Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon—Edisi Siparsiajaran  |  Desember 2016

Pasahat ma Holso ni Roham tu Jahowa

Pasahat ma Holso ni Roham tu Jahowa

”Tinggangkon hamu ma nasa na hinolsohon ni rohamuna tu [Jahowa], ai disarihon do hamu!”​—1 PTR. 5:7.

ENDE: 23, 49

1, 2. (a) Boasa boi hita holsoan? (Ida gombar di mula ni parsiajaran.) (b) Aha do na laho taulas di artikel on?

SAONARI, Sibolis ”songon babiat na marauang, mangalului sibondutonna”. (1 Ptr. 5:8; Pgk. 12:17) Ujungna, susa ma ngolu ni jolma, jala naposo ni Debata pe gabe holsoan. Naposo ni Debata najolo pe olo do holsoan. Umpamana, Bibel paboahon, sipata holsoan do Raja Daud. (Ps. 13:3) Apostel Paulus pe ”mangkolsohon saluhut huria”. (2 Kor. 11:28) Alai, aha do na boi taulahon molo holsoan hita?

2 Jahowa mangurupi naposoNa najolo asa mandapot pangurupion tingki holsoan, jala lomo dope rohaNa mangulahon i saonari. Bibel mandok, ”Tinggangkon hamu ma nasa na hinolsohon ni rohamuna tu Ibana, ai disarihon do hamu!” (1 Ptr. 5:7) Adong opat cara laho mangulahon i. (1) Martangiang, (2) manjaha jala  mangarimangi Bibel, (3) paloas ma tondi parbadia mangurupi hamu, jala (4) mangkatai tu dongan na mangantusi pangkilalaanta. Molo tapingkirhon on, tarimangi ma na dia do na porlu padengganonta.

”TU JAHOWA MA PASAHAT PARSORIONMI”

3. Songon dia do hamu boi pasahathon holso ni rohamuna tu Jahowa?

3 Cara na parjolo laho pasahathon holso ni rohanta tu Jahowa, i ma marhite tangiang. Tingki holsoan hita, lomo do roha ni Debata molo tapaboa pangkilalaanta tu Ibana. Si Daud mandok tu Jahowa, ”Sai tangi ma tangiangku, ale Debata.” Di psalmen na sarupa, didok si Daud, ”Tu Jahowa ma pasahat parsorionmi, jadi Ibana ma pangoluhon ho.” (Ps. 55:2, 23) Molo nunga dibahen hamu sian nasa gogomuna laho mangadopi sitaonon, martangiang ma tu Jahowa mangido pangurupion asa unang paholsohu. Alai, adong do labana molo martangiang? Songon dia do tangiang mangurupi hita asa unang sai holsoan?​—Ps. 94:18, 19.

4. Tingki holsoan hita, boasa ringkot martangiang tu Jahowa?

4 Jaha Pilippi 4:6, 7. Songon dia do Jahowa maradophon tangiangta na sian ias ni roha? Boi do Ibana mangurupi hita asa dame pangkilalaan dohot pingkiranta. Debata ndang olo mambahen hita holsoan jala mabiar, alai lomo do rohaNa mangalehon hadameon na hea tahilala. Godang do donganta naung mangkilala on. Hamu pe, boi do mangkilala on. ”Dame ni Debata” boi mangurupi hita mangadopi sitaonon. Pos ma rohamuna tu janji ni Jahowa, ”Unang biahaton ho, ai ahu do Debatam: Ahu margogoihon ho huhut mangurupi ho.”​—Jes. 41:10.

MANGKILALA HADAMEON SIAN HATA NI DEBATA

5. Songon dia do Hata ni Debata mangurupi hita mangkilala hadameon?

5 Cara na paduahon asa mangkilala hadameon, i ma manjaha jala mangarimangi ayat ni Bibel. Boasa on ringkot? Bibel, i ma Hata ni Debata. Di Bibel, adong do poda sian Sitompa hita. Tingki holsoan, boi do tapingkirhon jala tarimangi songon dia poda i boi patoguhon hita. On mangurupi hita mangadopi, mangorui, manang pasidingkon holso ni roha. Dipatudos Jahowa do manjaha Bibel songon mandapot habaranion dohot gogo jala asa unang mabiar.​—Jos. 1:7-9.

Haporseaon na togu tu Jahowa mangurupi hita marpos ni roha na olo do Jahowa paradehon na tahaporluhon

6. Songon dia do hata ni Jesus marlaba tu hita?

6 Di Bibel, tajaha do taringot cara ni Jesus mangkatai. Lomo do roha  ni halak manangihon Jesus ala hata ni Jesus mangalehon pangapulion dohot las ni roha, tarlumobi tu na gale manang na holsoan. (Jaha Mateus 11:28-30.) Diparrohahon Jesus do songon dia pangkilalaan ni angka halak. (Mrk. 6:30-32) Dos songon janji ni Jesus laho mangurupi angka apostel, saonari pe diurupi ibana do hita. Ndang ala laho mandapot laba hita asa jonok tu Jesus. Ala nunga gabe Raja di surgo, tongtong do dipatudu ibana holongna tu hita. Tingki holsoan hita, pos ma rohanta na olo do Jesus mangurupi hita di tingki na pas. Dilehon Jesus do pangkirimon dohot habaranion asa unang paholsohu hita.​—Heb. 2:17, 18; 4:16.

PARANGE HINORHON NI TONDI PARBADIA

7. Songon dia do hita mandapot laba sian tondi parbadia?

7 Marjanji do Jesus, lehonon ni Jahowa do tondi parbadia molo tapangido tu Ibana. (Luk. 11:10-13) Songon dia do cara na patoluhon on mangurupi hita asa unang sai holsoan? Tondi parbadia sian Debata mangurupi hita patuduhon parange na denggan songon na adong di Debata. (Kol. 3:10) Di Bibel, parange on didok ”parbue ni Tondi”. (Jaha Galatia 5:22, 23.) Molo tapatudu parange on, lam solhot ma paralealeonta tu na asing jala boi ma tapasiding angka situasi na mambahen hita holsoan. Taida ma songon dia parbue ni tondi boi mangurupi hita.

8-12. Songon dia do parbue ni tondi parbadia mangurupi hita?

8 Holong, las ni roha, dame. Molo taargai do na asing, boi do hita ndang sai holsoan. Boasa? Molo tapatudu holong dohot pangargaion tu donganta, boi ma hita pasidingkon situasi na mambahen hita muruk, marsak, jala holsoan. On mambahen hita tongtong mardame dohot na asing.​—Rom 12:10.

Molo tapatudu parange na denggan, lam solhot ma paralealeonta tu na asing

9 Hasabaron, roha pangurupi, haburjuon. Bibel mandok, ”Gabe na basar ma hamu sama hamu, angka parasiroha; masisesaan dosa ma hamu.” (Eps. 4:32) Molo taihuthon poda on, lam solhot ma paralealeonta tu na asing jala boi tapasiding situasi na mambahen hita holsoan. Jala, on mangurupi hita mangadopi situasi na masa alani hagaleonta.

10 Haporseaon. Saonari, jotjot do hita holsoan alani hepeng dohot arta. (Poda 18:11) Songon dia do asa unang sai holsoan? Taihuthon ma poda ni si Paulus, ”Hasabamhon hamu ma na adong!” Haporseaon na togu tu Jahowa mangurupi hita marpos ni roha na olo do Jahowa paradehon na tahaporluhon. Nunga marjanji Ibana, ”Sandok na so tadingkononku do ho;  sandok na so pasombuonku do ho!” Boi ma tadok songon si Paulus, ”Tuhan i do pangurupi di ahu, ndang mabiar ahu; aha ma bahenon ni jolma tu ahu?”​—Heb. 13:5, 6.

11 Halambohon ni roha jala boi mangarajai diri. Rimangi ma aha labana molo tapatudu halambohon jala boi mangarajai diri. Parange on mangurupi hita asa unang mangulahon manang mandok hata na mambahen hita holsoan. On pe mangurupi hita pasidingkon ”riting ni roha dohot muruk dohot rimas, nang hata songgaksonggak dohot insahinsak”.​—Eps. 4:31.

12 Ingkon serep do rohamuna asa marpos ni roha tu ”tangan ni Debata na gogo” jala ”tinggangkon hamu ma nasa na hinolsohon ni rohamuna tu Ibana”. (1 Ptr. 5:6, 7) Molo marserep ni roha, diurupi jala diparrohahon Jahowa ma hita. Molo taboto na boi dohot na so boi taulahon, ndang olo hita marhaposan tu dirinta. Alai, molo marhaposan tu Jahowa, ndang sai holsoan be hita.​—Mik. 6:8.

UNANG MA HOLSOAN

13. Aha do lapatan ni hata ni Jesus tingki didok, ’Unang ma holsoan’?

13 Di Mateus 6:34 (jaha), adong do poda ni Jesus na mandok, ’Unang ma holsoan.’ Ra, maol do mangulahon on saonari. Alai, aha do lapatan ni hata on? Nunga taboto, sipata holsoan do si Daud dohot si Paulus. Ndang didok Jesus naposo ni Debata ndang hea holsoan. Alai, Jesus mangurupi siseanna mangantusi ndang adong labana molo jotjot holsoan manang paholsohu. Sai adong do sitaononta ganup ari. Alani i, unang ma pola holsoan ala mamingkiri ari na naeng ro. Songon dia do poda ni Jesus mangurupi hita asa unang sai holsoan?

14. Songon si Daud, aha do na taulahon asa unang sai holsoan?

14 Sipata, adong do na holsoan alani hasalaan di tingki naung salpu. Ra, gabe marsak jala holsoan nasida alani i. Sada tingki, holsoan do Raja Daud alani hasalaanna. Ibana mandok, ”Holsoan ahu ala ni dosangku.” (Ps. 38:4, 5, 9, 19) Tingki i, marbisuk do si Daud maradophon situasina i.  Pos do rohana tu asi ni roha ni Jahowa jala disalpuhon do hasalaanna. Las ma roha ni si Daud ala diboto ibana nunga disalpuhon Debata be hasalaanna.​—Jaha Psalmen 32:1-3, 5.

15. (a) Parsiajaran aha do muse na tadapot sian si Daud? (b) Aha do na boi diulahon hamu asa unang sai holsoan? (Ida kotak ” Pigapiga Cara Asa Unang Sai Holsoan”.)

15 Ra, olo do holsoan hita taringot ari na naeng ro. Umpamana, tingki disurat si Daud Psalmen 55, mabiar do ibana dibunu. (Ps. 55:3-6) Alai, ndang dipaloas ibana i pagalehon pos ni rohana tu Jahowa. Dipangido do pangurupion ni Jahowa laho mangadopi sitaonon. Alai, diboto ibana ringkot do mangulahon ulaon na hombar tu pangidoanna i. (2 Sam. 15:30-34) Adong parsiajaran na denggan sian si Daud. Unang ma sai holsoan, alai taulahon ma manang aha pe laho mangadopi sitaonon, jala pos ma rohanta sai diparrohahon Jahowa do hita.

16. Songon dia do lapatan ni goar ni Debata patoguhon haporseaonta?

16 Adong do halak Kristen na holsoan taringot sitaonon na laho diadopi di ari na naeng ro. Alai, unang pola holsoan taringot tu na so masa dope. Boasa? Alana, ndang sai songon na di pingkiranta i na masa. Ingot ma, ndang adong na so boi diulahon Debata laho mangurupi hita. Lapatan ni goar ni Debata, ”Ibana Mambahen jala Ibana Pasauthon”. (2 Mus. 3:14) Unang ma pola holsoan taringot ari na naeng ro. Alana goar ni Debata patuduhon, sai saut do sangkapNa tu jolma. Pos ma rohanta, pasupasuon ni Debata do na marsihohot jala diurupi do nasida asa unang sai holsoan taringot tingki naung salpu, saonari, dohot di ari na naeng ro.

MANGKATAI TU DONGAN NA BOI DIHAPORSEAI

17, 18. Boasa paboahon pangkilalaanta tu dongan boi mangurupi hita tingki holsoan?

17 Cara na paopathon asa unang sai holsoan, i ma mangkatai tu dongan na boi dihaporseai. Dongan saripemu, alealemu, manang angka sintua di huria boi do mangurupi hamu mangadopi situasi di ngolumuna. Bibel paboahon, ”Holsoholso di bagasan roha ni baoa patungki ibana, alai anggo hata na denggan pahinsahon  rohana muse.” (Poda 12:25) Didok muse di Bibel, ”Sai na tarselak do angka sangkap molo soada tuptupan, alai molo torop panuturi, sai tulus ma.”​—Poda 15:22.

18 Parpunguanta mangurupi hita asa unang sai holsoan. Di parpunguan ganup minggu, rap do hita dohot angka dongan sahaporseaon, na mamparrohahon jala patoguhon hita. (Heb. 10:24, 25) ”Hiras ni roha” na tadapot di parpunguan, patoguhon hita jala mangurupi hita asa unang sai holsoan.​—Rom 1:12.

PARALEALEON TU DEBATA DO NA PATOGUHON HITA

19. Boasa pos rohamu molo paralealeon tu Debata boi patoguhon hamu?

19 Sahalak sintua di Kanada mamboto ringkot do pasahathon holso ni roha tu Jahowa. Marsak do ibana ala gabe guru dohot penasihat murid. Adong muse sahitna na mambahen ibana mura holsoan. Aha do na patoguhon ibana? Marsitutu do ibana patoguhon paralealeonna tu Jahowa. Diurupi alealena do ibana saleleng mangadopi sitaonon i, jala dipaboa ibana do sude na di rohana tu tungganeboruna. Asing ni i, angka sintua dohot pengawas wilayah mangurupi ibana mangantusi songon dia pamingkirion ni Jahowa taringot situasina i. Diurupi dokter do ibana mamboto taringot sahitna, jala diatur ibana ma tingkina asa boi santai dohot marolahraga. Lam leleng, diboto ibana ma songon dia cara mangarajai dirina. Tingki ndang boi dirajai dirina, dipangido do pangurupion sian Jahowa.

20. (a) Songon dia do hita pasahathon holso ni rohanta tu Debata? (b) Aha do na laho taulas di artikel na mangihut?

20 Di artikel on, nunga taparsiajari boasa ringkot pasahathon holso ni roha tu Jahowa marhite tangiang, manjaha dohot mangarimangi Bibel. Nunga taparsiajari boasa ringkot paloashon tondi parbadia mangurupi hita, mangkatai tu dongan na boi dihaporseai, jala ro marpungu. Di artikel na mangihut, taparsiajari ma songon dia Jahowa mangurupi hita marhite mangalehon pangkirimon.​—Heb. 11:6.