Tangkas do ditanda hamu Bibel? Saleleng on, ndang adong buku sisongon i na tarsar di liat portibi on. Torop halak sian marragam hasomalan dapotan pangapulion dohot panghirimon sian isi ni Bibel jala angka podana denggan tu parngoluon siganup ari. Alai, saonari on godang halak ndang haru mangantusi isi ni Bibel. Nang pe hamu parugamo manang na ndang, naeng do ra rohamu mangantusi Bibel. Buku on dipatupa asa boi mura tandaonmu isi ni Bibel.

ANDORANG so dijaha hamu Bibel, ringkot do jolo tandaonmu buku on. Ndang holan buku na badia on, Bibel on 66 buku na dipasada, parjolo buku 1 Musa sahat tu buku Pangungkapon.

Ise do pangarang ni Bibel? On sada sungkunsungkun na ringkot. Buku na badia on disurat hirahira 40 halak baoa, lelengna lobi sian 1600 taon. Alai, angka baoa on ndang hea mandok dirina pangarang ni Bibel. Sada sian panurat i manurathon: ”Ai nasa surat i sinihathon ni Debata do.” (2 Timoteus 3:16) Panurat na asing mandok: ”Tondi ni Jahowa do mangkatai marhite sian ahu, jala hata sinihathonna di atas dilangku.” (2 Samuel 23:2) Angka panurat i paboahon Jahowa Debata na tumimbul di liat portibi on, Ibana do pangarang ni Bibel. Angka panurat i mandok lomo roha ni Debata asa angka jolma jonok tu Ibana.

Adong dope na asing na ringkot taantusi sian Bibel. Buku na badia on marojahan tu sada tema: Patigorhon hak ni Debata laho mamarenta sude jolma marhite HarajaonNa. Di alaman na mangihut, boi idaonmu songon dia tema on patar di sude buku sian 1 Musa sahat tu Pangungkapon.

Parjolo, parrohahon ma barita na adong di buku naung tarsar di liat portibi on, i ma Bibel.

^ par. 9 Marragam do isara laho paboahon taringot partingkian. Di buku on, D.M. lapatanna ”Dungkon Masehi” jala A.S.M. lapatanna ”Andorang So Masehi”. Idaonmu ma tudosanna di garis partingkian na tarida di toru ni angka alaman ni buku on.