Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Keluargamuna Boi do Martua

 BAGIAN 3

Molo Adong Parungkilon di Keluarga

Molo Adong Parungkilon di Keluarga

”Masihahoholongan situtu ma hamu, ai dihungkupi haholongon ni roha i do godang dosa.”1 Petrus 4:8

Dung marrumatangga hamu, marragam do na boi mambahen parungkilon. Boi do alani ndang sapandapot, ndang sahata saoloan, jala boi do on masa alana asing be ingananta magodang. Parungkilon on, olo do ro sian luar ni rumatangga manang sian na asing na so panagaman.

Ndang lomo rohanta molo adong parungkilon. Alai Bibel mandok, molo ro parungkilon tu hita unang tapasiding, taadopi ma. (Mateus 5:23, 24) Prinsip ni Bibel boi mangurupi hita mangadopi parungkilon di keluarga.

 1 HATAI MA DENGGAN

SONGON ON MA HATA NI BIBEL: ”Martingki be do sude na masa . . . adong do tingki mangkatai.” (Parjamita 3:1, 7, Bibel siganup ari) Porlu luluanmuna tingki laho mangkatai pasaehon parungkilon na ro. Paboa ma songon dia pandapot dohot panghilalaanmuna, jala ”hatahon hamu ma na sintong” tu dongan saripemu taringot tu parungkilon na niadopanmuna. (Epesus 4:25) Nang pe hansit rohamu, alai unang ma gogo soaramuna papuashon muruk. Hata na lambok boi do pamalum roha asa unang tubu parbadaan.Poda 15:4; 26:20.

Nang pe ndang sapandapot, tongtong ma marlambok ni roha jala patuduhon ma holong dohot pangargaion. (Kolosse 4:6) Molo adong parungkilon, hatop ma dihatai laho pasaehon, unang ma dipahohom.Epesus 4:26.

NA BOI ULAHONONMU:

  • Lului ma tingki na denggan laho mangkatai molo adong parungkilon

  • Rade ma manangihon, unang dialusalusi. Adong do tingkimuna mangkatai

 2 TANGIHON JALA MARPANGANTUSION MA

SONGON ON MA HATA NI BIBEL: ”Masijolojoloan ma hamu masipasangapan!” (Rom 12:10) Ringkot do taparrohahon isaranta laho manangihon. Marpangantusion ma tu pandapot ni dongan saripemuna, tangihon ma nasida, ”sapangkilalaan ma hamu . . . jala serep ma rohamuna.” (1 Petrus 3:8, Bibel siganup ari; Jakobus 1:19) Unang paula so dibege molo mangkatai dongan saripemuna. Alai molo boi, so ma satongkin sian karejomu jala tangihon ma denggan, manang dokhon ma dung sae karejo pe dihatai. Molo dibahen hamu do dongan saripemuna i songon alealemu, on boi mangurupi hita asa ”unang muramura muruk.”Parjamita 7:9, Bibel siganup ari.

NA BOI ULAHONONMU:

  • Tangihon ma hata ni dongan saripemuna nang pe ndang sapandapot hamu

  • Sungkun ma di bagasan rohamuna boasa songon i pangkataionna

3 ULAHON MA HOMBAR TU HAPUTUSAN MUNA

SONGON ON MA HATA NI BIBEL: ”Adong do laba ni ganup halojaon, alai hapogoson do horhonon ni na holan hatahata.” (Poda 14:23, Bibel siganup ari) Ndang holan mangolohon sambing. Ingkon diulahon do hombar tu haputusan naung binahenmuna. Nang pe suda tingki dohot gogo laho mangulahon i, alai marlaba do i jala ndang marisuang. (Poda 10:4) Molo diulahon hamu sian nasa gogomuna laho mangulahon on, ”dumenggan ma karejomuna.”Parjamita 4:9, Bibel siganup ari.

NA BOI ULAHONONMU:

  • Hatai ma aha na laho siulahononmu mangadopi parungkilon i

  • Ingot ma aha naung diulahon, manang na so diulahon dope