Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PARSIAJARAN 47

Jahowa Patoguhon Si Elia

Jahowa Patoguhon Si Elia

Muruk do si Izebel ala mate angka panurirang Baal i. Disuru ma halak mandok tu si Elia, ‘Marsogot, ho nama dipamate songon panurirang Baal i.’ Gabe mabiar ma si Elia jala lari ma ibana tu padang gurun. Martangiang ma ibana, ‘Jahowa, ndang tolap be ahu. Pasombu ma ahu mate.’ Alani lojana, tarpodom ma si Elia di toru ni hau.

Dung i ro ma suru-suruan manang malaikat, didok ma, ‘Dungo ma ho jala mangan ma.’ Diida si Elia ma adong roti dohot aek. Dung sae mangan dohot minum, modom ma muse ibana. Didungoi suru-suruan i ma ibana muse, didok ma, ‘Mangan ma ho. Asa adong gogom mardalan.’ Mangan ma muse si Elia. Mardalan ma ibana 40 ari 40 borngin sahat tu Dolok Horeb. Masuk ma si Elia tu sada gua jala modom ma ibana disi. Alai didok Jahowa ma tu ibana, ‘Marhua ho tuson Elia?’ Dialusi si Elia ma, ‘Ndang diulahon halak Israel be janjina tu Ho. Dirumpakkon do mezbahmu, jala dibunu do angka panurirangmu. Saonari naeng dibunu nasida do ahu.’

Didok Jahowa ma tu ibana, ‘Kaluar ma ho, jala jongjong ma ho di dolok on.’ Mulana, ro ma alogo na gogo jala ro ma gempa bumi dohot api. Dung i, adong ma muse soara na lambok begeon. Kaluar ma ibana sian gua i jala ditutup ma bohina. Disungkun Jahowa ma muse boasa lari ibana. Dialusi si Elia ma, ‘Holan ahu nama na manomba Ho.’ Alai didok Jahowa ma tu ibana, ‘Daong, ndang holan ho. Adong dope 7.000 nai halak Israel na manomba ahu. Laho ma ho, pillit ma si Elisa gabe panurirang na laho manggantihon ho.’ Laho ma si Elia jala diulahon do i. Menurutmu, olo do Jahowa mangurupi ho mangulahon lomo ni rohana? Taida ma muse angka na masa tingki ari logo di Israel.

“Unang ma holsohon hamu manang aha, alai pangido hamu ma saluhutna tu Debata marhite tangiang dohot elek-elek mardongan hamauliateon.”​—Pilippi 4:6