Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PASAL 78

Mangarade ma Naposo Haposan!

Mangarade ma Naposo Haposan!

LUKAS 12:35-59

  • INGKON MANGARADE DO NAPOSO HAPOSAN

  • MAMBAHEN PARBADAAN DO HARORO NI JESUS

Nunga dipaboa Jesus holan “punguan na metmet” do na dohot tu Harajaon banua ginjang i. (Lukas 12:32) Alai ndang mura i. Dipatuduhon Jesus do na ingkon diulahon asa boi dohot tu Harajaon i.

Alani i, didok Jesus ma tu angka siseanna asa tongtong jaga paimahon harorona. Didok ma, “Pangke ma pangkean ni parhobas jala mangarade ma hamu, tongtong ma galak palitomuna. Jala hamu ingkon songon halak na paima-imahon tuan ni nasida mulak sian pesta parbogason. Tingki ro ibana jala dituktuk pintu, pintor boi ma bungkaon ni nasida. Marlas ni roha ma angka hatoban na sai jaga tingki ro tuanna.”​—Lukas 12:35-37.

Mura do diantusi angka siseanna na pinaboa ni Jesus di tudosan on. Sai mangarade do hatoban i paimahon tuanna mulak. Dung i didok Jesus ma, “Molo ro ibana di tonga borngin manang tingki tahuak manuk jala rade nasida dapotna, marlas ni roha ma angka hatoban i!”​—Lukas 12:38.

Tudosan ni Jesus i ndang holan mamodai nasida asa gabe parkarejo na ringgas. Ai dohot do taringot dirina na pinaboana disi. Alani i do didok ibana, “Hamu pe, sai mangarade ma hamu, ai di tingki na so panagamonmuna do ro Anak ni jolma i.” (Lukas 12:40) Lomo do roha ni Jesus asa rade siihuthon ibana tingki ro ibana di ari na naeng ro, tarlumobi “punguan na metmet”.

Dung i disungkun si Petrus ma Jesus, “Tuan, holan tu hami do dipaboa ho tudosan on manang dohot do tu na asing?” Alai ndang pintor dialusi Jesus i. Dibahen ma tudosan na asing, “Ise do sasintongna naposo haposan jala na marbisuk na pinillit ni tuanna laho mangaradoti angka naposona na asing, na sai mangalehon sipanganon na dihaporluhon nasida di tingkina? Marlas ni roha ma naposo na mangulahon songon i didapot tuanna di harorona i! Tutu do na hudok on tu hamu, pilliton ni tuanna ma ibana mangaradoti sude artana.”​—Lukas 12:41-44.

Jesus do “Tuan” di tudosan i. Ibana do na digoari Anak ni jolma. Alani i, sian “punguan na metmet” do na gabe “naposo haposan” i jala dohot do nasida manjalo upa di Harajaon i. (Lukas 12:32) Didok Jesus, naposo haposan ma na laho mangalehon ‘sipanganon na dihaporluhon di tingkina’ tu “angka naposona na asing”. Alai, Jesus do na mangajari jala na patoguhon haporseaon ni si Petrus dohot angka sisean na asing di tingki i. Alani i, diboto nasida ma na laho dibahen pengaturan laho patoguhon haporseaon ni angka siihuthon Kristus di ari na naeng ro, i ma saleleng haroro ni Anak ni Jolma i.

Dipaboa Jesus ma muse boasa ingkon jaga angka siseanna jala mangarade. Ai boi do gabe ndang jaga be nasida jala mangulahon na jahat tu angka donganna, “Alai autsura didok naposo i di bagasan rohana, ‘Sundat do ro tuanki,’ gabe dipungkuli ibana angka naposo baoa dohot borua jala mangan minum ma ibana sahat tu na mabuk, dung i, di ari na so panagamanna jala di tingki na so pamotoanna ro ma tuan ni naposo i. Borat ma uhumon ni tuanna ibana jala bahenonna ma ibana rap dohot angka na so marsihohot.”​—Lukas 12:45, 46.

Dung i didok Jesus ma tu angka siseanna, “Ro do ahu laho pagalakkon api di tano on.” Godang do parbadaan alani ibana jala gabe ndang marlangku be ajaran dohot adat ni  halak Jahudi alani ibana. Gariada angka na saripe pe gabe marbadai do. Didok Jesus, “Masa ma parbadaan di nasida, ama mangalo anakna jala anak mangalo amana. Ina mangalo boruna jala boruna mangalo inana. Simatua boru mangalo parumaenna jala parumaenna mangalo simatuana boru.”​—Lukas 12:49, 53.

Dung i diida Jesus ma tu angka halak i. Godang do sian nasida na so mangakkui ibana Messias. Didok ibana ma, “Molo diida hamu mangkolom ombun di sabola barat dohononmuna ma, ‘Naeng ro nama udan haba-haba,’ jala masa do i. Jala molo diida hamu mangullus alogo sian selatan, didok hamu do, ‘Na laho ro nama logo ni ari,’ jala masa do i. Halak na munafik, diboto hamu do mangida tanda na tarida di tano on dohot di langit, alai boasa ndang diboto hamu mangida tanda na masa di tingki on?” (Lukas 12:54-56) On patuduhon ndang mangarade nasida.