Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon—Edisi Siparsiajaran  |  Februari 2017

Tobusan—Sada ”Silehonlehon na Denggan” sian Debata

Tobusan—Sada ”Silehonlehon na Denggan” sian Debata

”Saluhutna silehonlehon na denggan, nasa ulibasa na mauliutus, i ma na ro . . . sian Ama.”JAKOBUS 1:17.

ENDE: 148, 5

1. Marhite tobusan, pasupasu aha do na dilehon tu hita?

PELEAN tobusan ni Jesus Kristus parohon godang pasupasu. Marhite tobusan, dilehon ma dalan asa sude jolma na marsihohot gabe keluarga ni Debata, jala marpangkirimon laho mangolu salelengna. Asing ni i, hombar do tobusan tu sada parsoalan na mansai ringkot tu saluhut na di surgo dohot na di tano on.Heb. 1:8, 9.

2. (a) Aha do parsoalan na mansai ringkot na masa di surgo dohot di tano on na ditangiangkon Jesus? (Ida gombar di mula ni parsiajaran.) (b) Aha do na laho taulas di artikel on?

2 Hirahira dua taon andorang so mate Jesus, diajari ibana ma angka siseanna asa martangiang, ”Ale Amanami na di banua ginjang! Sai pinarbadia ma Goarmu! Sai ro ma harajaonmu! Sai saut ma lomo ni roham di banua tonga on songon na di banua ginjang!” (Mat. 6:9, 10) Taulas ma songon dia do tobusan ni Jesus hombar tu Harajaon ni Debata, jala pabadiahon goar ni Jahowa dohot sangkapNa.

 ”SAI PINARBADIA MA GOARMU”

3. Aha do na pinatudu ni goar ni Jahowa? Songon dia do Sibolis mangaleai goar ni Jahowa?

3 Na parjolo, martangiang do Jesus asa dipabadia goar ni Jahowa. Goar ni Jahowa patuduhon ise Ibana sasintongna. Holan Ibana do Partigor jala Pargogo na so hatudosan. Jesus pe mandok Ibana ”Amang na badia”. (Joh. 17:11) Ala badia do Jahowa, sude na diulahon dohot uhumNa pe badia do. Alai tingki di porlak Eden, marsangkap ma Sibolis mangalo hak ni Debata mamarenta jolma. Didok ma angka na so denggan taringot tu Jahowa jala dileai goarNa.1 Mus. 3:1-5.

4. Songon dia do Jesus pabadiahon goar ni Debata?

4 Mansai diparsangapi Jesus do goar ni Jahowa jala marsitutu pabadiahon i. (Joh. 17:25, 26) Songon dia carana? Marhite ajaran dohot parniulaonna, diurupi Jesus ma halak mamboto denggan do aturan sian Jahowa jala marlaba do sude na diparentahon Ibana. (Jaha Psalmen 40:9-11.) Nang pe hansit sitaononna dibahen Sibolis jala gabe mate, alai marsihohot do Jesus. Dipatuduhon ibana, boi do jolma na tipak tongtong unduk tu Jahowa.

5. Songon dia do pabadiahon goar ni Jahowa?

5 Songon dia do patuduhon na taparsangapi goar ni Jahowa? Marhite parniulaonta. Lomo roha ni Jahowa asa badia hita. (Jaha 1 Petrus 1:15, 16.) Holan Ibana ma tasomba jala unduk sian nasa roha. Nang pe marsitaonon, marsitutu do hita mangolu hombar tu aturan ni Jahowa. Molo hombar do ngolunta tu aturan ni Jahowa, on parohon sangap tu Jahowa. (Mat. 5:14-16) Tapatudu ma na denggan do patik ni Jahowa jala pargabus do Sibolis. Ala ndang tipak, olo do hita mangulahon na sala. Molo taulahon na sala, marhamubaon ma hita jala marsitutu asa unang mangaleai goar ni Jahowa.Ps. 79:9.

6. Nang pe ndang tipak hita, boasa olo Jahowa manjangkon hita?

6 Ndang soal hita na miniahan manang birubiru na asing, disalpuhon Jahowa do dosanta molo marhaporseaon hita tu tobusan. Dijangkon Jahowa do sude na mangalehon diri tu Ibana asa gabe naposoNa. Didok Ibana do halak Kristen na miniahan i gabe anakNa, jala birubiru na asing gabe alealeNa. (Joh. 10:16; Rom 5:1, 2; Jak. 2:21-25) Alani tobusan i, saonari boi hita maraleale tu Debata jala pabadiahon goarNa.

”SAI RO MA HARAJAONMU”

7. Marhite tobusan, aha do pasupasu na laho dipasaut?

7 Di tangiang na diajarhon Jesus, didok, ”Sai ro ma harajaonmu.” Songon dia do tobusan i hombar tu Harajaon ni Debata? Harajaon ni Debata, i ma sada pamarentaon na dibahen Jesus dohot 144.000 halak na dipillit sian tano on. Tobusan mambahen nasida boi dipahehe tu surgo. (Pgk. 5:9, 10; 14:1) Nasida gabe raja dohot malim jala mamarenta tano on raphon Jesus saleleng saribu taon. Marhite Harajaon i, bahenon ni Jahowa ma tano on gabe paradeiso jala urupanNa do sude jolma gabe tipak. Gabe sada keluarga ma sude naposo ni  Jahowa na di surgo dohot na di tano on. (Pgk. 5:13; 20:6) Ripashonon ni Jesus ma Sibolis jala ndang adong be hasusaan.1 Mus. 3:15.

8. (a) Songon dia do Jesus mangurupi siseanna mangantusi ringkot ni Harajaon ni Debata? (b) Saonari, songon dia do hita patuduhon na tapillit Harajaon ni Debata?

8 Diurupi Jesus do siseanna mangantusi ringkot ni Harajaon ni Debata. Songon dia carana? Dung tardidi Jesus, dibaritahon ibana ma barita na uli taringot tu ”harajaon ni Debata” tudia pe ibana laho. (Luk. 4:43) Didok muse tu siseanna asa mangkatindangkon ibana ”sahat ro di ujung ni tano on”. (Ul. 1:6-8) Saonari marhite ulaon parbaritaon, godang halak marsiajar taringot tu tobusan jala gabe rakyat ni Harajaon ni Debata. Tapatudu ma na marsihohot do hita gabe rakyat ni Harajaon ni Debata, marhite mangurupi na miniahan pasahathon barita na uli di liat portibi on.Mat. 24:14; 25:40.

”SAI SAUT MA LOMO NI ROHAM”

9. Boasa pos rohanta na laho pasauton ni Jahowa sangkapNa tu jolma?

9 Aha do lapatan ni hata ni Jesus tingki didok, ”Sai saut ma lomo ni roham”? Molo didok Jahowa ingkon saut sangkapNa, na ingkon saut do i. (Jes. 55:11) Ndang boi Sibolis mangambati sangkap ni Jahowa. Aha do sangkap ni Jahowa tu tano on? Lomo rohaNa asa tano on digohi pinompar ni si Adam dohot si Hawa. (1 Mus. 1:28) Pingkirhon ma, molo mate si Adam dohot si Hawa alai ndang marpinompar dope, ndang saut be sangkap ni Debata tu tano on. Alani i, dipaloas Jahowa ma nasida marianakhon. Marhite tobusan, sude na marsihohot boi tipak jala mangolu salelengna. Dihaholongi Jahowa do hita jala lomo rohaNa asa martua ngolunta songon sangkapNa na parjolo.

10. Songon dia do tobusan marlaba tu halak naung mate?

10 Songon dia do taringot tu marmilliar halak naung mate, alai ndang mananda Jahowa dope? Lomo roha ni Jahowa asa tongtong jolma mangolu. Alani i, paheheonNa ma angka naung mate. Marhite tobusan, boi ma nasida mangolu muse, marsiajar taringot tu Jahowa jala mangolu salelengNa. (Ul. 24:15) Jahowa do Mual ni hangoluan. Tingki Jahowa pahehehon angka naung mate, Ibana ma gabe Ama di nasida. (Ps. 36:10) Di tangiang na diajarhon Jesus, ibana manjou Jahowa ”Amanami na di banua ginjang”. (Mat. 6:9) Nunga dilehon Jahowa tanggung jawab tu Jesus laho pahehehon angka naung mate. Jesus mandok, ”Ahu do haheheon dohot hangoluan.”Joh. 6:40, 44; 11:25.

11. Aha do sangkap ni Debata tu angka halak na ”mansai torop”?

11 Jesus mandok, ”Ai na mangulahon lomo ni roha ni Debata, i do anggingku, i do ibotongku, i do dainang!” (Mrk. 3:35) Marsangkap do Debata laho mambahen sude jolma sian marragam bangso dohot bahasa gabe naposoNa. Didok do nasida na ”mansai torop, na so dapot bilangan ni jolma”. Marhaporseaon do nasida tu tobusan jala unduk tu Debata. Dipuji nasida do Debata jala didok, ’Haluaon sian Debatanta, na hundul di habangsa i, dohot di Birubiru i!’Pgk. 7:9, 10.

12. Sian tangiang ni Jesus, aha do na taparsiajari taringot sangkap ni Jahowa tu jolma?

 12 Sian tangiang na diajarhon Jesus, godang na taparsiajari taringot tu Jahowa dohot sangkapNa. Na parjolo, ingkon marsitutu do hita pabadiahon jala pasangaphon goar ni Jahowa. (Jes. 8:13) Tobusan ndang holan paluahon hita, alai dohot do pasangaphon goar ni Debata. Lapatan ni goar ni Jesus, i ma ”Jahowa do Haluaon”. Na paduahon, marhite Harajaon i dilehon Jahowa ma pasupasu alani tobusan tu sude jolma na marsihohot. Na patoluhon, pos do rohanta ndang adong na boi mangambati sangkap ni Jahowa.Ps. 135:6; Jes. 46:9, 10.

PATUDU MA HAMAULIATEON TU JAHOWA ALANI TOBUSAN

13. Boasa olo hita tardidi?

13 Sada cara na rumingkot laho patuduhon hamauliateonta alani tobusan, i ma mangalehon diri tu Jahowa jala tardidi. On patuduhon marhaporseaon do hita tu tobusan jala Jahowa do nampuna hita. (Rom 14:8) Tingki tardidi, tapangido tu Jahowa asa dilehon ”panggora ni roha na ias”. (1 Ptr. 3:21, Bibel siganup ari) Dung i, dilehon Jahowa do pasupasu alani tobusan. Pos rohanta, lehononNa do sude na dijanjihon Ibana.Rom 8:32.

Songon dia do hita patuduhon pangargaion alani tobusan? (Ida paragraf 13, 14)

14. Boasa disuru Jahowa hita asa mangkaholongi dongan jolma?

14 Sude ulaon ni Jahowa diulahon alani holongNa. Marsangkap do Ibana asa sude naposoNa maniru Ibana jala masihaholongan. (1 Joh. 4:8-11) Molo tahaholongi halak na asing, on patuduhon lomo rohanta ”gabe anak ni [Debata] na di banua ginjang i”. (Mat. 5:43-48) Adong dua parenta na umbalga, i ma mangkaholongi Jahowa dohot mangkaholongi dongan jolma. (Mat. 22:37-40) Sada cara laho patuduhon holong tu dongan jolma, i ma mangajari nasida taringot tu Harajaon ni Debata. Molo taoloi parenta ni Jahowa asa mangkaholongi donganta, tarlumobi dongan sahaporseaonta, lam balga ma holongta tu Ibana.1 Joh. 4:12, 20.

 TOBUSAN PAROHON PASUPASU SIAN JAHOWA

15. (a) Saonari, aha do pasupasu na tadapot sian Jahowa? (b) Pasupasu aha do na laho jaloonta di ari na naeng ro?

15 Jahowa paposhon rohanta, molo porsea hita tu tobusan, gabe ”tarsesa” ma dosanta. Boi do sesaonNa sude dosanta. (Jaha Ulaon ni Apostel 3:19-21.) Songon naung taulas, marhite tobusan, dipillit Jahowa ma pigapiga halak gabe anakNa di surgo. Didok ma nasida na miniahan. (Rom 8:15-17) Ditogihon do muse angka birubiru na asing asa gabe keluargaNa di tano on. Alai dung tipak nasida, adong dope ujian na parpudi. Molo marsihohot tu Jahowa, nasida pe boi do gabe anakNa. (Rom 8:20, 21; Pgk. 20:7-9) Dihaholongi Jahowa do sude ianakhonNa. Marhite tobusan, tadapot ma pasupasu salelengna. (Heb. 9:12) Nunga dilehon Jahowa silehonlehon on tu hita, jala ndang adong na boi mambuat i.

16. Songon dia do tobusan i paluahon hita?

16 Molo marhamubaon hita, ndang boi Sibolis mangambati hita gabe keluarga ni Jahowa. ”Sahali ro di saleleng ni lelengna” do Jesus mate. Tobusan i dilehon holan sahali ro di salelengna. (Heb. 9:24-26) Si Adam parohon hamatean, alai Jesus mamboan tu hangoluan salelengna. Alani tobusan, malua ma hita sian portibi na nirajaan ni Sibolis dohot sian hamatean.Heb. 2:14, 15.

17. Aha do pangkorhon ni holong ni Jahowa di hamu?

17 Sai saut do sude janji ni Debata. Songon hukum alam na so hea muba, Jahowa pe ndang hea muba. Ndang hea dibahen jut rohanta. (Mal. 3:6) Dilehon do silehonlehon na ummarga sian hangoluan. Dipatudu do holongNa tu hita. ”Nunga tatanda jala tahaporseai holong ni roha ni Debata di hita. Debata do haholongon.” (1 Joh. 4:16) Ndang sadia leleng nai, gabe paradeiso ma tano on. Sude halak boi maniru Jahowa jala masihaholongan. Dung i, na di surgo dohot na di tano on mandok, ”Pujipujian dohot hasangapon dohot hapistaran dohot hamauliateon dohot hagogoon dohot hatoguon ma di Debatanta ro di salelenglelengna! Amen.”Pgk. 7:12.