Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PASAL 51

Dipamate di Pesta Ulang Tahun ni Si Herodes

Dipamate di Pesta Ulang Tahun ni Si Herodes

MATEUS 14:1-12 MARKUS 6:14-29 LUKAS 9:7-9

  • DISURU SI HERODES MA ASA DIPONGGOL ULU NI SI JOHANNES

Tingki marbarita na uli sisean ni Jesus di Galilea, dipenjara do si Johannes Pandidi. Nunga naeng dua taon ibana dung dipenjarahon.

Dipenjarahon do si Johannes ala sai didok ibana sala si Herodes. Tingki i, disirangkon si Herodes do tunggane boruna, holan asa boi mambuat si Herodias tunggane boru ni abangna. Sala do na niulahon ni si Herodes i mangihuthon Patik ni si Musa jala nunga mangalangkup ibana disi. Ujungna dipenjarahon ma si Johannes, ra alani pangidoan ni si Herodias.

Ndang diboto si Herodes aha bahenonna tu si Johannes. Ai mabiar do ibana tu godang halak, ala “panurirang do si Johannes didok roha nasida”. (Mateus 14:5) Asing ni i, si Herodias pe ‘sogo do rohana’ tu si Johannes. Jala dilului ibana do dalan laho mambunu si Johannes. (Markus 6:19) Alai, dapot ma tingki na denggan di si Herodias.

Andorang so Paska 32 M, dibahen si Herodes ma pesta ulang tahunna. Dijou ibana do tu pestana i angka pejabat, komandan militer, dohot angka halak na sangap di Galilea. Dung i manortor ma si Salome, boru ni si Herodias di jolo ni angka na ro i. Jala las do roha ni angka na ro i mangida i.

Si Herodes pe las do rohana tu si Salome. Didok ibana ma, “Pangido ma sian ahu manang aha lomo ni roham, sai na lehononku do i tu ho.” Jala marsumpa do si Herodes, ninna ma, “Manang aha pe na pinangidom, lehononku do i tu ho, agia pe satonga ni harajaonkon.” Alani i, disungkun si Salome ma omakna, ninna ma, “Aha do pangidoonku?”​—Markus 6:22-24.

Didok ma tu boruna i, “Ulu ni si Johannes Pandidi.” Dung i, hatop ma ibana mulak tu si Herodes jala ninna ma, “Lehon ma tu ahu saonari ulu ni si Johannes Pandidi di atas ni talam.” (Markus 6:24, 25) Gabe tingki na denggan do i di si Herodias laho pamatehon si Johannes.

Marsak do si Herodes alani pangidoanna i. Alai, ala nunga marsumpa ibana, ingkon pasautonna do i. Disuru si Herodes ma asa diponggol ulu ni si Johannes di penjara. Ndang sadia leleng ro ma na mamonggol ulu ni si Johannes i, diboan ma ulu ni si Johannes di ginjang ni talam. Dilehon ma i tu si Salome jala dipasahat ma tu omakna.

Ro ma angka sisean ni si Johannes, dibuat ma bangkena i jala dikubur. Dung i, dipaboa nasida ma na masa i tu Jesus.

Di pudian ni ari, sungkun-sungkun do roha ni si Herodes mambege barita taringot tu Jesus. Dibege ibana do Jesus pamalumhon na marsahit, jala mangusir suru-suruan na jahat. Alani i, dirimpu si Herodes ma “naung hehe si Johannes sian na mate”. (Lukas 9:7) Ujungna, sai marsitutu ma si Herodes naeng pajumpang dohot Jesus. Ndang naeng manangihon ajaran ni Jesus ibana, alai naeng mamboto manang na tutu do na nidokna i.