Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

Boasa Ringkot Patuduhon Unduk ni Roha

Boasa Ringkot Patuduhon Unduk ni Roha

”Jumpang do hapistaran di halak na serep marroha.”PODA 11:2.

ENDE: 38, 11

1, 2. Boasa ndang dijangkon Jahowa be si Saul gabe raja? (Ida gombar di mula ni parsiajaran.)

TINGKI dipillit Jahowa si Saul gabe raja, unduk do si Saul. (1 Sam. 9:1, 2, 21; 10:20-24) Alai, dung gabe raja, ginjang ma rohana. Sada tingki, ro ma halak Palistim mamorangi halak Israel. Nunga didok si Samuel tu si Saul asa dipaima harorona laho mambahen pelean tu Jahowa. Alai, andorang so sahat si Samuel, mabiar ma halak Israel jala ditadingkon ma si Saul. Ndang sabar si Saul paimahon si Samuel. Ibana sandiri ma na mambahen pelean i. Sasintongna, malim do na marhak mangulahon i, ndang boi si Saul. Ndang lomo roha ni Jahowa mangida i.1 Sam. 13:5-9.

2 Dung sahat, didok si Samuel ma ndang dioloi si Saul be Jahowa. Alai, didok roha ni si Saul, ndang sala ibana. Marsidalian do ibana jala halak na asing do disalahon. (1 Sam. 13:10-14) Dung i, lam jotjot ma si Saul marginjang ni roha. Ujungna, ndang dijangkon  Jahowa be ibana gabe raja. (1 Sam. 15:22, 23) Mulana denggan do parngoluonna, alai ngeri do parmatena.1 Sam. 31:1-6.

3. (a) Aha do na didok angka halak taringot unduk marroha? (b) Sungkunsungkun aha do na laho taalusi?

3 Godang halak marpingkir, ala nunga mamora ndang boi nasida marunduk ni roha. Ginjang ma rohanasida, asa songon na dumenggan sian na asing. Umpamana, sahalak artis dohot parpolitik mandok, ”Ndang boi unduk rohangku, jala ndang olo ahu mangulahon i.” Boasa ringkot halak Kristen patuduhon unduk ni roha? Aha do lapatan ni unduk ni roha, jala aha do na so domu tusi? Tadapot ma alusna di artikel on. Artikel na mangihut mangulas songon dia asa tongtong unduk nang pe maol.

BOASA RINGKOT MARUNDUK NI ROHA?

4. Aha do lapatan ni ginjang ni roha?

4 Bibel paboahon, maralo do ginjang ni roha tu unduk ni roha. (Jaha Poda 11:2.) Dipangido si Daud tu Jahowa, ”Palua ma huhut naposom sian angka haginjangon ni roha.” (Ps. 19:14) Aha do lapatan ni ginjang ni roha? Lapatanna, mangulahon ulaon na so ulaonta. Ra, taulahon i ala ndang sabar hita manang ginjang rohanta. Ala mardosa, olo do hita marginjang ni roha. Taingot ma Raja Saul, molo gabe hasomalan on di hita, ndang lomo roha ni Jahowa. Psalmen 119:21, Bibel siganup ari mandok, ”Dimuruhi [Jahowa] do angka siginjang roha.” Boasa songon i?

Molo unduk hita, na patuduhon pangargaion do i tu Jahowa

5. Boasa ginjang ni roha i sada hasalaan na balga?

5 Na parjolo, molo ginjang rohanta, on patuduhon na so unduk hita tu Jahowa, Silehon Uhum tu hita. Na paduahon, molo taulahon ulaon na so ulaonta, boi do on gabe parsalisian tu na asing. (Poda 13:10) Na patoluhon, maila do hita molo diboto halak na ginjang rohanta. (Luk. 14:8, 9) Tangkas ma, nunga taboto boasa lomo roha ni Jahowa asa unduk rohanta.

AHA DO NA DIDOK UNDUK MARROHA?

6, 7. Aha do partalian ni unduk ni roha tu serep ni roha?

6 Adong do partalian ni unduk ni roha tu serep ni roha. Halak Kristen na serep marroha, ndang didok rohana dumenggan ibana sian halak na asing. (Plp. 2:3) Halak na serep marroha patuduhon unduk ni roha. Diboto do adong hahuranganna, jala diangkui do hasalaanna. Ditangihon do pandapot ni halak jala marsiajar sian i. Las do roha ni Jahowa mangida halak na serep marroha.

7 Bibel paboahon, ditanda halak na unduk do ise dirina jala diboto do adong ulaon na so boi ulahononna. On mangurupi ibana mangargai jala burju tu na asing.

8. Asa tongtong unduk, pamingkirion na songon dia na ingkon tapasiding?

 8 Sipata di na so pamotoanta, olo do gabe ginjang rohanta. Songon dia on boi masa? Ra, didok rohanta rumingkot do hita sian na asing ala adong hak na sumurung di hita manang ala alealenta mandapot hak na sumurung di huria. (Rom 12:16) Manang, olo do ra holan dirinta na tapingkirhon. (1 Tim. 2:9, 10) Alani i, olo do ra gabe lomolomonta mangatur halak.1 Kor. 4:6.

9. Boasa pigapiga halak gabe marginjang ni roha? Paboa ma tudosan sian Bibel.

9 Molo ndang tapasiding giotgiot na sala, olo do gabe ginjang rohanta. Godang do na marginjang ni roha ala mangalului hasangapon, sogo rohana tu na asing, manang ndang boi mangorom murukna. On ma na masa tu pigapiga halak na disurat di Bibel, songon si Absalom, si Usia, dohot si Nebukadnesar. Tangkas didok Jahowa, ingkon marserep ni roha do nasida.2 Sam. 15:1-6; 18:9-17; 2 Kron. 26:16-21; Dan. 5:18-21.

10. Boasa ndang boi tauhumi halak na asing? Paboa ma tudosan sian Bibel.

10 Adong do muse na mambahen boasa sasahalak ndang unduk. Pingkirhon ma taringot si Abimelek dohot si Petrus. (1 Mus. 20:2-7; Mat. 26:31-35) Na ginjang do roha ni angka baoa on? Na so diboto nasida do aha na masa jala ndang dipingkirhon i andorang so mangulahon ulaonna? Ala ndang siboto roha hita, unang ma tauhumi angka donganta na asing.Jaha Jakobus 4:12.

TANGGUNG JAWABMUNA DI ORGANISASI NI DEBATA

11. Aha do na porlu taantusi?

11 Diantusi halak na unduk do tanggung jawabna di organisasi ni Debata. Jahowa, Debata na taratur. Nunga dilehon Ibana angka tanggung jawab tu ganup halak di huria. Sude do hita dihaporluhon. Dilehon Jahowa do haboion dohot bakat tu hita, jala boi do tontuhononta songon dia hita mamangke i. Molo unduk hita, tapangke ma haboion on laho mangulahon parentaNa. (Rom 12:4-8) Taboto, lomo do roha ni Jahowa asa tapangke i laho pasangaphon Ibana jala mangurupi na asing.Jaha 1 Petrus 4:10.

Aha do na taparsiajari sian Jesus tingki muba tanggung jawabta? (Ida paragraf 12-14)

12, 13. Aha do na ingkon taingot molo muba tanggung jawabta di organisasi ni Jahowa?

12 Sipata, olo do muba tanggung jawabta. Pingkirhon ma na masa tu Jesus. Parjolo, holan ibana dohot Jahowa do na adong. (Poda 8:22) Diurupi do Jahowa manompa surusuruan, tano on, dohot jolma. (Kol. 1:16) Ro ma Jesus tu tano on, tubu gabe posoposo jala lam magodang. (Plp. 2:7) Dung mate, dipahehe ma Jesus tu surgo, dung i gabe Raja di Harajaon ni Debata taon 1914. (Heb. 2:9) Di ari na naeng ro, dung mamarenta saleleng saribu taon, lehononna ma Harajaon i tu Jahowa, asa ”Debata gabe saluhut di bagasan saluhut”.1 Kor. 15:28.

13 Hita pe, olo do adong angka na muba di ngolunta. Olo do muba tanggung jawabta alani na tapillit. Umpamana, tapillit laho marhasohotan, marianakhon, manang mambahen  hamubaon asa lam godang tingkinta marhobas tu Jahowa. Sipata, olo do muba tanggung jawabta alani situasi. Ra, gabe boi hita mangulahon godang ulaon, manang ndang boi mangulahon i. Alai, na poso manang na matua, sehat manang na ndang, diboto Jahowa do songon dia hita mangalehon na dumenggan tu Ibana. Ndang dihirim rohaNa asa taulahon na so tolap gogonta. Las do rohaNa molo taulahon na ringkot di Ibana.Heb. 6:10.

14. Songon dia do pamingkirion na unduk mangurupi hita marlas ni roha di sude situasi?

14 Marlas ni roha do Jesus alani tanggung jawab na nilehon ni Jahowa, jala hita pe boi songon i. (Poda 8:30, 31) Dihasabamhon halak na unduk do tanggung jawabna di huria. Ndang sai dipingkiri na boi diulahon halak. Las rohana mangulahon na boi ulahononna di organisasi ni Debata. Didok rohana, silehonlehon sian Jahowa do i. Diargai halak na unduk do na asing jala las rohana mangurupi. Diboto ibana, Jahowa pe mangalehon tanggung jawab tu nasida.Rom 12:10.

PANGANTUSION NA SINTONG TARINGOT UNDUK MARROHA

15. Aha do na taparsiajari sian si Gidion?

15 Si Gidion ma sitiruon na dumenggan taringot unduk marroha. Tingki diparentahon Jahowa ibana paluahon halak Israel sian halak Midian, si Gidion mandok, ”Hami na saompu do na ummetmet di marga Manasse, jala ahu do apala siampudan pinompar ni damang.” (Pangh. 6:15) Porsea do si Gidion tu Jahowa, jala didalanhon  do tanggung jawab i. Dipingkiri do aha na dipangido Jahowa sian ibana, jala dipangido ibana pangurupion ni Jahowa. (Pangh. 6:36-40) Barani jala gogo do si Gidion, alai marbisuk do ibana jala manat. (Pangh. 6:11, 27) Tingki disuru bangso i ibana mamarenta, ndang olo ibana. Dung diulahon na pinangido ni Jahowa, mulak ma ibana tu jabuna.Pangh. 8:22, 23, 29.

16, 17. Songon dia do halak na unduk marroha mambahen hamajuon?

16 Molo dijalo sasahalak tanggung jawab na baru, manang lomo rohana mangulahon godang ulaon di huria, on ndang patuduhon na so unduk ibana. Bibel mandok, denggan do molo talehon godang tingki mangurupi dongan sahaporseaonta jala mambahen hamajuon. (1 Tim. 4:13-15) Ingkon manjalo tanggung jawab na baru do hita asa marhamajuon? Ndang. Hita sude boi do lam denggan marparange, jala mamangke haboion na dilehon Jahowa asa lam denggan manomba Ibana dohot mangurupi na asing.

17 Andorang so manjalo tanggung jawab, ingkon dipingkirhon na unduk marroha do aha na dihaporluhon sian dirina. Ditangiangkon jala manat dipingkirhon, na boi do i diulahon manang na ndang. Adong dope tingki dohot gogona laho mangulahon ulaon na asing na rumingkot? Molo ndang adong, adong do na boi manggantihon ibana mangulahon i? Dung dipingkirhon, halak na unduk marroha diboto ma manontuhon, boi manang na ndang ibana mangulahon tanggung jawab na baru. Molo unduk hita, porlu do hita mandok ndang boi.

18. (a) Tingki manjalo tanggung jawab na baru, aha do na diulahon halak na unduk marroha? (b) Songon dia do Rom 12:3 mangurupi hita asa unduk marroha?

18 Lomo do roha ni Jahowa asa ”marpangalaho haserepon” hita maradophon Ibana. (Mik. 6:8) Songon si Gidion, tingki dilehon tu hita tanggung jawab na baru, tapangido ma pangurupion ni Jahowa. Manat ma tapingkirhon aha na dipaboa Jahowa marhite Bibel dohot organisasiNa. Taingot ma, aha pe na taulahon di organisasiNa, on ndang alani gogonta alai ala serep do roha ni Jahowa jala lomo rohaNa mangurupi hita. (Ps. 18:36) Halak na unduk roha ndang olo umsangap sian na sasintongna.—Jaha Rom 12:3.

19. Boasa hita ingkon unduk marroha?

19 Diboto na unduk marroha, holan Jahowa do na tama manjalo hasangapon, ala Ibana Sitompa hita jala Natumimbul. (Pgk. 4:11) Molo unduk hita, las ma rohanta mangulahon na boi taulahon di organisasi ni Jahowa. Gabe taargai ma pangkilalaan dohot pandapot ni dongan sahaporseaonta. Ujungna, marsada ma hita. Halak na unduk marroha, dipingkirhon do pangkorhon ni ulaonna andorang so diulahon. Gabe boi ma dipasiding ibana angka na sala. Las situtu do roha ni Jahowa mangida halak na unduk marroha. Alani i, ringkot do naposo ni Debata patuduhon unduk ni roha. Di artikel na mangihut, taida ma songon dia hita boi tongtong unduk marroha nang pe maol.