Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

”Gohi ma Janjimuna”

”Gohi ma Janjimuna”

”Tepati ma janjim di jolo ni Jahowa.”MATEUS 5:33, Bibel siganup ari.

ENDE: 18, 7

1. (a) Aha do na mambahen dos si Jepta dohot si Hanna? (Ida gombar di mula ni parsiajaran.) (b) Sungkunsungkun aha do na laho taulas?

SAHALAK pamimpin jala tentara na barani do si Jepta. Si Hanna, i ma borua na marserep ni roha na mamparrohahon keluargana. Sisomba Jahowa do nasida na dua, jala dos do na diulahon si Jepta dohot si Hanna. Hea do nasida marjanji tu Jahowa, jala digohi nasida do janjina i. Gabe sitiruon do nasida tu angka jolma na laho mambahen janji tu Jahowa. Saonari, taulas ma tolu sungkunsungkun on: Aha do lapatan ni janji? Boasa ingkon tagohi janjinta tu Debata? Parsiajaran aha do na tadapot sian si Jepta dohot si Hanna?

2, 3. (a) Aha do lapatan ni janji? (b) Aha do na didok Bibel taringot mambahen janji tu Debata?

2 Di Bibel, janji, i ma padan na tabahen tu Debata. Umpamana, olo do ra sasahalak marjanji tu Jahowa asa lam denggan marparange, mangalehon silehonlehon, mangalehon gumodang tingki tu Ibana, manang pasidingkon ulaon na roa. Ingkon sian rohanta sandiri do janji na tabahen, ndang ala na dipaksa. Di adopan ni Jahowa,  molo nunga marjanji hita, ringkot do i tagohi. Di Bibel, dipatudos do janji i songon sumpa. Sumpa, i ma janji ni sasahalak laho mangulahon sada ulaon manang ndang mangulahon ulaon i. (1 Mus. 14:22, 23; Heb. 6:16, 17) Songon dia do didok Bibel taringot manggohi janjinta tu Debata?

3 Di Patik ni si Musa, molo adong na marjanji tu Jahowa, ”na so tupa ubaonna hatana, ingkon hombar tu saluhut na ruar sian pamanganna bahenonna”. (4 Mus. 30:3) Si Salomo mandok, ”Molo marbagabaga ho tu Debata, unang [ganggu] ho pasahathon, ai ndang lomo rohana mida halak na oto i. Manang aha pe naung binagabagahonmu, ingkon gararonmu do i.” (Pjm. 5:3) Jesus mandok, ringkot do manggohi janji tu Debata. Didok ibana, ”Hata na tu angka ompu na robi: ”Ndang jadi tolononmu na tutu! Naung saut diuarihon ho tu Debata, ingkon gararonmu do!””—Mat. 5:33.

4. (a) Boasa ringkot manggohi janji tu Debata? (b) Aha do na laho taparsiajari taringot tu si Jepta dohot si Hanna?

4 Mansai ringkot do manggohi janjinta tu Jahowa. Molo tagohi janjinta, togu ma paralealeonta tu Jahowa. Dipatangkas si Daud do on muse tingki didok, ”Ise ma patut nangkok tu dolok ni Jahowa? Ise ma na boi masuk tu joroNa na badia i?” Didok ibana, i ma halak ”na so olo marjanji palsu”. (Ps. 24:3, 4, Bibel siganup ari) Taulas ma aha do janji ni si Jepta dohot si Hanna tu Jahowa? Mura do di nasida laho manggohi janji i?

DIGOHI NASIDA DO JANJINA TU DEBATA

5. Aha do janji ni si Jepta? Aha do pangkorhonna?

5 Marjanji do si Jepta tu Jahowa tingki laho mangalo halak Amon, i ma musu ni naposo ni Debata. (Pangh. 10:7-9) Dipangido si Jepta do tu Jahowa asa monang ibana, jala marjanji do ibana, ”Molo dipasahat Ho halak Amon tu bagasan tanganku: Manang aha na ruar parjolo sian pintu ni bagashu manomunomu ahu, di na mulak ahu marsonangsonang sian halak Amon, ingkon Jahowa nampunasa.” Dialusi Debata do tangiangna jala diurupi do ibana gabe monang. Tingki mulak tu jabu, boruna do na parjolo ro manomunomu ibana. Boruna i ma na gabe pelean tu Jahowa. (Pangh. 11:30-34) Aha do pangkorhon ni on tu boruna?

Marsihohot do si Jepta dohot boruna jala ndang olo mangose janjina tu Debata

6. (a) Mura do di si Jepta dohot boruna laho manggohi janjina tu Debata? (b) Sian 5 Musa 23:22, 24 dohot Psalmen 15:4, aha do na taparsiajari taringot tu janji?

6 Laho manggohi janji ni bapakna, ingkon laho ma boru ni si Jepta tu tabernakel asa marhobas tu Jahowa. Andorang so marjanji, na so jolo dipingkirhon  si Jepta do taringot i? Ndang songon i. Ra, diboto si Jepta do boruna na parjolo ro manomunomu ibana. Alai, nang pe diboto ibana manang na ndang, maol do di ibana dohot di boruna manggohi janjina i. Tingki diida si Jepta boruna i, malala ma ateatena. Dung i, laho ma boruna i mangandungi habajuonna ala ndang boi marhamulian. Boasa? Holan boruna i do ianakhon ni si Jepta, jala gabe ndang boi be boruna i marhasohotan dohot marianakhon. On mambahen ndang adong be na gabe pinompar ni si Jepta. Alai diboto si Jepta dohot boruna, adong do na rumingkot sian pangkilalaan ni nasida. Didok si Jepta, ”Nunga huungkap pamanganku marbagabaga tu Jahowa, jala ndang tartait ahu be.” Jala didok boruna, ”Bahen ma tu ahu marguru tu hata na ruar sian pamanganmu.” (Pangh. 11:35-39) Nang pe mansai maol, marsihohot do nasida na dua jala ndang olo mangose janjina tu Debata.Jaha 5 Musa 23:22, 24; Psalmen 15:4.

7. (a) Aha do janji ni si Hanna, jala boasa didok ibana songon i? Aha do hasilna? (b) Aha do pangkorhon ni janji ni si Hanna tu si Samuel? (Ida surat na di toru.)

7 Marjanji do si Hanna tu Jahowa tingki marsak ibana. Susa do ngoluna jala direhei ala ndang boi marianakhon. (1 Sam. 1:4-7, 10, 16) Dipatolhas si Hanna ma pangkilalaanna tu Jahowa, jala marjanji do ibana, ”Ale Jahowa Zebaot! Molo ditatap roham pardangolan ni naposomon, jala diingot Ho ahu, jala ndang halupahononmu naposomon, jala dilehon Ho tu naposomon sada anak, lehononku ma ibana muse tu Jahowa saleleng mangolu ibana, jala ndang jadi hona raut parnabung uluna.” * (1 Sam. 1:11) Ditangihon Jahowa do tangiang ni si Hanna. Dung salpu sataon, tubuan anak ma ibana, digoari ma anakna i si Samuel. Las situtu roha ni si Hanna! Alai diingot ibana do janjina tu Debata. Dung tubu si Samuel, didok si Hanna, ”Ai sian Jahowa ibana hupangido.”1 Sam. 1:20.

Rade do si Hanna mangulahon manang aha pe laho manggohi janjina tu Debata

8. (a) Mura do dihilala si Hanna manggohi janjina? (b) Songon dia do Psalmen 61 paingothon hamu taringot tu si Hanna?

8 Dung marumur tolu taon si Samuel, digohi si Hanna ma janjina tu Jahowa. Diboan ma si Samuel tu Sintua ni Malim Eli di tabernakel di Silo, jala didok, ”Dakdanak on do na hupangido uju i, gabe dibasabasahon Jahowa tu ahu na pinangido ni rohangku sian Ibana. Dibahen i ahu pe pasahatonku ma ibana tu Jahowa saleleng mangolu ibana; ai na pinangido di Jahowa do ibana.” (1 Sam. 1:24-28) Dungkon i, di tabernakel ma si Samuel tading. Didok di Bibel, ”magodang di adopan ni Jahowa  do ianggo si Samuel”. (1 Sam. 2:21) Tontu ndang mura dihilala si Hanna manggohi janjina i. Alana, ndang boi ibana rap dohot anakna ganup ari, jala ndang boi diida ibana si Samuel magodang. Nang pe songon i, digohi si Hanna do janjina tu Jahowa. Rade do ibana mangulahon manang aha pe laho manggohi janjina tu Debata.1 Sam. 2:1, 2; jaha Psalmen 61:2, 6, 9.

Digohi hamu do janjimu tu Jahowa?

9. Aha do muse na laho taulas?

9 Saonari, nunga taboto be ringkot ni manggohi janjinta tu Jahowa. Taulas ma sungkunsungkun on: Angka aha do janji na boi tabahen saonari? Aha do na ingkon taulahon asa tongtong mangingot janji i?

JANJI TARINGOT MANGALEHON DIRI TU JAHOWA

Janji taringot mangalehon diri (Ida paragraf 10)

10. Aha do janji na rumingkot na boi dibahen halak Kristen? Songon dia hita mangulahon i?

10 Janji na rumingkot di halak Kristen, i ma mangalehon diri tu Jahowa. Tingki talehon dirinta tu Jahowa marhite tangiang, marjanji do hita laho manomba Ibana saleleng ngolunta. Didok  Jesus, ingkon tasoadahon do dirinta. Ingkon Jahowa do na tajumolohon di ngolunta, ndang dirinta. (Mat. 16:24) Alani i, Jahowa nama nampuna hita. (Rom 14:8) Tongtong ma tagohi janjinta, asa sarupa pangkilalaanta songon panurat psalmen, ”Tung beha ma pamaloshu tu Jahowa, ala saluhut denggan ni uhumna i tu ahu! Gararonku ma angka bagabagangku tu Jahowa, apala di adopan ni sandok bangsona.”Ps. 116:12, 14.

11. Tingki tardidi hamu, patuduhon aha do i tu angka halak?

11 Nunga dilehon hamu dirimu tu Jahowa jala tardidi? Molo nunga, mansai denggan do i! Diingot hamu do tingki disungkun parjamita, nunga diboto hamu molo ”dilehon hamu dirimuna tu Jahowa jala tardidi, ditanda halak ma hamu gabe Sitindangi Ni Jahowa?” Tingki didok hamu nunga, diboto sude na ro ma naung dilehon hamu dirimu tu Jahowa, nunga rade hamu tardidi, jala manomba Jahowa. Mansai las do roha ni Jahowa di tingki i!

12. (a) Sungkunsungkun aha do na ingkon sai tasungkun tu dirinta? (b) Aha do na didok si Petrus asa taulahon?

12 Tingki tardidi, nunga marjanji hamu tu Jahowa na laho mangalehon ngolumuna manomba Ibana jala mangihuthon tudutuduNa. Alai, pandidion i holan mulana dope i. Porlu do tasungkun tu dirinta: ’Dungkon tardidi, lam solhot do paralealeonku tu Jahowa? Tongtong dope husomba Ibana sian nasa rohangku? (Kol. 3:23) Jotjot dope ahu martangiang? Hujaha do Bibel ganup ari? Ringgas dope ahu marpungu? Jotjot dope ahu marbarita? Manang gabe mago do hiras ni rohangku mangulahon on?’ Didok apostel Petrus, boi do parohon jea molo ndang hiras rohanta mangulahon ulaon partondion. Alai, boi do tapasiding i molo marsitutu hita patoguhon haporseaonta, parbinotoanta, habengetonta, jala marsihohot.Jaha 2 Petrus 1:5-8.

13. Aha do na porlu diingot sasahalak naung mangalehon diri jala tardidi?

13 Halak naung marjanji laho manomba Jahowa, ndang boi be mangose janjina i. Molo adong na mandok dirina ndang olo be gabe Sitindangi Ni Jahowa, ndang boi dohononna na so tutu ibana sian ias ni rohana mangalehon diri tu Jahowa tingki tardidi. * Molo adong na mangalehon diri tu Jahowa hape mangulahon dosa na balga, ingkon martanggung jawab do ibana tu Jahowa dohot tu huria. (Rom 14:12) Ndang olo hita songon halak na didok Jesus, ”naung tinadingkonmu holong ni roham na di mulana i”. Alai, lomo rohanta asa didok tu hita, ”Huboto do angka ulaonmu dohot holong ni roham dohot haporseaonmu ro di pangkobasionmu, nang benget ni roham; huboto, gumodang do ulaonku parpudi sian angka na parjolo i.” (Pgk. 2:4, 19) Lomo rohanta mambahen las roha ni Jahowa hombar tu janjinta.

 JANJI TARINGOT PARSARIPEON

Janji taringot parsaripeon (Ida paragraf 14)

14. Aha do muse janji na ringkot na ingkon dibahen sasahalak? Jala boasa?

14 Janji na asing na ringkot dibahen sasahalak, i ma janji di parsaripeon. Badia do parsaripeon i, jala mansai ringkot di adopan ni Jahowa. Tingki na mardongansaripe mambahen padan, nunga marjanji nasida di adopan ni Jahowa dohot di jolo ni natorop. Marjanji do nasida asa masihaholongan, marlas ni roha, jala mangargai dongan saripena saleleng nasida na dua mangolu di tano on mangihuthon uhum ni Debata taringot parsaripeon. Ra ndang sarupa hata na dipangke halak laho marpadan di parsaripeon di inganan na asing. Alai, dos do padan i di adopan ni Debata. Tingki marpadan, nasida na dua nunga gabe na mardongan saripe. Lapatanna, ingkon marsada ma nasida salelengna. (1 Mus. 2:24; 1 Kor. 7:39) Jesus mandok, ”Naung pinadomu ni Debata, ndang jadi sirangon ni jolma!” Unang ma tubu di roha ni na mardongan saripe boi nasida marsirang molo ndang martua parsaripeonna.Mrk. 10:9.

15. Boasa ingkon imbar pangantusion ni Sitindangi Ni Jahowa tu halak na asing taringot parsaripeon?

15 Ala mardosa do sude jolma, ndang adong parsaripeon na sempurna. Alani i ma didok di Bibel, ”marniae di daging” do na marsaripe. (1 Kor. 7:28) Saonari, godang do na so parduli tu parsaripeonna. Didok rohana, molo ndang martua parsaripeonna, tumagon ma marsirang. Alai, ndang songon i pangantusion ni Sitindangi Ni Jahowa taringot parsaripeon. Alana, marjanji do nasida di adopan ni Debata asa marsihohot tu dongan saripena. Molo ndang digohi nasida janjina i, on patuduhon na margabus do nasida tu Debata, jala ndang lomo roha ni Debata mangida pargabus. (3 Mus. 19:12; Poda 6:16-19) Ingkon diingot angka na marsaripe do hata ni si Paulus na mandok, ”Adong do niolim? Unang ma sirangkon ibana.” (1 Kor. 7:27, Bibel siganup ari) Didok si Paulus songon i, ala diboto ibana ndang lomo roha ni Debata Jahowa mangida parsirangan.Mal. 2:13-16.

16. Aha do na didok Bibel taringot parsirangan dohot padaodao?

16 Didok Jesus, sasahalak boi marsirang molo dongan saripena mangulahon parmainanon jala ndang olo ibana manalpuhon hasalaan ni dongan saripena i. (Mat. 19:9; Heb. 13:4) Songon dia do taringot padaodao? Tangkas do hatorangan ni Bibel taringot on. (Jaha 1 Korint 7:10, 11.) Ndang adong dipaboa di Bibel angka aha na mambahen sasahalak boi padaodao. Alai sipata, adong do situasi na mambahen halak na mardongan saripe gabe padaodao. Umpamana, molo dongan saripena mambahen gabe sega paralealeonna tu Jahowa manang kejam tu ibana. *

17. Aha do na ingkon diulahon na marsaripe asa tongtong hot parsaripeonna?

17 Molo dipangido na mardongan saripe  poda tu sintua taringot parsaripeon, ingkon dijujui angka sintua do nasida manonton video Apa itu Cinta Sejati? dohot mamparsiajari brosur Keluargamuna Boi do Martua. On mambahen nasida mamboto prinsip sian Bibel laho patoguhon parsaripeon. Na mardongan saripe mandok, ”Dung diparsiajari hami buku on, lam martua ma parsaripeonnami.” Adong donganta borua naung marhasohotan saleleng 22 taon. Dirimpu ibana, ndang boi be hot parsaripeonna. Ditonton ibana ma video i. Didok ma, ”Nunga tardidi hami na dua, alai mansai imbar do parangenami. Pas situtu do video on tu hami! Gabe lam denggan parsaripeonnami.” Molo diulahon na mardongan saripe do prinsip ni Jahowa, lam togu ma parsaripeonna jala marlas ni roha.

JANJI NI SASAHALAK NA MANGALEHON SUDE TINGKINA MARHOBAS TU DEBATA

18, 19. (a) Aha do naung diulahon angka natuatua ni Sitindangi Ni Jahowa? (b) Janji aha do na dibahen angka halak na mangalehon sude tingkina marhobas tu Debata? Songon dia do nasida manggohi janji i?

18 Nunga taulas taringot si Jepta dohot si Hanna na mambahen janji tu Jahowa. Ala naung marjanji, dilehon boru ni si Jepta dohot si Samuel ma ngolu ni nasida asa manomba Jahowa saleleng ngoluna. Saonari, godang do natuatua na manjujui ianakhonna asa mangalehon sude tingkina, jala mangalehon ngolu ni nasida marhobas tu Debata. Hita pe, boi do manjujui angka na poso asa tongtong dohot di ulaon i.Pangh. 11:40; Ps. 110:3.

Janji ni sasahalak na mangalehon sude tingkina marhobas tu Debata (Ida paragraf 19)

19 Saonari, adong hirahira 67.000 halak di Ordo ni na Mangalehon Sude Tingkina Marhobas tu Debata sian Sitindangi Ni Jahowa di Liat Portibi On. Adong na mangurupi di Betel, ulaon pajongjongkon inganan na laho pangkeon ni organisasi, manang ulaon di sada wilayah. Adong na gabe instruktur lapangan, perintis istimewa, misionaris, parhobas na mangaradoti Inganan Kebaktian, manang parhobas na mangaradoti inganan tu singkola Bibel. Nunga dibahen nasida ”Ikrar Ketaatan dan Kesahajaan”. Marjanji do nasida asa marsitutu mangulahon tanggung jawab na dilehon, ndang marsangkap naeng mamora, jala ndang karejo mangalului hepeng molo so dipaloas. Tugas i do na sumurung ndang halakna. Serep do roha ni nasida jala marsitutu asa tongtong manggohi janjina saleleng nasida gabe sahalak na mangalehon sude tingkina marhobas tu Debata.

20. Ingkon songon dia do pangantusionta taringot janjinta tu Debata? Jala boasa?

20 Di artikel on, nunga taulas tolu janji na boi tabahen tu Debata. Ra, nunga dibahen hamu sada sian janji on. Nunga taboto, ringkot do manggohi janji naung tabahen. (Poda 20:25) Molo ndang tagohi janjinta tu Jahowa, parohon jea do i tu hita. (Pjm. 5:5) Alani i, tatiru ma panurat psalmen na mandok tu Jahowa, ”Asa huendehon goarmu salelenglelengna, manggarari angka bagabagangku ganup ari.”Ps. 61:9.

^ par. 7 Marjanji do si Hanna tu Jahowa, molo adong anakna, gabe halak Nasir ma anakna i saleleng ngoluna. Lapatanna, dilehon ma anakna i asa marhobas tu Jahowa.4 Mus. 6:2, 5, 8.

^ par. 13 Manat do dipingkirhon angka sintua taringot syarat ni sasahalak na laho tardidi. Alani i, ndang boi dohonon sasahalak i ndang sah tardidi.

^ par. 16 Ida Lampiran ”Na Didok Bibel taringot Parsirangan dohot Padaodao” di buku ”Tongtong ma di Bagasan Holong ni Roha ni Debata”.