“Si Noak, si Daniel dohot si Job, hosanasida sandiri do paluaon nasida, alani hatigorannasida.”​—HES. 14:14.

ENDE: 89, 119

1, 2. (a) Boasa mangarimangi sitiruon sian si Noak, si Daniel, dohot si Job boi patoguhon hita?(b) Situasi aha do masa tingki disurat si Hesekiel hata na adong di Hesekiel 14:14?

HEA do dihilala hamu marungkil di sitaonon na borat songon manaon sahit na posi, susa di parhepengon, manang dipaburuburu? Ra, i do na mambahen hamu gabe ndang marlas ni roha manomba Jahowa. Molo songon i do pangkilalaanmuna, rimangi ma sitiruon sian si Noak, si Daniel, dohot si Job. Boi do i patoguhon hamu. Taboto nasida pe jolma na mardosa do songon hita, jala sarupa do parungkilon na diadopi nasida songon na taadopi saonari. Di sada tingki hea do terancam ngolu ni nasida. Alai tongtong do nasida marsihohot tu Jahowa. Jala di adopan ni Jahowa, gabe sitiruon do nasida taringot marhaporseaon dohot unduk ni roha.​—Jaha Hesekiel 14:12-14.

2 Disurat si Hesekiel ma ayat tema on tingki di Babel  taon 612 SM. * (Hes. 1:1; 8:1) Tingki i baru dope Jerusalem ditaluhon taon 607 SM. Holan otik do halak di Jerusalem na marsihohot jala unduk songon si Noak, si Daniel, dohot si Job, jala boi do nasida martahan. (Hes. 9:1-5) Pigapiga sian nasida, i ma si Jeremia, si Baruk, si Ebedmelek, dohot pinompar ni si Rekab.

3. Aha do na laho taulas di parsiajaran on?

3 Suang songon i ma di tingkinta saonari, holan halak na tigor songon nasida do na boi martahan di portibi na jahat on. (Pgk. 7:9, 14) Saonari, taparsiajari ma boasa dipangke Jahowa nasida gabe sitiruon di hita. Taulas ma (1) angka ambatambat aha do na diadopi nasida jala (2) songon dia hita boi maniru haporseaon dohot unduk ni roha ni nasida.

TONGTONG DO SI NOAK MARSIHOHOT JALA UNDUK SALELENG 900 TAON!

4, 5. Angka aha do ambatambat na diadopi si Noak, alai aha do na boi taida sian ibana?

4 Angka ambatambat aha do na diadopi si Noak? Sian tingki ni si Henok, nunga mansai jahat angka halak. Dihatahon nasida do ‘hata na tois’ taringot Jahowa. (Jud. 14, 15) Lam leleng lam jahat ma portibi on. Di tingki ni si Noak, “nunga gok hajahaton”. Ro do surusuruan na jahat tu tano on, dipauba dirina gabe jolma, jala dibuat ma angka borua na dihalomohon nasida. Ujungna gabe tubu ma angka ianakhonnasida na garang jala jahat. (1 Mus. 6:2-4, 11, 12) Alai boi do diida halak, imbar do si Noak sian halak na asing. Didok do di Bibel, na “asi do roha ni Jahowa ianggo marnida si Noak”. Tigor do ulaon ni si Noak, ndang songon halak na di humaliangna. “Marparange mardonganhon Debata do si Noak i.”​—1 Mus. 6:8, 9.

5 Sian angka ayat i, aha do na taboto sian si Noak? Na parjolo, pingkirhon ma sadia leleng ibana manomba Jahowa andorang so ro Aek na Sumar. Ndang holan 70 manang 80 taon, alai ra saleleng 600 taon! (1 Mus. 7:11) Na paduahon, ingot ma ndang adong dope huria na boi patoguhon ibana songon di tingkinta saonari. Jala ndang adong hahaanggina na mangurupi ibana. *

6. Songon dia do si Noak patuduhon habaranionna?

6 Diboto si Noak do, ndang sae holan gabe halak na burju. Alai, barani do ibana paboahon haporseaonna tu angka halak. Didok Bibel do ibana, “Parjamita hatigoran.” (2 Ptr. 2:5) Jala didok si Paulus do, “ala ni haporseaon i diuhum ibana do portibi on”. (Heb. 11:7, Bibel Siganup ari) Direhei jala diambati angka halak do ibana. Ra, marsangkap do angka halak laho pamatehon ibana. Alai, ndang mabiar ibana. (Poda 29:25) Gariada pos do rohana. Alani i, dilehon Jahowa ma habaranion tu ibana. Jadi, lehonon ni Debata do gogo tu  angka halak na marsihohot di tingkinta saonari.

7. Ambatambat aha do na diadopi si Noak tingki paulihon parau?

7 Tongtong do si Noak marsihohot tu Jahowa saleleng lobi sian 500 taon dungkon disuru ibana paulihon parau. I ma na laho dipangke paluahon pigapiga halak dohot binatang sian Aek na Sumar. (1 Mus. 5:32; 6:14) Tontu ndang mura mangulahon on. Diboto si Noak, boi do gabe direhei jala digugai angka halak ibana. Alai tongtong do ibana porsea jala unduk tu Jahowa. “Songon na tinonahon ni Debata tu ibana, songon i dibahen.”​—1 Mus. 6:22.

8. Songon dia si Noak marpos ni roha tu Jahowa taringot mangalului mangan ganup ari?

8 Ndang holan i na diadopi si Noak. Ingkon disarihon ibana do keluargana. Andorang so masa Aek na Sumar, ingkon marsitutu do halak karejo asa boi mangan ganup ari, tarmasuk ma si Noak. (1 Mus. 5:28, 29) Alai, ndang i na rumingkot di ibana. Dijumolohon ibana do laho manomba Jahowa. Nang pe ingkon mambahen parau saleleng 40 manang 50 taon, tongtong do ibana manjaga paralealeonna tu Jahowa. Dung salpu pe Aek na Sumar, tongtong do ibana manomba Jahowa saleleng 350 taon sahat tu na marujung ngolu ibana. (1 Mus. 9:28) Haporseaon dohot unduk ni rohana i gabe sitiruon na denggan do tu hita!

9, 10. (a) Songon dia hita boi maniru haporseaon dohot unduk ni roha ni si Noak? (b) Molo tongtong hita mangihuthon uhum ni Debata, aha do na paposhon rohanta?

9 Songon dia hita boi maniru haporseaon dohot unduk ni roha ni si Noak? Tongtong ma taihuthon uhum ni Debata. Unang ma taihuthon Sibolis dohot angka halak di portibi on. (Mat. 6:33; Joh. 15:19) Tontu ala marimbar, gabe dihasogohon angka halak do hita. Umpamana, ala taihuthon do uhum ni Debata taringot seks dohot parsaripeon, gabe dipandokhoni nasida ma angka na so denggan taringot hita. (Jaha Maleaki 3:17, 18.) Songon si Noak, unang ma biar hita tu jolma. Holan Jahowa do na ingkon tahabiari. Ingkon tapasangap ma Ibana, jala unang ma taulahon na dihasogohon Ibana. Taingot ma, holan Ibana do na boi mangalehon ngolu salelengna tu hita.​—Luk. 12:4, 5.

10 Rimangi ma, ‘Tongtong do huulahon na dihalomohon Debata, nang pe direhei manang diorai halak ahu? Pos do rohangku tu Jahowa, na sai disarihon Jahowa do hami nang pe maol mansari ngolungolu?’ Molo porsea jala unduk tu Jahowa hita songon na diulahon si Noak, pos ma rohanta disarihon Jahowa do hita.​—Plp. 4:6, 7.

SI DANIEL TONGTONG MARSIHOHOT JALA UNDUK NANG PE GODANG PARJAHAT DI HUMALIANGNA

11. Aha do ambatambat na diadopi si Daniel dohot tolu donganna? (Ida gombar di mula ni parsiajaran.)

11 Angka ambatambat aha do na diadopi si Daniel? Tading di Babel do si Daniel. Di kota i, gok ganaganaan dohot ulaon hadatuon. Jala angka halak disi, ndang marlomo ni roha mangida  halak Jahudi. Sai direhei nasida do halak Jahudi dohot Debata Jahowa. (Ps. 137:1, 3) Tontu gabe sitaonon na borat do on tu si Daniel dohot halak Jahudi na asing! Asing ni i, godang do halak na mananda si Daniel dohot tolu donganna, i ma si Hanania, si Misael, dohot si Azaria. Alana, dohot do nasida dilatik asa karejo tu raja Babel. Dipangido do nasida asa mangallang sipanganon ni raja. Hape ndang lomo roha ni Jahowa molo naposoNa mangallang angka sipanganon i. Alai, marsangkap do si Daniel “asa unang ramunanna dirina, marhite sian sipanganon ni rajai”.​—Dan. 1:5-8, 14-17.

12. (a) Songon dia do parange si Daniel? (b) Songon dia do Jahowa mangida si Daniel?

12 Adong do muse ambatambat na asing na diadopi si Daniel. Ala malo si Daniel, dilehon raja ma pangkat na timbo tu ibana. (Dan. 1:19, 20) Alai, ndang na gabe ginjang rohana. Didok ibana do molo sude pasupasu na didapot na i, marharoroan sian Jahowa do. (Dan. 2:30) Ingot ma, dipatudos do si Daniel tu si Noak dohot si Job na gabe sitiruon na denggan. Hape poso dope ibana tingki i. Alai, pos do roha ni Jahowa tu ibana! Jala, tutu do ibana marsihohot jala unduk saleleng ngoluna. Tingki naeng marumur 100 taon si Daniel, didok surusuruan ni Debata ma tu ibana, ”Ale Daniel, baoa hasudungan ni roha!”​—Dan. 10:11.

13. Boasa diurupi Jahowa si Daniel laho mandapot pangkat na timbo?

13 Alani pangurupion ni Jahowa do, si Daniel boi mandapot pangkat na timbo, di tingki pamarentaon Babel dohot Madai Persia. (Dan. 1:21; 6:2, 3) Ra, dibahen Jahowa ibana mandapot pangkat na timbo asa boi mangurupi naposoNa, songon tingki si Josep di Misir, si Ester dohot si Mordahai di Persia. * (Dan. 2:48) Tontu gabe dipatogu do si Hesekiel dohot halak Jahudi na asing, ala dipangke Jahowa do si Daniel laho mangurupi nasida!

Mararga do hita di Jahowa molo tongtong hita marsihohot tu Ibana. (Ida ma paragraf 14, 15)

14, 15. (a) Songon dia situasinta dos songon na diadopi si Daniel? (b) Aha do na boi ditiru angka natuatua sian natuatua ni si Daniel?

 14 Songon dia hita boi maniru haporseaon dohot unduk ni roha ni si Daniel? Godang do na mangulahon angka na rorang, dohot agama na so sintong di portibi on. Diihuthon halak do Babel na Balga, i ma punguan agama na so sintong. Didok Bibel do i ”inganan ni angka sibolis”. (Pgk. 18:2) Na manompang do hita di portibi saonari on. Alani i, diida halak do imbar hita sian nasida. Gabe direhei ma hita. (Mrk. 13:13) Alai songon si Daniel, tapajonok ma dirinta tu Jahowa. Molo serep rohanta, porsea, jala unduk tu Ibana, hita pe gabe mararga do di adopanNa.​—Hag. 2:7.

15 Boi do angka natuatua marsiajar sian natuatua ni si Daniel. Tading di Juda do si Daniel tingki dakdanak, jala godang do angka na jahat di humaliangna. Alai, boi do ibana gabe mangkaholongi Jahowa. Alana sian na metmet diajari natuatuana do ibana taringot Jahowa. (Poda 22:6) Goar ni si Daniel lapatanna, “Jahowa do Panguhumi di ahu”. On patuduhon molo natuatuana mangkaholongi Jahowa. (Dan. 1:6) Hamu angka natuatua, ingkon sabar do mangajari ianakhonmuna taringot Jahowa. Unang ma marnaloja hamu. (Eps. 6:4) Martangiang ma raphon nasida, jala tangiangkon ma nasida. Marsitutu ma hamu mangajari nasida asa mangkaholongi Jahowa. Tontu pasupasuon ni Jahowa do naung diulahonmuna i.​—Ps. 37:5.

TONGTONG DO SI JOB MARSIHOHOT JALA UNDUK DI TINGKI SONANG MANANG SUSA

16, 17. Ambatambat aha do na diadopi si Job?

16 Ambatambat aha do na diadopi si Job? Hea do muba parngoluon ni si Job. Mulana, “sumangap do ibana tahe sian saluhut halak na di habinsaran”. (Job 1:3) Mamora hian do ibana. Ditanda jala diargai angka halak do ibana. (Job 29:7-16) Nang pe songon i, ndang gabe ginjang rohana manang gabe ndang mangkaporluhon pangurupion sian Debata. I do alana dijou Jahowa do ibana ”naposongku”. Jala didok do, ”Ibana marroha di tano i, daulatna, tigorna, biarna mida Debata, jala dipadao rohana sian hajahaton.”​—Job 1:8.

17 Tompu do muba parngoluon ni si Job. Gabe pogos ma ibana, jala on mambahen ibana mandele. Taboto Sibolis do na mambahen ibana susa. Alana, didok Sibolis ala sonang do ngolu ni si Job umbahen na olo ibana manomba Jahowa. (Jaha Job 1:9, 10.) Serius do Jahowa mangida tuduhan ni Sibolis i. Jadi, ingkon patuduhon ni Jahowa do na pargabus Sibolis. Dilehon Jahowa do tingki tu si Job laho patuduhon holongna tu Ibana.

18. (a) Aha do na denggan na boi taida sian si Job? (b) Sian pengalaman ni si Job, aha do na boi taparsiajari taringot Jahowa?

18 Lam borat do sitaonon ni si Job dibahen Sibolis. Jala marsitutu do ibana asa dirimpu si Job sian Debata do pangunjunan i. (Job 1:13-21) Dung i, ro ma muse tolu dongan ni si Job jala mandok angka na so denggan taringot  ibana. Didok do na diuhumi Debata do ibana alani hajahatonna. (Job 2:11; 22:1, 5-10) Alai nang pe songon i, tongtong do ibana marsihohot tu Jahowa. Tutu, hea do ibana mandok hata oto. (Job 6:1-3) Alai, diboto Jahowa do alani arsak ni rohana do i. Boi do diida Jahowa, ndang olo si Job manadingkon Ibana, nang pe Sibolis sai jotjot mambahen ibana lam susa. Dung salpu hasusaanna dilehon Jahowa do pasupasu umgodang sian na parjolo. Jala mangolu dope ibana 140 taon nai. (Jak. 5:11) Tongtong do si Job marsihohot saleleng ngoluna. Sian dia taboto? Alana hata na di Hesekiel 14:14 disurathon tingki maratus taon dung mate ibana.

19, 20. (a) Songon dia hita boi maniru haporseaon dohot unduk ni roha ni si Job? (b) Songon dia hita maniru Jahowa molo adong donganta na mangadopi sitaonon?

19 Songon dia hita boi maniru haporseaon dohot unduk ni roha ni si Job? Manang songon dia pe situasinta, tongtong ma Jahowa tajumolohon di ngolunta. Porsea jala unduk ma hita tu Ibana sian nasa rohanta. Alana, gumodang do na boi paposhon rohanta sian si Job. Saonari godang do taboto taringot Sibolis dohot cara na dipangke Ibana. (2 Kor. 2:11) Di Bibel, tarlumobi di buku Job, boi taboto boasa dipaloas Debata hita marsitaonon. Sian surirang ni si Daniel, gabe taboto ma taringot Harajaon ni Debata na diparenta Jesus Kristus. (Dan. 7:13, 14) Jala taboto do Harajaon i ma na laho mamarenta di tano on, jala salpuhononNa ma sude sitaononta.

20 Sian pengalaman ni si Job, taboto ma ingkon burju do hita tu angka donganta na mangadopi sitaonon. Songon si Job, hea do ra nasida mandok hata oto. (Pjm. 7:7) Alai, unang ma tauhumi nasida manang tadok nasida marsala. Gariada, ingkon taantusi do pangkilalaan ni nasida. Molo taulahon i, na maniru holong dohot asi ni roha ni Debata do hita.​—Ps. 103:8.

PATOGUON NI JAHOWA DO HAMU

21. Songon dia 1 Petrus 5:10 paingothon hita tu pengalaman ni si Noak, si Daniel dohot si Job?

21 Si Noak, si Daniel, dohot si Job mangolu di tingki na marasingasing jala ndang sarupa situasi ni nasida. Alai, martahan do nasida mangadopi ambatambat. Pengalaman ni nasida on gabe paingothon hita tu hata ni si Petrus, “Alai anggo Debata, nampuna saluhut asi ni roha, . . . pauliulionna, pahotonna jala patoguonna do hamu, dung jolo ditaon hamu satongkin haporsuhon i.”​—1 Ptr. 5:10.

22. Aha do na laho taulas di parsiajaran na mangihut?

22 Hata na disurat di 1 Petrus 5:10, marlangku do di tingkinta saonari. Dipapos Jahowa do rohanta na urupanNa do angka naposoNa asa tongtong togu. Tahalomohon do asa dipatogu Jahowa hita jala tongtong marsihohot tu Ibana. Alani i, tatiru ma haporseaon dohot unduk ni roha ni si Noak, si Daniel, dohot si Job. Sasintongna boi pe nasida marsihohot ala “tangkas do diantusi nasida” aha na dipangido Debata tu nasida. (Poda 28:5) Jala boi do tatiru nasida. Taulas ma on di parsiajaran na mangihut.

^ par. 2 Si Hesekiel ditaban tu Babel taon 617 SM. Disurat ibana do Hesekiel 8:1–19:14 di “paonomtaonhon” dung ditaban ibana, i ma taon 612 SM.

^ par. 5 Porsea tu Debata do bapak ni si Noak, i ma si Lamek. Alai, nunga marujung ngolu ibana lima taon andorang so ro Aek na Sumar. Molo mangolu dope omak dohot hahaanggina andorang so ro Aek na Sumar, tontu mate disi do nasida.

^ par. 13 Ra, dipangke Jahowa do si Hanania, si Misael, dohot si Azaria laho mangurupi halak Jahudi.​—Dan. 2:49.