Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PARSIAJARAN 40

Si Daud dohot Si Goliat

Si Daud dohot Si Goliat

Didok Jahowa ma tu si Samuel, ‘Laho ma ho tu jabu ni si Isai. Sada sian angka anakna ma na gabe raja ni Israel.’ Laho ma si Samuel tu jabu ni si Isai. Tingki diida si Samuel anak siangkangan, didok rohana ma, ‘On do ra na dipillit Jahowa.’ Alai didok Jahowa, ndang i na dipillit. Didok ma muse, ‘Ndang rupa na huida alai rohana do.’

Dipatudu si Isai ma onom anakna. Alai didok si Samuel ma, ‘Ndang adong sian nasida na dipillit Jahowa. Adong dope na asing?’ Didok si Isai ma, ‘Adong dope sada nai, goarna si Daud. Marmahan do ibana saonari.’ Tingki ro si Daud, didok Jahowa ma tu si Samuel, ‘On do na Hupillit!’ Dung i, diusehon si Samuel ma miak tu ulu ni si Daud. Ibana ma na gabe raja ni Israel di ari na naeng ro.

Ndang sadia leleng, marporang ma halak Israel dohot halak Palistim. Adong do tentara ni halak Palistim na mansai balga songon raksasa. Goarna si Goliat. Ganup ari, direhei ibana do halak Israel. Gogo ma didok, ‘Suru ma sahalak baoa mangalo ahu. Molo monang ibana, gabe hatobanmuna ma hami. Alai molo ahu do na monang, hatobannami ma hamu.’

Ro ma si Daud tu perkemahan ni tentara ni halak Israel, laho mamboan sipanganon ni angka abangna. Dibege ibana do hata ni si Goliat i. Alani i didok ma, ‘Ahu ma na  mangalo ibana!’ Alai didok Raja Saul ma, ‘Poso dope ho, ndang taralom i.’ Didok si Daud ma, ‘Urupan ni Jahowa do ahu.’

Dibahen si Saul ma baju porangna tu si Daud. Didok si Daud ma, ‘Ndang hea hupangke songon on.’ Dibuat si Daud ma ambalang, i ma alat laho mangalempar batu. Dung i, dipillit ibana ma lima batu na licin sian sunge. Didapothon ibana ma si Goliat. Didok si Goliat ma, ‘Ro ma ho. Asa hubahen ho gabe sipanganon ni pidong dohot binatang buas.’ Nang pe songon i, ndang mabiar si Daud, didok do, ‘Mamangke podang dohot hujur do ho mangalo ahu, alai marhite goar ni Jahowa do ahu mangalo ho. Ndang hami alom, alai Debata do. Lehonon ni Debata ma hamu tu hami. Diida sude halak ma, umgogo do Jahowa sian podang dohot hujur.’

Dilempar si Daud ma batu i mamangke ambalang sagogo ni gogona. Ala diurupi Jahowa, hona ma batu i tu ulu ni si Goliat. Mate ma si Goliat, jala marlarian ma halak Palistim. Olo do ho porsea tu Jahowa songon si Daud?

“Ndang tarbahen ni jolma i, alai sude do tarbahen ni Debata.”—Markus 10:27