Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PASAL 1

Dua Barita na Ro sian Debata

Dua Barita na Ro sian Debata

LUKAS 1:5-33

  • SI GABARIEL PABOAHON TARINGOT TU HATUTUBU NI SI JOHANNES PANDIDI

  • SI  GABARIEL PABOAHON TU SI MARIA TARINGOT TU HATUTUBU NI JESUS

Sasintongna, sude do isi ni Bibel ro sian Debata. Dilehon do i laho mangajari hita. Saonari, taparsiajari ma dua barita na ringkot na dipaboa lobi sian 2.000 taon naung salpu. Barita i dipaboa suru-suruan na margoar Gabariel, “na jongjong di jolo ni Debata”. (Lukas 1:19) Aha do barita na ringkot i?

Hira-hira taon 3 SM, dipaboa si Gabariel ma barita na parjolo. Dipaboa ma i tu si Sakaria. Ibana dohot tunggane boruna si Elisabet tading di Judea, inganan na mardolok-dolok na jonok tu Jerusalem. Nunga matua nasida jala ndang marianakhon dope. Sada tingki, marhobas ma si Sakaria gabe malim di bagas joro na di Jerusalem. Hape tompu ma jongjong si Gabariel jonok tu langgatan i.

Gabe mabiar situtu ma si Sakaria. Alai dipapos suru-suruan i ma rohana, ninna ma, “Unang ho mabiar Sakaria, ai nunga ditangihon pangidoanmi. Tubuhonon ni si Elisabet tunggane borumi ma sada anak di ho, jala bahen ma goarna si Johannes.” Dung i, dipaboa si Gabariel do muse taringot tu si Johannes i, na gabe ‘sangap ibana di adopan ni Jahowa’ jala bahenonna halak “gabe bangso na rade di Jahowa”.​—Lukas 1:13-17.

Ndang porsea si Sakaria tu hatana i. Boasa? Ala nunga matua ibana dohot tunggane boruna si Elisabet. Didok si Gabariel ma tu ibana, “Gabe ngungu ma ho, ndang boi be ho mangkatai sahat tu na masa i”.​—Lukas 1:20.

Laos di tingki i, sungkun-sungkun do roha ni halak boasa leleng si Sakaria kaluar sian bagasan i. Ujungna kaluar ma si Sakaria, alai ndang boi be ibana mangkatai. Marhite tanganna nama dibahen ibana laho mangkatai tu nasida. Gabe diboto nasida ma na masa do halongangan tu ibana di bagas joro i.

Dung sae marhobas di bagas joro, mulak ma si Sakaria tu jabuna. Ndang sadia leleng dungkon i, mardenggan pamatang ma si Elisabet! Saleleng lima bulan andorang so tubu anakna i, sai di jabu do si Elisabet dao sian angka jolma.

Ro ma muse si Gabariel na paduahalihon tu sahalak namarbaju na margoar si Maria. Ibana tading di Galilea di kota Nasaret di sabola utara ni Jerusalem. Didok si Gabariel ma tu ibana, “Dihaholongi Debata do ho.” Didok ma muse, “Ida ma! Gabe-gabean ma ho jala tubuhononmu ma anak, bahen ma goarna Jesus.” Dung i, didok si Gabariel ma muse, “Gabe sangap ma ibana, goaron ma ibana Anak ni Natumimbul i. . . . Mamarenta ma ibana gabe Raja tu pinompar ni si Jakkob salelengna jala ndang na laho marujung Harajaonna i.”​—Lukas 1:30-33.

Tontu hasangapon do di si Gabariel pasahathon dua barita na ringkot i. Molo tajaha hatorangan taringot tu si Johannes dohot taringot tu Jesus, lam tangkas ma taboto boasa mansai ringkot barita na ro sian surgo i.