Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PARSIAJARAN 9

Holong dohot Hatigoran ni Jahowa tu Halak Israel Najolo

Holong dohot Hatigoran ni Jahowa tu Halak Israel Najolo

“Ibana mangkaholongi hatigoran dohot uhum, gok asi ni roha ni Jahowa do tano on.”​—PS. 33:5.

ENDE 3 Hagogoonta, Pangkirimonta, Haporusanta

NA LAHO DIULAS *

1-2. (a) Aha do na dihalomohon sude halak? (b) Songon dia do roha ni Jahowa tu hita?

LOMO do rohanta sude asa dihaholongi jala dibahen na tigor. Alai, molo jotjot dibahen na so denggan tu hita, olo do ra gabe tahilala ndang mararga dirinta jala gabe mandele.

2 Diboto Jahowa do na lomo rohanta dihaholongi jala dibahen na tigor tu hita. (Ps. 33:5) Taboto, ndang lomo roha ni Jahowa molo adong na mambahen na so tigor tu hita, alana holong do rohana tu hita. Boi do i taboto sian Patik na dilehon Jahowa tu bangso Israel marhite si Musa. Molo dihilala rohamuna ndang dihaholongi hamu manang adong na mambahen na so tigor tu hamu, rimangi ma Patik ni si Musa * na patuduhon na disarihon Jahowa do naposona.

3. (a) Songon na dipaboa di Rom 13:8-10, aha do na boi taparsiajari sian Patik ni si Musa? (b) Sungkun-sungkun aha do na laho taulas?

3 Molo taparsiajari Patik ni si Musa, gabe taboto ma songon dia holong ni roha ni Jahowa tu hita. (Jaha Rom 13:8-10.) Di parsiajaran on, laho taulas ma piga-piga patik na dilehon Jahowa tu halak Israel. Jala dapotta ma alus ni sungkun-sungkun na mangihut: Boasa boi tadok Patik ni si Musa dibahen marhite holong? Boasa boi tadok Patik i manjujui angka halak asa mangulahon na tigor? Songon dia angka halak na dilehon tanggung jawab mangulahon Patik i? Jala ise do na tarlumobi dilinggomi Patik i? Alus ni sungkun-sungkun on boi  mangapuli rohanta, mangalehon pangkirimon, jala mambahen hita gabe lam solhot tu Jahowa.​—Ul. 17:27; Rom 15:4.

PATIK DIBAHEN MARHITE HOLONG

4. (a) Boasa boi tadok Patik ni si Musa dibahen marhite holong? (b) Aha do parenta ni Jesus na disurat di Mateus 22:36-40?

4 Patik ni si Musa dibahen marhite holong. Alana, holong do na mangonjar roha ni Jahowa mambahen Patik i. (1 Joh. 4:8) Jala ojahan ni sude Patik i, i ma holong tu Debata dohot holong tu jolma. (3 Mus. 19:18; 5 Mus. 6:5; jaha Mateus 22:36-40.) Sian 600 Patik na dibahen i, boi ma taparsiajari taringot holong ni Jahowa. Saonari taulas ma piga-piga contohna.

5-6. Aha do na diparentahon Jahowa tu na mardongan saripe? Jala aha do na diparrohahon Jahowa? Paboa ma sada contoh.

5 Tongtong ma setia tu dongan saripemuna, jala sarihon ma ianakhonmuna. Lomo roha ni Jahowa angka na mardongan saripe asa tongtong marsihaholongan saleleng ngolu ni nasida. (1 Mus. 2:24; Mat. 19:3-6) Na so mangkaholongi dongan saripena do molo mangalangkup sasahalak. I do alana di patik na papituhon sian Sampulu Patik i, didok do asa unang mangalangkup. (5 Mus. 5:17b) Molo mangalangkup sasahalak boi ma tadok, jahat do ibana tu dongan saripena. Jala nunga ‘mardosa maradophon Debata’ ibana. (1 Mus. 39:7-9) Boi do hansit roha ni dongan saripe na so marsala i saleleng martaon-taon.

6 Diparrohahon Jahowa do songon dia na mardongan saripe maradophon dongan saripena. Di tingki ni halak Israel, dipangido Jahowa angka suami asa burju tu istrina. Sahalak suami na mangulahon Patik ni si Musa, tontu dihaholongi do istrina jala ndang olo ibana manirangkon holan alani parsoalan na sepele. (5 Mus. 24:1-4; Mat. 19:3, 8) Alai molo adong parsoalan na serius, jala naeng disirangkon istrina, ingkon dilehon do surat sirang tu istrina i. Asa unang didok halak istrina i mangulahon na rorang. Alai andorang so dilehon surat sirang, ingkon jolo mangkatai do ibana tu angka sintua. Alana, disi ma tingkina angka sintua boi mangurupi nasida asa unang marsirang. Tingki adong halak Israel na manirangkon istrina holan alani parsoalan na sepele, ndang sai pintor diurupi Jahowa i. Alai diboto Jahowa do sadia hansit pangkilalaan ni istrina i.​—Mal. 2:13-16.

Lomo roha ni Jahowa asa dijaga, dihaholongi jala diajari angka natua-tua ianakhonna (Ida paragraf 7-8) *

7-8. (a) Aha do parenta ni Jahowa tu angka natua-tua? (Ida gambar sampul.) (b) Aha do na boi taparsiajari?

7 Sian Patik ni si Musa, taboto ma na disarihon Jahowa do angka ianakhon. Alana, tanggung jawab ni natua-tua ndang holan manarihon na dihaporluhon ianakhonna, alai ingkon diurupi do ianakhonna asa marale-ale tu Debata. Alani i, diparentahon Jahowa do natua-tua asa mangajari ianakhonna mangargai Patik i jala mangkaholongi Jahowa. (5 Mus. 6:6-9; 7:13) Alasan na asing boasa diuhum Jahowa halak Israel i ma, ala jahat do nasida tu ianakhonna. (Jer. 7:31, 33) Alana silehon-lehon sian Jahowa do angka ianakhon jala ingkon diargai angka natua-tua do i.​—Ps. 127:3.

8 Parsiajaranna: Diparrohahon Jahowa do songon dia na mardongan saripe maradophon dongan saripena. Dipangido Jahowa do asa dihaholongi angka natua-tua ianakhonna. Jala martanggung jawab do nasida laho manarihon ianakhonna.

9-11. Boasa dilehon Jahowa patik na mandok unang halomohon ampuna ni halak?

9 Unang halomohon ampuna ni halak. Di Patik na Pasampuluhon didok do unang haliangi ampuna ni halak, manang  mangkalomohon ampuna ni na asing. (5 Mus. 5:18; Rom 7:7) Diboto Jahowa do, molo pingkiran dohot pangkilalaan na sala boi mambahen sasahalak gabe mangulahon na jahat. I do alana dilehon Jahowa patik on, asa mangajari naposona manjaga roha ni nasida, i ma pingkiran dohot pangkilalaan ni nasida. (Poda 4:23) Molo sai dipingkiri na sala, boi do sasahalak gabe mangulahon na jahat tu na asing. Umpamana songon Raja Daud. Sasintongna, halak na burju do ibana. Alai sada tingki, lomo rohana tu istri ni halak. Ala sai dipingkiri i, gabe mangulahon dosa ma ibana. (Jak. 1:14, 15) Ujungna mangalangkup ma si Daud, dioto-otoi ibana ma suami ni borua i dungkon i dibunu.​—2 Sam. 11:2-4; 12:7-11.

10 Siboto roha do Jahowa. Alani i, diboto Ibana do molo adong halak Israel na so mangihuthon patikna i. (1 Kron. 28:9) Di patik i, didok do tu naposona, asa unang mangkalomohon ampuna ni halak. Alani i, ingkon dipasiding nasida do pingkiran na boi mambahen nasida mangulahon na sala. On patuduhon, mansai marbisuk do Jahowa jala dihaholongi Ibana do hita!

11 Parsiajaranna: Ndang songon jolma, boi do diida Jahowa na di bagas rohanta. (1 Sam. 16:7) Ndang adong na buni sian Ibana. Nang pe songon i, angka na denggan do na diida Ibana sian hita. Alani i, lomo do rohana asa taboto songon dia dirinta jala ingkon taorom ma dirinta asa unang mangulahon na sala.​—2 Kron. 16:9; Mat. 5:27-30.

PATIK DIBAHEN MARHITE HATIGORAN

12. Aha do na taboto sian Patik ni si Musa?

12 Sian Patik ni si Musa taboto ma na dihaholongi Jahowa do na tigor. (Ps. 37:28; Jes. 61:8) Ibana ma sitiruon na dumenggan taringot songon dia mambahen na tigor tu na asing. Molo dioloi halak Israel do patik ni Jahowa, dipasu-pasu do nasida. Alai tingki ndang dioloi nasida patikna i, gabe susa do ngolu ni nasida. Saonari taulas ma dua patik na asing sian Sampulu Patik i.

13-14. Aha do dua parenta na parjolo sian Sampulu Patik? Jala aha do laba ni Patik i tu halak Israel?

13 Ingkon holan Jahowa do na disomba. Dua parenta na parjolo sian Sampulu Patik i, i ma holan Jahowa do na ingkon disomba jala unang manomba patung. (2 Mus. 20:3-6) Sasintongna Patik i parohon laba do tu halak Israel. Molo setia nasida tu Jahowa, gabe dipasu-pasu do nasida. Alai molo disomba nasida debata na asing, boi do gabe susa ngolu ni nasida.

14 Rimangi ma taringot halak Kanaan. Ala angka patung do na disomba nasida ndang Debata na sintong, gabe susa do ngolu ni nasida. (Ps. 115:4-8) Tingki marsomba nasida tu patung i, diulahon nasida do seks na so patut jala dipelehon do ianakhonna. On ma na diulahon halak Israel tingki ndang Jahowa be na disomba nasida. Gabe susa do ngolu ni nasida dohot keluargana. (2 Kron. 28:1-4) Angka pamimpin ni halak Israel pe, gabe ndang mangulahon patik ni Jahowa jala ndang tigor be. Lomo-lomo ni nasida do tu angka halak na susa dohot tu na pogos. (Hes. 34:1-4) Alani i, dipasingot Jahowa do halak Israel. Didok Jahowa laho uhumonna do angka halak na so mambahen na denggan tu angka borua dohot dakdanak. (5 Mus. 10:17, 18; 27:19) Alai molo setia nasida tu Jahowa jala dibahen na denggan tu angka halak, dipasu-pasu Jahowa do nasida.​—1 Raj. 10:4-9.

Dihaholongi Jahowa do hita jala diboto do tingki adong halak na mambahen na so tigor tu hita (Ida paragraf 15)

15. Aha do na taparsiajari taringot Jahowa?

15 Parsiajaranna: Tingki adong halak na mangangku manomba Jahowa, hape ndang diulahon patikna jala dibahen susa tu naposona, ndang boi Jahowa na tasalahon. Alana, holong  do roha ni Jahowa tu hita. Diboto Ibana do molo adong halak na mambahen na so tigor tu hita. Lungun do rohana, lobi sian lungun ni sahalak ina na mangida molo marsahit poso-posona. (Jes. 49:15) Nang pe ndang pintor diurupi Jahowa hita tingki masa sisongon i, alai adong do tingkina haduan uhumonna halak na tongtong mambahen na so tigor tu na asing.

SONGON DIA DO PATIK I DIPANGKE?

16-18. Songon dia do Patik ni si Musa didalanhon, jala aha parsiajaranna?

16 Dibahen do sude parenta taringot na ingkon diulahon halak Israel di Patik i. Alani i, ndang boi lomo-lomo ni angka sintua di tingki i tu halak Israel. Ingkon dibahen do na tigor tu nasida. Ndang holan mangurupi halak Israel asa tongtong manomba Jahowa tanggung jawab ni nasida. Alai ingkon diurupi do halak Israel laho pasaehon parsoalan. Taulas ma angka contohna.

17 Molo adong halak Israel mambunu sasahalak, ndang boi pintor diuhum mate ibana. Andorang so diuhum, ingkon jolo disulingkiti angka sintua do boasa masa i. (5 Mus. 19:2-7, 11-13) Ingkon diurupi angka sintua do muse nasida molo adong parsoalan na masa di nasida. Mulai sian parsoalan taringot arta sahat tu parsoalan di keluarga. (2 Mus. 21:35; 5 Mus. 22:13-19) Molo diihuthon angka sintua dohot halak Israel do patik i, boi do hilalaon ni nasida sude labana. Jala on boi pasangaphon Jahowa.​—3 Mus. 20:7, 8; Jes. 48:17, 18.

18 Parsiajaranna: Ringkot do di Jahowa sude na taulahon. Lomo do rohana asa taulahon na tigor jala tahaholongi halak na asing. Diparrohahon Ibana do aha na tadok dohot na taulahon, nang pe tingki ndang adong halak na mangida.​—Heb. 4:13.

19-21. (a) Ingkon songon dia do angka sintua dohot hakim maradophon naposo ni Debata? (b) Songon dia do patik na dilehon Jahowa mangalinggomi naposona, jala aha do parsiajaranna?

19 Ndang lomo roha ni Jahowa molo naposona mangihuthon angka na so denggan sian bangso na asing. Alani i, dipangido Jahowa do asa diihuthon angka sintua dohot angka hakim Patik i. Tingki pasaehon parsoalan i, ingkon dipatudu angka sintua do holong, ndang kaku, ndang kasar jala ndang mardingkan.​—5 Mus. 1:13-17; 16:18-20.

20 Dipatudu Jahowa do asi ni rohana tu naposona. I do alana dilehon Ibana patik asa unang dibahen na so tigor tu sasahalak. Umpamana, adong do Patik na mangurupi sasahalak tingki ditudu mangulahon na jahat. Marhak do ibana mamboto ise na manudu ibana. (5 Mus. 19:16-19; 25:1) Andorang so ditudu sasahalak mangulahon na jahat, ingkon adong do pinomat dua saksi na mangalehon hatorangan taringot i. (5 Mus. 17:6; 19:15) Alai songon dia molo adong sasahalak na mangulahon na jahat alai holan sada  do saksina? Unang ma dirimpu rohana ndang laho diuhum ibana. Alana diida Jahowa do sude na diulahon ibana. Di keluarga, tu ama do dilehon tanggung jawab, alai adong do batasna. Umpamana, molo adong parsoalan na serius di keluarga i, ingkon angka sintua do na pasaehon parsoalan i.​—5 Mus. 21:18-21.

21 Parsiajaranna: Tigor do sude na diulahon Jahowa. Alani i, sitiruon na denggan do Ibana di hita. (Ps. 9:8) Dipasu-pasu Ibana do angka halak na tongtong setia mangulahon lomo ni rohana. Alai uhumonna do halak na so mandalanhon tanggung jawabna. (2 Sam. 22:21-23; Hes. 9:9, 10) Ra adong do halak na mangulahon na jahat alai ndang diuhum. Alai pos ma rohanta adong do tingkina uhumon ni Jahowa nasida. (Poda 28:13) Jala molo ndang olo nasida muba, botoon ni nasida ma na “marjea do halak na madabu tu panguhuman ni Debata na mangolu i”.​—Heb. 10:30, 31.

ISE DO NA TARLUMOBI DILINGGOMI PATIK I?

Tingki laho pasaehon parsoalan, ingkon ditiru angka sintua do holong ni roha ni Jahowa dohot hatigoranna (Ida paragraf 22) *

22-24. (a) Ise do tarlumobi na dilinggomi Patik ni si Musa, jala aha do na taparsiajari taringot Jahowa? (b) Aha do sipasingot na dipaboa di 2 Musa 22:22-24?

22 Di Patik ni si Musa, ingkon dilinggomi do halak na susa. Umpamana, halak na so marama so marina, ina na mabalu, dohot halak panompang. Didok hakim ni halak Israel do, “Unang agohon hak ni halak na ro tu hutam dohot halak na so marama so marina, jala unang buat ulos ni na mabalu bahen borok ni utangna.” (5 Mus. 24:17, Bibel siganup ari) Marasi ni roha do Jahowa tarlumobi tu angka  halak na susa. Jala uhumonna do angka halak na mambahen na so tigor tu nasida.​—Jaha 2 Musa 22:22-24.

23 Somal do angka bangso na asing na adong di humaliang ni halak Israel mangulahon seks na so patut dohot anggota keluargana sandiri. Sada ulaon hajahaton do on di Jahowa jala dihagigihon Ibana do i. I do alana di Patik ni si Musa dipaboa do tu halak Israel asa unang mangulahon sisongon i. (3 Mus. 18:6-30) Alani i, ingkon ditiru nasida do Jahowa asa mangkagigihon ulaon sisongon i.

24 Parsiajaranna: Dipangido Jahowa do asa sude angka na manguluhon naposona tongtong mangkaholongi angka naposona i. Sogo do roha ni Jahowa mangida na mangulahon seks na so patut. Jala ingkon dilinggomi do naposona tarlumobi angka halak na susa. Jala ingkon dibahen do na tigor tu nasida.

‘BAYANGAN NI ANGKA NA DENGGAN NA NAENG RO’

25-26. (a) Boasa holong dohot hatigoran dipatudos songon hosa dohot hangoluan? (b) Aha do na laho taulas di parsiajaran na mangihut?

25 Asa adong hangoluan ingkon adong do hosa hangoluan. Dos songon i ma holong dohot hatigoran. Molo pos do rohanta laho bahenon ni Jahowa na tigor tu hita, gabe lam togu do holongta tu Ibana. Jala molo holong do rohanta tu Debata dohot tu uhumna, gabe taronjar do rohanta mangkaholongi na asing jala mambahen na tigor tu nasida.

26 Patik ni si Musa mangurupi halak Israel asa lam solhot marale-ale tu Jahowa. Alai dung ro Jesus, ndang Patik ni si Musa be na diihuthon naposo ni Debata. Alana Patik ni Jesus do na dumenggan. (Rom 10:4) Didok si Paulus do Patik i songon ‘bayangan ni angka na denggan na naeng ro’. (Heb. 10:1) Di parsiajaran na mangihut, laho taulas ma piga-piga angka na denggan jala boasa ringkot patuduhon holong dohot hatigoran di huria.

ENDE 109 Mangkaholongi sian Ias ni Roha

^ par. 5 On ma parsiajaran na parjolo sian opat parsiajaran na mangulas taringot boasa pos rohanta na disarihon Jahowa do hita. Tolu parsiajaran na mangihut laho dibahen di Joujou Paboahon bulan Mei 2019. Judul ni tolu parsiajaran i, i ma “Holong dohot Hatigoran ni Jahowa di Huria Kristen,” “Holong dohot Hatigoran ni Jahowa Mangalinggomi Naposona sian Hajahaton,” dohot “Diapuli Jahowa do Halak na Hea Mangadopi Pelecehan Seksual”.

^ par. 2 HATA NA DIPATORANG: Adong do 600 lobi patik na dilehon Jahowa tu halak Israel marhite si Musa. Didok ma i, “Patik”, “Patik ni si Musa” dohot “angka parenta”. Sian buku 1 Musa sahat tu 5 Musa jotjot do i didok Patik. Alai sipata, sude buku Heber pe didok do Patik.

^ par. 60 HATORANGAN NI GAMBAR: Sahalak ina dohot boruna di tingki ni halak Israel, paradehon sipanganon huhut mangkata-hatai. Di pudina, sahalak ama mangalatik anakna marmahan.

^ par. 64 HATORANGAN NI GAMBAR: Angka sintua na jongjong di harbangan ni kota marasi ni roha tu sahalak ina na mabalu dohot anakna na dioto-otoi partiga-tiga.