Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 SUNGKUNSUNGKUN 8

Porlu do Huantusi Aha Pelecehan Seksual?

Porlu do Huantusi Aha Pelecehan Seksual?

BOASA RINGKOT

Ganup taon, marjuta halak diperkosa jala diserang secara seksual. Angka na poso do na jotjotan diserang secara seksual.

AHA DO ULAHONONMUNA?

Tompu ma si Annette didabuhon. Didok si Annette ma, ”Nga hubahen nasa gogongku mangalo ibana. Laho marsurak do ahu, alai ndang kaluar soarangku. Huonjar, hutendang, hupastap, jala hugaromak ma ibana. Alai di tingki i, huhilala hira na hona tusuk piso ma ahu. Gale ma ahu jala ndang boi be manang marhua.”

Molo diadopi hamu situasi na sarupa, aha do na laho ulahononmu?

PINGKIRI MA!

Porlu do paradehon diri. Umpamana, molo kaluar tingki borngin, olo do masa sisongon i. Bibel paboahon, ”Tingki dohot parsorion mangonai tu nasida luhutna.”​—Parjamita 9:11.

Songon si Annette, olo do halak na so tinanda menyerang na poso secara seksual. Na asing diserang halak na tinanda manang keluargana. I ma na masa tu si Natalie. Tingki marumur sampulu taon dope, adong dolidoli hombar jabuna na menyerang ibana secara seksual. Didok ma, ”Mabiar jala maila hian ahu. Leleng do ndang hupaboa manang tu ise.”

 NDANG HAMU NA SALA

Lungun dope roha ni si Annette mangingot na masa i. Didok ibana, ”Sai ro do tu pingkiranku na masa di borngin i. Boi hian do hualo. Alai, dung ditusuk, gale ma ahu ala mabiar. Ndang boi be manang marhua. Alai huhilala, boi hian do ahu.”

Songon i ma pangkilalaan ni si Natalie. Didok ma, ”Aturanna, unang ma pintor porsea ahu tu sasahalak. Nga didok natuatuangku, molo marmeami ndang boi ahu dao sian kakakku. Alai, ndang huoloi. Huhilala, alani on ma dolidoli i menyerang ahu. Lungun ma roha ni keluargangku, jala sai huingot ma i. Sitaonon na borat do on.”

Molo dos pangkilalaanmu tu nasida, boha do hamu mangadopi i? Ingkon botoonmu do molo diperkosa pe hamu, ndang hamu na mangkalomohon i. Adong do halak na so pola mamingkiri on. Didok nasida, ”Goarna pe baoa. Alani borua i do gabe tubu roha ni baoa i.” Ndang soal aha pandapot ni halak, ndang suman sasahalak diperkosa! Molo diperkosa hamu, ndang salamuna i!

Mura do manjaha ”ndang hamu na sala”. Alai, maol do i. Adong do na so olo paboahon aha na masa, gabe ndang tabo pangkilalaanna jala sai diingot ma i. Ise do na maruntung molo sai sip hamu, hamu do manang halak na memerkosa? Ingkon pingkirhononmuna do aha siulahononmu.

PABOA MA AHA NA MASA

Bibel paboahon, tingki marsitaonon si Job, didok ma, ”Papuasonku ma hoihoingku, hatahononku ma hansit ni rohangku.” (Job 10:1, Bibel siganup ari) Lumbang ma pangkilalaan molo diulahon hamu songon i. Molo dipaboa hamu tu halak na dihaporseai, lumbang ma pangkilalaanmu jala ndang lungun be rohamuna.

Borat do pangkilalaan molo holan hamu na manaon i. Alani i, porlu do pangurupion sian na asing taringot i

On ma na diparhatutu si Annette. Didok ma, ”Hupaboa do on tu alealengku, jala dijujui ahu paboahon i tu sintua di hurianami. Tuani ma huoloi. Mangkatai ma ahu tu angka sintua, jala dipasahat nasida ma hata na porlu situtu di ahu, na mandok ndang hasalaanku i. I do nian, ndang sala di ahu i.”

Dipaboa si Natalie ma tu natuatuana. Didok ma, ”Diurupi jala dijujui do ahu paboahon na sasintongna. Ndang hupasip be masalah i, jala ndang lungun be rohangku.”

Ala martangiang, tarapul ma si Natalie. Didok ma, ”Marlaba do molo tapasahat holso ni rohanta tu Debata, tarlumobi tingki ndang tarhatahon tu na asing. Tingki martangiang, hupatolhas ma sude na di rohangkon. Dame ma huhilala.”

Ingot ma, adong do tingki ”pamalumhon”. (Parjamita 3:3) Jaga ma kesehatan dohot pingkiran. Unang gabe hurang modom. Na rumingkot, asahon ma Jahowa, Sipangapul na sumurung.​—2 Korint 1:3, 4.

 MOLO NUNGA BOI HAMU MARHALLET

Molo dielaela hamu mangulahon na rorang, tangkas ma dokkon, ”Unang songon i!” manang ”Padao tanganmi!” Unang mabiar hamu ditadingkon. Jolma na so hasea do ibana molo ditadingkon hamu alani on! Baoa na burju, i ma na mangargai hamu dohot prinsipmuna.

TARINGOT PELECEHAN SEKSUAL

”Tingki SMP, jotjot do angka baoa di singkola manariknarik baju dalamhu, jala didok ma angka hata na rorang. Umpamana, tabo hian ma molo olo ahu mangulahon seks dohot nasida.”​—Coretta.

Molo pandapotmu, na marhua do baoa i?

  1. Margaitgait?

  2. Mangelaela?

  3. Mangulahon pelecehan seksual?

”Tingki di bus, adong sahalak baoa na mandok angka hata na rorang tu ahu jala dijamai ma ahu. Hupastap ma tanganna jala hudok ma asa mandao ibana. Pamerengna tu ahu songon mamereng halak na rintik.”​—Candice.

Molo pandapotmu, na marhua do baoa i tu si Candice?

  1. Margaitgait?

  2. Mangelaela?

  3. Mangulahon pelecehan seksual?

”Taon naung salpu, adong sahalak baoa na sai mandok lomo hian rohana tu ahu, jala lomo rohana asa marhallet hami. Hudok do ”daong” tu ibana. Sipata, ditiop ma tanganku. Nga humuruki ibana, alai ndang olo ibana mambege. Dung i, tingki mangikat tali sipatu ahu, dijama ma ihurhu.”​—Bethany.

Molo pandapotmu, na marhua do angka baoa i?

  1. Margaitgait?

  2. Mangelaela?

  3. Mangulahon pelecehan seksual?

Bagian C do alus na sintong tu tolu sungkunsungkun i.

Holan sapihak do na mangkalomohon pelecehan seksual. Nang pe tamuruki, sai dijugulhon do.

Serius do pelecehan seksual. Boi do i gabe kekerasan seksual.