Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PARSIAJARAN 72

Jesus Tingki Dakdanak

Jesus Tingki Dakdanak

Di Nasaret do jabu ni si Josep rap dohot keluargana. Tukang hau do ibana. Diajarhon ibana do tu angka gellengna taringot Jahowa dohot Patikna. Ringgas do nasida tu sinagoga laho manomba Jahowa. Jala laho do nasida tu Jerusalem tiap taon laho mangarayahon Paska.

Tingki marumur 12 taon Jesus, laho ma nasida sakeluarga tu Jerusalem. Godang do halak na ro tusi laho mangarayahon Paska. Dung sae Paska, mulak ma si Josep dohot si Maria. Dirimpu nasida dohot Jesus mulak. Alai tingki dilului nasida Jesus di rombongan ni nasida, ndang adong ibana.

Gabe mulak ma muse nasida tu Jerusalem. Dilului nasida ma Jesus saleleng tolu ari. Dung i, laho ma nasida tu bagas joro. Diida nasida ma disi Jesus mangkata-hatai dohot angka guru. Godang do na disungkun Jesus tu nasida. Disungkun angka guru i ma muse ibana. Heran do nasida mambege alus ni Jesus. Alana, diantusi Jesus do angka Patik ni Jahowa.

 Nunga marsak si Josep dohot si Maria mangalului Jesus. Alani i, gabe didok si Maria ma, ‘Sian dia do ho amang? Nunga hulului hami ho tu sude inganan.’ Didok Jesus ma, ‘Na so diboto hamu do na ingkon di jabu ni Bapakku ahu?’

Dung i, mulak ma Jesus rap dohot natua-tuana tu Nasaret. Diajari si Josep do Jesus martukang. Lam balga ma Jesus jala lam malo ma ibana. Lomo do roha ni Debata dohot angka halak tu ibana. Menurutmu, songon dia do Jesus tingki dakdanak?

“Mansai lomo do rohangku mangulahon lomo ni rohaM ale Debatangku, huingot do pangajarionMu di bagasan rohangku.”​—Masmur 40:9, Bibel siganup ari