Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PARSIAJARAN 42

Barani jala Setia do Si Jonatan

Barani jala Setia do Si Jonatan

Anak siangkangan ni Raja Saul do si Jonatan. Tentara na barani do si Jonatan. Didok si Daud, umhatop do si Jonatan sian lali jala umgogo sian singa. Sada tingki, diida si Jonatan ma 20 halak tentara ni Palistim di punsu ni dolok. Didok si Jonatan ma tu siboan senjatana, ‘Molo dibahen Jahowa tanda, taserang ma nasida. Molo disuru halak Palistim hita nangkok, taserang ma nasida.’ Manggora ma halak Palistim i, ‘Nangkok ma hamu!’ Nangkok ma si Jonatan dohot siboan senjatana, jala dibunu ma angka tentara i.

Ala anak siangkangan do si Jonatan, sasintongna marhak do ibana gabe raja dungkon si Saul. Alai diboto si Jonatan do naung dipillit Jahowa si Daud. Ndang cemburu ibana. Mardongan do ibana dohot si Daud. Marjanji do nasida asa masiurupan. Dilehon si Jonatan do tu  si Daud rompi na ganjang, podang, panah dohot sabuk. On ma tandana na mardongan nasida.

Tingki martabuni si Daud sian si Saul, ro do si Jonatan manjumpangi ibana. Didok si Jonatan ma, ‘Ingkon togu do ho jala barani. Nunga dipillit Jahowa ho gabe raja. Diboto bapakku do i.’ Lomo do roham adong donganmu songon si Jonatan?

Jotjot do si Jonatan mangurupi si Daud. Olo do ibana mate laho mangurupi si Daud. Diboto ibana do naeng dibunu bapakna si Daud. Didok ma tu bapakna, ‘Mardosa do ho Bapa molo dibunu ho si Daud. Ndang adong salana.’ Muruk ma si Saul tu si Jonatan. Piga-piga taon dungkon i, mate di parporangan do si Saul dohot si Jonatan.

Dung mate si Jonatan, dilului si Daud ma anakna, i ma si Mepiboset. Didok ma tu si Mepiboset, ‘Donganku do bapakmu. Alani i, jagaonku ma ho saleleng ni ngolum. Tinggal di istana ma ho jala rap mangan ma hita.’ Ndang lupa si Daud tu si Jonatan donganna i.

“Masihaholongan ma hamu, songon ahu naung mangkaholongi hamu. Ndang adong holong na umbalga sian holong ni halak na olo mangalehon ngoluna humongkop angka donganna.”​—Johannes 15:12, 13