Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PARSIAJARAN 36

Janji ni Si Jepta

Janji ni Si Jepta

Ndang disomba halak Israel be Jahowa. Disomba nasida do angka patung. Tingki ro halak Ammon menyerang nasida, ndang boi diurupi angka patung i nasida. Susa do halak Israel saleleng martaon-taon. Ujungna didok nasida ma tu Jahowa, ‘Nunga mardosa hami. Palua ma hami sian angka musunami.’ Dihancurhon halak Israel ma patung i, jala manomba Jahowa ma nasida muse. Alani i, gabe asi ma roha ni Jahowa tu nasida.

Adong ma sahalak baoa na margoar si Jepta. Dipillit do ibana laho mamimpin bangso i mangalo halak Ammon. Didok ibana ma tu Jahowa, ‘Ale Jahowa, urupi ma hami. Molo monang hami, marjanji ma ahu: Lehononku do tu Ho, manang ise pe na parjolo  kaluar sian jabungku manjumpangi ahu.’ Ditangihon Jahowa do pangidoan ni si Jepta. Monang do nasida.

Tingki mulak si Jepta tu jabuna, boruna ma na parjolo manjumpangi ibana. Holan i do gellengna. Marlas ni roha do boruna i huhut manortor mamangke rebana. Diingot si Jepta do janjina tu Jahowa. Didok ma, ‘Ago borungku! Ingkon ho ma hape! Nunga marjanji ahu tu Jahowa. Ingkon laho nama ho marhobas di tabernakel di Silo.’ Didok boruna i ma, ‘Bapa, molo nunga marjanji ho tu Jahowa, ulahon ma i. Alai, laho ma jolo ahu dohot angka donganku tu dolok saleleng dua bulan. Dung i, laho ma ahu tu Silo.’ Ganup taon, sai ro do angka donganna manjumpangi ibana di Silo. Marhobas di tabernakel do boru ni si Jepta sahat tu na mate.

“Manang ise na humolong rohana tu anak manang tu boruna sian tu ahu, ndang tama ibana siseanku.”​—Mateus 10:37