Marhite Harajaon ni Kristus, Jahowa pabadiahon goarNa, patigorhon hadaulatonNa dohot pasohothon sude hajahaton

BUKU na parpudi di Bibel i ma Pangungkapon, buku na mangalehon panghirimon. Buku on disurat si Johannes, isina parnidaon ni ibana taringot sangkap ni Jahowa naung digohi.

Di parnidaon na parjolo, diapoi huhut dipareso Jesus angka huria. Parnidaon paduahon, dipatuduhon tu hita habangsa ni Debata di surgo, jala disi ma surusuruan pasahathon pujian tu Ibana.

Paima dipasaut Debata sangkapNa dijalo Jesus sada gulungan, pitu sahapna. Tingki dibungka opat sahap na parjolo, tarida ma angka parsihundul di atas ni hoda. Na parjolo, Jesus hundul di hoda na bontar jala adong tumpal harajaon di uluna. Diuduti angka parsihundul na marasingasing, na manggombarhon porang, haraparon, dohot sahit bala—on sude masa di ari parpudi. Tingki dibungka sahap na papituhon jala dipalu sarune na paboahon panguhuman ni Debata, ro ma pitu bala manang rimas ni Debata.

Harajaon ni Debata na digombarhon songon posoposo na baru tubu, dipajongjong di surgo. Didabuhon ma Sibolis dohot angka surusuruanna tu tano on. Tarbege ma soara na gogo ”marjea ma tano i.” Sibolis marrimas situtu ala diboto otik na ma tingkina.​—Pangungkapon 12:12.

Si Johannes mangida Jesus di surgo, ibana digombarhon songon anak ni birubiru rap dohot 144.000 halak. Nasida ”mangarajai rap” dohot Jesus.​—Pangungkapon 14:1; 20:6.

Angka raja na di tano on marpungu, ”papunguhon nasida tu hamusuon na di ari na bolon i, ari ni Debata” i ma Armagedon. Diporangi ma Jesus, na hundul di hoda na bontar, na manguluhon parangan ni pardisurgo. Na laho mangalengsehon sude panggomgomi ni tano on jala mangarante Sibolis. Mamarenta ma Jesus dohot 144.000 halak saleleng ”saribu taon.” Jala di ujung ni saribu taon i, pasohotonna ma Sibolis.​—Pangungkapon 16:14; 20:4.

Aha do laba ni Pamarentaon Saribu taon ni Kristus i, tu jolma na mangoloi Debata? Disurat si Johannes: ”Apusan ni [Jahowa] ma nasa iluilu sian matanasida: Ndang adong be hamatean nang arsak ni roha; nang angguhangguk, nang na hansit, ndang disi be; ai nunga salpu na parjolo i.” (Pangungkapon 21:4) Tano on gabe Paradeiso!

Songon i ma buku Pangungkapon paujungkon isi ni Bibel. Marhite Harajaon Messianik, goar ni Jahowa dipabadia jala hadaulatonNa dipatigor ro di salelenglelengna!

Dibuat sian buku Pangungkapon.