipillit laho dipangke taon 2017 pas tu hita? (b) Songon dia do hamu mangulahon ayat na laho dipangke taon 2017?

19 Portibi on nunga lam tu jahatna, alani i lam godang do hasusaan na laho taadopi ganup ari. (2 Tim. 3:1, 13) Alai na rumingkot, unang ma gale hita alani hasusaan na taadopi. Ingkon togu do haporseaonta jala marsitutu mangulahon na boi taulahon. Alani i, dipillit ma ayat on na laho dipangke taon 2017, ”Sai marhaposan tu Jahowa ma ho jala ulahon na denggan”!Ps. 37:3.

Ayat na dipangke di taon 2017: ”Sai Marhaposan tu Jahowa ma Ho jala Ulahon na Denggan”Psalmen 37:3

^ par. 18 Ida Menara Pengawal, 15 Oktober 2013, halaman 17 sahat tu 20.