BOASA RINGKOT

Dipaboa di Bibel, ”Nasa Surat i, sinihathon ni Debata.” (2 Timoteus 3:16) Molo tutu do on, dapotmu ma tudutudu na sian Bibel.

AHA DO ULAHONONMUNA?

Rimangi ma situasi on: Laho ma si David mamboan motor tu inganan na so hea dope didalani ibana. Angka tanda di dalan, patuduhon molo ibana ndang di inganan na laho tinujuna. Diboto ma naung lilu ibana. Ra, sala mambuat dalan.

Molo hamu gabe si David, aha do na laho ulahononmu?

PINGKIRI MA!

Adong do pigapiga sipillitonmu:

  1. Manungkun halak.

  2. Mamangke peta manang GPS.

  3. Torus mamboan motor, atik boha dapotmu inganan na tinujumuna.

Sasintongna, ndang marlapatan bagian C.

Dumenggan do bagian B sian na parjolo. Alana, molo tapangke peta manang GPS, diurupi ma hita mamboto pardalanan.

Songon peta manang GPS, Bibel pe boi mangurupi hamu!

Buku naung tarsar di liat portibi on, boi

  • manogunogu hamu di parngoluon

  • mangurupi hamu mananda dirimu jala asa lam denggan marparange

  • patuduhon tu hamu songon dia parngoluon na dumenggan

 ALUS NA RINGKOT TU PARNGOLUON

Disi boi hita mangkatai, jotjot do tasungkun.

  • Boasa balau langit i?

  • Sian dia do haroro ni angka bintang?

Dung i, tasungkun ma taringot angka na masa di portibi on.

Songon dia do molo alusna nunga adong sian najolo di Bibel?

Godang halak mandok, Bibel i holan turiturian. Bibel i buku naung leleng, jala mansai maol antusan. Alai, Bibel i do na sala, manang pandapot ni halak taringot tu Bibel i? Halak i do na so mangantusi?

Dirimpu angka halak, Bibel mangajarhon Debata na mangarajai portibi on. Tutu do songon i? Portibi on nunga sursar! Godang hasusaan dohot sitaonon, sahit dohot hamatean, hapogoson dohot mara. Tutu do Debata parholong na mambahen on sude?

Lomo do rohamu mamboto alusna? Ra, tarsonggot do hamu tingki mamboto alus ni Bibel taringot ise na mangarajai portibi on!

Ra, nunga diboto hamu molo angka poda na dibahen di brosur on, dibuat sian Bibel. Porsea do Sitindangi Ni Jahowa molo Bibel i boi dihaporseai jala mangalehon tudutudu di parngoluon. Alana, Bibel i ”sinihathon ni Debata do; jala hasea mamodai, maminsang, pauliulihon”. (2 Timoteus 3:16, 17) Tontu, olo do hamu manjalo jala manulingkiti buku na hombar dope tu parngoluonta saonari!