Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Alus ni 10 Sungkunsungkun ni Angka na Poso

 SUNGKUNSUNGKUN 9

Ingkon Porsea do Ahu tu Evolusi?

Ingkon Porsea do Ahu tu Evolusi?

BOASA RINGKOT

Molo tutu masa evolusi, ndang martujuan ngolunta. Molo tutu panompaon, taralusi ma sungkunsungkun taringot ari na naeng ro dohot ngolunta saonari.

AHA DO ULAHONONMUNA?

Rimangi situasi on: Bingung ma si Alex. Saleleng on, porsea do ibana tu Debata dohot tu panompaon. Alai, didok guru biologina tutu do adong evolusi, ala nunga disulingkiti angka ilmuwan. Gabe ganggu do roha ni si Alex. Didok ma di bagasan rohana, ”Molo tutu do hata ni angka ilmuwan taringot evolusi, ise ma ahu on, gabe ndang satolop tu nasida?”

Molo hamu gabe si Alex, satolop do hamu tu evolusi ala diparsiajari hamu i di singkola?

PINGKIRI MA!

Halak na porsea tu panompaon dohot tu evolusi, nasida holan porsea sambing, jala ndang diboto nasida boasa ingkon mangkaporseai i.

  • Ala nunga diajarhon di gereja, pigapiga halak porsea tu panompaon.

  • Ala nunga diajarhon di singkola, pigapiga halak porsea tu evolusi.

 RIMANGI MA ONOM SUNGKUNSUNGKUN ON

Dipatorang do di Bibel, ”Ganup bagas, adong do na paulihonsa; alai sipauli saluhutna, Debata do.” (Heber 3:4) Boi do on tahaporseai?

Molo tadok ndang adong Panompa, dos do on songon na mandok ndang adong na paulihon jabu on

DIDOK HALAK: Ala adong do ledakan na balga umbahen na adong alam semesta on.

1. Ise jala aha do na mambahen ledakan i?

2. Dia do na dapot rohanta, sude gabe adong sandiri manang adong na manompa?

DIDOK HALAK: Jolma berevolusi sian binatang.

3. Molo tutu do jolma berevolusi sian binatang, umpamana, sian bodat, boasa imbar situtu hapistaran ni jolma sian hapistaran ni bodat?

4. Boasa bentuk kehidupan na ”sederhana” mansai maol taantusi?

DIDOK HALAK: Tutu do masa evolusi.

5. Nunga disulingkiti nasida taringot bukti ni evolusi?

6. Piga halak do na porsea tu evolusi holan alani mangihuthon pandapot ni angka na malo?

”Tingki laho hamu tu harangan jala diida hamu ma adong jabu na bagak sian hau. Olo do hamu mandok, ’Bah, bagak ni jabu on! Tontu, adong pe jabu on, alani angka hau na marumpak on do.’ Ndang masuk di angkal i! Antong, boasa ingkon porsea hita molo sude na adong di alam semesta on ndang adong na mambahen?”​—Julia.

”Rimangi ma. Dipaboa ma tu hamu, adong ledakan di sada percetakan. Marsampatan ma tintana i tu dinding dohot tu sude ruangan i. Alani ledakan ni tinta i, gabe adong ma kamus na lengkap. Porsea do hamu disi?”​—Gwen.

 BOASA PORSEA TU DEBATA?

Dijujui do hita asa ’daulat marroha’. (Rom 12:1) Haporseaonta tu Debata ndang holan alani

  • PANGKILALAAN (Molo pandapothu, adong do Natumimbul)

  • PANGKORHON NI NA ASING (Ahu tading di inganan ni paragama)

  • MANGIHUTHON HALAK (Ala porsea natuatuangku tu Debata, porsea ma ahu)

Tangkas ma, ndang boi asal porsea.

”Tingki hutangihon guru patorangkon taringot cara kerja ni pamatangta, lam porsea ma ahu tutu do adong Debata. Adong do tugas ni ganup bagian ni pamatangta, sian na balga ro di na metmet. Jala, masa ma proses on di na so pamotoanta. Mansai longang do roha mamboto i!”​—Teresa.

”Tingki huida gedung na timbo, kapal pesiar, manang motor, husungkun ma diringku, ”Ise do na mambahen on?” Tontu, adong do halak na malo na mambahen motor. Alana, godang do alat na metmet na dipangke asa boi motor i denggan mardalan. Gari motor adong na mambahen, tarlumobi ma hita jolma.”​—Richard.

”Lam godang huparsiajari taringot sains, lam so dapot rohangku do evolusi. . . . Molo pandapothu, porlu do haporseaon na balga laho mangkaporseai evolusi sian mangkaporseai Sitompa saluhutna.”​—Anthony.

NA INGKON DIRIMANGI

Nang pe nunga marpulutaon disulingkiti ilmuwan taringot evolusi, alai ndang hea nasida sapandapot taringot hatorangan na dibahen. Molo angka ilmuwan pe ndang satolop taringot evolusi, hape didok do nasida halak na malo, tontu ndang sala molo ganggu rohanta tu teori evolusi.