Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon—Edisi Siparsiajaran  |  April 2017

Anggiat ma Girgir ni Rohamu Parohon Sangap tu Jahowa!

Anggiat ma Girgir ni Rohamu Parohon Sangap tu Jahowa!

”Pinuji ma Jahowa,  . . . ala girgir roha ni bangso i sumeahon dirina.”PANGUHUM 5:2.

ENDE: 40, 10

1, 2. (a) Aha do na didok si Elipas dohot si Bildad taringot pangkilalaan ni Jahowa tu pangkobasionta? (b) Aha do na didok Jahowa taringot on?

LOBI sian 3.000 taon naung salpu, adong tolu baoa na mangkatai tu naposo ni Debata na margoar si Job. Sada sian nasida, i ma si Elipas na sian Teman. Didok ibana ma tu si Job, ”Tung tarbahen baoa ma manumpak Debata? Ndada manumpak tu dirina sambing do halak na marroha i. Tung adong ma tagamon gunana di Debata Nasunhinagogo, molo dipintori ho dirim? Manang tung adong ma untungna sian i molo dipadaulat ho pangalahom?” (Job 22:1-3) Didok si Elipas, ndang marguna jolma i di adopan ni Debata. Baoa na asing, i ma si Bildad na sian Sua, na mandok ndang boi jolma gabe sintong di adopan ni Debata.Jaha Job 25:4.

Sian Debata do angka na denggan na adong di hita, jala diparrohahon do caranta mamangke i

2 Marsitutu do si Elipas dohot si Bildad asa diboto si Job marisuang do ulaonna manomba Jahowa. Lomo roha ni nasida asa porsea si Job na sarupa do jolma tu ngitngit, gilokgilok, manang gea di adopan ni Debata. (Job 4:19;  25:6) Ndang ala na serep roha ni nasida umbahen didok songon i. (Job 22:29) Tutu do, mansai gogo do Jahowa jala mansai metmet do hita molo dipatudos tu Ibana. Molo taida sian sada dolok manang sian jandela ni pesawat, taboto ma mansai metmet do hita jala ndang ringkot. Alai, songon i do pangkilalaan ni Jahowa mangida hita na marsitutu mangkaringkothon HarajaonNa? Ndang songon i! Didok Jahowa do na margabus si Elipas, si Bildad, dohot si Sopar. Dung i didok Debata, las do rohaNa mangida si Job jala didok do si Job ”naposongku”. (Job 42:7, 8) Pos ma rohanta, marguna do jolma na mardosa di adopan ni Debata.

AHA NA LAHO SILEHONONMU TU DEBATA?

3. Aha do na didok si Elihu taringot tu ulaonta manomba Jahowa? Aha do lapatan ni hatana i?

3 Sahalak baoa na poso na margoar si Elihu manangihon pangkataion ni si Job dohot tolu baoa i. Dung sae pangkataion i, disungkun si Elihu ma si Job taringot tu Jahowa, ”Molo tung pintor ho, aha ulina sian i lehononmu? Manang tung aha ma jaloonna sian tanganmu?” (Job 35:7) Sarupa do hata ni si Elihu tu hata ni baoa na tolu i? Ndang sarupa. Alana, holan baoa na tolu i do na dipasingot Jahowa. Didok si Elihu, nang pe ndang tasomba Jahowa, ndang adong pangkorhon ni i tu Jahowa. Ndang adong na hurang di Jahowa. Ndang adong na boi mambahen Ibana gabe gumogo manang ummora. Sasintongna, sian Debata do angka na denggan na adong di hita, jala diparrohahon do caranta mamangke i.

4. Molo burju hita tu na asing, songon dia do pangkilalaan ni Jahowa?

4 Di adopan ni Jahowa, molo tahaholongi dongan sahaporseaon, dos do i songon na patuduhon holong tu Ibana. Didok di Poda 19:17, ”Na pasali Jahowa do manang ise na mardenggan basa tu na pogos, jala Ibana mamaloshon denggan basana i tu ibana.” Tingki tapatudu asi ni roha tu na asing, diparrohahon Jahowa do i. Nang pe Jahowa na manompa saluhutna, di adopanNa, songon na pasali Ibana do molo taulahon songon i. BaloshononNa do pambahenanta i marhite pasupasu, jala diangkui Jesus do taringot on.Jaha Lukas 14:13, 14.

5. Sungkunsungkun aha do na laho taulas saonari?

5 Di tingki naung salpu, dipangido Jahowa do si Jesaya asa mewakili Ibana jala mangulahon ulaon na sumurung. (Jes. 6:8-10) Dioloi si Jesaya do i jala didok, ”Dison do ahu, suru ma ahu!” Saonari pe, dilehon Jahowa do hak na sumurung tu jolma laho mangulahon ulaonNa. Sarupa do pangkilalaan ni marribu naposo ni Jahowa tu pangkilalaan ni si Jesaya. Rade do nasida mangulahon tanggung jawab  na marasingasing di marragam inganan jala rade mangadopi marragam situasi dohot ambatambat. Alai adong do na mandok songon on tu dirina: ’Girgir do rohangku mangulahon ulaon na dihalomohon Jahowa. Alai tutu do ringkot na huulahon? Nang pe ndang dohot ahu mangulahon i, boi do Jahowa pasauthon sangkapNa.’ Hea do dihilala hamu songon i? Saonari, asa boi taalusi sungkunsungkun on, taulas ma na masa tu dua naposo ni Jahowa, i ma si Debora dohot si Barak.

DIURUPI DEBATA DO NAPOSONA ASA BARANI

6. Sasintongna, boasa mura di tentara ni si Jabin laho manaluhon halak Israel?

6 Sahalak tentara ni Israel do si Barak. Alai si Debora, sahalak panurirang boruboru. Saleleng 20 taon, raja ni halak Kanaan, i ma si Jabin, manusai halak Israel. Ala mansai jahat jala kejam do tentara ni si Jabin, mabiar situtu ma halak Israel jala ndang barani manadingkon jabuna. Adong 900 hureta ni tentara ni si Jabin. Hape ndang godang ugasan ni halak Israel laho marporang.Pangh. 4:1-3, 13; 5:6-8. *

7, 8. (a) Aha do tudutudu na parjolo sian Jahowa tu si Barak? (b) Songon dia do halak Israel manaluhon tentara ni si Jabin? (Ida gombar di mula ni parsiajaran.)

7 Molo dipatudos tu tentara ni si Jabin, ndang margogo halak Israel jala mura ditaluhon. Alai marhite si Debora, didok Jahowa ma tu si Barak, ”Borhat ma ho, laho tu dolok Tabor, jala uluhon ma sampuluribu halak sian pinompar ni Naptali dohot Zebulon. Jala Ahu manjumpangkon tu ho, tu batang aek Kison, si Sisera partogi ni parangan ni si Jabin, ro di huretana dohot paranganna, jala Ahu pasahathon ibana tu tanganmi.”Pangh. 4:4-7.

8 Dung i, dilului ma halak na rade laho marporang. Ujungna, adong ma 10.000 halak na rade marporang jala marpungu ma nasida di Dolok Tabor. Dung i, laho ma si Barak dohot tentarana marporang tu Taanak. (Jaha Panguhum 4:14-16.) Diurupi Jahowa do halak Israel asa monang. Tompu ma ro udan habahaba jala margambo ma inganan i. On ma na mambahen halak Israel boi monang. Dilele si Barak ma tentara ni si Sisera hirahira 24 kilometer daona, sahat tu Haroset. Tingki di pardalanan, ndang boi mardalan hureta ni si Sisera ala nunga margambo sude inganan i. Laho ma ibana marlojong tu Zaannim, ra di jonok ni Kades. Tingki disi, laho ma si Sisera martabuni tu undungundung ni sahalak borua na margoar si Jael. Loja hian dihilala si Sisera, gabe tarpodom ma ibana. Tingki modom, dibunu si Jael ma ibana. (Pangh. 4:17-21) Dibahen Jahowa ma monang halak Israel! *

PANGANTUSION NA MARIMBAR

9. Aha do na taparsiajari sian Panguhum 5:20, 21 taringot parporangan tu si Sisera?

9 Molo tajaha Panguhum bindu 5, tadapot ma godang parsiajaran sian na  disurat di Panguhum bindu 4. Dipaboa di Panguhum 5:20, 21, ”Sian langit huhut marporang, marmusu tahe angka bintang sian pardalananna dompak si Sisera. Batang aek Kison mangaup nasida.” Molo tajaha ayat on, tutu do adong surusuruan na mangurupi halak Israel marporang? Manang, na diparo Debata do udan batu tingki i? Ndang adong dipatorang di Bibel. Alai na taboto, diparo Jahowa ma udan na mansai doras laho paluahon naposoNa, asa unang boi 900 hureta i mardalan. Molo tajaha Panguhum 4:14, 15, tolu hali dipaboa, Jahowa do na mandapot hasangapon ala marhamonangan halak Israel. Ndang adong nanggo sada sian 10.000 halak Israel i na gabe dipasangap ala marhamonangan.

10, 11. Didia do Meros i? Boasa i diburai?

10 Saonari taulas ma hatorangan na ringkot. Dungkon monang halak Israel, marende ma si Debora dohot si Barak mamuji Jahowa. On ma ende i, ”Pulasi hamu ma huta Meros, ninna suruan ni Jahowa, tung pulasi hamu pangisina, ala so ro nasida manolongi Jahowa, manolongi Jahowa dompak parangan angka na begu.”Pangh. 5:23.

11 Didia do Meros i? Ndang pola tangkas taboto. Ala diburai do Meros i gabe ndang boi tangkas taboto didia ingananna na sasintongna. Ra, Meros i huta ni angka halak na so olo mangihuthon si Barak tu parporangan. Ala dihaporluhon 10.000 halak laho mangalo halak Kanaan, tontu nunga dibege halak Meros taringot i. Ra, dibolus si Sisera do huta Meros tingki laho martabuni ibana, jala olo do ra diida nasida si Sisera martabuni asa boi malua! Sasintongna, boi do halak Meros manangkup si Sisera, alai ndang olo nasida mangulahon i. Boi hian do dohot nasida mangurupi asa saut sangkap ni Jahowa. Molo diulahon hian songon i, dipasupasu ma nasida. Alai ala ndang diulahon nasida songon i, ndang dapotna be pasupasu. Sian on taboto, imbar do halak Meros dohot si Jael na barani.Pangh. 5:24-27.

Tapareso ma pangkobasionta tu Jahowa

12. Aha do imbar ni parange ni jolma songon na disurat di Panguhum 5:9, 10? Aha do pangkorhonna tu hita?

12 Di Panguhum 5:9, 10, imbar do parange ni na 10.000 halak i tu ”angka na mangkunduli halode sihapaspili”, na so olo dohot tu parporangan i. Dipuji si Debora dohot si Barak ma ”angka siparenta Israel, dohot mida halak natorop i, angka na girgir sumeahon dirina sian lomona”. Halak na so olo dohot marporang didok songon ”na mangkunduli palano na uli” jala songon ”angka na mardalan pat”, na mangkaringkothon diri sandiri. Alai angka na rade marporang pintor mangihuthon si Barak tu dolok Tabor dohot tu rura Kison. Didok do tu angka na so olo marporang asa dipingkirhon boasa ndang olo nasida dohot marporang.  Saonari, tapareso ma pangkobasionta tu Jahowa.

13. Aha do imbar ni parange ni halak Ruben, Dan, dohot Aser tu halak Zebulon dohot Naptali?

13 Diida na 10.000 halak i do songon dia Jahowa gabe Natumimbul tingki di parporangan i. Dipaboa nasida do ”denggan basa ni Jahowa” tu na asing. (Pangh. 5:11) Di halak Ruben, Dan, dohot Aser, rumingkot do hamoraon sian apala mangulahon ulaon na dihalomohon Jahowa. Umpamana, rumingkot do di nasida mamparrohahon birubiruna, kapalna, dohot pelabuhan. (Pangh. 5:15-17) Alai, ndang sude halak mangulahon sisongon i. Alana, adong do halak Zebulon dohot Naptali ”na olo sumeahon hosana tu hamatean” laho mangurupi si Debora dohot si Barak. (Pangh. 5:18) Gabe tadapot ma parsiajaran na ringkot sian pangantusion ni nasida na marimbar.

”PINUJI MA JAHOWA”

14. Songon dia caranta patuduhon na taihuthon pamarentaon ni Jahowa?

14 Saonari, ndang ingkon marporang hita laho mangihuthon pamarentaon ni Jahowa. Alai, marhite marhiras ni roha jala barani marbarita. Saonari, godang do halak na dihaporluhon laho mangulahon on. Girgir do roha ni marjuta dongan sahaporseaon dohot angka na poso dohot tu marragam dinas sepenuh waktu. Umpamana, adong na merintis, mangurupi di Betel, pajongjongkon Bale Harajaon, jala rade mangurupi di angka kebaktian. Pigapiga sintua gabe Panitia Penghubung Rumah Sakit jala mangaradoti kebaktian. Alani i, pos ma rohanta, diargai Jahowa do girgir ni rohanta laho manomba Ibana jala ndang dihalupahon Ibana angka na denggan naung tabahen.Heb. 6:10.

Andorang so manontuhon sipilliton, pingkirhon ma pangkorhon ni i tu keluarga dohot tu huria (Ida paragraf 15)

15. Songon dia do carana asa tongtong hiras rohanta mangulahon na dihalomohon Jahowa?

 15 Ringkot do tapingkiri na rade do hita mangulahon lomo ni roha ni Jahowa manang na ndang. Tasungkun ma dirinta: ’Halak na asing do na huloas mangulahon godang ulaon? Rumingkot do hamoraon di ahu sian apala marhobas tu Jahowa? Manang, hutiru do si Barak, si Debora, si Jael, dohot 10.000 halak na marsitutu mangulahon manang aha pe laho marhobas tu Jahowa? Adong do sangkaphu laho pinda asa mandapot gumodang hepeng, asa lam denggan ngolungku? Hutangiangkon do taringot pangkorhon ni on tu keluarga dohot tu huria?’ *

16. Nang pe nunga adong sude di Jahowa, aha do na boi talehon tu Ibana?

16 Dilehon Jahowa do hak na sumurung tu hita laho mangihuthon pamarentaonNa. Mulai sian tingki ni si Adam dohot si Hawa, lomo roha ni Sibolis asa mangalo jolma tu Jahowa. Alai, molo taihuthon pamarentaon ni Jahowa, on patuduhon tu Sibolis ise na tapillit. Ala marhaporseaon jala marsihohot, gabe girgir ma rohanta mangulahon ulaon na dihalomohon Jahowa jala on mambahen las rohaNa. (Poda 23:15, 16) Molo marsihohot jala unduk hita, boi ma dialusi Debata gabus ni Sibolis. (Poda 27:11) Na boi talehon tu Jahowa, i ma tongtong mangoloi Ibana. Mansai arga do on di Ibana jala mambahen las rohaNa.

17. Aha do na taparsiajari sian Panguhum 5:31 taringot ari na naeng ro?

17 Satongkin nai, holan pamarentaon ni Jahowa ma na dihalomohon sude halak. Mansai las rohanta paimahon i! Sarupa ma pangkilalaanta tu si Debora dohot si Barak, na mandok, ”Ingkon songon i ma nian hamamago ni saluhut angka musum, ale Jahowa! Alai anggo jolma, angka na mangkaholongi Ho, ingkon marsinondang do songon habibinsar ni mata ni ari di hagogoanna.” (Pangh. 5:31) Masa ma on tingki diripashon Jahowa portibi na jahat on. Di Armagedon, ndang dihaporluhon Jahowa pangurupion ni jolma laho manaluhon musu. Alai, tongtong do hita ”jongjong disi, huhut paidaidahon tua sibahenon ni Jahowa”. (2 Kron. 20:17) Andorang so i, barani jala marlas ni roha ma mangihuthon pamarentaon ni Jahowa.

18. Molo tongtong rade hamu mangoloi Jahowa, aha do laba ni i tu na asing?

18 Jahowa do na dipuji si Debora dohot si Barak tingki didok nasida, ”Pinuji ma Jahowa, ala girgir roha ni bangso i sumeahon dirina.” (Pangh. 5:1, 2) Suang songon i, molo girgir rohanta mangulahon manang aha pe laho manomba Jahowa, gabe taronjar do roha ni na asing laho mamuji Jahowa!

^ par. 6 Di hureta i, adong dibahen podang na tajom, na suman tu sasabi. Dibahen do podang i di roda ni hureta i. I ma na mambahen hureta i gabe dihabiari musu ala boi manegai sasude.

^ par. 8 Ida ma gumodang hatorangan taringot on di Menara Pengawal 1 Agustus 2015, ”Aku Bangkit Sebagai Ibu di Israel”.

^ par. 15 Ida artikel ”Arsak ni Roha Alani Parhepengon” di Joujou Paboahon 1 Juli 2015.