Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PARSIAJARAN 31

“Ndang Marnaloja Hami”!

“Ndang Marnaloja Hami”!

“Alani i do ndang marnaloja hami.”​—2 KOR. 4:16.

ENDE 128 Martahan Ro di Ujung

NA LAHO DIULAS *

1. Aha do na ingkon diulahon halak Kristen di parlumbaan tu hangoluan?

SUDE halak Kristen dohot do di parlumbaan tu hangoluan. Nang pe na baru manang naung leleng di parlumbaan i, ingkon tongtong do hita setia sahat tu garis finis. Poda na dilehon si Paulus tu halak Kristen di Pilippi boi do mangurupi hita asa tongtong martahan. Piga-piga halak Kristen di huria i nunga leleng gabe sisomba Jahowa tingki mandapot surat sian si Paulus. Setia do nasida. Alai dipaingot si Paulus do nasida asa unang menyerah. Dijujui si Paulus do nasida asa maniru ibana na ‘marlojong asa mandapot upa’.​—Plp. 3:14.

2. Boasa poda ni si Paulus tu halak Pilippi pas di tingkina?

2 Porlu hian do poda ni si Paulus on tu halak Pilippi. Alana dung dibahen huria i, godang do hasusaan na dihilala angka dongan disi sian angka halak Pilippi. Masa ma hasusaan i tu nasida dungkon mandapot parnidaan si Paulus dohot si Silas jala disuru nasida asa ‘ro tu Makedonia’. Sahat ma nasida di Pilippi taon 50 M. (Ul. 16:9) Disi, pajumpang ma nasida dohot sahalak borua na margoar si Lidia. Ditangihon ibana do si Paulus dohot si Silas jala “dibungka Jahowa ma rohana” asa olo manjalo barita na uli. (Ul. 16:14) Ndang sadia leleng, tardidi ma ibana dohot sude donganna sajabu. Alai ndang lomo roha ni Sibolis disi. Disarat angka halak Pilippi ma si Paulus dohot si Silas tu jolo ni angka pejabat pengadilan. Ditudu do nasida manggunturi di kota i. Ujungna, dipungkuli ma nasida, dipenjarahon, dung i diusir sian kota i. (Ul. 16:16-40) Gabe menyerah do nasida? Daong! Aha do na diulahon angka dongan di huria na baru i? Tongtong do nasida setia, jala sitiruon na denggan do nasida di hita! Tontu, sitiruon sian si Paulus dohot si Silas do na mangurupi nasida asa tongtong martahan.

3. Aha do na diboto si Paulus, jala aha do sungkun-sungkun na laho taulas?

 3 Marsitutu do si Paulus asa unang menyerah. (2 Kor. 4:16) Diboto ibana do, asa boi setia sahat tu na mate, ingkon tongtong do diingot ibana upa na sian Debata. Aha do na boi taparsiajari sian contoh ni si Paulus? Songon dia do pengalaman ni angka dongan di tingkinta saonari patuduhon na boi do hita martahan mangadopi angka hasusaan? Jala songon dia do pangkirimon di ari na naeng ro mangurupi hita asa unang menyerah?

CONTOH NI SI PAULUS MARLABA TU HITA

4. Manang aha pe situasina, songon dia do si Paulus tongtong ringgas marbarita?

4 Pingkirhon ma aha na diulahon si Paulus tingki dibahen ibana surat tu halak Pilippi. Tingki i, dipenjarahon do ibana di sada jabu di Rom. Ndang boi ibana kaluar laho marbarita. Alai jotjot do ibana marbarita tu halak na ro manjumpangi ibana. Jala dibahen ibana do surat tu angka huria na dao. Saonari pe, godang do halak Kristen ndang boi kaluar sian jabuna laho marbarita. Alai jotjot do nasida marbarita tu angka halak na ro tu jabu ni nasida. Adong do muse na marbarita marhite mambahen surat tu angka halak na so boi pajumpang dohot nasida.

5. Hombar tu Pilippi 3:12-14, aha do na diulahon si Paulus asa boi mandapot upa na sian Debata?

5 Ndang dipaloas si Paulus manang aha pe mambahen ibana gabe ndang ringgas di ulaon marbarita. Didok si Paulus, huhalupahon do “angka naung salpu” jala marsitutu do ahu mangadu “angka na laho ro”. On ma na mambahen ibana mandapot upa na sian Debata. (Jaha Pilippi 3:12-14.) Aha do na diulahon si Paulus asa boi tongtong ringgas? Na parjolo, andorang so gabe halak Kristen, sahalak Jahudi na sangap do ibana. Alai didok ibana do molo hasangaponna i “songon sampah”. (Plp. 3:3-8) Na paduahon, sai disolsoli si Paulus do dirina ala dianiaya ibana do halak Kristen najolo. Alai ndang dipaloas pangkilalaanna i mambahen ibana gabe ndang be manomba Jahowa. Na patoluhon, godang do angka na denggan naung diulahon ibana tu Jahowa. Alai ndang didok rohana nunga sae holan i. Tongtong do si Paulus sibuk di ulaon marbarita nang pe mangadopi godang ambat-ambat. Hea do ibana dipenjarahon, dipungkuli, didangguri dohot batu, naeng lonong kapal na ditompang, hurang mangan, jala ndang adong pangkeanna. (2 Kor. 11:23-27) Manang aha pe na masa tu si Paulus, diboto ibana do na ingkon tongtong ibana manomba Jahowa. Hita pe ingkon songon i do.

6. Aha do “angka naung salpu” na ingkon tahalupahon?

6 Songon dia hita boi maniru si Paulus mangalupahon “angka naung salpu?” Ra, adong do sian hita na manguhumi dirina sandiri alani dosana najolo. Molo songon i, bahen ma pelajaran pribadi taringot tobusan ni Jesus. Molo taparsiajari, tarimangi, jala tatangiangkon na taparsiajari i, on mangurupi hita asa unang sai manguhumi diri sandiri. Unang be sai tapingkiri dosa naung disesa Jahowa. Adong do muse parsiajaran na asing na boi tatiru sian si Paulus. Saonari, godang do angka donganta na manadingkon karejo na jago asa boi lam godang tingkina laho marbarita. Molo songon i do na taulahon, boi do hita mangalupahon jala ndang sai mamingkirhon angka naung tatadingkon i? (4 Mus. 11:4-6; Pjm. 7:10) “Angka naung salpu”, boi do muse lapatanna angka na denggan naung hea taulahon tingki marhobas tu Jahowa, manang songon dia hita marhasil mangadopi ambat-ambat. Tontu molo taingot muse songon dia Jahowa mamasu-masu jala mangurupi hita,  gabe lam solhot ma hita tu Ibana. Alai, unang ma didok rohanta nunga sae be angka naung taulahon tu Jahowa.​—1 Kor. 15:58.

Di parlumbaan tu hangoluan, ingkon tapasiding do na boi mambahen hita gabe ndang mamingkirhon upa na sian Debata (Ida paragraf 7)

7. Hombar tu 1 Korint 9:24-27, aha do na ingkon taulahon asa boi monang di parlumbaan tu hangoluan? Paboa ma tudosanna.

7 Tangkas do diboto si Paulus taringot hata ni Jesus na mandok, “Bahen ma nasa gogom.” (Luk. 13:23, 24) Songon Jesus, diboto si Paulus do, ingkon marsitutu do ibana sian nasa gogona. Dipatudos ibana do hangoluan ni halak Kristen songon na marlumba lari. (Jaha 1 Korint 9:24-27.) Tontu, ingkon dipingkirhon sahalak pelari do songon dia carana asa boi monang. Saleleng parlumbaan, tontu ndang diparrohahon ibana be angka na asing. Umpamana, godang do pertandingan lomba lari na dibahen di kota. Tingki na marlumba i, godang do angka toko na dilewati pelari i. Molo menurut hamu, adong do pelari na so satongkin laho mangida angka barang na adong di toko i? Molo naeng monang ibana, tontu daong! Suang songon i ma hangoluan ni halak Kristen. Di parlumbaan tu hangoluan, ingkon tapasiding do na boi mambahen hita gabe ndang mamingkirhon upa na sian Debata. Molo tongtong hita setia mangulahon sian nasa gogonta, songon si Paulus, dapotta ma upa sian Debata!

TONGTONG MANOMBA JAHOWA

8. Aha do tolu ambat-ambat na laho taulas?

8 Saonari taulas ma tolu ambat-ambat na boi mambahen hita marmetmet ni roha. Na parjolo, tingki ndang saut aha na tahirim. Na paduahon, ala lam matua hita jala ndang margogo. Na patoluhon, ala leleng mangadopi hasusaan. Boi do tadapot laba sian contoh ni angka donganta na marhasil mangadopi situasi sisongon i.​—Plp. 3:17.

9. Aha do pengaruhna tu hita tingki ndang saut aha na tahirim?

9 Tingki ndang saut aha na tahirim. Tontu mangkirim do hita tu sude janji ni Jahowa. Songon panurirang Habakuk, sai dipangido ibana do tu Jahowa asa disalpuhon hajahaton di Juda. Alai didok Jahowa ma tu ibana, “sai paimaima ma i”. (Hab. 2:3) Tingki ndang saut  dope aha na tahirim, boi do i mambahen hita gabe ndang ringgas. Jala boi do i mambahen hita gabe marmetmet ni roha. (Poda 13:12) On ma na masa tu angka donganta na miniahan di taon 1914. Tingki i, dirimpu nasida di taon i do nasida laho mangolu di surgo. Alai tingki ndang saut dope na dihirim angka donganta i, aha do na diulahon nasida?

Si Royal dohot si Pearl Spatz tongtong setia saleleng martaon-taon nang pe ndang saut dope masa na dihirim nasida di taon 1914 (Ida paragraf 10)

10. Aha do na diulahon dua donganta tingki ndang saut masa na dihirim nasida?

10 Pingkirhon ma contoh sian dua donganta na hea mangadopi situasi sisongon i. Sahalak donganta baoa na margoar si Royal Spatz, tardidi di taon 1908 tingki marumur 20 taon. Pos hian do rohana na laho tu surgo ibana. Alani i di taon 1911, didok ibana ma tu tunanganna si Pearl, “Diboto ho do kan aha na laho masa di taon 1914. Ala ingkon marhasohotan do hita, tumagon ma tapahatop!” Tingki ndang saut masa aha na dihirim nasida di taon 1914, gabe ndang setia do nasida? Daong. Alana tujuan ni nasida, i ma mangulahon lomo ni roha ni Jahowa, ndang ala na naeng tu surgo. Tongtong do setia si Royal dohot si Pearl jala sibuk sahat tu na mate nasida. Tontu, hirim do rohamuna tingki dipabadia Jahowa goarna, dipatudu do na sintong Ibana mamarenta, jala dipasaut Ibana do angka janjina. Pos ma rohamuna, laho saut do i di tingki naung ditontuhon Jahowa. Alani i paima ro tingkina, tongtong ma hita setia manomba Jahowa. Nang pe ndang saut dope aha na tahirim, unang ma i mambahen hita marmetmet ni roha.

Nang pe naung matua si Arthur Secord tongtong do mangulahon na dumenggan tu Jahowa (Ida paragraf 11)

11-12. Boasa boi hita tongtong ringgas jala setia tu Jahowa nang pe ndang margogo be songon najolo? Paboa ma contohna.

11 Ala lam matua jala ndang margogo. Ndang songon na dohot marlumba lari, ndang na ingkon gogo jala sehat asa boi togu parale-aleonmuna tu Jahowa. Adong do angka donganta naung matua jala ndang margogo be alai tongtong boi mangalehon na dumenggan tu Jahowa. (2 Kor. 4:16) Umpamana, tingki marumur 88 taon donganta si Arthur Secord, nunga 55 taon ibana karejo di Betel jala di tingki i nunga marsahit-sahit. Sada tingki, ro ma sahalak donganta borua na mangurupi laho paradehon angka na porlu di ibana. Diida donganta i ma ibana jala dipuji ala nunga godang na diulahon donganta si Secord tu Jahowa. Alai ndang didok roha ni si Arthur nunga cukup naung diulahon ibana i. Diida ibana ma donganta borua i huhut mengkel jala didok, “Tutu do i. Alai nang pe naung godang na taulahon, ndang i na rumingkot. Na rumingkot di hita, i ma songon dia carana asa boi tongtong setia tu Jahowa.”

12 Ra, nunga leleng hamu manomba Jahowa. Alai ala naung matua jala marsahit-sahit, gabe ndang boi be godang na boi diulahon hamu songon di tingki naung salpu. Alai  unang ma metmet rohamuna. Pos ma rohamuna, sai diingot Jahowa do jala las do rohana tu sude naung diulahon hamu. (Heb. 6:10) Holongta tu Jahowa ndang diida sian sadia godang na talehon tu Ibana. Alai tapatudu ma i marhite tongtong marlas ni roha manomba Ibana, marpangkirimon jala mangulahon na dumenggan tu Ibana. (Kol. 3:23) Diboto Jahowa do sadia godang na boi taulahon jala ndang dipangido Ibana na so boi taulahon.​—Mrk. 12:43, 44.

Si Anatoly dohot si Lidiya Melnik tongtong martahan nang pe mangadopi penganiayaan (Ida paragraf 13)

13. Aha do na masa tu si Anatoly dohot si Lidiya, jala songon dia do pengalaman ni nasida boi patoguhon rohanta nang pe mangadopi hasusaan?

13 Ala leleng mangadopi hasusaan. Adong do naposo ni Jahowa na susa manang dianiaya saleleng martaon-taon. Umpamana, si Anatoly Melnik. * Tingki marumur 12 taon, ditangkup ma bapakna, dipenjarahon jala diboan tu Siberia na daona hira-hira 7.000 kilometer sian huta ni nasida di Moldova. Dung sataon, diboan ma si Anatoly, omakna, dohot ompungna tu Siberia. Dung i, boi ma nasida marpungu di huta na asing. Alai ingkon mardalan do nasida hira-hira 30 kilometer daona. Godang do salju di dalan i jala mansai ngali do disi. Hea do muse dipenjarahon donganta si Anatoly saleleng tolu taon. Gabe dao do ibana sian istrina si Lidiya, dohot boruna na marumur sada satonga taon. Nang pe godang hasusaan na diadopi saleleng martaon-taon, tongtong do si Anatoly dohot keluargana setia tu Jahowa. Saonari nunga marumur 82 taon ibana jala Panitia Cabang di sada negara di Asia Tengah. Songon si Anatoly dohot si Lidiya, boi do hita tongtong martahan mangadopi hasusaan huhut mangulahon na dumenggan tu Jahowa.​—Gal. 6:9.

INGOT MA PANGKIRIMONTA

14. Asa boi mandapot upa sian Debata, aha do na ingkon diulahon si Paulus?

14 Pos do roha ni si Paulus boi do ibana martahan ro di ujung jala mandapot upa sian Jahowa. Ala halak Kristen na miniahan do ibana, mangkirim do ibana asa “mandapot upa, i ma panjouon ni Debata”. Alai, ingkon “marlojong” do si Paulus asa boi mandapot upa i. (Plp. 3:14) Dipaboa si Paulus do tudosan on laho mangurupi halak Pilippi asa tongtong mangingot upa ni nasida.

15. Songon dia do si Paulus paingothon halak Kristen di Pilippi asa tongtong marlojong?

15 Dipaingot si Paulus do huria Pilippi. Didok ibana, naeng gabe warga negara di surgo do nasida. (Plp. 3:20) Boasa ingkon diingot  nasida i? Di tingki i, godang do halak naeng gabe warga negara Rom ala godang do laba na boi didapot nasida. * Alai, dao do dumenggan kewarganegaraan ni halak Kristen na miniahan, jala gumodang do laba na dapot ni nasida. Alana dumenggan do pamarentaon di surgo molo dibandingkon tu pamarentaon ni Rom! Alani i, didok si Paulus do tu halak Kristen di Pilippi, “Pahombar hamu ma pangalahomuna tu barita na uli taringot tu Kristus i.” (Plp. 1:27) Saonari pe, gabe sitiruon na denggan do halak Kristen na miniahan, ala marsitutu do nasida asa mandapot upa laho mangolu di surgo.

16. Hombar tu Pilippi 4:6, 7, aha do na ingkon diulahon sude halak Kristen ndang soal didia pe pangkirimonta?

16 Marpangkirimon di surgo manang di paradeiso pe hita, ingkon marsitutu do hita asa tongtong setia. Manang aha pe situasinta, unang ma sai taingot angka naung salpu na boi mambahen hita gabe ndang manomba Jahowa. (Plp. 3:16) Ra, ndang saut dope na tahirim manang nunga matua hita jala ndang margogo. Adong muse na leleng mangadopi hasusaan jala dianiaya. Alai aha pe situasina, “unang ma holsohon hamu manang aha”. Pasahat ma pangidoan dohot elek-elekmuna tu Debata jala lehononna ma hadameon lobi sian na tabayangkon.​—Jaha Pilippi 4:6, 7.

17. Aha do na laho taulas di parsiajaran na mangihut?

17 Songon pelari, ingkon marsitutu do ibana asa boi monang, tarlumobi molo nunga lam jonok tu garis finis. Suang songon i ma nang hita. Naeng saut nama sude janji ni Jahowa jala nunga jonok be aha na tahirim saleleng on. Alani i, marsitutu ma hita asa tongtong setia. Alai aha do na ingkon taulahon asa boi martahan? Parsiajaran na mangihut mangurupi hita asa mamboto aha na ingkon tajumolohon jala na “dia na rumingkot”.​—Plp. 1:9, 10.

ENDE 79 Bahen ma Nasida Togu

^ par. 5 Nang pe naung leleng hita manomba Jahowa, ingkon tongtong do tapatogu parale-aleonta tu Ibana. Dijujui si Paulus do halak Kristen asa unang menyerah! Molo tajaha surat na dibahen si Paulus tu halak Pilippi, on boi mangurupi hita asa tongtong martahan di parlumbaan tu hangoluan. Di parsiajaran on, laho taulas ma songon dia hita boi mandapot laba sian surat na dibahen si Paulus i.

^ par. 13 Ida ma kisah hidup ni donganta si Melnik di Sedarlah! 22 Oktober 2004, “Diajar sejak Kecil untuk Mengasihi Allah”.

^ par. 15 Ala pamarenta ni Rom do na marhuaso di kota Pilippi, godang do laba na dapot ni angka halak disi songon na didapot angka halak Rom. Alani i, mura do diantusi angka dongan na di Pilippi tudosan na dibahen si Paulus.