Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PASAL 1

”Sai Ro ma Harajaonmu”

”Sai Ro ma Harajaonmu”

NA DIULAS DI PASAL ON

Manulingkit na diajarhon Jesus taringot tu Harajaon ni Debata

1, 2. Aha do didok Jahowa tu tolu halak apostel ni Jesus, jala aha do na diulahon nasida dung dibege soara i?

MOLO dipangido Jahowa hamu mangulahon sada ulaon, olo do hamu? Tontu, las do rohamu mangulahon i!

2 Songon i ma na masa tu si Petrus, si Jakobus, dohot si Johannes apostel ni Jesus. (Jaha Mateus 17:1-5.) Ndang sadia leleng dung perayaan Paska taon 32 M, rap ma nasida dohot Jesus laho tu ”sada dolok na timbo”. Tingki di dolok i, diida nasida ma parnidaan na patuduhon hamuliaon ni Jesus na gabe Raja di ari na naeng ro. Ala dirimpu si Petrus tutu i masa, didok ibana ma pajongjongonna tolu kemah. Tingki mangkatai dope si Petrus, dilinggomi ombun ma nasida. Dung i, dibege si Petrus ma dohot donganna soara ni Jahowa na mandok, Jesus i AnakNa. Dung i, didok Jahowa ma muse, ”Tangihon hamu ma ibana.” Diulahon angka apostel do parenta i jala diurupi do na asing laho mangulahon i.​—Ul. 3:19-23; 4:18-20.

Harajaon ni Debata ma na jotjot dihatahon Jesus

3. Boasa disuru Jahowa hita manangihon Jesus, jala aha do na laho taparsiajari?

3 Disurat di Bibel hata ”Tangihon hamu ma ibana” ala marlaba do on tu hita. (Rom 15:4) Boasa porlu tatangihon Jesus? Ibana do parhitean ni Debata laho pasahathon HataNa. Jala, diajarhon Jesus do sangkap ni Debata tu hita. (Joh. 1:1, 14) Jotjot do Jesus mangajarhon taringot tu Harajaon ni Debata, i ma pamarentaon ni Messias. Jesus dohot 144.000 halak ma na mamarenta di Harajaon i. Alani i, taparrohahon ma taringot tu pamarentaon on. (Pgk. 5:9, 10; 14:1-3; 20:6) Parjolo sahali, taparsiajari ma boasa jotjot dihatahon Jesus taringot tu Harajaon ni Debata.

”Ia I na Manggohi Roha . . . ”

4. Songon dia do Jesus patuduhon molo Harajaon ni Debata do na manggohi rohana?

4 Harajaon ni Debata do na manggohi roha ni Jesus. Boasa tadok songon i? Jesus mandok, ”Ia i na manggohi roha, matua i do hatahonon ni pamangan.” Alani i, aha na tahatahon, i do na adong di rohanta dohot na ringkot di hita. (Mat. 12:34) Dipangke Jesus do tingkina laho  mangajarhon Harajaon ni Debata. Sian buku Mateus sahat tu Johannes, adong lobi sian 100 hali dipaboa taringot tu Harajaon ni Debata, jala Jesus ma na gumodang mangajarhon i. Harajaon ni Debata do na gabe tema ni ulaon parbaritaon ni Jesus. Didok ibana, ”Ingkon dohot do tu angka huta na asing hubaritahon harajaon ni Debata, ai ala ni i do Ahu disuru.” (Luk. 4:43) I do tongtong na diajarhon Jesus tu siseanna dung hehe ibana. (Ul. 1:3) Pangargaion tu Harajaon ni Debata do na manggohi roha ni Jesus, i do umbahen na taronjar rohana mangajarhon taringot tu Harajaon i.

5-7. (a) Sian dia do taboto molo Harajaon i manggohi roha ni Jahowa? Bahen ma tudosan. (b) Songon dia do hita patuduhon Harajaon ni Debata manggohi rohanta?

5 Harajaon i do muse na manggohi roha ni Jahowa. Sian dia taboto? Taingot ma, Jahowa do na marsuru Jesus ro tu tano on, alani i, sude na dihatahon dohot na diajarhon Jesus ro sian Jahowa. (Joh. 7:16; 12:49, 50) Asing ni i, Jahowa do na mangurupi panurat ni buku Mateus sahat tu Johannes, na paboahon hatorangan taringot tu hangoluan dohot ulaon ni Jesus. Taparrohahon ma lapatan ni on tu hita.

Ringkot do tasungkun dirinta, ’Harajaon ni Debata do na manggohi rohangku?’

6 Tingki disusun hamu angka foto tu sada album, alai ndang siat sude foto di album i, songon dia do bahenonmu? Tontu pillitonmu ma na porlu disusun di album i. Boi ma tapatudos isi ni buku Mateus sahat tu Johannes songon album foto na paboahon hatorangan taringot tu Jesus. Ndang disuru Jahowa angka apostel manurathon sude ulaon dohot hata ni Jesus tingki di tano on. (Joh. 20:30; 21:25) Alai, disuru Jahowa do nasida manurat na diajarhon dohot na diulahon Jesus na mangurupi hita mangantusi pangkobasion ni Jesus dohot angka na ringkot, hombar tu sangkap ni Jahowa. (2 Tim. 3:16, 17; 2 Ptr. 1:21) Godang do disurat hatorangan taringot tu Harajaon ni Debata di buku Mateus, Markus, Lukas dohot Johannes. Sian i boi taboto Harajaon i manggohi roha ni Jahowa. Las do roha ni Jahowa asa taboto taringot tu HarajaonNa!

7 Ringkot do tasungkun dirinta, ’Harajaon ni Debata do na manggohi rohangku?’ Molo songon i do, tontu ingkon olo do hita manangihon na diajarhon dohot na dihatahon Jesus taringot tu Harajaon ni Debata, jala ingkon taboto do muse sadia ringkot Harajaon i tu hita, songon dia jala andigan ro Harajaon i.

”Sai Ro ma Harajaonmu”—Songon dia do I Saut?

8. Songon dia do Jesus patuduhon molo Harajaon ni Debata i ringkot?

8 Taparrohahon ma tangiang na diajarhon Jesus. Marhite tangiang i, dipatudu Jesus do na ringkot Harajaon ni Debata, i ma tingki dipaboa ibana aha na laho ulahonon  ni Harajaon i. Adong pitu pangidoan di tangiang i. Tolu sian i hombar tu sangkap ni Jahowa, i ma pabadiahon goarNa, asa ro HarajaonNa, asa saut lomo ni rohaNa di tano on songon na di surgo. (Jaha Mateus 6:9, 10.) Dos do na tinuju ni na tolu on. Marhite Pamarentaon ni Messias ma pabadiaon ni Jahowa goarNa jala pasautonNa lomo ni rohaNa.

9, 10. (a) Aha do na laho masa dung ro Harajaon ni Debata? (b) Janji na dia do na disurat di Bibel na dipaimaima hamu?

9 Songon dia do Harajaon ni Debata pasautonNa di tano on? Tingki hita martangiang, ”Sai ro ma harajaonmu”, hita mangkirim asa marhuaso Harajaon ni Debata di tano on. Molo dung ro Harajaon ni Debata pasohotonNa ma hajahaton, gantihononNa pamarentaon ni jolma, jala gohanNa portibi on dohot hatigoran. (Dan. 2:44; 2 Ptr. 3:13) Marhite pamarentaon i, saut ma paradeiso di tano on. (Luk. 23:43) Paheheon ni Jahowa ma sude halak na mate na niingotNa, dung i pajumpang dohot halak na dihaholongi ni nasida. (Joh. 5:28, 29) Halak na mangoloi Jahowa boi mangolu salelenglelengna. (Pgk. 21:3-5) Ujungna saut ma lomo ni roha ni Debata di tano on songon na di surgo! Hirim do rohamu asa saut janji ni Debata on? Sasintongna, molo tatangiangkon ”Sai ro ma harajaonmu”, hita mangido asa saut janjiNa i.

10 Taboto do ndang ”ro” dope Harajaon ni Debata tu tano on. Songon na taida, jolma dope na mamarenta saonari. Alai, adong barita na uli. Nunga jongjong Harajaon ni Debata di surgo, songon na laho taulas di pasal na mangihut. Saonari, taparsiajari ma na diajarhon Jesus taringot tu andigan jongjong Harajaon i, jala andigan ro tu tano on.

Andigan do Jongjong Harajaon ni Debata?

11. Aha do na dipatudu Jesus taringot tu andigan jongjong Harajaon ni Debata?

11 Nang pe hirim roha ni angka sisean ni Jesus jongjong Harajaon i di abad na parjolo M, alai Jesus patuduhon ndang na laho masa dope i di tingki i. (Ul. 1:6) Taparrohahon ma dua tudosan na pinaboa ni Jesus di tingki na marasingasing di bagasan dua taon.

12. Songon dia do tudosan eme dohot simaremeeme patuduhon Harajaon ni Debata ndang jongjong di abad na parjolo M?

12 Tudosan taringot tu eme dohot simaremeeme. (Jaha Mateus 13:24-30.) Tudosan on dipaboa jala dipatorang Jesus tu siseanna hirahira musim semi taon 31 M. (Mat. 13:36-43) On ma hatorangan dohot lapatan ni tudosan i: Dung mate angka apostel, disabur Sibolis ma simaremeeme (halak Kristen palsu) di tongatonga ni eme (”anak harajaon”, manang halak Kristen na miniahan). Dipasombu do rap tubu eme dohot simaremeeme sahat tu na jumpang tingki gotilon, i ma ”ajal ni hasiangan on”. Di  tingki laho gotilon, dipapungu ma simaremeeme, dung i, dipapungu ma muse eme. Tudosan on patuduhon ndang di abad na parjolo Harajaon i jongjong, alai dung pe jumpang tingki gotilon, i ma taon 1914.

13. Songon dia do Jesus patuduhon molo ibana ndang pintor gabe Raja dope dung hehe tu surgo?

13 Tudosan taringot tu hepeng. (Jaha Lukas 19:11-13.) Tudosan on dipaboa Jesus taon 33 M, tingki laho ibana parpudi sahali tu Jerusalem. Adong na mandok pajongjongon ni Jesus ma Harajaon i dung sahat ibana di Jerusalem. Alai laho patangkashon molo Harajaon i ndang jongjong di tingki i, dipatudos Jesus ma dirina songon pinompar ni raja na laho ”tu luat na dao, manjalo harajaon”. * Di tudosan on, ”luat na dao”, i ma surgo. Disi ma Jesus manjalo huaso gabe Raja. Alai, diboto Jesus do ndang pintor mamarenta ibana gabe Raja dung hehe tu surgo. Alai, dipaima Jesus do saleleng marratus taon tingki naung ditontuhon tu ibana.​—Ps. 110:1, 2; Mat. 22:43, 44; Heb. 10:12, 13.

Andigan do Ro Harajaon ni Debata?

14. (a) Songon dia do Jesus mangalusi sungkunsungkun ni opat apostel i? (b) Aha do na taboto dung digohi surirang ni Jesus taringot tu harorona dohot Harajaon i?

14 Andorang so mate Jesus, ro ma siseanna manungkun ibana, ”Dia ma tanda ni harorom dohot ajal ni hasiangan on?” (Mat. 24:3; Mrk. 13:4) Dialusi Jesus ma marhite surirang na disurat di Mateus bindu 24 dohot 25. Dipaboa  Jesus do molo tanda ni harorona tarida sian angka na masa di portibi on. Harorona dipungka tingki jongjong Harajaon i di surgo; jala harorona marujung dung mamarenta Harajaon i di tano on. Godang do tanda na patuduhon surirang ni Jesus nunga masa sian taon 1914. * Alani i, tangkas ma taboto di taon 1914 do dipungka haroro ni Jesus jala jongjong Harajaon i.

15, 16. Ise do na nidok ni Jesus bangso manang sundut?

15 Andigan do ro Harajaon ni Debata? Ndang dipaboa tu hita andigan masa i. (Mat. 24:36) Alai, adong tanda na paposhon rohanta molo ari i nunga jonok. Dipaboa Jesus taringot tu sada ”bangso [sundut]” na so jolo salpu nasida andorang so diida surirang ni Jesus i masa. (Jaha Mateus 24:32-34.) Ise do ”bangso on”? Taparrohahon ma na nidok ni Jesus.

16 ”Bangso [sundut] on”. Ise do na nidok ni Jesus dison? Halak na so porsea tu ibana do? Ndang songon i. Surirang on dipaboa Jesus tu siseanna na ”pulik” mandapothon ibana. (Mat. 24:3) Jala ndang sadia leleng nai nasida ma na laho dimiahi. Asing ni i, dipaboa Jesus do tudosan taringot tu hau ara. Didok Jesus, ”Alai sian hau ara i ma guruhon hamu tudosanna: Molo martunasi punsuna jala rungkar angka bulungna, botoonmuna ma, naung jonok [ari logo]. Suang le songon i, jumpa diida hamu masa angka ondeng, botoonmuna ma, naung jonok hasosonggopna.” Siihuthon Jesus na miniahan do na mangida jala na mangantusi molo surirang i patuduhon ”naung jonok” haroro ni Jesus, ndang halak na so porsea tu ibana. Alani i, na nidokna ”bangso on”, i ma siihuthon Jesus na miniahan.

17. Aha do lapatan ni hata ”bangso [sundut]” dohot ”sasudena”?

17 ”Na so tupa salpu bangso [sundut] on, so jolo songgop sasudena i”. Songon dia do hata on digohi? porlu do taboto lapatan ni hata ’sundut’ dohot ”sasudena” asa taboto alusna. Hata ’sundut’ jotjot didok laho manggombarhon jolma na rap mangolu di sada tingki nang pe ndang saumurnasida. Sada ’sundut’ ndang pola leleng jala boi do salpu. (2 Mus. 1:6) Hata ”sasudena” manggombarhon sude na masa naung disurirangkon saleleng haroro ni Jesus sian taon 1914 sahat tu hasusaan bolon.​—Mat. 24:21.

18, 19. Songon dia do asa taantusi hata ni Jesus taringot tu bangso manang sundut, jala aha do na taboto sian i?

18 Antong, songon dia do asa taantusi hata ni Jesus taringot tu ”bangso [sundut] on”? Bangso on, i ma halak na miniahan na rap mangolu di sada tingki. Nasida adong dua punguan, na parjolo, i ma halak na mangida tanda ni haroro ni Jesus taon 1914. Punguan na parpudi, i ma halak na miniahan na so mangida tanda i masa taon 1914,  alai rap mangolu dope nasida dohot punguan na parjolo i. Adong dope na mangolu sian punguan na parpudi on tingki dipungka hasusaan bolon. Ala dua punguan on mangolu di sada tingki, nasida ma na digoari bangso manang sundut. *

19 Aha do na boi taparsiajari sian on? Nunga tangkas be taida saonari tanda haroro ni Jesus di liat portibi on. Dung i songon naung taboto, nunga lam matua halak na miniahan na digoari bangso manang sundut on; alai, ingkon idaon ni nasida do masa mula ni hasusaan bolon i. Alani i, tangkas ma, ndang sadia leleng nai ro ma Harajaon ni Debata mamarenta tu tano on! Tontu, las do rohanta molo taida digohi tangiang na diajarhon Jesus ”Sai ro ma harajaonmu”!

20. Aha do na laho taparsiajari di buku on, jala aha do na laho taparsiajari di pasal na mangihut?

20 Tongtong ma taingot hata ni Jahowa na mandok, ”Tangihon hamu ma ibana.” Tontu olo do hita mangulahon parenta on. Jala ingkon tapatuduhon do na ringkot di hita ulaon dohot na dihatahon Jesus taringot tu Harajaon ni Debata. Di buku on, taparsiajari ma taringot tu aha naung diulahon dohot na laho pasauton ni Harajaon ni Debata. Di pasal na mangihut, taparsiajari ma muse taringot tu na diulahon Harajaon ni Debata naung jongjong di surgo.

^ par. 13 Tudosan na pinaboa ni Jesus olo do ra paingothon halak na manangihon ibana taringot tu si Arkilaus, anak ni si Herodes Agung. Andorang so mate si Herodes dipajongjong ibana do si Arkilaus laho mamarenta Judea dohot inganan na asing laho manggantihon ibana. Alai, andorang so mamarenta dope si Arkilaus ingkon ro do ibana tu Rom mandapothon Kesar Augustus asa dipajongjong ibana raja.

^ par. 14 Tu hatoranganna muse, ida ma pasal 9 buku Aha do na diajarhon Bibel?

^ par. 18 Ndang dohot be digoari bangso manang sundut halak na dimiahi dung mate sude punguan na parjolo na mangida mula ni pambebeon taon 1914.​—Mat. 24:8.