Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 SUNGKUNSUNGKUN 3

Boha do Ahu Maradophon Natuatuangku?

Boha do Ahu Maradophon Natuatuangku?

BOASA RINGKOT

Molo las rohamuna maradophon natuatuamu, lam denggan ma parngoluonmuna.

AHA DO ULAHONONMUNA?

Rimangi ma situasi on: Di ari Rabu borngin, si Geoff, 17 taon, baru pasaehon karejona di jabu. Songon na somal, dipagalak ma TV laos hundul ma ibana.

Di tingki i, ro ma bapakna, jala hira na so las rohana.

”Geoffrey! Holan na manontoni do karejom! Urupi jo anggim pasaehon PR! Ndang hea diulahon ho na hudok!”

Marungutungut ma si Geoff, mandok, ”On ma kan!”

Laos dialusi bapakna ma, ”Aha nimmu?”

Didok si Geoff ma, ”Ndang adong, bapak.” Alai, nunga murhing bohina.

Muruk ma bapakna. Didok ma, ”So tung didokkon ho muse songon i tu ahu!”

Molo hamu gabe si Geoff, aha do na laho ulahononmu asa unang adong parbadaan?

PINGKIRI MA!

Mangkatai tu natuatua dos songon mamboan motor. Molo jumpangmu palang mangambat dalan, tontu dilului hamu ma dalan na asing.

 UMPAMANA:

Sahalak borua na margoar si Leah mandok, ”Maol do ahu mangkatai tu bapakku. Sipata, tingki mangkatai ahu, dialusi ma, ’Na mangkatai do ho tu ahu?’”

ADONG TOLU NA BOI DIULAHON SI LEAH.

  1. Muruk tu bapakna.

    Gogo ma soara ni si Leah mandok, ”Tangihon ma jo hatangkon, pak!”

  2. Ndang olo mangkatai tu bapakna.

    Ndang olo be si Leah mangkatai taringot masalahna tu bapakna.

  3. Paimahon tingki na pas, jala dipaboa ma masalahna.

    Mangkatai ma si Leah tu bapakna, manang mambahen surat na paboahon masalahna.

Molo disungkun hamu, na dia do na ingkon dipillit si Leah?

RIMANGI MA: Ra, ndang tusi pingkiran ni bapakna. Ndang diboto bapakna masalah ni si Leah. Molo dipillit si Leah Bagian A, ndang diantusi bapakna boasa ibana murukmuruk. Molo on na dipillit si Leah, maol ma bapakna manangihon. On patuduhon si Leah ndang pasangaphon natuatuana. (Epesus 6:2) Tangkas ma, ndang marlapatan molo muruk tu bapakna.

Songon halak na so olo dalanna tarambati, hamu pe boi mangalului dalan na asing asa mardame dohot natuatuamuna

Nang pe mura mangulahon Bagian B, adong do cara na dumenggan. Boasa? Asa boi mangatasi masalahna, ingkon mangkatai do si Leah tu bapakna. Asa boi bapakna mangurupi, ingkon diboto do masalah ni si Leah. Ndang adong lapatanna molo holan sip.

Molo Bagian C do dipillit si Leah, on patuduhon ndang olo ibana diambati. Marsitutu do ibana mangkatai tu bapakna. Molo dipillit ibana mambahen surat tu bapakna, on mambahen lumbang pangkilalaanna.

Mambahen surat pe mangurupi ibana paboahon na di rohana. Tingki dijaha surat i, diboto bapakna ma lomo do roha ni si Leah mangkatai tu ibana, jala diantusi ma pangkilalaan ni si Leah. Parohon laba do bagian C on. Ndang soal mangkatai manang marhite surat, on mangihuthon poda sian Bibel ”taeahi ma na tau padamehon”.​—Rom 14:19.

Aha do cara na asing na boi diulahon si Leah?

Pingkiri ma, jala surat ma di inganan naung diparade. Dung i, surat ma muse aha pangkorhon ni ulaon i.

 TANGKAS MA PABOA HATAMUNA

Ingot ma, ndang sai sarupa aha na didokmuna tu aha na dapot roha ni natuatuamuna.

UMPAMANA:

Disungkun natuatuamuna ma boasa songon na sipsip hamu. Dialusi hamu ma, ”Ndang pola boha.”

Na diantusi natuatuamuna boi gabe songon on, ”Ndang porsea be ahu tu hamu. Tu donganku do annon hupaboa, ndang tu hamuna.”

Rimangi ma molo hamu mangadopi masalah, jala lomo roha ni natuatuamu mangurupi. Alai didokkon hamu, ”Ndang pola boha i. Boi do sahalakku mangadopi on.”

  • Aha do na diantusi natuatuamuna?

  • Aha do hata na dumenggan na boi dohononmu?