”Bongot dosa i tu portibi on marhite sian sada halak [si Adam] jala marhitehite dosa i ro hamatean.”​—Rom 5:12

Aha do alusmu molo adong na manungkun tu hamu, ”Olo do hamu mangolu salelengna?” Torop halak mandok olo do nasida, alai ndang na tarpatupa i. Songon na didok ni nasida, ingkon mate do jolma na mangolu.

Aha muse do alusmu molo adong na manungkun tu hamu, ”Lomo do roham mate?” Tontu, ndang lomo rohanta mate. Aha do na pinatudu ni on? On patuduhon nang pe marsitaonon, lomo do rohanta mangolu. Songon na dipaboa di Bibel, lomo do rohanta tongtong mangolu, alana nunga disuanhon Debata hian taringot i di roha ni jolma tingki ditompa. Dipatorang do di Bibel, ”ditompahon do huhut roha hangoluan salelenglelengna tu bagasan rohanasida”.—Parjamita 3:11.

Alai, ndang adong jolma na mangolu salelengna. Antong, aha do parsoalanna? Boi do Debata padengganhon parsoalan on? Alus ni Bibel paposhon rohanta. Alus ni sungkunsungkun on domu tu hatorangan boasa Jesus ingkon marsitaonon jala mate.

AHA DO PARSOALANNA?

Bindu na parjolo sahat tu bindu na patoluhon di buku 1 Musa, patorangkon molo Debata manompa si Adam dohot si Hawa asa boi mangolu salelengna. Jala dipaboa do songon dia nasida asa boi tongtong mangolu. Dipatorang do muse nasida ndang mangoloi Debata, ujungna ndang boi be mangolu salelengna. Ndang pola ganjang dipatorang taringot on. Alani i, pigapiga halak mandok, on holan turiturian. Alai, buku 1 Musa, songon Buku Injil, tangkas jala tingkos do patorangkon taringot on. *

Ala ndang mangoloi si Adam, aha do pangkorhonna tu hita? Bibel patorangkon, ”Bongot dosa i tu portibi on marhite sian sada halak [si Adam] jala marhitehite dosa i ro hamatean, songon i sahat hamatean i tu saluhut jolma, ala sude nasida mardosa.” (Rom 5:12) Ala ndang mangoloi Debata, gabe mardosa ma si Adam. Ndang dapotna be hangoluan salelengna, jala mate ma ibana. Ala pinompar ni si Adam do hita, adong  ma dosa teanteanan di hita. Gabe marsahit ma hita, matua, jala mate. Hatorangan taringot on dos tu pangantusion ilmu pengetahuan na patorangkon, parange ni natuatua turun tu ianakhonna. Alai, adong do na diulahon Debata laho padengganhon on?

NA DIULAHON DEBATA

Dibahen Debata do isara asa mangolu hita salelengna. Songon dia do Debata paradehon i?

Rom 6:23 paboahon, ”Upa tinuhor ni dosa do hamatean.” Lapatanna, dosa parohon hamatean. Si Adam mate ala mardosa. Songon si Adam, nunga mardosa hita, alani i tajalo ma upa tinuhor ni dosa, i ma hamatean. Alai, ndang sala di hita on. Alana, sian mulai tubu nunga mardosa hita. Alani holongNa, dilehon Debata ma AnakNa, i ma Jesus, laho pasohon pangkorhon ni dosa. Songon dia do on boi masa?

Hamatean ni Jesus mamungka dalan tu hangoluan salelengna

Si Adam, jolma na so mardosa. Ala ndang mangoloi Debata, gabe mardosa jala mate ma ibana. Alani i, porlu ma adong halak na so mardosa na boi paluahon hita sian pangkorhon ni dosa. Bibel patorangkon, ”Marhite sian hatoison ni sada jolma gabe torop tardapot mardosa, songon i ma marhite sian pangoloion ni na Sada i gabe torop dipintori.” (Rom 5:19) Jesus do ”na Sada i”. Ditadingkon ibana do surgo, gabe jolma na so mardosa *, jala mate humongkop hita. Gabe boi ma hita maraleale tu Debata jala mangolu salelengna.

BOASA JESUS MARSITAONON JALA MATE?

Boasa ingkon mate Jesus laho pasaehon parsoalan on? Na so adong do huaso ni Debata mambahen pinompar ni si Adam mangolu salelengna? Boi do tarpatupa Debata i. Alai, nunga dibahen Ibana uhum, upa tinuhor ni dosa do hamatean. Ndang boi be diganti uhum i. On ma ojahan ni hatigoran.—Psalmen 37:28.

Molo ndang diihuthon Debata hatigoranNa, ra sungkunsungkun do roha ni halak taringot ulaon ni Debata di situasi na asing. Umpamana, dipatudu Debata do hatigoran tingki manontuhon ise pinompar  ni si Adam na mandapot hangoluan salelengna? Boi do Ibana manggohi sude janjiNa? Ala dipatudu Debata do hatigoran laho paluahon hita, pos ma rohanta, sintong do sude ulaon ni Debata.

Marhite tobusan ni Jesus, dibahen Debata ma dalan tu hita asa mandapot hangoluan salelengna di Paradeiso di tano on. Parrohahon ma hata ni Jesus na disurat di Johannes 3:16, ”Songon on do holong ni roha ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan na salelenglelengna di ibana.” Hamatean ni Jesus ndang holan patuduhon hatigoran ni Debata, alai patuduhon holongNa na mansai balga tu jolma.

Alai, boasa Jesus ingkon marsitaonon jala mate songon na disurat di Buku Injil? Molo tongtong Jesus marsihohot nang pe marsitaonon, Jesus patuduhon sala do hata ni Sibolis na mandokkon ndang adong jolma na marsihohot tu Debata molo marsitaonon. (Job 2:4, 5) Songon na toho do hata ni Sibolis i tingki dibahen ibana si Adam na so mardosa hian, madabu tu dosa. Alai Jesus, jolma na so mardosa, tongtong marsihohot nang pe marsitaonon. (1 Korint 15:45) On patuduhon, boi do si Adam mangoloi Debata molo olo ibana mangulahon i. Ala tongtong marsihohot nang pe marsitaonon, dilehon Jesus ma sitiruon tu hita. (1 Petrus 2:21) Dipasupasu Debata ma Jesus, jala dilehon hangoluan na manongtong di surgo.

LABANA TU HITA

Tutu do masa hamatean ni Jesus. On ma na mambahen hita boi mangolu salelengna. Olo do hamu mangolu salelengna? Jesus paboahon aha na porlu taulahon asa mandapot i. Ibana mandok, ”Alai na mananda Ho, Debata na sasada i, na sintong i, dohot Jesus Kristus na sinurum, i do hangoluan na salelenglelengna.”—Johannes 17:3.

Las do roha ni na pabinsarhon majalah on manogihon hamu marsiajar taringot Jahowa, Debata na sintong, dohot taringot AnakNa, Jesus Kristus. Las do roha ni Sitindangi Ni Jahowa na adong di luatmu laho mangurupi hamu. Boi do muse idaonmu gumodang hatorangan di situs Webnami, www.jw.org/bbc.

^ par. 8 Ida ma ”Kejadian sebagai Buku Sejarah” di Pemahaman Alkitab,” halaman 1203, na dipabinsar ni Sitindangi Ni Jahowa. Boi do hamu manjaha buku on di www.jw.org/id di bagian PUBLIKASI › PERPUSTAKAAN ONLINE.

^ par. 13 Marhite tanda halongangan, dipapinda Debata ma hangoluan ni AnakNa sian surgo tu bortian ni si Maria. Jala diondingi tondi parbadia do Jesus asa unang mardosa songon si Maria.—Lukas 1:31, 35.