Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PASAL 5

Didia do Jesus Tubu jala Andigan?

Didia do Jesus Tubu jala Andigan?

LUKAS 2:1-20

  • JESUS TUBU DI BETLEHEM

  • ANGKA PARMAHAN RO MANGIDA JESUS

Di tingki i, diparentahon Kesar Augustus ma asa sude halak di Imperium Rom mandaftarhon dirina be. Borhat ma si Josep dohot si Maria tu huta hatubuanna, i ma Betlehem na di sabola selatan ni Jerusalem.

Godang do halak ro tu Betlehem laho mandaftarhon dirina. Alani i, ndang adong be inganan dapot ni si Josep dohot si Maria laho marborngin. Gabe marborngin ma nasida di handang ni binatang, i ma inganan ni halode dohot binatang na asing. Di inganan i ma Jesus tubu. Dibungkus si Maria do ibana dohot lampin jala dipeakkon tu inganan panggagatan.

Tontu nunga diboto Debata hian, na laho bahenon ni Kesar Augustus parenta asa sude halak mandaftarhon dirina. Alana marhite i, boi ma Jesus tubu di huta Betlehem, huta ni ompuna Raja Daud. Jala nunga dipaboa hian di Surat na Badia, di huta i do tubu Panggomgomi na dijanjihon i.​—Mika 5:1.

Mansai ringkot do na masa di borngin i! Tingki di ladang dope angka parmahan, tompu ma ro sinondang sian langit tu nasida. Hasangapon ni Jahowa do i! Ro ma sada sian suru-suruan ni Debata mandok tu nasida, “Unang hamu mabiar, ai na pasahathon barita na uli do ahu tu hamu taringot tu las ni roha na laho hilalaon ni sude jolma. Nunga tubu di hamu sadari on Sipalua, di huta ni si Daud, i ma Kristus Tuan i. On ma tanda di hamu: Jumpangmuna ma sada poso-poso dibungkus dohot lampin jala peak di bagasan palangka.” Tompu ma ro mansai torop angka suru-suruan, ninna ma, “Hasangapon ma di Debata di banua ginjang jala dame ma di tano on di tonga-tonga ni jolma na hinalomohon ni rohana.”​—Lukas 2:10-14.

Dung laho suru-suruan i, didok angka parmahan i ma, “Beta ma hita tu Betlehem marnida na masa, na pinaboa ni Jahowa tu hita.” (Lukas 2:15) Hatop ma nasida laho, jala diida nasida ma Jesus na baru tubu i di inganan na nidok ni suru-suruan i. Dung dipaboa angka parmahan i hata ni suru-suruan i, longang ma sude halak. Diparrohahon si Maria do sude hata i jala disimpan di bagasan rohana.

Godang do halak porsea molo Jesus tubu tanggal 25 Desember. Hape bulan Desember, ngali do ari jala jotjot do ro udan di Betlehem. Gariada olo do ro salju. Tontu di tingki sisongon i, ndang adong parmahan na marborngin di ladang laho manjaga pinahan ni nasida. Asing ni i, di tingki sisongon i, ndang suruon ni Kesar ni Rom rayatna laho tu luat na dao laho mandaftarhon diri. Ai di tingki i, sogo do roha ni rayat tu pamarentaon ni Rom. Alani i, boi ma tadok hira-hira bulan Oktober do Jesus tubu.