Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon—Edisi Siparsiajaran  |  Januari 2017

Denggan ma Pangke Hakmuna Laho Mamillit

Denggan ma Pangke Hakmuna Laho Mamillit

”Ia disi Tondi ni Tuhan i, disi do haluaon.”2 KORINT 3:17.

ENDE: 31, 32

1, 2. (a) Songon dia do pandapot ni halak taringot hak laho mamillit? (b) Aha do na diajarhon Bibel taringot hak laho mamillit, jala sungkunsungkun aha do na laho taulas?

TINGKI mamillit sipilliton, sahalak borua mandok tu donganna, ”Unang bahen ahu marpingkir; paboa ma na ingkon huulahon.” Ndang lomo rohana mamangke hak laho mamillit na dilehon Debata, alai lomo rohana adong na manontuhon sipillitonna. Songon dia molo hamu? Hamu sandiri do na manontuhon sipilliton, manang ingkon adong na manontuhon? Songon dia do pangantusionmu taringot hak laho mamillit?

2 Marasingasing do pandapot ni halak taringot hak laho mamillit. Adong na mandok, ndang adong di hita hak laho mamillit ala Debata do na manontuhon sudena. Na asing mandok, hak laho mamillit boi adong molo holan hita sandiri na mambahen aturan di ngolunta. Alai Bibel paboahon, tingki ditompa Debata hita, dilehon do hak laho mamillit. (Jaha Josua 24:15.) Di Bibel,  tadapot ma alus ni sungkunsungkun: Adong do aturan taringot hak laho mamillit? Songon dia do hita mamangke hak laho mamillit tingki manontuhon sipilliton? Songon dia do sipillitonta patuduhon sadia bagas holongta tu Jahowa? Songon dia hita patuduhon pangargaion taringot na pinillit ni halak?

AHA DO NA TAPARSIAJARI SIAN JAHOWA DOHOT JESUS?

3. Songon dia do Jahowa mamangke hak laho mamillit?

3 Taringot hak laho mamillit, marsiajar ma hita tu Jahowa. Alana, Jahowa do na mambahen aturan na dumenggan taringot mamillit. Umpamana, dipillit Jahowa do Israel gabe bangsoNa. (5 Mus. 7:6-8) Boasa nasida na dipillit? Lomo roha ni Jahowa manggohi janjiNa tu si Abraham. (1 Mus. 22:15-18) Tingki mamangke hak laho mamillit, dipatudu Jahowa do holong dohot hatigoranNa. On taboto sian cara ni Jahowa pasingothon bangso Israel tingki mangalo nasida tu Jahowa. Tingki marhamubaon nasida, dipatudu Jahowa do holong dohot asi ni roha. Didok Ibana, ”Pamalumonku ma panundalionnasida, girgir ma ahu mangkaholongi nasida.” (Hos. 14:5) Jahowa mangalehon sitiruon taringot mamangke hak laho mamillit laho mangurupi na asing!

Andorang so tu tano on, marsihohot do Jesus tu Jahowa jala ndang mangihuthon Sibolis dohot angka begu

4, 5. (a) Ise do na parjolo mandapot hak laho mamillit sian Debata, jala songon dia do ibana mamangke i? (b) Aha do na ingkon tasungkun tu dirinta?

4 Tingki manompa surusuruan dohot jolma, dilehon Jahowa do hak laho mamillit tu nasida. Jesus ma tompaan na parjolo. Ditompa do Jesus tumiru Debata jala dilehon hak laho mamillit. (Kol. 1:15) Songon dia do Jesus mamangke hak laho mamillit? Andorang so tu tano on, marsihohot do Jesus tu Jahowa jala ndang mangihuthon Sibolis dohot angka begu. Tingki di tano on, ditundalhon do elaela ni Sibolis. (Mat. 4:10) Di borngin andorang so mate, didok Jesus do tu Jahowa, mangulahon parentaNa do na dihalomohon. Didok ibana, ”Amang, aut olo ma Ho nian pasalpuhon siinumon on sian Ahu! Alai unang ma rohangku saut, roham ma!” (Luk. 22:42) Boi do hita maniru Jesus jala mamangke hak laho mamillit asa pasangaphon Jahowa dohot mangulahon parentaNa?

5 Boi do tatiru Jesus, alana hita pe ditompa tumiru Debata. (1 Mus. 1:26) Alai, hakta laho mamillit ndang dos songon Jahowa. Bibel patorangkon, dilehon Jahowa do aturan taringot hak laho mamillit jala lomo rohaNa asa tajangkon aturan i. Umpamana, taringot keluarga, ingkon unduk do tungganeboru tu tungganedolina jala dakdanak  unduk tu natuatuana. (Eps. 5:22; 6:1) Songon dia do aturan i mangkorhon tingki tapangke hak laho mamillit? Alus ni sungkunsungkun on manontuhon pangkirimonta di ari na naeng ro.

CARANTA MAMANGKE HAK LAHO MAMILLIT

6. Bahen ma tudosan na patuduhon ringkot ni mangihuthon aturan taringot hak laho mamillit.

6 Boi do tadok hakta laho mamillit mangihuthon aturan ni Debata parohon las ni roha? Boi! Alana, tarlinggomi do hita molo adong aturan. Umpamana, marmobil hita tu sada kota na dao. Songon dia ma molo di inganan i ndang adong aturan lalu lintas, jala lomolomo ni halak manontuhon sadia hatop jala di jalur dia nasida marmobil. Olo do hamu marmobil di dalan sisongon i? Tontu ndang olo. Dihaporluhon do aturan asa sude marlas ni roha jala mandapot laba sian hak laho mamillit. Taulas ma sitiruon sian Bibel na patuduhon songon dia aturan na dilehon Jahowa marlaba tu hita.

7. (a) Aha do imbar ni si Adam dohot angka binatang? (b) Patorang ma songon dia si Adam denggan mamangke hakna laho mamillit.

7 Tingki ditompa si Adam, dilehon Debata do tu ibana haboion songon na adong di surusuruan, i ma hak laho mamillit. Alai, ndang dilehon i tu binatang. Songon dia do si Adam denggan mamangke hakna laho mamillit? Las roha ni si Adam mambahen goar ni binatang. ”Ditogihon [Debata] ma i tu si Adam, asa diida manang beha goaranna.” Jala ndang diganti Jahowa be goar na dilehon si Adam tu binatang. ”Dibahen si Adam goar ni nasa na marhosa laos i do goarna.”1 Mus. 2:19.

8. Songon dia do si Adam ndang denggan mamangke hak laho mamillit, jala aha do pangkorhonna?

8 Dilehon Jahowa do tanggung jawab tu si Adam mambahen tano on gabe paradeiso. Didok Debata, ”Marpinompari ma hamu, asa sopar hamu, jala gohi hamu sandok tano on, jala patunduk hamu; jala raja i hamu dengke angka na di laut dohot pidong angka na martongatonga langit ro di sude binatang, angka na manjirir di atas tano on.” (1 Mus. 1:28) Dipangan si Adam do parbue ni hau i. Ala diulahon i, on patuduhon ndang dijangkon ibana aturan ni Jahowa. Ala ndang denggan cara ni si Adam mamangke hak laho mamillit, gabe susa ma jolma. (Rom 5:12) Taingot ma muse aha pangkorhon ni na pinillit ni si Adam. On mangonjar rohanta asa denggan mamangke hak laho mamillit jala manjangkon aturan sian Jahowa.

Dioloi halak Israel do Debata jala dijangkon do aturan sian Ibana

9. Aha do sipilliton na dilehon Jahowa tu halak Israel, jala aha do janji ni nasida tu Jahowa?

9 Sude jolma nunga manean dosa dohot hamatean sian si Adam dohot si Hawa. Nang pe songon i, adong dope hakta laho mamillit. Taboto ma on  sian cara ni Jahowa maradophon halak Israel. Dilehon Jahowa do tu nasida hak laho mamillit gabe bangsoNa manang na ndang. (2 Mus. 19:3-6) Dioloi halak Israel do Debata jala dijangkon do aturan sian Debata. Didok nasida, ”Saluhut na pinaboa ni Jahowa, bahenonnami ma.” (2 Mus. 19:8) Alai ujungna, ndang olo nasida manggohi janjina tu Jahowa. Parsiajaranna, denggan ma tapangke hak laho mamillit, tongtong ma jonok tu Jahowa, jala unduk tu patikNa.1 Kor. 10:11.

10. Sitiruon aha do na dipaboa di Heber 11 na patuduhon boi hita mamangke hak laho mamillit laho pasangaphon Debata? (Ida gombar di mula ni parsiajaran.)

10 Di Heber bindu 11, tajaha do taringot 16 halak na manjangkon aturan sian Jahowa. Dijalo nasida do pasupasu jala marpangkirimon. Umpamana, marhaporseaon situtu do si Noak jala diihuthon do tudutudu sian Debata laho mambahen parau asa malua ibana dohot pinomparna. (Heb. 11:7) Unduk do si Abraham dohot si Sarah tu Debata jala laho do nasida tu tano na laho lehonon ni Debata. Nang pe boi do nasida mulak muse tu Ur, alai didok rohanasida tumagon do paimahon janji ni Debata taringot tu ari na naeng ro. Bibel paboahon, ”na dumenggan do dihalungunhon nasida”. (Heb. 11:8, 13, 15, 16) Ndang olo si Musa manjalo arta di Mesir. ”Tagonan do dipilit rohana: Rap tumaon na porsuk ibana dohot bangso ni Debata, sian na maruntung satongkin, bahenon ni dosa.” (Heb. 11:24-26) Tatiru ma haporseaon ni nasida jala taargai ma hak laho mamillit, mamangke i mangulahon lomo ni roha ni Debata.

11. (a) Aha do pasupasu na mansai arga taringot hak laho mamillit? (b) Aha do na mangonjar rohamu asa denggan mamangke hak laho mamillit?

11 Ra, tabo do molo adong na manontuhon sipillitonta, alai ndang dapotta be pasupasu na arga taringot tu hakta laho mamillit molo taulahon songon i. Pasupasu aha i? Dialusi ma i di 5 Musa 30:19, 20. (Jaha.) Di ayat 19, dilehon Debata do sipilliton tu halak Israel. Di ayat 20, taboto ma na dilehon Jahowa do tingki tu nasida laho patuduhon sadia balga holong ni nasida tu Jahowa. Hita pe boi do mamillit laho manomba Jahowa manang na ndang. Dilehon Jahowa do tingki asa denggan tapangke hak laho mamillit laho pasangaphon Jahowa jala patuduhon holongta tu Ibana!

DENGGAN MA TAPANGKE HAK LAHO MAMILLIT

12. Aha do na so boi taulahon taringot hak laho mamillit?

12 Rimangi ma, molo dilehon hamu silehonlehon na arga tu donganmu. Songon dia do pangkilalaanmu molo dibolongkon i, manang dibahen laho parohon jea tu halak? Tontu hansit do rohamu. Dilehon Jahowa do silehonlehon tu hita, i ma hak laho mamillit. Hansit do rohaNa tingki diida Ibana angka halak mamangke hak laho mamillit tu ulaon na so denggan. Bibel paboahon, ”di angka tingki parpudi”, ndang diboto halak mandok mauliate. (2 Tim. 3:1, 2) Songon dia do hita patuduhon hamauliateon tu Jahowa alani  silehonlehon on? Songon dia do hita asa tongtong denggan mamangke i?

13. Aha do sada cara na mangurupi hita asa denggan mamangke hak laho mamillit?

13 Dilehon do hak tu hita laho mamillit dongan, pangkean, dohot hiburan. Alai, boi do on mambahen hita marsidalian laho mangulahon na so dihalomohon Debata manang mangihuthon portibi on. (Jaha 1 Petrus 2:16.) Alani i, asa unang tu na so denggan tapangke hak laho mamillit, denggan ma molo tapangke ”saluhutna i, pasangaphon Debata”.1 Kor. 10:31; Gal. 5:13.

14. Boasa hita ingkon marhaposan tu Jahowa tingki mamangke hak laho mamillit?

14 Jahowa mandok, ”Ahu do Jahowa Debatam, na mangajarhon tu ho bahen hatuaonmu, na manogu ho di dalan sidalananmu.” (Jes. 48:17) Asa boi hita denggan mamillit, ingkon porsea do hita tu Jahowa jala manjangkon aturanNa. Taangkui do, ”ndada guru di jolma dalanna, ndada guru di baoa pardalandalan, pahothon langkana”. (Jer. 10:23) Si Adam dohot bangso Israel ndang olo manjangkon aturan sian Debata. Marhaposan tu diri sandiri do nasida. Unang ma tatiru i. ’Marhaposan tu Jahowa ma hita sian nasa rohanta,’ unang tu diri sandiri.Poda 3:5.

MANGARGAI HAK NI HALAK NA ASING

15. Aha do na taparsiajari sian prinsip di Galatia 6:5?

15 Ingkon taargai do hak ni halak laho mamillit. Boasa? Ala dilehon do hak laho mamillit tu hita sude, ndang sai  dos na tapillit dohot dongan na asing. Umpamana taringot tu parniulaon dohot panombaonta. Taingot ma prinsip di Galatia 6:5. (Jaha.) Ala taboto martanggung jawab do ganup halak Kristen di sipillitonna, taargai ma hak ni halak laho mamillit.

Tingki tapillit sipilliton tu diri sandiri, unang ma tapaksa halak na asing mamillit na sarupa (Ida paragraf 15)

16, 17. (a) Songon dia do hak laho mamillit gabe parsoalan di Korint? (b) Songon dia do si Paulus mangurupi nasida, jala aha do parsiajaran na tadapot?

16 Tapingkirhon ma sada sitiruon sian Bibel na patuduhon boasa porlu mangargai hak ni donganta laho mamillit. Sada tingki, marsoal ma halak Kristen di Korint taringot mangallang jagal naung dipelehon tu ganaganaan, dung i digadis di pasar. Olo do pigapiga halak Kristen mangallang jagal i, ala ndang porsea nasida tu ganaganaan. Halak na manomba ganaganaan hian alai naung gabe Kristen, ndang olo mangallang i, ala didok nasida dos do i songon na manomba ganaganaan. (1 Kor. 8:4, 7) On ma na mambahen huria ndang marsada. Songon dia do si Paulus mangurupi nasida pasaehon i?

17 Parjolo, dipaingot si Paulus do nasida, ndang boi sipanganon patoguhon paralealeon tu Debata. (1 Kor. 8:8) Dipaingot muse, ndang boi nasida mambahen gabe ganggu halak na gale panggora ni rohana. (1 Kor. 8:9) Didok ibana tu halak na gale panggora ni rohana, asa unang manguhumi halak Kristen na mangallang jagal i. (1 Kor. 10:25, 29, 30) Alani i, sude halak Kristen ingkon manontuhon sandiri tingki laho mamillit ulaon na mangkorhon tu panombaon. Olo do hita mangargai hak ni dongan sahaporseaonta laho mamillit?1 Kor. 10:32, 33.

18. Songon dia do hamu patuduhon molo hamu denggan mamangke hak laho mamillit?

18 Dilehon Jahowa do tu hita hak laho mamillit, na mambahen hita marlas ni roha. (2 Kor. 3:17) Denggan ma tapangke silehonlehon on, ala on mangurupi hita mamillit sipilliton na patuduhon holong ni rohanta tu Jahowa. Alani i, tongtong ma hita mambahen sipilliton na pasangaphon Jahowa, jala taargai ma hak ni halak laho mamillit.