Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 BAGIAN 5

Songon dia Asa Denggan Marsimatua

Songon dia Asa Denggan Marsimatua

”Solukhon hamu ma parasirohaon situtu . . . habasaron, haserepon, lambok dohot lambas ni roha.”Kolosse 3:12

Dungkon marhasohotan hamu, pulik nama parrumatanggaonmu sian natuatuamuna. Nang pe ingkon tongtong haholongan jala pasangaponmu natuatuamuna, alai ingkon parjolo ma sarihononmu dongan saripemuna. Ra maol do on dihilala natuatuamuna. Alai, prinsip ni Bibel boi do mangurupi hamu asa tongtong denggan tu nasida dohot tu sude keluarga ni dongan saripemuna.

 1 PATUDU MA PANGARGAION NA PATUT TU SIMATUA

SONGON ON MA HATA NI BIBEL: ”Parsangapi amangmu dohot inangmu!” (Epesus 6:2) Nang pe naung marhasohotan hamu, ingkon tongtong do pasangaponmu natuatuamuna. Suang songon i do tu dongan saripemuna, ingkon pasangaponna do natuatuana. ”Ndang na mangiburu haholongan i.” Alani i, unang ma mangiburu hamu molo burju dongan saripemuna tu natuatuana.1 Korint 13:4; Galatia 5:26.

NA BOI ULAHONONMU:

  • Padao ma hata na mandok ”Na leasan roha ni keluargam tu ahu” manang ”Ndang hea denggan di natuatuam aha pe na huulahon”

  • Mardop ni roha ma hamu tu dongan saripemuna

 2 TEGAS MA MOLO PORLU

SONGON ON MA HATA NI BIBEL: ”Dibahen i, tadinghonon ni baoa do amana dohot inana mandongani jolmana, jadi sada sibuk nasida.” (1 Musa 2:24) Jotjot do natuatua mangantoi rumatangga ni ianakhonna ala ninna rohana, martanggung jawab dope nasida tu hamu nang pe naung marrumatangga.

Hamu do na manontuhon songon dia natuatua muna manarihon parsaripeonmuna. Tangkas jala denggan ma taringoti hamu tu nasida. (Poda 15:1) Serep ni roha dohot lambas ni roha, boi mambahen hamu denggan marsimatua jala tongtong patuduhon ”holong ni rohamuna.”Epesus 4:2, Bibel siganup ari.

NA BOI ULAHONONMU:

  • Molo diida hamu natuatuamuna jotjot mangatur di parsaripeonmu, denggan ma paboa tu dongan saripemuna

  • Tontuhon ma dohot dongan saripemuna songon dia laho mangatasi i