Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PARSIAJARAN 60

Harajaon na Saleleng ni lelengna

Harajaon na Saleleng ni lelengna

Di tingki borngin, marnipi ma Raja Nebukadnesar. Marsak ma ibana jala ndang boi modom alani nipina i. Dijou ma angka peramal jala didok ma, ‘Patorang ma jo tu ahu aha nipingku.’ Didok nasida ma, ‘Paboa ma tu hami aha do nipimi, O rajanami.’ Alai didok si Nebukadnesar ma, ‘Daong. Ingkon hamu do na paboahon aha nipingku. Molo ndang, hubunu hamu.’ Didok nasida ma muse, ‘Paboa ma tu hami nipimi raja, asa dipaboa hami artina.’ Didok raja i ma, ‘Naeng mangoto-otoi ahu do hamuna. Paboa ma aha do nipingku!’ Didok nasida ma, ‘Ndang adong jolma na mamboto i. Ndang tarulahon hami i raja.’

Muruk situtu ma si Nebukadnesar. Disuru ma asa dipamate angka halak na malo, termasuk ma i si Daniel, si Sadrak, si Mesak, dohot si Abednego. Dipangido si Daniel ma tu raja asa dilehon tingki. Martangiang ma si Daniel dohot tolu donganna. Aha do na diulahon Jahowa?

Dipaboa Jahowa ma nipi ni si Nebukadnesar i tu si Daniel jala dipaboa do arti ni nipi i. Marsogotna i, didok si Daniel ma tu pangurupi ni raja i, ‘Unang ma pamate angka baoa na malo i. Hupaboa pe aha do nipi ni raja i.’ Diboan pangurupi i ma si Daniel tu si Nebukadnesar. Didok si Daniel ma tu raja i, ‘Nunga dipaboa Debata aha na laho masa tu raja i. On ma nipi ni raja i: Diida raja i ma sada patung na mansai balga, uluna sian mas. Andorana dohot tanganna sian perak. Butuhana sahat tu hae-haena sian tombaga. Lutut sahat tu pergelangan ni patna sian bosi. Pergelangan ni patna sahat tu toru sian bosi marcampur tano liat. Dung i, adong ma sada batu madabu sian dolok jala hona tu pat ni patung i. Marumpak jala hancur ma patung i. Gabe orbuk ma i jala dihabangkon alogo. Alai batu i gabe sada dolok na timbo jala ditutupi ma tano on.’

 Didok si Daniel ma muse, ‘On ma arti ni nipi ni raja i: Ulu ni patung na sian mas, manggombarhon harajaon ni raja i. Perak manggombarhon sada harajaon dungkon harajaonmu. Dung i, adong ma sada harajaon na songon tombaga laho mamarenta portibi on. Harajaon na mangihut, togu do songon bosi. Na parpudi, adong sada harajaon na tarbagi. Sada gogona songon bosi, jala sada nai ndang margogo songon tano liat. Batu na gabe dolok i manggombarhon Harajaon ni Debata. Harajaon i ma na laho manghancurhon sude harajaon jala adong do i saleleng ni lelengna.’

Marsomba ma si Nebukadnesar tu si Daniel. Didok ma, ‘Debatam do na paboahon i. Ndang adong Debata na songon i.’ Ujungna ndang jadi be dibunu si Daniel. Dibahen si Nebukadnesar ma ibana gabe pemimpin ni Babel dohot sude halak na malo. Ditangihon Jahowa do tangiang ni si Daniel i kan?

“Dipapungu ma angka raja i tu inganan na margoar Armagedon di bahasa Heber.”​—Pangungkapon 16:16