Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Keluargamuna Boi do Martua

 BAGIAN 6

Na masa di Parsaripeon dung Tubu Ianakhon

Na masa di Parsaripeon dung Tubu Ianakhon

”Silehonlehon ni Jahowa do angka ianakhon.”Psalmen 127:3, Bibel siganup ari

Las do roha ni natuatua tingki tubu dakdanak di parsaripeonnasida, alai tamba ma ulaonna laho manarihon posoposonasida. Ala on dope hamu gabe natuatua, olo do suda tingki dohot gogo laho manarihon posoposo i. Jala ala hurang modom boi do mambahen hamu gabe mura muruk. Alani i, ingkon pahombaronmu do dirimuna laho manarihon ianakhonmuna jala manarihon na ringkot di parsaripeonmuna. Songon dia do poda ni Bibel boi mangurupi hamu?

 1 MASIANTUSAN MA HAMU

SONGON ON MA HATA NI BIBEL: ”Na lambas do haholongan i jala na sorta.” Haholongan i pe ”ndang na ahut, ndang na olo pangarimason”. (1 Korint 13:4, 5) Ala on dope hamu marposoposo gabe gumodangan ma tingkimu manarihon posoposomuna i. Alai, tunggani dolimuna pe ingkon tongtong do sarihononmu. Alani i, patuduhon ma pangargaionmuna tu ibana jala patuduhon ma na ringkot do pangurupionna laho rap manarihon ianakhonmuna.

”Angka baoa pe . . . marroha ma hamu mangangkupi nasida.” (1 Petrus 3:7) Marpangantusion ma hamu tu tunggani borumu, ala nunga gumodangan tingki dohot gogo ni nasida laho mangurus ianakhonmuna. Ala tanggung jawab na baru on di ibana, ra olo do ibana gabe stres, malojahu, manang gabe depresi. Sipata olo do jut rohana mida hamu, alai marlambas ni roha ma hamu, ala ”tagonan do halak na lambat tarrimas sian ulubalang.” (Poda 16:32) Patudu ma pangantusion jala lehon ma pangurupion na dihaporluhon.Poda 14:29.

NA BOI ULAHONONMU:

  • Ama: Urupi ma tunggani borumu manarihon posoposomuna nang tingki borngin. Unang ma pagodangku tingkimuna di luar, alai sarihon ma tunggani boru dohot ianakhonmuna

  • Ina: Las ma rohamu manjalo pangurupion sian tunggani dolimuna ala olo ibana manarihon ianakhonmuna i. Molo ndang songon na di rohamuna i dibahen, unang ma pintor muruk. Alai, sabar ma patuduhon songon dia isara na denggan

 2 PATOGU MA PARDONGANSARIPEONMUNA

SONGON ON MA HATA NI BIBEL: Jadi ingkon gabe ”sada sibuk nasida”. (1 Musa 2:24) Nang pe naung adong ianakhonmuna, alai hamu dohot tunggani dolimuna tongtong do sada sibuk. Dibahen i, porlu jagaonmu pardongansaripeonmuna tongtong togu.

Tunggani boru, hamauliatehon ma pangurupion na binahen ni tunggani dolimuna. Pangargaion na pinatudumu boi do ”pamalumhon” rohana. (Poda 12:18) Tunggani doli, paboa ma na dihaholongi hamu dohot diargai hamu do gogo dohot tingki ni tunggani borumuna. Puji ma ibana alana rade mangurus keluarga.Poda 31:10, 28.

”Unang ma masiringkoti na di ibana, na di dongan i ma!” (1 Korint 10:24) Na dumenggan ma ulahon tu dongan saripemuna. Lului ma tingki laho mangkatahatai, unang maol mamuji jala rade ma manangihon. Unang ma holan mamingkiri dirina sandiri taringot tu parsaoran ni na mardongansaripe. Parrohahon ma aha na dihaporluhon dongan saripe muna. Bibel mandok, ”Holan sian dos ni rohamuna be jala martingki hamu masipadaoan.” (1 Korint 7:3-5) Dibahen i, denggan ma hatai hamu taringot on di bagasan lambok ni roha. Molo marlambas ni roha jala marpangantusion, on boi mangurupi hamu patoguhon parsaripeonmuna.

NA BOI ULAHONONMU:

  • Porlu luluanmu tingki laho mangkatahatai hamu na dua

  • Patuduhon ma holongmu tu dongan saripemuna, songon mangirim SMS manang mangalehon silehonlehon

 3 AJARI MA IANAKHONMU

SONGON ON MA HATA NI BIBEL: ”Jala ingot ma naung sian mulai na metmet dope ho nunga ditanda ho buku na badia i, na boi mangalehon habisuhon di ho.” (2 Timoteus 3:15) Pingkiri hian ma songon dia bahenonmu laho mangajarajari anakhonmuna. Nang pe di bortian dope, nunga manangihon nasida di pangajarajarionmu, nunga boi ditanda soaramuna jala mangkorhon do na dihilalamu tu ibana. Ringgas ma hamu manjahahon buku nang pe ndang mangantusi dope ibana, on boi mangurupi ibana asa ringgas manjaha dung magodang.

Unang tapaima dung balga asa mangajarhon taringot Debata tu nasida. Rap martangiang ma dohot ibana tu Jahowa. (5 Musa 11:19) Jala nang pe tingki marmeammeam dohot ibana, taringoti ma angka tompaan ni Debata tu ibana. (Psalmen 78:3, 4) Lam magodang ibana, idaonna ma songon dia holongmuna tu Jahowa jala ibana pe gabe manghaholongi Jahowa.

NA BOI ULAHONONMU:

  • Tangiangkon ma mangido pangurupion laho mangajarajari ianakhonmuna

  • Jotjot ma taringoti angka na ringkot botoonna asa boi ibana marsiajar sian mulai na metmet