Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Keluargamuna Boi do Martua

 BAGIAN 1

Jalo ma Poda Sian Debata Asa Martua

Jalo ma Poda Sian Debata Asa Martua

”Sian mulana i do ditompa Panompa i nasida baoa dohot boruboru.”Mateus 19:4

Jahowa * do na mamasumasu pardongansaripeon sian mulana. Dipaboa di Bibel, Debata manompa borua na parjolo ”jala ditogu ibana tu si Adam”. Las ma roha ni si Adam, didok ibana ma, ”On do sahali holiholi sian angka holiholingku.” (1 Musa 2:22, 23) Dihalomohon Jahowa dope saonari on asa martua sude na mardongan saripe.

Tingki hita marhasohotan, denggan do sude di hita ndang adong na hurang. Alai sasintongna, na mardongan saripe na masihaholongan pe ndang malua sian hasusaan na masa di parsaripeon. (1 Korint 7:28) Di buku on, taida ma prinsip ni Bibel na boi mangurupi asa martua na mardongan saripe dohot na markeluarga.Psalmen 19:8-11.

 1 ULAHON MA NAUNG NIATURHON NI JAHOWA

SONGON ON HATA NI BIBEL: Baoa do ulu di parsaripeon.Epesus 5:23.

Molo hamu tunggani doli, lomo do roha ni Jahowa asa lambok hamu tu tunggani borumuna. (1 Petrus 3:7) Dilehon Debata tunggani boru laho mangurupi hamu, jala lomo rohaNa asa dihaholongi jala dipasangap hamu nasida. (1 Musa 2:18) Holong ma nian na mangonjar rohamu patujolohon na ringkot di nasida sian na di hamu.Epesus 5:25-29.

Molo hamu tunggani boru, lomo do roha ni Jahowa pasangaponmuna jala urupanmu tunggani dolimuna. (1 Korint 11:3; Epesus 5:33) Mardos ni roha jala masiurupan ma hamu di ulaonmu. (Kolosse 3:18) Molo diulahon tunggani boru songon on, uli ma nasida di adopan ni tunggani dolina dohot di adopan ni Jahowa.1 Petrus 3:1-6.

NA BOI ULAHONONMU:

  • Sungkun jala tangihon ma dongan saripemuna, songon dia bahenonmu gabe tunggani doli manang tunggani boru na denggan laos marsitutu ma mangulahon i

  • Marlambas ni roha ma tu dongan saripemuna, ala dihaporluhon do tingki laho mananda dohot pasonangkon roha ni nasida

2 SARIHON MA PANGHILALAAN NI DONGAN SARIPEMU

SONGON ON HATA NI BIBEL: Ringkot sarihononmu angka na dihaporluhon dongan saripemuna. (Pilippi 2:3, 4) Sangap ma bahen nasida, didok Jahowa tu angka naposoNa asa ”basar maradophon saluhut”. (2 Timoteus 2:24) ”Hata na asal nidok, maniham do i songon podang; alai ianggo hata na nidok marhite habisuhon, mambahen hamalumon do i.” Alani i, pingkiri ma parjolo hata sidohononmu. (Poda 12:18, Bibel siganup ari) Boi do urupan ni Jahowa hamu asa denggan jala lambok mangkatai.Galatia 5: 22, 23; Kolosse 4:6.

NA BOI ULAHONONMU:

  • Martangiang ma mangido pangurupion asa boi tiur roha nang pingkiranmuna tingki mangadopi parsoalan

  • Pingkiri ma denggan aha na laho sihatahononmuna jala songon dia mangkatahon i

 3 SAROHA SAPINGKIRAN MA HAMU

SONGON ON HATA NI BIBEL: Dung marhasohotan, nunga ”sada daging” be hamu. (Mateus 19:5) Alai sipata ndang sai dos pandapotmuna. Alani i, porlu asa sai saroha jala sapingkiran hamu. (Pilippi 2:2) Tarlumobi on ringkot tingki mambahen sada haputusan. Bibel mandok, ”Pangido ma nasehat na denggan asa marhasil ulaonmu.” (Poda 20:18, Bibel siganup ari) Pangke ma prinsip ni Bibel mangurupi hamu tingki mambahen haputusan na ringkot.Poda 8:32, 33.

NA BOI ULAHONONMU:

  • Paboa ma aha na adong di rohamuna, unang holan mangalusi sambing manang holan mangalehon pandapot

  • Hatai ma parjolo dohot dongan saripemuna andorang so mambahen haputusan

^ par. 4 Jahowa i ma goar ni Debata na disurat di Bibel.