Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PASAL 99

Dipamalum Jesus na Mapitung jala Diurupi Si Sakeus

Dipamalum Jesus na Mapitung jala Diurupi Si Sakeus

MATEUS 20:29-34 MARKUS 10:46-52 LUKAS 18:35–19:10

  • DIPAMALUM JESUS NA MAPITUNG DI JERIKO

  • MUBA MA SI SAKEUS

Sahat ma Jesus dohot godang halak di Jeriko. Hira-hira sadari pardalanan ma sian Jeriko tu Jerusalem. Adong dua kota Jeriko. Kota Jeriko na leleng dohot na baru na dipajongjong di tingki ni halak Rom. Hira-hira 1,6 km ma daona sian kota na sada tu kota na sada nai. Tingki mardalan Jesus sian kota Jeriko na leleng tu kota Jeriko na baru, adong ma dua pangido-ido na mapitung na mambege i. Sahalak sian nasida margoar si Bartimeus.

Dibege si Bartimeus dohot donganna ma lewat Jesus, marsurak ma nasida mandok, “Tuan, Anak ni si Daud, asi ma roham tu hami!” (Mateus 20:30) Gabe muruk ma angka halak na disi tu nasida jala disuru ma asa sip nasida. Alai lam gogo ma nasida marsurak. Mambege i, so ma Jesus mardalan. Didok Jesus ma asa dijou halak na marsurak i. Dung i, didapothon nasida ma pangido-ido i jala didok ma, “Pos ma roham! Hehe ma ho, dijou ibana do ho.” (Markus 10:49) Pintor didapothon na mapitung i ma Jesus jala disampathon ma abit luarna.

Disungkun Jesus ma, “Aha dipangido hamu sibahenonku tu hamu?” Dialusi nasida ma, “Tuan, bahen ma asa marnida hami.” (Mateus 20:32, 33) Asi ma roha ni Jesus, dijama ma mata ni nasida, jala didok ma, “Mulak ma ho. Haporseaonmi do mambahen ho malum.” (Markus 10:52) Gabe marnida ma dua halak na mapitung i jala dipuji nasida ma Debata. Dohot ma angka halak na asing i mamuji Debata marnida na masa i. Dung i diihuthon pangido-ido i ma Jesus.

Tingki lewat Jesus sian kota Jeriko, godang do halak naeng mangida ibana ala dipamalum ibana na mapitung i. Masionjaran ma nasida di pudi ni Jesus. Alani godang ni nasida, gabe adong ma halak na so boi mangida ibana. Adong ma sahalak kepala ni sijalo pajak na margoar si Sakeus. Ndang boi diida ibana Jesus alani pendekna. Alani i, manjangkit ma ibana tu hau ara na laho dilewati Jesus. Boi ma diida ibana sian i aha na masa. Dung jonok Jesus tusi jala diida ibana si Sakeus di ginjang ni hau i, didok ma, “Sakeus hatop ma ho turun, ai naeng tu jabum do ahu sadari on.” (Lukas 19:5) Pintor turun ma si Sakeus jala rap laho ma nasida tu jabuna.

Gabe marungut-ungut ma angka halak mangida i. Didok nasida, ndang patut Jesus martamu tu jabu ni sahalak pardosa. Ai sijalo pajak do si Sakeus jala jotjot do ditipu ibana halak.

Tingki masuk Jesus tu jabu ni si Sakeus, didok nasida ma, “Martamu do ibana tu jabu ni pardosa.” Alai diboto Jesus do na boi si Sakeus  muba, jala i ma na masa. Dung i jongjong ma si Sakeus jala didok ma, “Satonga sian artangkon Tuan, lehononku do tu na pogos jala paulakonku do opat hali lompit hepeng na dapothu marhite manipu.”​—Lukas 19:7, 8.

On patuduhon na tutu do si Sakeus muba! Diboto ibana do sadia godang naung dapotna sian halak Jahudi. Alai marsumpa do ibana laho paulakkon i opat hali lompit. Hape mangihuthon patik ni Debata, ndang ingkon nasa i lehononna. (2 Musa 22:1; 3 Musa 6:2-5) Asing ni i, marjanji do si Sakeus naeng mangalehon satonga sian artana tu angka na pogos.

Las situtu ma roha ni Jesus ala muba si Sakeus. Didok ma, “Sadari on ro ma haluaon tu jabu on, ai ibana pe anak ni si Abraham do. Ai ro pe Anak ni jolma i laho paluahon jala mangalului na mago do.”​—Lukas 19:9, 10.

Hea do dipaboa Jesus tudosan taringot tu anak na mago. (Lukas 15:11-24) Songon i ma na masa tu si Sakeus. Lomo do roha ni Jesus mangurupi angka anak ni si Abraham na lilu. Alai, sogo ma roha ni angka pamimpin agama tu Jesus, ala burju ibana tu sahalak pardosa songon si Sakeus.