Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PARSIAJARAN 9

Marianakhon ma Nasida!

Marianakhon ma Nasida!

Nunga marpulu-pulu taon si Abraham kawin dohot si Sara. Ditinggalhon nasida do jabu ni nasida di kota Ur, jala tading di kemah do nasida. Nang pe songon i, ndang marungut-ungut si Sara. Alana porsea do ibana tu Jahowa.

Sada tingki didok si Sara ma tu si Abraham, ‘Molo adong anakmu sian si Hagar, dos do i songon anakku.’ Ndang sadia leleng, tubu ma anak ni si Hagar. Dibahen ma goarna si Ismael.

Tingki marumur 99 taon si Abraham jala si Sara 89 taon, adong ma tolu halak ro manjumpangi nasida. Ditogihon si Abraham ma nasida mangan di toru ni sada hau. Diboto ho do ise na tolu halak on? Suru-suruan manang malaikat do nasida! Didok suru-suruan i ma tu si Abraham, ‘Sataon nai, di tingki sisongon on, tubu ma anakmu.’ Dibege si Sara do i sian kemahna. Mengkel ma ibana sahalakna, jala didok ma di rohana, ‘Nunga matua ahu. Boi dope ahu manubuhon anak?’

Ditaon na mangihut, partus ma si Sara. Pas songon na didok suru-suruan ni Jahowa. Dibahen si Abraham ma goarna si Isak, artina “Siparengkelon”.

 Tingki marumur lima taon si Isak, diida si Sara ma si Ismael mangejeki si Isak. Alani i, dipangido si Sara ma tu si Abraham, asa diusir si Hagar dohot si Ismael. Mulana, ndang olo si Abraham. Alai dijaga Jahowa do si Isak. Didok ma tu si Abraham, ‘Tangihon ma si Sara i. Hujaga pe si Ismael. Ai sian si Isak do saut janji na hudok i.’

“Alani haporseaon do umbahen na boi si Sara mardenggan daging. . . . pos do rohana, haposan do Debata na mangalehon janji i.”​—Heber 11:11