Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PASAL 92

Sahalak na Marsahit Kusta Mandok Mauliate

Sahalak na Marsahit Kusta Mandok Mauliate

LUKAS 17:11-19

  • DIPAMALUM JESUS SAMPULU HALAK NA MARSAHIT KUSTA

Asa unang dibunu anggota ni Sanhedrin Jesus, laho ma ibana tu Epraim di utara ni Jerusalem. Disi ma ibana rap dohot angka siseanna. Gabe dao ma ibana sian angka musuna. (Johannes 11:54) Alai nunga jonok Paska taon 33 M. Alani i, dibolus Jesus ma Samaria jala laho tu Galilea na di utara. On ma parpudi sahali ibana tusi andorang so mate.

Tingki dibolus Jesus angka huta, jumpang ma ibana dohot sampulu halak na hona kusta. Adong do sahit kusta na mambahen habis jari-jari ni tanganna, jari-jari ni patna, manang pinggolna. (4 Musa 12:10-12) Mangihuthon Patik ni Debata, ingkon didok na hona kusta i do, “Na ramun, na ramun!” Jala pulik do ingananna dibahen.​—3 Musa 13:45, 46.

Alani i, ndang olo sisampulu halak na marsahit kusta i manjonoki Jesus. Alai jou-jou ma nasida, “Jesus, Guru, asi ma roham tu hami!” Mangida i, didok Jesus ma, “Laho ma jala patudu ma dirimuna tu angka malim.” (Lukas 17:13, 14) Dipatudu Jesus do na diargai ibana Patik ni Debata. Alana, angka malim do na marhak paboahon naung malum sasahalak sian kusta. Dung i pe asa boi nasida rap tading dohot angka na sehat.​—3 Musa 13:9-17.

Pos do roha ni sisampulu halak i na boi Jesus pamalumhon nasida. Laho do nasida tu angka malim, hape ndang malum dope nasida. Alani i, dipasu-pasu ma haporseaon ni nasida. Tingki na mardalan i, boi ma dihilala sisampulu halak i naung malum nasida.

Alai ro ma sahalak sian nasida mandapothon Jesus laho mandok mauliate. Hape halak Samaria do ibana. Dung i, “gogo ma ibana marsoara mamuji Debata”. Ai pos do rohana, Debata do na pamalumhon ibana. (Lukas 17:15) Dung jumpang ibana dohot Jesus, marsinggang ma ibana jala didok ma mauliate.

Didok Jesus ma tu angka halak na disi, “Nda sampulu halak do na dipamalum i? Alai didia do na sia nai? Laos so adong do sian nasida mulak laho mamuji Debata asing ni baoa na sian bangso na asing on?” Dung i ninna ma tu halak Samaria i, “Hehe ma ho jala mulak ma ho, haporseaonmi do mambahen ho malum.”​—Lukas 17:17-19.

Marhite pamalumhon sisampulu halak na marsahit kusta, dipatudu Jesus ma na sian Jahowa do huaso laho pamalumhon i. Ndang holan malum baoa Samaria i, alai olo do ra gabe dapotna hangoluan na saleleng ni lelengna. Saonari ndang dibahen Jesus be tanda halongangan manang mukjizat tu hita. Alai molo porsea hita tu Jesus, dapotta ma hangoluan na saleleng ni lelengna. Taargai do i songon na binahen ni baoa Samaria i?