Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PASAL 87

Marbisuk ma Mamillit na Dumenggan

Marbisuk ma Mamillit na Dumenggan

LUKAS 16:1-13

  • TUDOSAN TARINGOT TU HATOBAN NA SO SINTONG

  • ‘LULUI MA ALE-ALE’ MARHITE ARTAM

Sian tudosan ni Jesus taringot tu anak na mago, boi ma diantusi angka sijalo pajak, siboto surat, dohot angka halak Parise na olo do Debata manalpuhon hasalaan ni pardosa na marhamubaon. (Lukas 15:1-7, 11) Dung i, mangkatai ma muse Jesus tu angka siseanna. Dipaboa Jesus ma tudosan na asing taringot tu baoa na mora, jala adong ma hatobanna na didok ndang jujur.

Ndang denggan hatoban i mamangke arta ni tuanna. Gabe naeng dipecat tuanna i ma ibana. Didok hatoban i ma di rohana, “Aha ma na ingkon huulahon? Ai buaton ni tuanki nama na huradoti i. Ndang adong be gogongku laho mangula jala maila do ahu mangido-ido.” Alani i, gabe didok ibana ma, “Huboto do aha na ingkon huulahon, asa molo dipakaluar ahu sian parkarejoanki, jaloon ni angka halak ma ahu di jabu ni nasida.” Pintor dijou ma angka na marutang tu tuanna i jala disungkun ma nasida, “Sadia do utangmu tu tuanku?”​—Lukas 16:3-5.

Dialusi na parjolo ma, “Miak jetun 2.200 liter.” Ra adong do ladang Jetun ni na marutang i manang partiga-tiga miak do ibana. Gabe didok hatoban i ma tu na marutang i, “Buat ma muse surat parjanjianmi, hundul ma ho jala hatop ma surathon gabe 1.100 liter.”​—Lukas 16:6.

Disungkun hatoban i ma muse na asing, “Molo ho, sadia utangmu?” Dialusi ma, “Saratus goni gandum.” Didok ibana ma tu halak i, “Buat ma muse surat parjanjianmi jala surathon ma gabe 80 goni.” Gabe diorui ma utangna 20 porsen.​—Lukas 16:7.

Tingki i, martanggung jawab dope ibana mangurus arta ni tuanna i. Alani i, marhak do ibana mangorui utang ni angka halak. Ala diulahon ibana i, gabe marale-ale ma ibana tu angka na marutang i. Gabe olo ma nasida manjalo ibana molo ndang karejo be.

Ujungna diboto tuanna i ma na diulahon hatobanna. Nang pe rugi ibana, alai dipuji do hatobanna i. Ai ‘malo’ do hatobanna i, nang pe “ndang sintong” na niulahonna. Didok Jesus ma muse, “Taringot tu pasaehon parsoalan tu sundut on, ummalo do angka anak ni portibi on sian angka anak ni hatiuron.”​—Lukas 16:8.

Ndang lomo roha ni Jesus tu na niulahon ni hatoban i, jala ndang dijujui ibana hita margabus tingki mangulahon ulaonta. Antong aha do na boi taparsiajari? Didok Jesus ma tu angka siseanna, “Lului ma ale-alem marhite hamoraon na sian portibi na jahat on, asa molo habis hamoraonmi jaloon ni nasida ma hamu di inganan na manongtong i.” (Lukas 16:9) Sian tudosan on, marsiajar ma hita asa marbisuk. Ingkon marbisuk do naposo ni Debata  mamangke arta ni nasida, jala tongtong diingot pangkirimon tu ari na naeng ro.

Holan Debata Jahowa dohot Anakna do na boi manontuhon ise na masuk tu Harajaon banua ginjang manang tu Paradeiso. Jadi, tapangke ma artanta laho mangurupi ulaon Harajaon, asa boi hita tongtong marale-ale tu Debata dohot tu Jesus. Alani i, tadapot ma hangoluan na saleleng-lelengna nang pe mago mas, perak, dohot sude artanta.

Didok Jesus do muse, molo denggan hita tingki mamangke arta, boi ma denggan hita tingki mangulahon na rumingkot. Alani i didok Jesus ma, “Molo ndang boi hamu dihaporseai mamangke hamoraon na sian portibi na jahat on, ise ma na olo pasahathon hamoraon na sintong tu hamu [tanggung jawab na ni lehon ni Debata tu naposona]?”​—Lukas 16:11.

Marhite tudosan on, dipatudu Jesus ma godang do tanggung jawab ni nasida molo naeng parsidohot tu “inganan na manongtong i”. Alani i, ndang boi sasahalak gabe hatoban ni Debata huhut gabe hatoban ni hamoraon. Jesus mandok, “Ndang haoloan ni sahalak hatoban dua tuan. Ai gabe sogo do rohana tu na sada jala holong rohana tu na sada nai, manang pasangaponna do na sada jala leas rohana tu na sada nai. Ndang boi hamu gabe hatoban ni Debata dohot hatoban ni hamoraon.”​—Lukas 16:9, 13.