Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Bibel—Aha do Isina?

 BAGIAN 25

Poda taringot Haporseaon, Parange dohot Holong

Poda taringot Haporseaon, Parange dohot Holong

Surat ni si Jakobus, si Petrus, si Johannes, dohot si Judas patoguhon roha ni angka dongan sahaporseaon

SI JAKOBUS, si Judas, si Petrus dohot si Johannes dohot do tu na 12 na digoari apostel. Si opat halak on manurat pitu surat na adong di Buku na Badia marhata Junani. Ganup surat digoari mangihuthon goar ni panuratna. Isi ni surat i, mangurupi halak Kristen marsihohot tu Jahowa dohot tu HarajaonNa.

Patudu ma haporseaon. Ndang holan hata haporseaon i. Alai, ingkon tarida do sian parniulaon. Disurat si Jakobus, ”Ai songon daging i na mate, anggo so martondi; songon i do mate haporseaon na so marulaon.” (Jakobus 2:26) Haporseaon i, boi mangurupi hita marsihohot tingki adong pangunjunan. Asa martahan di pangunjunan, halak Kristen porlu mangido bisuk jala marpos ni roha tu Debata. Molo tongtong hita marsihohot, on mambahen las roha ni Debata. (Jakobus 1:2-6, 12) Molo marhaporseaon jala marsihohot manaon pangunjunan, urupan ni Debata Jahowa do. ”Pajonok hamu ma tu Debata,” didok si Jakobus, ”dung i pajonohonna ma tu hamu!”​—Jakobus 4:8.

Haporseaon ni halak Kristen ingkon togu asa boi padaohon diri sian parmainanon. Ala godang masa parmainanon dohot parange na roa, si Judas paingothon dongan sahaporseaonna asa ”marungkil humongkop haporseaon.”​—Judas 3.

Manjaga parange na ias. Lomo roha ni Jahowa asa sude naposoNa, ias jala badia di saluhutna. Disurat si Petrus: ”dohot ma hamu gabe badia di nasa parangemuna! Ai na tarsurat do: ”Badia ma hamu, ai na badia do Ahu!” (1 Petrus 1:15, 16) Adong do sitiruon ni halak Kristen. ”Kristus manaon na porsuk humongkop hamu,” ninna si Petrus, ”tumadingkon tiruan di hamu, asa diihuthon hamu bogas ni patna.” (1 Petrus 2:21) Nang pe marsitaonon halak Kristen ala marsihohot tu uhum ni Debata, boi do nasida mandapot ”panggora ni roha na ias.” (1 Petrus 3:16, 17, Bibel Siganup Ari) Si Petrus mandok ingkon marparange na ias, jala mangulahon angka ulaon na denggan, huhut paimahon ari panguhuman sian Debata dohot tano na imbaru na dijanjihon, i ma ”inganan ni hatigoran i.”​—2 Petrus 3:11-13.

“Pajonok hamu ma tu Debata, ndung i pajonohonna ma tu hamu!“—Jakobus 4:8

Patuduhon ma holong. ”Ai haholongon do Debata,” disurat si Johannes. Apostel on mandok dipatudu Debata do holong marhite Jesus ” bahen pardengganan pasaehon dosanta.” Songon dia do halak Kristen mangida on? Si Johannes patorangkon: ”Hamu angka haholongan, anggo songon i holong ni roha ni Debata di hita, tama ma nang hita masihaholongan!” (1 Johannes 4:8-11) Patuduhon holong on boi marhite mangurupi dongan sahaporseaon.​—3 Johannes 5-8.

Alai, songon dia do angka sisomba Jahowa boi patuduhon holong ni nasida tu Ibana? Dialusi si Johannes: ”Ai on do holong ni roha di Debata; molo taradoti patikna. Ndada na dokdok patikna i.” (1 Johannes 5:3; 2 Johannes 6) Jadi dipapos Debata do roha ni halak na marsihohot tu Ibana jala tongtong dihaholongi Debata nasida ’sahat tu hangoluan salelenglelengna.’​—Judas 21.

Dibuat sian Jakobus; 1 Petrus; 2 Petrus; 1 Johannes; 2 Johannes; 3 Johannes; Judas.