Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

Mamingkirhon taringot Partondion Asa Mandapot Hangoluan dohot Hadameon

Mamingkirhon taringot Partondion Asa Mandapot Hangoluan dohot Hadameon

”Tondi do diparrohahon angka na mangihuthon Tondi i.”​—ROM 8:5.

ENDE: 22, 52

1, 2. Boasa lomo roha ni halak Kristen na miniahan mamparsiajari Rom bindu 8?

TONTU, nunga hea dijaha hamu Rom 8:15-17 tingki Ari Parningotan hamamate ni Jesus. Ayat on patorangkon songon dia halak Kristen na miniahan mamboto molo nasida mangkirim mangolu di surgo. Rom 8:1 mandok, angka na miniahan nunga ”di bagasan Kristus Jesus”. Alai, holan tu na miniahan do Rom bindu 8 i marlangku? Boi do i mangurupi na mangkirim mangolu di tano on?

2 Rom bindu 8 disurat tarlumobi tu na miniahan. Dijalo nasida do ”Tondi” parbadia jala ”paimaimahon haanakon, asa disi marhaluaon pamatangta”. (Rom 8:23) Di ari na naeng ro, gabe anak ni Debata ma nasida di surgo. Nunga disesa Jahowa dosa ni nasida alani pelean  tobusan. Tigor do nasida di adopan ni Debata, gabe didok ma nasida anak ni Debata.​—Rom 3:23-26; 4:25; 8:30.

3. Boasa halak na mangkirim mangolu salelengna di tano on ingkon mamparsiajari Rom bindu 8?

3 Alai, tingki manurat buku Rom, disurat si Paulus do taringot sahalak baoa na so miniahan, alai tigor di adopan ni Jahowa. I ma si Abraham. Ibana nunga mangolu andorang so ro dope Jesus mangalehon ngoluna gabe tobusan. (Jaha Rom 4:20-22.) Saonari, Jahowa pe boi mandok na tigor do halak na mangkirim mangolu salelengna di tano on. Nasida pe boi mandapot laba sian poda na disurat di Rom bindu 8.

4. Tingki tajaha Rom 8:21, aha do na tasungkun tu dirinta sandiri?

4 Di Rom 8:21, marjanji do Jahowa, bahenonNa tano on gabe Paradeiso jala dipalua ma jolma sian dosa dohot hamatean. Ayat on mandok, dihilala nasida ma ”haluaon hasangapon na di angka anak ni Debata”. Pos do rohamu na boi hamu mangolu di tano na imbaru? Taulas ma na porlu taulahon asa boi mangolu disi.

MAMINGKIRHON HAGIOT NI DAGING

5. Situasi na songon dia do na dipaboa si Paulus di Rom 8:4-13?

5 Jaha Rom 8:4-13. Di bindu ualu di buku Rom, didok si Paulus taringot halak na ”mangihuthon daging”  dohot na ”mangihuthon Tondi”. Adong do na marpingkir, hata ni si Paulus on taringot halak na so Kristen dohot halak Kristen. Alai tingki i, si Paulus manurat tu halak Kristen, na didok ”angka na badia”. (Rom 1:7) Alani i, na didok si Paulus dison, adong do halak Kristen na ”mangihuthon daging” dohot na ”mangihuthon Tondi”. Aha do imbar ni nasida?

6, 7. (a) Aha do pigapiga lapatan ni hata ”daging” di Bibel? (b) Aha do lapatan ni hata ”daging” na disurat di Rom 8:4-13?

6 Tingki disurat hata ”daging” di Bibel, adong do pigapiga lapatanna. Sipata, on lapatanna pamatangta. (Rom 2:28; 1 Kor. 15:39, 50) Boi do lapatanna tu na sakeluarga. Umpamana, Bibel mandok Jesus ”tubu sian pomparan ni si Daud, ia dagingna”. Si Paulus mandok, halak Jahudi ’donganna sabangso mangihuthon partubu ni daging’.​—Rom 1:3; 9:3.

7 Aha do lapatan ni hata ni si Paulus taringot halak na ”mangihuthon daging” na disurat di Rom 8:4-13? Asa dapot alusna, tajaha ma Rom 7:5. Didok si Paulus disi, ”Andorang di bagasan daging i hita, margogo do angka hisap hadosaon i di bagasan angka ruasta dihorhon patik i.” Si Paulus patorangkon, halak na ”mangihuthon daging”, i ma halak na mangihuthon hagiot ni daging laho mangulahon dosa, mangulahon sude na dihalomohon rohana.

8. Boasa si Paulus ingkon pasingothon halak Kristen na miniahan taringot mangolu ”mangihuthon daging”?

 8 Boasa dipasingot si Paulus halak Kristen na miniahan taringot mangolu ”mangihuthon daging”? Boasa sude halak Kristen saonari ingkon dipasingot taringot on? Alana, sude halak Kristen olo gabe mangkaringkothon lomo ni rohana sandiri. Umpamana si Paulus mandok, pigapiga donganta di Rom gabe hatoban ni ”butuhanasida”. Na didok si Paulus, i ma taringot seks, sipanganon, dohot angka hasonangan na asing na diharingkothon nasida. (Rom 16:17, 18; Plp. 3:18, 19; Jud. 4, 8, 12) Sada tingki, adong do sahalak donganta di Korint na mangulahon parmainanon, ”diparjolma nioli ni amana”. (1 Kor. 5:1) Tangkas ma, halak Kristen di tingki i porlu mandapot sipasingot sian si Paulus taringot mangolu ”mangihuthon daging”.​—Rom 8:5, 6.

9. Aha do na so apala tangkas disurat di Rom 8:6?

9 Sipasingot on pe marlaba saonari. Nang pe nunga leleng manomba Jahowa, boi do sasahalak gabe mangolu ”mangihuthon daging”. Alai, na so boi do hita mamingkirhon taringot sipanganon, parkarejoan, rekreasi, dohot hubungan romantis? Ndang sala i tapingkirhon. Jesus pe mangan do jala dilehon do halak na asing mangan. Diboto ibana do porlu istirahat. Jala si Paulus manurat, hubungan seks ma sada bagian na ringkot di parsaripeon.

Aha do na pinatudu ni pangkataionta? (Ida paragraf 10, 11)

10. Aha do lapatan ni hata ’mamingkirhon’?

10 Aha do lapatan ni hata ’mamingkirhon’ na didok si Paulus? Hata Junani sian hata on, lapatanna marpingkir jala marsangkap laho mangulahon na dipingkirhon i. Sahalak sarjana mandok lapatan ni hata on, i ma sasahalak na ”mamingkirhon na dihalomohon rohana, on ma na jotjot dihatai”, jala on ma na sai dipingkirhon. Dipaloas do lomo ni rohana i mangarajai dirina.

Aha do na rumingkot di ngolunta?

11. Aha do na boi gabe rumingkot di ngolunta?

11 Halak Kristen di Rom porlu mamareso dirina, jala mamboto aha na dipingkirhon nasida di ngoluna. ”Mangihuthon daging” do na dipingkirhon nasida? Saonari, hita pe porlu mamingkirhon na rumingkot di ngolunta. Aha na jotjot tahatai? Aha na jotjot laho taulahon? Adong do halak na sai mamingkirhon laho manginum pigapiga jenis anggur, padengganhon jabu asa lam bagak, manuhor baju na baru, manimpan hepeng, manang rekreasi. Ndang sala mamingkirhon jala mangulahon i. Umpamana, diparade Jesus do anggur tingki adong pesta parbogason, jala didok si Paulus tu si Timoteus boi do manginum ”anggur sasaotik”. (1 Tim. 5:23; Joh. 2:3-11) Alai, ndang anggur na gabe  rumingkot di nasida. Songon dia do hita? Aha do na rumingkot di ngolunta?

12, 13. Boasa ingkon manat hita mamingkirhon na taharingkothon?

12 Si Paulus mandok, ”Hamatean do harohaon ni daging.” (Rom 8:6) Aha do lapatan ni on? Molo ”mangihuthon daging”, sega ma paralealeonta tu Jahowa jala ndang marpangkirimon be hita. Alai, unang ma gabe songon i. Boi do hita marhamubaon. Diingot hamu do baoa na mangulahon parmainanon di Korint na dipabali sian huria? Marhamubaon do ibana jala ndang be mangihuthon hagiot ni daging. Marlas ni roha ma ibana muse manomba Jahowa.​—2 Kor. 2:6-8.

13 Sitiruon na denggan do baoa i. Nang pe sanga mangolu ”mangihuthon daging”, olo do ibana muba. Suang songon i, molo adong halak Kristen na mangihuthon hagiot ni daging sian na mangihuthon patik ni Jahowa, boi do ibana marhamubaon. Mangingot sipasingot ni si Paulus mambahen hita rade marhamubaon.

MAMINGKIRHON ANGKA NA HOMBAR TU PARTONDION

14, 15. (a) Aha do na didok si Paulus asa tapingkirhon? (b) Aha do na boi ro tu pingkiran ni halak taringot lapatan ni mamingkirhon angka na hombar tu partondion?

14 Dung didok si Paulus bahaya ni mamingkirhon hagiot ni daging, didok ibana ma, ”Hangoluan jala hadameon do anggo harohaon ni Tondi.” Pasupasu na palashon rohanta!

15 Mamingkirhon angka na hombar tu partondion, ndang na gabe holan taringot Jahowa dohot Bibel na tapingkirhon dohot na tahatai. Umpamana, pingkirhon ma halak Kristen di abad na parjolo. Marlas ni roha do nasida mangan, minum, marhasohotan, marianakhon, jala karejo.​—Mrk. 6:3; 1 Tes. 2:9.

Manomba Debata do na rumingkot di si Paulus

16. Aha do na rumingkot di ngolu ni si Paulus?

16 Ndang dipaloas si Paulus dohot halak Kristen di abad na parjolo angka ulaon on gabe rumingkot di ngoluna. Taboto do si Paulus mangalului hepeng marhite mambahen tenda. Alai, ndang gabe i na rumingkot di ngoluna. Manomba Debata do na rumingkot di si Paulus. Marsitutu do ibana marbarita dohot mangajar. (Jaha Ulaon ni Apostel 18:2-4; 20:20, 21, 34, 35.) Halak Kristen di Rom porlu maniru si Paulus, suang songon i ma hita.​—Rom 15:15, 16.

17. Aha do laba na tadapot molo tapingkirhon angka na hombar tu partondion?

17 Songon dia do ngolunta molo tongtong manomba Jahowa? Rom 8:6 mandok, ”Hangoluan jala hadameon do anggo harohaon ni Tondi.” Tapaloas ma tondi parbadia manogunogu pingkiranta jala tatiru ma cara  ni Jahowa marpingkir. Marjanji do Jahowa mambahen martua ngolunta jala mangalehon ngolu salelengna.

Mandok mauliate ma hita tu Jahowa ala boi dame pingkiranta

18. Songon dia do hita boi mandapot hadameon molo tapingkirhon angka na hombar tu partondion?

18 Aha do lapatan ni ”harohaon ni Tondi” parohon dame na didok si Paulus? Lomo do roha ni sude halak mangkilala hadameon, tarlumobi pingkiran na dame. Alai saotik do na mangkilala i. Mandok mauliate ma hita tu Jahowa ala boi dame pingkiranta. Hita pe mardame tu keluarga dohot dongan di huria. Ala mardosa dope hita, olo do ra adong parsoalanta tu angka dongan sahaporseaon. Molo masa i, ihuthon ma poda ni Jesus, ”Jolo mardenggan dohot donganmi.” (Mat. 5:24) Ingot ma, dongan sahaporseaonta pe manomba Jahowa, ”Debata Pardame”.​—Rom 15:33; 16:20.

19. Hadameon na songon dia do muse na boi tahilala?

19 Molo sai tapingkirhon angka na hombar tu partondion, hita pe boi mardame tu Debata. Panurirang Jesaya manurat, ”Hombar tu sangkap na ojak do dipaian ho [Jahowa] dame, dame ma tutu, ai marnalom ni roha mida ho do ibana.”​—Jes. 26:3; jaha Rom 5:1.

20. Boasa mandok mauliate hita ala dilehon poda di Rom bindu 8?

20 Ndang soal mangkirim mangolu di surgo manang di tano on, tadapot do laba sian Rom bindu 8. Mandok mauliate do hita ala adong Bibel na mangurupi hita tongtong manomba Jahowa jala ndang mangkaringkothon diri sandiri. Molo tapingkirhon na hombar tu partondion, tadapot ma pasupasu. Si Paulus manurat, ”Basabasa ni Debata do hangoluan salelenglelengna marhitehite Kristus Jesus Tuhanta i.”​—Rom 6:23.