Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PARSIAJARAN 95

Sai Marbarita do Angka Murid ni Jesus

Sai Marbarita do Angka Murid ni Jesus

Adong ma sahalak baoa na lumpu na sai mangido-ido di gerbang ni joro. Tingki botari, diida ibana ma si Petrus dohot si Johannes. Ninna ma, ‘Asi ma rohamuna, lehon hamu ma di ahu manang aha pe taho.’ Didok si Petrus ma, ‘Adong do na naeng lehononnami tu ho, alai ndang hepeng. Di bagasan goar ni Jesus, mardalan ma ho!’ Ditogu si Petrus ma ibana asa jongjong. Gabe boi ma mardalan baoa i! Las ma roha ni angka halak na mangida i. Gabe porsea ma nasida jala gabe murid ni Jesus.

Alai muruk ma angka malim dohot halak Saduse. Diboan ma angka murid i tu pengadilan ni halak Jahudi. Didok ma, ‘Marhite huaso ni ise do dipamalum hamu baoa i?’ Dialusi si Petrus ma, ‘Huaso sian Jesus Kristus na dipamate hamu i do hupangke hami.’ Gogo ma didok angka pemimpin agama i, ‘Unang be dok hamu goar ni Jesus!’ Alai didok angka murid i ma, ‘Ndang adong na boi mangorai hami paboahon taringot Jesus.’

Dung bebas si Petrus dohot si Johannes, didapothon nasida ma murid na asing. Dipaboa nasida ma aha na masa. Dung i martangiang ma nasida jala didok ma, ‘Urupi ma hami asa barani marbarita.’ Dilehon Jahowa ma tu nasida tondi parbadia. Torus ma nasida marbarita dohot pamalumhon na marsahit. Ujungna, lam godang ma na gabe murid ni Jesus. Ditangkup halak Saduse ma angka murid i jala dipenjarahon ala cemburu nasida. Alai di borngin i, disuru Jahowa ma sada suru-suruan manang malaikat mambungka pintu ni penjara i. Didok suru-suruan i ma, ‘Hatop, laho ma hamu tu joro jala mangajari ma hamu disi.’

Marsogotna i, adong ma na mandok tu angka pemimpin agama, ‘Tarkunci do penjara i, alai ndang disi be angka baoa i! Nunga mangajari  nasida di joro!’ Ujungna, ditangkup ma muse angka murid i jala diboan tu pengadilan ni halak Jahudi. Didok sintua ni malim ma, ‘Kan nunga didok hami asa unang didok hamu be goar ni Jesus?’ Dialusi si Petrus ma, ‘Ingkon Debata do dioloi hami, ndang jolma.’

Mansai muruk ma angka pemimpin agama i jala naeng dibunu ma angka murid i. Alai adong ma sahalak Parise na margoar si Gamaliel mandok, ‘Hati-hati hamu! Debata do ra na mandongani nasida. Sotung gabe dialo hamu Debata.’ Dibege angka pemimpin agama i do hata ni si Gamaliel. Dibebashon ma angka murid i. Jala didok ma asa unang marbarita be nasida. Alai sai marbarita do nasida. Barani do nasida paboahon barita na uli, di joro dohot sian jabu tu jabu.

“Rumingkot do di hami mangoloi Debata gabe parhuaso unang apala jolma.”​—Ulaon ni Apostel 5:29