Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PARSIAJARAN 66

Diajarhon Si Esra ma Patik ni Debata

Diajarhon Si Esra ma Patik ni Debata

Hira-hira 70 taon dung mulak halak Israel tu Jerusalem, adong dope halak Israel na tinggal di Persia. Sahalak sian nasida, i ma malim Esra na mangajarhon Patik ni Jahowa. Dung diboto ibana na so diihuthon halak na di Jerusalem Patik ni Debata, naeng laho ma ibana tu Jerusalem mangurupi nasida. Tingki i, Raja Artasasta do raja di Persia. Didok ma tu si Esra, ‘Marbisuk do ho dibahen Debata, alani i boi do diajarhon ho Patikna. Laho ma ho, boan ma donganmu.’ Dung i marpungu ma si Esra dohot sude halak na naeng lao tu Jerusalem. Martangiang ma nasida asa dijaga Jahowa saleleng di pardalanan. Dung i lao ma nasida.

Dung opat bulan, sahat ma nasida di Jerusalem. Didok angka pemimpin na disi ma tu si Esra, ‘Dialo halak Israel do Jahowa. Kawin do nasida tu borua na so manomba Jahowa.’ Dung i, martangiang ma si Esra di jolo ni godang halak, didok ma, ‘Ale Jahowa, nunga godang na dilehon ho tu hami, alai sai mardosa dope hami tu ho.’ Gabe muba ma nasida. Alai, adong dope diulahon nasida na so denggan. Alani i, dipillit si Esra ma angka sintua dohot hakim laho mamareso parsoalan i. Dung tolu bulan dipareso, diusir ma angka halak na so olo manomba Jahowa.

Dung 12 taon, sae ma dipajongjong tembok ni Jerusalem. Dipapungu si Esra ma angka halak di tano lapang laho manangihon ibana manjaha Patik ni Debata. Jongjong do angka halak i manangihon si Esra. Tingki dipuji si Esra Jahowa, dohot do angka halak i mangangkat tanganna mamuji Debata. Dung i, dipatorang si Esra ma arti ni Patik ni Jahowa i. Denggan do i ditangihon nasida, gabe diboto ma naung mardosa nasida. Alani i, gabe tangis ma nasida. Marsogotna i, dijahahon si Esra ma muse Patik ni Debata tu nasida. Gabe diboto ma, na ingkon mangarayahon Ari Raya Parlape-lapean nasida satongkin nai. Dibahen ma angka na porlu tu perayaan i.

 Pitu ari ma Perayaan Parlape-lapean i. Las do roha ni halak Israel jala dipuji ma Jahowa ala denggan do panen ni nasida. Ndang hea dope songon i balga ni Perayaan Parlape-lapean mulai sian tingki ni si Josua. Dung sae perayaan i, marpungu ma angka halak laho martangiang. Didok ma, ‘Ale Jahowa, dipalua Ho do hami, dilehon Ho do hami mangan di padang pasir jala dilehon Ho do tano na denggan on. Alai sai mangalo do hami. Ndang olo hami manangihon angka panurirang na disuru Ho pasingothon hami. Alai sai sabar do Ho. Diingot Ho do janjim tu si Abraham. Saonari, marjanji ma hami laho mangoloi Ho.’ Disurathon nasida ma janji  i. Jala disegel angka pemimpin, halak Lepi, dohot angka sintua ma i.

“Halak na manangihon hata ni Debata jala na mangulahon i do na marlas ni roha!”​—Lukas 11:28