Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Keluargamuna Boi do Martua

 BAGIAN 8

Tingki Adong Pangunjunan

Tingki Adong Pangunjunan

”Halashon hamu ma i, nang pe saonari marsak hamu satongkin alani pangunjunan na marragamragam.”1 Petrus 1:6, Bibel siganup ari

Nang pe na dumenggan tabahen tu parrumatanggaon dohot tu parsaripeon, alai na so panagaman boi do masa pangunjunan na mambahen mago las ni rohanta. (Parjamita 9:11) Alai, diparade Debata do pangurupion tu hita tingki marsitaonon. Molo taihuthon prinsip ni Bibel, boi do hita dohot keluarga denggan mangadopi pangunjunan i.

 1 MARPOS NI ROHA MA TU JAHOWA

SONGON ON MA HATA NI BIBEL: ”Tinggangkon hamu ma nasa na hinolsohon ni rohamuna tu Ibana, ai disarihon do hamu!” (1 Petrus 5:7) Ingkon ingotonta do ndang na Debata na parohon pangunjunan. (Jakobus 1:13) Molo tapajonok tu Debata, patuduhononNa do dalan na dumenggan tu hita. (Jesaya 41:10) ”Usehon hamu ma rohamuna tu jolona.”Psalmen 62:9.

Boi ma tahilala hadameon molo tajaha jala taparsiajari Bibel ganup ari. Hilalaonta ma pangapulion sian Jahowa. (2 Korint 1:3, 4; Rom 15:4) Dibagabagahon Debata tu hita dame ”na sumurung sian saluhut roha.”Pilippi 4:6, 7, 13.

NA BOI ULAHONONMU:

  • Martangiang ma mangido pangurupion sian Jahowa asa tongtong dame jala torang pingkiranta

  • Lului ma aha na boi sibahenon jala pillit ma na dumenggan

2 SARIHON MA DIRIMU DOHOT KELUARGAMUNA

SONGON ON MA HATA NI BIBEL: ”Roha na pantas mangomo parbinotoan, jala pinggol ni halak na pistar manjalahi parbinotoan.” (Poda 18:15) Sarihon ma na dihaporluhon dongan saripemuna dohot ianakhonmuna. Mangkatahatai ma tu nasida jala tangihon ma.Poda 20:5.

Songon dia do molo marujung ngolu na tahaholongi? Unang pola maila laho tangis. Ingot ma, Jesus pe hea do ”tariluilu.” (Johannes 11:35; Parjamita 3:4) Ringkot do mangalehon tingki laho istirahat dohot modom. (Parjamita 4:6) On boi mangurupi hita asa margogo jala torang pingkiranta laho mangadopi hasusaan.

NA BOI ULAHONONMU:

  • Andorang so masa dope pangunjunan, tibu hian ma pasomalsomal denggan mangkatai tu keluarga. Asa unang mabiar nasida mangkatai tu hamu tingki adong pangunjunan tu keluarga

  • Sungkun ma dongan na hea mangadopi hasusaan na sarupa

3 LULUI MA PANGURUPION

SONGON ON MA HATA NI BIBEL: ”Sai masihaholongan do na mardongan jala songon na marhahamaranggi do di sitaonon.” (Poda 17:17, Bibel siganup ari) Sipata ndang diboto alealemuna aha sibahenonna laho mangurupi hamu. Alani i, unang pola alang rohamuna mangido pangurupion nasida. (Poda 12:25) Pangido ma pangurupion sian dongan na togu partondionna. Poda na nilehon ni nasida sian Bibel boi patoguhon partondionmuna.Jakobus 5:14.

Lam togu do tongtong partondionmuna molo ringgas hamu mangkatahatai dohot dongan na marpos ni roha tu bagabaga ni Debata. Boi do muse dame rohanta molo rade hita mangurupi halak na mangkaporluhon pangurupion. Alani i, taurupi ma halak asa mamboto bagabaga ni Jahowa. Jala unang ma hita mandao sian dongan na manghaholongi jala na manarihon hita.Poda 18:1; 1 Korint 15:58.

NA BOI ULAHONONMU:

  • Paboa ma holso ni rohamu tu alealemuna, jalo ma pangurupion nasida

  • Paboa ma tangkas aha na dihaporluhon hamu