Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PARSIAJARAN 33

Malua do Halak “na Manangihon Ho”

Malua do Halak “na Manangihon Ho”

“Tongtong ma parrohahon dirim dohot na niajarhonmu. Marsitutu ma ho mangulahon i, ai molo diulahon ho i na paluahon dirim do ho dohot na manangihon ho.”​—1 TIM. 4:16.

ENDE 67 Baritahon ma Hata ni Debata

NA LAHO DIULAS *

1. Aha do na tahirim sian keluarganta?

SAHALAK donganta na margoar si Pauline * mandok, “Sian tingki mulai marsiajar Bibel ahu, hirim do rohangku asa sude keluargangku boi rap dohot ahu di Paradeiso. Hirim do rohangku asa suami dohot anakku manomba Jahowa.” Adong do keluargamuna na so manomba Jahowa dope? Songon si Pauline, ra hirim do rohamu asa manomba Jahowa keluargamuna.

2. Di parsiajaran on, sungkun-sungkun aha do na laho taulas?

2 Ndang boi tapaksahon keluarganta asa manjalo barita na uli. Alai boi do tajujui nasida asa mambungka roha dohot pingkiran ni nasida tu Bibel. (2 Tim. 3:14, 15) Boasa ingkon marbarita hita tu keluarganta? Boasa ingkon tapatudu roha sapangkilalaan? Aha do na boi taulahon laho mangurupi keluarganta asa mangkaholongi Jahowa? Jala songon dia angka dongan di huria boi mangurupi hita?

BOASA INGKON MARBARITA HITA TU KELUARGA?

3. Hombar tu 2 Petrus 3:9, boasa ingkon marbarita hita tu keluarganta?

3 Nunga lam jonok ajal ni portibi on. Alai, holan angka na “tama mandapot hangoluan saleleng ni lelengna” do na boi malua. (Ul. 13:48) Godang do tingki na talehon laho marbarita tu halak na so tatanda na adong di luatta. Alani i, tontu  lomo do rohanta marbarita tu keluarganta asa boi rap manomba Jahowa. Ama na parholong do Jahowa i, jala “ndang lomo rohana mago manang ise pe, alai naeng ma sude jolma marhamubaon”.​—Jaha 2 Petrus 3:9.

4. Aha do hasalaan na olo tabahen tingki marbarita tu keluarganta?

4 Taingot ma, adong do cara na denggan dohot cara na sala tingki marbarita. Ra, lambok do hita mangkatai tingki marbarita tu halak na so tatanda. Alai, olo do ra ndang songon i tabahen tingki marbarita tu keluarganta.

5. Aha do na ingkon taingot andorang so marbarita tu keluarganta?

5 Molo taingot muse tingki parjolo sahali hita marbarita tu keluarga, godang do sian hita na manolsoli ala ndang denggan caranta marbarita tu nasida tingki i. Alani i, lomo do rohanta asa boi denggan caranta marbarita di tingki na asing. Didok apostel Paulus tu halak Kristen, “Sai lambok ma begeon angka hatamuna songon na siniraan, asa diboto hamu mangalehon alus na denggan tu ganup halak.” (Kol. 4:5, 6) Denggan do molo taingot poda on tingki marbarita tu keluarganta. Molo ndang denggan caranta, olo do gabe jut roha ni nasida jala ndang boi nasida taurupi.

AHA DO NA BOI TAULAHON LAHO MANGURUPI KELUARGANTA?

Dapotmuna do laba molo dipatudu hamu roha sapangkilalaan dohot pangalaho na denggan (Ida paragraf 6-8) *

6-7. Paboa ma contoh na patuduhon boasa ringkot halak Kristen mangantusi pangkilalaan ni dongan saripena na so sisomba Jahowa.

6 Patudu ma roha sapangkilalaan. Si Pauline na dipaboa nangkin mandok, “Mulana, holan taringot Debata dohot Bibel do na sai huhatai tu suamikku. Ndang hea dihatai hami taringot na asing.” Otik do na diboto si Wayne, suami ni si Pauline taringot Bibel. Didok roha ni si Wayne, holan agama do na sai dipingkiri istrina. Mabiar do ibana gabe dohot istrina tu agama na sesat jala dioto-otoi.

 7 Disolsoli si Pauline do ala godang tingkina dipangke rap dohot angka dongan di huria. Umpamana, tu parpunguan, marbarita, dohot tu acara ramah tamah. Didok si Pauline, “Sipata tingki mulak si Wayne, ndang adong na jumpangna di jabu. On ma na mambahen ibana lungun-lungunan.” Tontu, lomo do roha ni si Wayne asa rap ibana dohot keluargana. Ndang diboto si Wayne angka ise do dongan ni istrina. Didok rohana, gabe nasida do na rumingkot di si Pauline sian ibana. Gabe diancam si Wayne ma istrina asa marsirang. Menurut hamu, aha do sasintongna na ingkon diulahon si Pauline?

8. Hombar tu 1 Petrus 3:1, 2, aha do na jotjot diparrohahon keluarganta?

8 Patudu ma pangalaho na denggan. Umjotjot do diparrohahon keluarganta aha na taulahon sian aha na tahatahon. (Jaha 1 Petrus 3:1, 2.) Ujungna, gabe disadari si Pauline do i. Didok ibana, “Huboto do na holong roha ni suamikku tu hami. Jala sasintongna, ndang lomo rohana marsirang. Alai, dung didok suamikku naeng disirangkon ahu, gabe huboto ma ingkon huihuthon do na didok Jahowa taringot parsaripeon. Rumingkot do patuduhon pangalaho na denggan sian apala sai marbarita tu ibana.” Ndang sai dipaksa si Pauline be suamina asa mangkatai taringot Bibel. Gabe na asing do na jotjot dihatai nasida. Diida si Wayne do naung lam burju istrina jala anakna pe pantun jala unduk tu ibana. (Poda 31:18, 27, 28) Dung diparrohahon si Wayne laba na didapot keluargana ala mangihuthon poda ni Bibel, gabe olo ma ibana mambungka roha dohot pingkiranna tu Hata ni Debata.​—1 Kor. 7:12-14, 16.

9. Boasa ingkon tongtong taurupi keluarganta?

 9 Tongtong ma urupi keluargamuna. Dilehon Jahowa do sitiruon tu hita. “Tongtong” do dilehon Ibana tingki tu angka halak asa manangihon barita na uli jala mandapot hangoluan salelengna. (Jer. 44:4) Asing ni i, didok si Paulus do tu si Timoteus asa tongtong mangurupi na asing. Boasa? Alana molo diulahon ibana i, boi do i paluahon dirina dohot na manangihon ibana. (1 Tim. 4:16) Ala tahaholongi do keluarganta, lomo do rohanta asa diboto nasida hasintongan na sian Bibel. Aha na dihatahon dohot na diulahon si Pauline, marlaba do i tu keluargana. Saonari, las do rohana ala nunga dohot suamina manomba Jahowa. Rap merintis do nasida, jala gabe sintua do si Wayne.

10. Boasa ingkon sabar hita?

10 Sabar ma. Tingki tabahen keputusan laho mangoloi Debata, ra godang do hamubaon na tabahen di ngolunta dohot di angka na tahaporseai. Diparrohahon keluarga do na so dohot be hita mangarayahon ari raya rap dohot nasida. Jala ndang dohot be hita tu ulaon politik. Mulana, muruk do nasida tu hita. (Mat. 10:35, 36) Alai, unang ma menyerah. Molo ndang taurupi keluarganta mangantusi haporseaonta, dos do i songon na manguhumi nasida. Gabe didok rohanta, ndang tama nasida mandapot hangoluan salelengna. Ndang dilehon Jahowa tu hita tugas laho manguhumi. Alai tu Jesus do dilehon Ibana tugas i. (Joh. 5:22) Molo sabar hita, ra gabe olo do keluarganta manangihon barita na tapasahat.​—Ida kotak “ Pangke ma Situs Web Laho Mangajari.”

11-13. Aha do na boi diparsiajari hamu sian cara ni si Alice maradophon natua-tuana?

11 Marbisuk ma. (Poda 15:2) Pingkirhon ma contoh sian si Alice. Tingki marsiajar taringot Jahowa, ndang rap tinggal ibana dohot natua-tuana. Ndang porsea natua-tuana tu Debata jala parsidohot do nasida tu politik. Diboto si Alice, ingkon hatop do dipaboa ibana tu natua-tuana taringot haporseaonna. Didok ibana, “Molo dipaleleng-leleng hamu paboahon haporseaonmuna tu keluarga, gabe lam jut do roha ni nasida.” Dilului si Alice do topik na dihalomohon natua-tuana, songon holong. Dung i, dibahen ibana do surat tu nasida. Dipaboa ibana do aha na didok Bibel taringot holong jala disungkun ibana do pandapot ni nasida. (1 Kor. 13:1-13) Mandok mauliate do ibana tu natua-tuana ala nunga dipagodang-godang jala dihaholongi ibana. Molo ro si Alice tu jabu ni natua-tuana, diurupi ibana do omakna mangulahon ulaon di jabu. Mulana, muruk do natua-tuana tingki dipaboa si Alice taringot haporseaonna.

12 Tingki di jabu ni natua-tuana, tongtong do si Alice manjaha Bibel ganup ari. Didok ibana, “Gabe diboto omakku ma na mansai ringkot do Bibel di ahu.” Gabe diparsiajari bapak ni si Alice do Bibel laho mamboto aha do na mambahen si Alice gabe muba, jala naeng mangalului hasalaan ni Bibel. Didok si Alice, “Hulehon ma Bibel tu bapakku jala adong hubahen catatan di bagasan Bibel i.” Aha do hasilna? Ndang dapot ni bapakna na sala sian Bibel. Gariada, mansai hona do tu roha ni bapakna hata ni Bibel i.

13 Ingkon togu do hita nang pe mangadopi ambat-ambat. (1 Kor. 4:12b) Contohna, ingkon sabar do si Alice maradophon omakna. Didok ibana, “Tingki tardidi ahu, didok omakku do ahu ‘boru na jahat.’” Aha do na diulahon si Alice? Didok ibana muse, “Lambok do hupatorang taringot keputusanku laho gabe Sitindangi Ni Jahowa jala ndang muba be keputusanki. Hupapos do roha ni omakku na mansai holong do rohangku tu ibana. Rap tangis ma hami jala hulompa ma sipanganon na tabo di ibana. Sian tingki i gabe  diboto omakku ma, Bibel do na mambahen ahu gabe lam burju.”

14. Boasa ndang boi tapaloas keluarga manguba keputusanta laho manomba Jahowa?

14 Porlu do tingki asa boi diantusi keluarganta na mansai ringkot do di hita manomba Jahowa. Umpamana, tingki dipillit si Alice asa gabe perintis jala ndang mamillit karejo songon na dihalomohon roha ni natua-tuana, tangis ma muse omakna. Alai tongtong do togu si Alice di keputusanna i. Didok ibana, “Molo dipaloas hamu keluargamuna manguba keputusanmuna di sada situasi, olo do gabe marsitutu nasida laho manguba keputusan na dibahen hamu di situasi na asing. Alai molo tongtong do togu hamu di keputusanmuna i, ra gabe olo do nasida manangihon hamu.” On ma na masa tu si Alice. Saonari, perintis do natua-tuana jala bapakna gabe sintua.

SONGON DIA ANGKA DONGAN DI HURIA BOI MANGURUPI?

Songon dia huria boi mangurupi keluarga ni donganta na so Sitindangi? (Ida paragraf 15-16) *

15. Hombar tu Mateus 5:14-16 dohot 1 Petrus 2:12, songon dia ‘pambahenan na denggan’ sian angka dongan boi mangurupi keluarganta?

15 Dipangke Jahowa do ‘pambahenan na denggan’ sian angka naposona asa boi halak marale-ale dohot Ibana. (Jaha Mateus 5:14-16; 1 Petrus 2:12.) Molo ndang Sitindangi Ni Jahowa dongan saripemuna, nunga hea nasida pajumpang dohot dongan di huriamuna? Si Pauline na dipaboa di mula ni parsiajaran on, manogihon angka dongan tu jabuna asa boi suamina si Wayne mananda nasida. Diingot si Wayne dope songon dia sahalak donganta baoa mangurupi ibana mamboto songon dia sasintongna Sitindangi i. Didok si Wayne, “Olo do donganta i cuti sian karejona laho manonton pertandingan olahraga  rap dohot ahu. Gabe didok rohangku ma, ‘Sarupa do hape ibana dohot halak na asing!’”

16. Boasa ingkon tatogihon keluarganta asa ro tu parpunguan?

16 Sada cara na denggan mangurupi keluarganta, i ma manogihon nasida asa ro tu parpunguan. (1 Kor. 14:24, 25) Parjolo sahali si Wayne ro tu parpunguan, i ma tingki Borngin Parningotan. Olo do ibana ro ala nunga mulak karejo jala ndang leleng acarana. Didok si Wayne, “Ndang pola tangkas huantusi isi ni jamitana. Alai las do rohangku tu angka halak disi. Dijangkon jala dijalang nasida do ahu. Gabe didok rohangku ma, halak na burju do hape nasida.” Adong donganta na mardongan saripe na mansai burju tu si Pauline. Diurupi nasida do ibana dohot ianakhonna tingki di parpunguan dohot di ulaon marbarita. Alani i, dung olo si Wayne marsiajar Bibel, donganta baoa i do na mangurupi ibana.

17. Aha do na so boi tasolsoli, alai boasa ndang menyerah hita mangurupi keluarganta?

17 Hirim do rohanta asa dohot keluarganta manomba Jahowa. Alai nang pe naung marsitutu hita mangurupi nasida, ra ndang olo nasida gabe naposo ni Debata. Molo songon i do na masa, unang ma manolsoli hamu di keputusan ni nasida i. Ndang boi tapaksahon halak na asing asa manangihon hita. Alai molo diida keluargamuna na mansai las do rohamuna ala manomba Jahowa, godang do pengaruhna tu nasida. Tangiangkon ma nasida jala marbisuk ma tingki mangkatai dohot nasida. Unang ma menyerah mangurupi nasida! (Ul. 20:20) Pos ma rohamuna, pasu-pasuon ni Jahowa do hamu. Molo dipillit keluargamuna do laho manangihon hamu, boi do nasida malua!

ENDE 57 Baritahon ma tu Saluhut Jolma

^ par. 5 Lomo do rohanta asa ditanda keluarganta Jahowa. Alai, ingkon nasida do na mambahen keputusan laho manomba Jahowa manang na ndang. Di parsiajaran on, laho taulas ma aha do na boi taulahon asa olo nasida manangihon hita.

^ par. 1 Piga-piga goar nunga diganti.

^ par. 53 HATORANGAN NI GAMBAR: Sahalak donganta na poso mangurupi bapakna na so Sitindangi padengganhon mobil. Di tingki na pas, dipatudu ibana do video di jw.org®.

^ par. 55 HATORANGAN NI GAMBAR: Ditangihon donganta borua do suamina na so Sitindangi tingki mangkatai taringot karejona di sadari i. Dung i, rap rekreasi do ibana dohot keluargana.

^ par. 57 HATORANGAN NI GAMBAR: Sahalak donganta borua manogihon angka dongan di huriana tu jabuna. Lomo do roha ni nasida mananda suamina. Dung i, ro do suamina tu Borngin Parningotan.