Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon—Edisi Siparsiajaran  |  April 2017

Ditiru Hamu do Pangkilalaan ni Jahowa Taringot Hatigoran?

Ditiru Hamu do Pangkilalaan ni Jahowa Taringot Hatigoran?

”Baritahononku ma Goar ni Jahowa . . . , sihaposan do Debata, ndang adong hageduhonna.”5 MUSA 32:3, 4.

ENDE: 15, 2

1, 2. (a) Aha do na masa tu si Nabot dohot ianakhonna? (b) Dua parange aha do na laho taulas di artikel on?

ADONG dua baoa na patubutubu hata na so tutu taringot sahalak baoa. Alai, margabus do baoa na dua i. Gabe disalahon ma sahalak baoa i jala naeng dipamate. Rimangi ma songon dia pangkilalaan ni halak na mangkaholongi hatigoran tingki mangida baoa i dohot anakna didangguri sampe mate! On ma na masa tu si Nabot, naposo ni Jahowa di tingki ni Raja Ahab mamarenta di Israel.1 Raj. 21:11-13; 2 Raj. 9:26.

2 Di artikel on, taulas ma aha na masa tu si Nabot. Taulas ma muse taringot hasalaan na diulahon sahalak sintua di huria Kristen di abad na parjolo. Sian on, taboto ma songon dia serep ni roha dohot asi ni roha mansai tahaporluhon molo naeng tatiru hatigoran ni Jahowa.

 PARNIULAON NA SO TIGOR

3, 4. Halak na songon dia do si Nabot, jala boasa ndang olo ibana manggadis porlak ni anggurna tu Raja Ahab?

3 Godang do halak Israel mangihuthon hajahaton ni Raja Ahab dohot tungganeboruna, si Izebel. Alai marsihohot do si Nabot tu Jahowa. Baal do na disomba nasida jala ndang dioloi nasida Jahowa dohot patikNa. Alai di si Nabot, ummarga do paralealeonna tu Jahowa sian ngoluna sandiri.

4 Jaha 1 Rajaraja 21:1-3. Didok si Ahab ma asa digadis si Nabot porlak anggurna i. Lehononna do muse porlak anggur na dumenggan tu si Nabot. Alai, ndang olo si Nabot. Boasa? Didok si Nabot, ”Dao ma i sian ahu bahenon ni Jahowa, anggo tung lehononku tu ho tadingtadingan ni damang.” Ndang dioloi si Nabot pangidoan ni Raja Ahab. Alana, di Patik ni Jahowa, ndang boi halak Israel manggadis tano tadingtadingan. (3 Mus. 25:23; 4 Mus. 36:7) Taboto ma, unduk do si Nabot tu Jahowa.

5. Aha do na diulahon si Izebel asa boi mandapot porlak anggur ni si Nabot?

5 Ala ndang olo si Nabot manggadis porlak i, marsangkap na jahat ma si Ahab dohot si Izebel tu si Nabot. Asa boi dapotna porlak i, disuru si Izebel ma dua baoa mandok molo si Nabot mangulahon hajahaton, hape ndang tutu i. Ujungna, dipamate ma si Nabot dohot anakna. Aha do na diulahon Jahowa tingki mamboto situasi on?

HATIGORAN NI DEBATA

6, 7. Songon dia do Jahowa patuduhon na tigor do Ibana, jala boasa on boi mangapuli roha ni keluarga dohot aleale ni si Nabot?

6 Pintor disuru Jahowa ma si Elia manjumpangi si Ahab, jala didok si Elia ma si Ahab i pambunu jala panangko. Aha do na diulahon Jahowa? Ingkon dipamate do si Ahab dohot keluargana, songon naung diulahon si Ahab tu si Nabot.1 Raj. 21:17-25.

7 Marhabot ni roha situtu do keluarga dohot aleale ni si Nabot alani pambahenan ni si Ahab. Alai, diboto Jahowa do situasi i jala pintor dipatudu do hatigoranNa. On ma na mangapuli roha ni nasida. Alai, taida ma songon dia serep ni roha dohot haporseaon ni nasida diuji.

Didok si Elia, ala nunga dipatoruk si Ahab dirina, ndang jadi uhumon ni Jahowa ibana

8. Aha do na diulahon si Ahab tingki mambege sipasingot ni Jahowa, jala aha do pangkorhonna?

8 Tingki dibege si Ahab na laho uhumon ni Jahowa ibana, ”gabe diribahi ma pangkeanna, jala disolukkon abit tangki tu dagingna huhut marpuasa ibana, jala modom marabit tangki, jala tungki mardalan”. Dipatoruk si Ahab ma dirina! Dung i, aha na masa? Didok Jahowa ma tu si Elia,  ”Ala naung pinaundukna i dirina maradophon Ahu, ndang paroonku jea i saleleng mangolu ibana, di ngolu ni anakna pe paroonku jea tu pinomparna.” (1 Raj. 21:27-29; 2 Raj. 10:10, 11, 17) Marasi ni roha do Jahowa tu si Ahab, ala Ibana do ”na manguji angka roha”, na mamboto taringot dirinta na sasintongna.Poda 17:3.

MANSAI RINGKOT DO MARSEREP NI ROHA

9. Boasa keluarga dohot aleale ni si Nabot ingkon marserep ni roha?

9 Diuji do haporseaon ni keluarga dohot aleale ni si Nabot tingki dibege molo keluarga ni si Ahab ndang jadi diuhum Jahowa sahat tu na mate ibana. Alai, serep ni roha mangurupi nasida tongtong marhaporseaon, manomba Jahowa, jala porsea ndang hea diulahon Debata na so tigor. (Jaha 5 Musa 32:3, 4.) Di ari na naeng ro, dipasupasu ma keluarga ni si Nabot dung diida nasida si Nabot dipahehe. On ma hatigoran na dipatudu Jahowa tu si Nabot dohot ianakhonna. (Job 14:14, 15; Joh. 5:28, 29) Diboto halak na marserep ni roha, ”nasa parulaon ni jolma boanon ni Debata sogot  tu paruhuman ro di saluhut na buni, nang na denggan nang na jat”. (Pjm. 12:14) Diboto Jahowa do na masa na so taboto. Alani i, serep ni roha mangurupi hita marhaporseaon tu Jahowa.

Serep ni roha mangurupi hita marhaporseaon tu Jahowa

10, 11. (a) Situasi aha do na manguji hatigoranta? (b) Songon dia do serep ni roha boi mangurupi hita?

10 Molo ndang diantusi hamu jala ndang boi dijalo rohamu angka na ditontuhon sintua, songon dia do hamu maradophon i? Aha do ulahononmu molo hamu manang sasahalak na dihaholongi hamu ndang be mandapot hak na sumurung di organisasi? Songon dia do molo dongan saripemu, ianakhonmuna, manang alealemuna dipabali sian huria, jala ndang tarjalo rohamuna i? Aha do ulahononmu molo dipatudu sintua asi ni roha tu sasahalak na mangulahon dosa? Situasi on boi manguji haporseaonta tu Jahowa dohot tu caraNa manguluhon huria saonari. Molo diadopi hamu sisongon i, songon dia do serep ni roha mangurupi hamu? Taulas ma dua carana.

Molo adong boaboa sian sintua na so tarjalo rohamuna, songon dia do hamu maradophon i? (Ida paragraf 10, 11)

11 Na parjolo, molo serep rohanta, taangkui ma ndang taboto sude na masa. Nang pe taboto sude na masa taringot situasi i, holan Jahowa do na mamboto roha. (1 Sam. 16:7) Molo taingot on, taangkui ma adong dope hahuranganta jala porlu manguba caranta marpingkir. Na paduahon, molo taadopi parniulaon na so tigor, serep ni roha mangurupi hita tongtong unduk jala paimahon Jahowa padengganhon situasina. Didok di Bibel, ”Martua sogot halak na mangkabiari Debata.” Didok muse, ”Alai ndang tagamon sonang anggo halak parjahat i, jala ndang tagamon paganjangonna ariarina.” (Pjm. 8:12, 13) Molo tongtong marserep ni roha, sude hita boi mandapot laba.Jaha 1 Petrus 5:5.

PARNIULAON NA SO TIGOR DI HURIA

12. Aha do na laho taulas saonari, jala boasa?

12 Di abad na parjolo, adong situasi na manguji serep ni roha dohot asi ni roha ni halak Kristen di Antiokia Siria. Huhut mangulas on, tapareso ma pangantusionta taringot manalpuhon hasalaan. On mangurupi hita mangantusi boasa dilehon Jahowa tanggung jawab tu jolma na mardosa, alai tongtong mangihuthon patik dohot uhumNa.

13, 14. Aha do tanggung jawab na dilehon tu apostel Petrus, jala songon dia do ibana patuduhon habaranion?

13 Apostel Petrus, i ma sahalak sintua na ditanda godang halak Kristen di abad na parjolo. Aleale ni Jesus do ibana jala dilehon do tanggung jawab na ringkot tu ibana. (Mat. 16:19) Umpamana  taon 36 M, disuru do si Petrus marbarita tu si Kornelius dohot tu keluargana. Boasa ringkot on? Alana, halak na so Jahudi do si Kornelius, na so marsunat. Tingki si Kornelius dohot keluargana mandapot tondi parbadia, didok si Petrus ma boi do nasida tardidi gabe halak Kristen. Didok ibana, ”Hum ma roha mangorai didion nasida on, angka naung manjalo Tondi Parbadia i songon hami?”Ul. 10:47.

14 Taon 49 M, marrapot ma angka apostel dohot sintua di Jerusalem laho manontuhon taringot sunat tu halak Kristen na so Jahudi. Tingki i, barani do si Petrus paboahon taringot halak na so Jahudi na so marsunat mandapot tondi parbadia. Pengalaman ni si Petrus mangurupi punguan na mangaradoti organisasi manontuhon taringot on. (Ul. 15:6-11, 13, 14, 28, 29) Tontu, mandok mauliate do halak Kristen Jahudi dohot na so Jahudi ala barani si Petrus paboahon aha na masa. Gabe pos ma rohanasida mangihuthon si Petrus!Heb. 13:7.

15. Aha do hasalaan na diulahon si Petrus tingki di Antiokia Siria? (Ida gombar di mula ni parsiajaran.)

15 Dung sae marrapot di Jerusalem, laho ma si Petrus tu Antiokia Siria. Disi, rap do ibana dohot dongan sahaporseaon na so halak Jahudi. Boi ma tarimangi mansai lomo rohanasida marsiajar sian parbinotoan dohot pengalaman ni si Petrus. Alai, ala tompu si Petrus ndang olo be rap mangan dohot nasida, tarsonggot jala hansit ma rohanasida. Didok si Petrus muse tu halak Kristen Jahudi na asing, dohot ma i si Barnabas, asa mangulahon na sarupa. Boasa diulahon si Petrus songon i, na mambahen huria gabe ndang marsada? Aha do na taparsiajari sian hasalaanna, na mangurupi hita tingki hansit rohanta alani pangkataion dohot parniulaon ni sintua?

Songon dia do pangkilalaan ni halak Kristen na so Jahudi mangida si Petrus?

16. Songon dia do si Petrus dipasingot, jala sungkunsungkun aha do na ro tu rohanta?

16 Jaha Galatia 2:11-14. Gabe mabiar do si Petrus tu jolma. (Poda 29:25) Diboto si Petrus do naung dijangkon Jahowa halak na so Jahudi. Alai, mabiar do ibana ala mamingkirhon songon dia pangantusion ni halak Kristen Jahudi tu ibana molo marsaor ibana tu halak Kristen na so Jahudi. Didok si Paulus ma tu si Petrus molo ibana munafik. Boasa? Alana, dibege si Paulus do hata na nidok ni si Petrus taringot tu halak na so Jahudi, tingki marrapot nasida di Jerusalem taon 49 M. (Ul. 15:12; Gal. 2:13) Songon dia do pangkilalaan ni halak Kristen na so Jahudi mangida si Petrus? Gabe gale do partondion ni nasida? Alani hasalaanna i, adong dope hak na sumurung di si Petrus?

 RADE MANALPUHON HASALAAN

17. Aha do laba na didapot si Petrus sian asi ni roha ni Jahowa?

17 Serep do roha ni si Petrus jala dijalo do sipasingot ni si Paulus. Ndang dipaboa di Bibel molo si Petrus ndang be mandapot hak na sumurung alani i. Alana di pudian ni ari, disurat ibana do dua surat di Bibel. Di surat na paduahon, didok ibana do si Paulus ”dongan haholonganta”. (2 Ptr. 3:15) Ra, hansit do roha ni halak Kristen na so Jahudi tu si Petrus. Alai, tongtong do dilehon Jesus hak na sumurung tu ibana. (Eps. 1:22) On ma tingkina di nasida asa maniru Jahowa dohot Jesus, na rade manalpuhon hasalaan ni si Petrus. Sai anggiat ma ndang gale partondionta ala mamboto hasalaan ni sasahalak.

18. Tingki sadihari do hita porlu maniru hatigoran ni Jahowa?

18 Dos songon di abad na parjolo, ndang adong sintua na tipak di hurianta saonari. Didok di Bibel, ”Saluhut hita jotjot marsala.” (Jak. 3:2) Mura do mangingot on. Alai, songon dia do molo hita sandiri na mangadopi hahurangan ni dongan sahaporseaon? Olo do hita maniru hatigoran ni Jahowa? Umpamana, molo adong sintua na mandok hata na so haru sintong taringot hita, songon dia do hita maradophon i? Gabe gale do partondionmu ala didok sintua i hata na mambahen hansit rohamu? Unang ma pintor didok hamu ndang tama ibana gabe sintua. Alai, olo do hamu paimahon Jesus na gabe ulu ni huria padengganhon situasina? Unang ma holan hasalaanna i na dipingkiri hamu. Olo do hamu mangingot angka na denggan na diulahon ibana? Molo adong donganta mambahen hasalaan tu hamu, alai tongtong ibana gabe sintua jala mandapot gumodang tanggung jawab, las do rohamu mangida ibana? Molo rade hamu manalpuhon hasalaan, on patuduhon nunga ditiru hamu hatigoran ni Jahowa.Jaha Mateus 6:14, 15.

19. Aha do na ingkon tongtong taulahon?

19 Ala holong rohanta mangida hatigoran, tarpaima do hita tingki Jahowa mangaripashon Sibolis dohot parjahat, jala ndang adong be parniulaon na so tigor. (Jes. 65:17) Andorang so masa i, molo taadopi parniulaon na so tigor, taangkui ma ndang taboto sude na masa taringot situasi i jala tasalpuhon ma hasalaan ni halak maradophon hita. Molo taulahon songon i, nunga tatiru hatigoran ni Jahowa.