Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon—Edisi Siparsiajaran  |  Februari 2018

Las ni Roha—Sada Parange na Sian Debata

Las ni Roha—Sada Parange na Sian Debata

Sude do halak naeng marlas ni roha. Alai, ala mangolu hita di tingki parpudi on, godang do parsoalan na maol taadopi. (2 Tim. 3:1) Adong do na so marlas ni roha ala mangadopi parniulaon na so tigor, marsahit, di PHK, manang ala mate na hinaholonganna. Asing ni i, ala adong parsoalan na mambahen holsoan manang lungun roha. Naposo ni Jahowa pe boi do gabe ndang marlas ni roha. Molo i do na dihilala hamu, songon dia do asa boi muse hamu marlas ni roha?

Asa tadapot alusna, ingkon taantusi do aha lapatan ni las ni roha. Jala, songon dia pigapiga halak tongtong marlas ni roha nang pe mangadopi sitaonon. Dung i, taboto ma songon dia carana asa tongtong hita marlas ni roha.

AHA DO LAS NI ROHA I?

Halak na marlas ni roha, ndang holan tarida sian bohina. Umpamana, sahalak na mabuk. Hira na las do rohana jala sai na mengkelengkel. Alai dung sadar, ndang be mengkelengkel ibana. Alana, diingot ibana do muse angka parsoalanna. Jadi holan satongkin i do las ni rohana, ndang na manongtong.​—Poda 14:13.

Las ni roha, i ma pangkilalaan na sian roha alani angka na denggan na tadapot manang tahirim. Halak na marlas ni roha tongtong mangkilala hadameon di tingki sonang manang susa. (1 Tes. 1:6) Tutu, sipata olo do jut rohanta. Alai tongtong do hita marlas ni roha. Umpamana, hea do angka apostel dipungkuli ala marbarita taringot Jesus. Alai nang pe songon i, “las do rohanasida, laho ruar sian jolo ni rapot i, ala tau nasida dirajumi Debata manaon lealea humongkop Goar i”. (Ul. 5:41) Ndang ala dipungkuli nasida marlas ni roha, alai ala tongtong do marsihohot nasida tu Debata.

Las ni roha ndang dapotta sian na tubu. Alana, las ni roha i ma sada sian parbue ni Tondi na disurat di Bibel. Parbue ni Tondi on mangurupi hita asa gabe “jolma na imbaru”, i ma asa marparange na denggan, dohot ma i las ni roha. (Eps. 4:24; Gal. 5:22) Molo las rohanta, gabe ummura ma hita mangadopi sitaonon.

ANGKA SITIRUON NA BOI TAIHUTHON

Ndang lomo roha ni Jahowa mangida angka na so denggan di portibi on. Nang pe godang halak mangulahon na jahat, alai tongtong do marlas ni roha Jahowa. Didok Bibel, “Hagogoon dohot las ni roha do manggohi JoroNa.” (1 Kron. 16:27, Bibel Siganup ari) Tarlumobi ma molo naposoNa mangulahon na denggan, gabe las do roha ni Jahowa.​—Poda 27:11.

Molo tongtong hita marlas ni roha nang pe ndang sude situasi dos songon na tahirim, na maniru Jahowa do hita disi. Unang ma hita holsoan, tongtong ma taingot angka na denggan na naung tadapot. Jala sabar  ma hita paimahon janji ni Debata di ari na naeng ro. *

Di Bibel, godang do disurat taringot angka halak na tongtong marlas ni roha nang pe marsitaonon. Songon si Abraham tongtong do ibana marlas ni roha, nang pe hea ibana digugai jala naeng dipamate. (1 Mus. 12:10-20; 14:8-16; 16:4, 5; 20:1-18; 21:8, 9) Aha do na mambahen ibana tongtong marlas ni roha? Ala sai dirimangi ibana do pangkirimon asa mangolu di tano na imbaru. (1 Mus. 22:15-18; Heb. 11:10) Jesus mandok, “[Marlas ni roha] do si Abraham, amamuna i, ala naeng idaonna aringki.” (Joh. 8:56) Boi do tatiru si Abraham molo tongtong tarimangi las ni roha na naeng tadapot di ari na naeng ro.​—Rom 8:21.

Songon i ma nang si Paulus dohot si Silas. Togu do haporseaon ni nasida jala tongtong marlas ni roha nang pe mangadopi godang hasusaan. Umpamana, tingki dipungkuli jala dipenjarahon, boi dope nasida martangiang jala marende mamuji Debata. (Ul. 16:23-25) Boi pe nasida mangadopi sitaonon ala tongtong diingot nasida janji ni Debata taringot ari na naeng ro. Las do roha ni nasida ala mamboto sude on masa ala nasida mangihuthon Jesus. Tatiru ma si Paulus dohot si Silas. Sai taingot ma sude na denggan na tadapot ala marsihohot manomba Debata.​—Plp. 1:12-14.

Saonari pe, godang do angka donganta na gabe sitiruon. Ala tongtong nasida marlas ni roha nang pe mangadopi hasusaan. Songon pengalaman ni angka donganta di Filipina. Di taon 2013 di bulan November, masa ma Topan Haiyan jala lobi sian 1.000 jabu ni donganta na sega. Sada sian donganta i, i ma si George na tading di kota Tacloban. Didok Ibana, “Nang pe masa on tu hami, tongtong do marlas ni roha angka dongan. Mansai balga do las ni roha na huhilala tingki i.” Molo tongtong taingot jala taargai sude naung dilehon Jahowa tu hita, boi ma hita marlas ni roha nang pe susa. Aha do muse na dilehon Jahowa tu hita asa boi marlas ni roha?

NA MAMBAHEN HITA MARLAS NI ROHA

Na mambahen hita marlas ni roha, i ma ala hita maraleale tu Debata Jahowa. Taboto do Ibana na Tumimbul sian sasudena. Ibana do na gabe Ama, Debata, jala gabe Alealenta!​—Ps. 71:17, 18.

Asing ni i na mambahen hita marlas ni roha, i ma ala boi tahilala hangoluan na dilehon Jahowa tu hita. (Pjm. 3:12, 13) Ala jonok hita tu Debata gabe taantusi do aha na dihalomohon Ibana tu hita. (Kol. 1:9, 10) Alai, godang do halak na so mangantusi aha na tinuju ni ngolunta on. Si Paulus patorangkon, “‘Na so dung niida ni mata, na so dung binege ni pinggol, na so dung hehe di bagasan roha ni jolma, i do diparade Debata di angka na mangkaholongi Ibana.’ Alai dipapatar Debata do i tu hami marhite sian Tondi i.” (1 Kor. 2:9, 10) Molo taantusi aha do sangkap ni Jahowa, gabe marlas ni roha ma hita.

Godang do muse na dilehon Jahowa tu hita. Dilehon Ibana do tobusan laho manalpuhon dosanta. (1 Joh. 2:12) Dilehon Ibana do pangkirimon asa boi hita mangolu di tano na imbaru. (Rom 12:12) Jala saonari, dilehon Jahowa do angka dongan na mangurupi hita asa tongtong manomba Ibana. (Ps. 133:1) Jala diondingi do hita sian Sibolis dohot angka surusuruan na jahat. (Ps. 91:11) Molo tongtong taingot sudena i, gabe boi ma hita lam marlas ni roha.​—Plp. 4:4.

ASA LAM TAMBA LAS NI ROHANTA

Molo nunga marlas ni roha hita, boi do lam tamba i muse? Jesus mandok: “Umbahen na huhatahon i tu hamu, asa di bagasan hamu halalas ni rohangki, jala asa gok  halalas ni rohamuna.” (Joh. 15:11) On patuduhon boi do tatambai las ni rohanta. Tapatudos ma i songon api. Asa lam galak api i, ingkon tatambai do soban. Taingot ma, boi do tondi parbadia mangurupi hita asa marlas ni roha. Jadi, asa lam marlas ni roha hita, tapangido ma tondi parbadia i marhite tangiang. Tarimangi ma isi ni Bibel, ala marhite tondi parbadia do i sude dilehon Debata.​—Ps. 1:1, 2; Luk. 11:13.

Asing i, boi do lam tamba las ni rohanta molo talehon gumodang tingki laho mambahen las roha ni Jahowa. (Ps. 35:27; 112:1) Boasa? Bibel mandok, hita ditompa asa ‘mangkabiari Debata, jala mangaradoti angka tonana, ai i do inana siingoton ni ganup jolma’. (Pjm. 12:13) Hita ditompa laho mangulahon sangkap ni Debata. Jadi, molo hita manomba Jahowa, gabe tahilala ma las ni roha di ngolunta. *

LABA NI MARLAS NI ROHA

Godang do laba na tadapot molo lam marlas ni roha hita. Umpamana, gabe las ma roha ni Jahowa mangida hita, ala tongtong hita manomba Ibana nang pe adong parungkilonta. (5 Mus. 16:15; 1 Tes. 5:16-18) Molo marlas ni roha hita, ndang be taharingkothon arta di ngolunta. Gariada, Harajaon ni Debata do na rumingkot di hita. (Mat. 13:44) Molo taida angka na denggan na tadapot ala mangkaringkothon Jahowa, lam tamba ma las ni rohanta. Jala, boi ma hita mangurupi halak asa marlas ni roha.​—Ul. 20:35; Plp. 1:3-5.

Boi do lam sehat hita, molo las rohanta. Sahalak panulingkit na mamparsiajari taringot kesehatan sian University of Nebraska di Amerika Serikat mandok, “Molo marlas ni roha jala martua ngolunta saonari, boi do i mambahen hita tongtong sehat di ari na naeng ro.” Satolop do ibana tu na didok Bibel, “Las ni roha, i do ubat na dumenggan.”​—Poda 17:22, Bibel Siganup ari.

Jadi nang pe hita mangadopi sitaonon saonari, boi do hita marlas ni roha alani diurupi tondi parbadia. Tadapot ma i marhite martangiang, marsiajar, jala mangarimangi Hata ni Debata. Gabe lam marlas ni roha ma hita molo sai tarimangi angka na denggan naung dilehon Jahowa tu hita. Taihuthon ma sitiruon sian na asing, jala taulahon ma na dihalomohon Debata. Dung i, boi ma tahilala songon na disurathon Psalmen 64:11 na mandok, “Marlas ni roha ma ianggo partigor i mangasahon Jahowa.”

^ par. 10 Di parsiajaran taringot “parbue ni Tondi” na naeng ro, taulas ma taringot lambas ni roha manang hasabaron.