Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PARSIAJARAN 20

Onom Tulah na Mangihut

Onom Tulah na Mangihut

Dipaboa si Musa dohot si Aron ma hata ni Jahowa tu si Firaun, ‘Molo ndang dipalua ho bangsongki, bahenonku ma godang lanok tu Mesir.’ Dung i, gok ma lanok masuk tu angka jabu ni halak Mesir. Alai ndang adong lanok di kota Gosen inganan ni bangso Israel. Holan tu halak Mesir do masa tulah na paopathon sahat tu na parpudi. Dung i didok si Firaun ma, ‘Dok ma tu Jahowa asa dipamago angka lanok on, huloas pe bangso Israel lao.’ Alai, tingki dipamago Jahowa angka lanok i, ndang diloas si Firaun be halak Israel lao. Ndang jora si Firaun.

Didok Jahowa ma, ‘Molo ndang olo si Firaun paloashon bangsongki, marsahit ma angka pinahan ni halak Mesir jala mate.’ Tutu do masa songon i. Alai molo pinahan ni bangso Israel ndang adong na mate. Nang pe songon i, tong do jugul si Firaun.

Dung i, disuru Jahowa ma si Musa manjumpangi si Firaun muse. Dibuat ma abu laos disampathon tu ginjang. Rarat ma abu i jala hona tu halak Mesir. Gabe bisulon ma halak Mesir dohot angka pinahan ni nasida. Alai nang pe songon i, tongtong do ndang olo si Firaun paloashon bangso Israel.

Disuru Jahowa ma muse si Musa manjumpangi si Firaun. Dipaboa ma hata ni Jahowa na mandok, ‘Tongtong dope  ndang dipaloas ho bangsongki lao? Marsogot, hubahen nama udan es tu luat on.’ Marsogotna i, ro ma udan es, sillam dohot api. Ndang hea dope diida halak Mesir songon i. Sega ma sude suan-suanan ni nasida. Alai ndang masa on di Gosen. Didok si Firaun ma, ‘Dok ma tu Jahowa asa dipaso udan on! Dung i lao ma hamu.’ Hape dung so udan es i, ndang dipaloas si Firaun bangso Israel lao.

Didok si Musa ma, ‘Ro nama sihapor manang belalang pasudahon sisa ni suan-suanan i.’ Ro ma marjuta belalang pasudahon suan-suanan di ladang dohot buah-buahan. Didok si Firaun ma muse, ‘Dok ma tu Jahowa asa dipalao belalang on.’ Alai dung dipalao Jahowa belalang i, tongtong do jugul si Firaun.

Didok Jahowa ma tu si Musa, ‘Angkat ma tanganmu dompak langit.’ Tompu ma golap langit. Saleleng tolu ari, golap ma sude inganan ni halak Mesir. Alai molo inganan ni halak Israel, tiur do.

Dung i didok si Firaun ma tu si Musa, ‘Lao ma hamu, alai tinggalhon ma pinahanmuna dison.’ Alai didok si Musa ma, ‘Ingkon boanonnami do pinahan i, asa adong persembahannami tu Debata.’ Muruk ma si Firaun. Gogo ma soarana mandok, ‘Laho hamu sian on! Molo ro muse hamu, ingkon hupamate hamu.’

“Idaonmuna ma hasurungan ni halak partigor martimbangkon halak parjahat, hasurungan ni halak sioloi Debata, martimbangkon halak na so mangoloi ibana.”​—Maleaki 3:18