Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Harajaon ni Debata Mamarenta!

 PASAL 14

Marsihohot Holan tu Pamarentaon ni Debata

Marsihohot Holan tu Pamarentaon ni Debata

NA DIULAS DI PASAL ON

Naposo ni Debata ndang sian portibi on ala nasida marsihohot tu pamarentaon ni Debata

1, 2. (a) Aha do prinsip na mangurupi siihuthon Kristus sahat tu saonari? (b) Songon dia do angka musu marsitutu pasohon ulaon ni naposo ni Debata, jala aha do hasilna?

TINDANG ma Jesus di jolo ni si Latus, hakim na marhuaso tu halak Jahudi. Disi ma dihatahon Jesus prinsip na mangurupi angka siihuthon ibana sahat tu sadari on. Jesus mandok, ”Ndang sian portibi on harajaonku. Aut sian portibi on harajaonku, ndang tarbahen so mangalo angka naposongki, asa unang sahat Ahu tu angka Jahudi, alai ndang sisongon i harajaonki.” (Joh. 18:36) Ujungna, disuru si Latus ma asa diuhum mate Jesus. Alai, ndang leleng hehe do muse Jesus sian hamatean. Marsitutu do Kesar ni Imperium Rom mambunu siihuthon Jesus, alai ndang marhasil. Di tingki i, nunga marbarita halak Kristen di liat portibi on.​—Kol. 1:23.

2 Dung jongjong Harajaon ni Debata taon 1914, marsitutu do pamarenta pasohon ulaon ni naposo ni Debata. Dipaksa punguan ni politik do hita asa mamihak tu ulaon ni nasida. Alai ndang marhasil ulaon i. Nang pe rayat ni Harajaon ni Debata adong di godang negara, tongtong do nasida maraleale di bagasan sada ni roha ala ndang mamihak nasida tu parsoalan ni politik. Sada ni roha on paposhon rohanta molo Harajaon ni Debata mamarenta, jala Jesus Kristus tongtong mangalehon tudutudu, mangondingi, jala mangurupi rayatna asa marparange na ias. Taparsiajari ma songon dia Jesus mangulahon i, jala taulas ma parsoalan ni angka Sitindangi na dipamonang di pengadilan na patoguhon haporseaonta, huhut marsihohot laho patuduhon molo hita ”ndang sian portibi on”.​—Joh. 17:14.

Masa ma Paraloan

3, 4. (a) Aha do na masa tingki jongjong Harajaon ni Debata? (b) Tangkas do diantusi naposo ni Debata di tingki naung salpu taringot tu ndang parsidohot marporang? Patorang ma.

3 Dung jongjong Harajaon i, masa ma porang di surgo. Dung i, didabu ma Sibolis tu tano on. (Jaha Pangungkapon 12:7-10, 12.) Masa ma porang di tano on jala diuji ma haporseaon ni naposo ni Debata. Marsitutu do nasida  mangihuthon Jesus jala dipatudu do molo nasida ndang sian portibi on. Alai mulana, ndang tangkas dope diantusi nasida songon dia patuduhon na so parsidohot tu politik.

4 Umpamana, Jilid VI Millennial Dawn, * na dipabinsar taon 1904, manjujui halak Kristen asa unang parsidohot tu porang. Alai molo dipillit do sahalak Kristen gabe tentara, marsitutu ma ibana asa unang dohot marporang. Molo ingkon laho tu parporangan, marsitutu ma ibana asa unang manembak alona. Si Herbert Senior na tading di Inggris jala tardidi taon 1905 mandok, ”Sungkunsungkun do roha ni angka donganta ala ndang adong hatorangan na tangkas taringot tu sasahalak na dipaloas gabe tentara asal unang dohot marporang.”

5. Songon dia do The Watch Tower, 1 September 1915 mangurupi pangantusion ni angka donganta?

5 The Watch Tower 1 September 1915 mangurupi angka donganta mangantusi parsoalan on. Rujukan di Studies in the Scriptures mandok, ”Aha na pinillit ni nasida, unang ma patuduhon nasida dohot marporang.” Alai songon dia do molo sahalak Kristen naeng ditembak ala ndang mamangke seragam militer jala ndang parsidohot tu dinas militer? Artikel di The Watch Tower i mandok, ”Dia do na dumenggan, mate ditembak ala marsihohot tu Rajanta Jesus dohot tu parentana, sian mate ditembak ala humongkop negara alai ndang marsihohot tu Jesus?” Sian dua sungkunsungkun i, tontu tumagon do tapillit na parjolo, i ma mate ala marsihohot tu Raja ni Harajaon ni Debata. Nang pe tangkas sipasingot on, dipaboa do di artikel i, ”Ndang dipaksa hami asa ihuthononmuna on, alai on boi mangurupi hamu.”

6. Aha do na taparsiajari sian pengalaman ni si Herbert Senior?

6 Godang do donganta na mangantusi hatorangan on jala rade manaon hasusaan ala mangihuthon tudutudu i. Si Herbert Senior mandok, ”Pandapothu, ndang adong imbar ni mambongkar peluru sian kapal [ndang dohot marporang] sian pamasukhon peluru tu senapan laho manembak.” (Luk. 16:10) Donganta si Senior ndang olo parsidohot tu dinas militer ala maralo tu panggora ni rohana. Ujungna, dipenjarahon ma ibana. Ibana dohot opat donganta na asing, dipapungu tu 16 halak na so olo tu dinas militer, dohot ma i sian agama na asing. Ditahan do nasida di penjara Richmond di Inggris, na diganti gabe Richmond 16. Sian na so pamotoan ni si Herbert dohot donganna, hea do nasida diboan tu parporangan di Prancis. Ditontuhon ma asa diuhum nasida jala disuru jongjong di jolo ni regu panembak alai ndang saut masa i. Dipenjara ma nasida saleleng sampulu taon.

”Huantusi ma angka naposo ni Debata ingkon mardame tu sude halak nang pe masa porang.”—Si Simon Kraker (Ida paragraf 7))

7. Dung masa Porang Dunia II, aha do na diantusi angka naposo ni Debata?

 7 Tingki masa Porang Dunia II tangkas ma diboto naposo ni Jahowa lapatan ni ndang marpihak, jala aha na ingkon diulahon nasida laho mangihuthon Jesus. (Mat. 26:51-53; Joh. 17:14-16; 1 Ptr. 2:21) Umpamana, majalah The Watchtower 1 November 1939, mambahen artikel na marjudul ”Netralitas”. Disi didok, ”Ingkon marsihohot do naposo ni Jahowa tu aturan on, ndang marpihak tu bangso na dia pe tingki marporang.” Taringot tu artikel i, donganta si Simon Kraker na ujungna karejo di kantor pusat di Brooklyn, New York mandok, ”Huantusi ma, angka naposo ni Debata ingkon mardame tu sude halak nang pe masa porang.” On ma sipanganon partondion na diparade di tingkina na mangurupi naposo ni Debata boi tongtong marsihohot tu Harajaon.

Mangadopi Sitaonon na Borat na Songon Batang Aek

8, 9. Songon dia do surirang ni apostel Johannes digohi?

8 Disurirangkon apostel Johannes do na masa dung jongjong Harajaon ni Debata taon 1914. Naga na manggombarhon Sibolis marsitutu pasohon angka na mangihuthon Harajaon ni Debata marhite mangutahon aek  godang sian pamanganna. * (Jaha Pangungkapon 12:9, 15.) Songon dia do surirang on digohi? Sian taon 1920-an, lam godang ma pangarupaon (penindasan) na masa tu angka naposo ni Debata. Songon na masa di tingki porang dunia na paduahon, donganta si Kraker dohot godang donganta di Amerika Utara, dipenjarahon ala marsihohot tu Harajaon ni Debata. Saleleng porang, lobi sian dua par tolu narapidana dipenjarahon di angka penjara federal di Amerika Serikat ala nasida Sitindangi Ni Jahowa.

9 Sibolis dohot na mangihuthon ibana marsitutu manegai haporseaon ni sude rayat ni Harajaon ni Debata. Donganta na adong di Afrika, Amerika Serikat, dohot Eropa diboan tu pengadilan dohot tu dewan pembebasan bersyarat. Ala tongtong do nasida marsihohot jala ndang marpihak, gabe dipenjarahon, dibalbali, jala adong na gabe cacat fisik. Di Jerman, naposo ni Debata disiksa ala ndang olo mandok, ”heil Hitler” manang parsidohot marporang. Di masa ni Nazi, hirahira 6.000 halak dihurung di angka kamp penjara. Lobi sian 1.600 Sitindangi halak Jerman dohot na so halak Jerman mate ala disiksa. Nang pe songon i, ndang boi Sibolis manegai haporseaon ni naposo ni Debata.​—Mrk. 8:34, 35.

Dibondut ”Tano I” ma ”Batang Aek” I

10. Aha do na digombarhon ”tano”, jala songon dia do i mangurupi naposo ni Debata?

10 Hata ”tano” na disurirangkon si Johannes, manggombarhon angka na adong di portibi on jala on do na mambondut ”batang aek”, manang pangarupaon na masa tu naposo ni Debata. Songon dia do surirang i digohi? Marpulu taon dung sae Porang Dunia II, jotjot do ”tano” mangalehon pangurupion tu angka naposo ni Debata na marsihohot tu Pamarentaon ni Messias. (Jaha Pangungkapon 12:16.) Umpamana, godang pengadilan na mangalinggomi hak ni Sitindangi Ni Jahowa na so parsidohot tu dinas militer dohot tu upacara nasionalistis. Taulas ma angka parsoalan na dipamonang Jahowa ala ndang parsidohot naposoNa tu dinas militer.​—Ps. 68:21.

11, 12. Aha do parsoalan na diadopi donganta si Sicurella dohot si Thlimmenos, jala songon dia do ujungna?

11 Amerika Serikat. Si Anthony Sicurella dohot lima nai donganna, i ma anak ni Sitindangi Ni Jahowa. Tardidi ma ibana tingki marumur 15 taon. Dung marumur 21 taon, dipaboa ma tu panitia pendaftaran wajib militer molo ibana sahalak parbarita na uli. Taon 1950, dipangido ma asa unang dohot ibana dinas militer ala maralo tu panggora ni rohana. Nang pe sasintongna ndang maralo on tu Biro Investigasi Federal (FBI), alai ndang dioloi Kejaksaan AS pangidoanna i. Dung pigapiga hali tu pengadilan, dipareso  Mahkamah Agung ma parsoalan ni si Sicurella, jala disundati ma surat putusan ni pengadilan tingkat rendah. On paluahon si Sicurella, jala on gabe ojahan tu sude penduduk ni Amerika Serikat na so parsidohot tu dinas militer alani panggora ni roha.

12 Junani. Dipenjarahon do si Iakovos Thlimmenos taon 1983 ala ditudu mangalo pamarenta jala ndang olo mamangke seragam militer. Dung malua, mangalului karejo ma ibana gabe akuntan, alai ndang dijalo lamaranna i ala tarsurat do ibana sahalak na hea mangulahon hajahaton. Diaduhon do persoalan on tu pengadilan, alai talu do ibana di pengadilan Junani. Naik banding ma ibana tu Mahkamah Eropa na mangaradoti Hak Asasi Manusia (ECHR). Taon 2000, 17 hakim na parsidohot tu Dewan Agung ECHR pamonangkon ibana, jala dipangke gabe ojahan pasohon diskriminasi. Andorang so dibahen putusan i, lobi sian 3.500 donganta di Junani ditudu mangulahon hajahaton ala ndang olo marpihak tu politik. Dung i, dibahen pamarentaon ni Junani ma undang-undang na mambahen donganta ias sian tuduhan i. Dung direvisi Undang-Undang Dasar Junani, dipangke ma muse undang-undang na mambahen sude penduduk ni Junani boi mamillit dinas sipil alternatif.

”Martangiang do ahu andorang so masuk tu kantor pengadilan, gabe dame ma pingkiranku.”—Si Ivailo Stefanov (Ida paragraf 13)

13, 14. Parsiajaran aha do na boi tadapot sian si Ivailo Stefanov dohot si Vahan Bayatyan?

13 Bulgaria. Taon 1994, tingki marumur 19 taon si Ivailo Stefanov, dipangido ma ibana gabe sahalak tentara. Alai ndang olo ibana nang pe ndang disuru dohot marporang. Alani i, dipenjarahon ma ibana 18 bulan. Naik banding ma ibana laho mangkatindangkon hakna asa unang parsidohot tu dinas militer alani panggora ni roha. Ujungna, sahat do parsoalan i tu ECHR. Taon 2001, ndang sanga dope dipareso parsoalan i, nunga dibahen pamarenta pardamean tu si Stefanov. Dipaloas pamarenta Bulgaria do si Stefanov dohot sude halak Bulgaria mamillit tugas sipil alternatif. *

14 Armenia. Taon 2001, ingkon wajib militer do si Vahan Bayatyan. * Ala maralo tu panggora ni rohana, ndang olo ibana dohot tu dinas militer. Naik banding ma ibana tu angka pengadilan negeri, alai ndang marhasil. Bulan September 2002, diuhum ma ibana saleleng dua satonga taon, alai ndang gok sampulusada bulan ibana dipenjara. Naik banding ma ibana tu ECHR. Alai, tanggal 27 Oktober 2009, ndang dipamonang Mahkamah i. On mambahen susa pingkiran ni angka donganta na mangadopi parsoalan na sarupa di Armenia. Alai, dipareso Dewan Agung ECHR ma muse surat putusan i. Tanggal 7 Juli 2011, Mahkamah mambahen surat putusan na pamonangkon donganta  si Vahan Bayatyan. On ma na parjolo sahali ECHR paloashon sasahalak ndang dohot tu dinas militer alani panggora ni roha na marojahan tu haporseaon ni sasahalak, jala ingkon digomgomi alani hak mangalehon pandapot, panggora ni roha dohot maragama. Ndang holan Sitindangi Ni Jahowa na dilinggomi surat putusan i, alai marratus juta penduduk di angka negeri na parsidohot tu anggota ni Dewan Eropa. *

Angka donganta di Armenia dipalua sian penjara dung dibahen ECHR surat putusan na pamonangkon ulaon ni Sitindangi

Paraloan Alani Upacara Nasionalistis

15. Boasa ndang parsidohot naposo ni Jahowa tu upacara nasionalistis?

15 Naposo ni Jahowa na marsihohot tu Pamarentaon ni Messias, ndang parsidohot tu dinas militer dohot tu upacara nasionalistis. Tarlumobi tingki masa Porang Dunia II, dipatudu jolma do semangat nasionalistis. Godang negara mangido angka rayatna marsumpah asa marsihohot tu negarana sandiri, mangendehon lagu kebangsaan, jala manghormat bendera. Alai sasintongna, ingkon holan tu Jahowa  do hita marsihohot. (2 Mus. 20:4, 5) Alani i, godang ma paraloan na taadopi. Sahali nai, bahenon ni Jahowa do ”tano” mambondut angka paraloan na ro. Taparrohahon ma songon dia Jahowa mangurupi naposoNa marhite Jesus, monang mangadopi parsoalan na hombar tu upacara nasionalistis.​—Ps. 3:9.

16, 17. Aha do parsoalan na diadopi si Lillian dohot si William Gobitas, jala aha do na taparsiajari sian parsoalan ni nasida?

16 Amerika Serikat. Taon 1940, dibahen Mahkamah Agung AS ma surat putusan 8 banding 1 maralohon Sitindangi Ni Jahowa taringot tu parsoalan na didok, Minersville School District v. Gobitis. Si Lillian Gobitas, * marumur 12 taon dohot anggina si William na marumur 10 taon, ndang olo manghormat bendera manang mandok sumpah setia ala nasida marsihohot tu Jahowa. Alani i, dipakaluar ma nasida sian singkola. Parsoalan on diboan tu Mahkamah Agung. Alai, Mahkamah mandok, hombar do tu undang-undang na diputushon singkola i ala nasida bagian ni ”persatuan nasional”. Surat putusan i mambahen godang Sitindangi dipakaluar sian parkarejoan, anak ni Sitindangi dipakaluar sian singkola, jala deba sian Sitindangi dibalbali massa. Buku The Lustre of Our Country mandok molo ”sitaonon na masa tu Sitindangi sian taon 1941 sahat tu 1943 sada ulaon na mansai kejam tu agama di abad 20 di Amerika”.

17 Ndang leleng masa sitaonon i. Taon 1943, dipareso Mahkamah Agung ma parsoalan na asing na suman tu parsoalan ni Gobitis. Parsoalan on digoari West Virginia State Board of Education v. Barnette. Di parsoalan on, dipamonang Mahkamah Agung do Sitindangi Ni Jahowa. On dope hea di Amerika Serikat, Mahkamah Agung mangganti surat putusan na holan pigapiga taon dope ditontuhon nasida. Dungkon i, moru ma paraloan tu Sitindangi Ni Jahowa di Amerika Serikat. Asing ni i, dipatogu ma muse hak ni sude penduduk ni Amerika Serikat.

18, 19. Aha do na mangurupi si Pablo Barros boi marsihohot, jala aha do na boi diparsiajari naposo ni Debata sian ibana?

18 Argentina. Taon 1976, tingki marumur ualu taon si Pablo jala si Hugo Barros marumur pitu taon, dipakaluar ma nasida sian singkola ala ndang dohot upacara bendera. Dionjar jala dipukul ibu kepala sekolah ma ulu ni si Pablo. Dung mulak singkola, diuhum ma nasida sajom jala dipaksa dohot tu upacara patriotik. Didok si Pablo, ”Molo ndang ala ni pangurupion ni Jahowa, ndang boi ahu marsihohot.”

19 Dung sahat tu pengadilan, ditolopi hakim do na diputushon singkola laho pakaluarhon si Pablo dohot si Hugo. Naik banding ma nasida tu Mahkamah Agung Argentina. Taon 1979, disundati Mahkamah i ma surat putusan  ni pengadilan tingkat rendah. Dipaboa, ”Surat putusan i ndang hombar tu hak konstitusional taringot tu marsiajar (Butir 14) dohot tugas ni Negara na martanggung jawab tu pendidikan dasar (Butir 5).” Surat putusan on mangurupi 1.000 anak ni Sitindangi. Adong do na so saut dipakaluar sian singkola, jala si Pablo, si Hugo dohot na asing boi singkola muse di singkola negeri.

Godang angka ianakhon ni Sitindangi marsihohot mangadopi paraloan

20, 21. Songon dia do parsoalan na masa tu si Roel dohot si Emily Embralinag boi patoguhon haporseaonta?

20 Filipina. Taon 1990, si Roel Embralinag * na marumur 9 taon dohot kakakna si Emily na marumur 10 taon, rap dohot 66 anak ni Sitindangi dipakaluar sian singkola ala ndang manghormat bendera. Bapak ni si Roel dohot si Emily na margoar si Leonardo manjumpangi guru, alai ndang marhasil. Dung i, dibahen si Leonardo ma petisi tu Mahkamah Agung. Ndang adong hepeng ni si Leonardo laho manggarar pengacara, jala direhei do ianakhonna di singkola. Martangiang ma nasida mangido pangurupion  ni Jahowa. Ndang hirim roha ni si Leonardo boi monang ala ndang adong parbinotoanna taringot tu hukum.

21 Di na so panagaman, diurupi si Felino Ganal ma nasida. Ibana hea gabe pengacara di sada firma hukum na tarbarita di negara i. Alai, tingki masa parsoalan on, ndang disi be ibana karejo jala nunga sahalak Sitindangi. Tingki dipasahat parsoalan on tu Mahkamah Agung, sahata do sude hakim laho pamonangkon Sitindangi, jala manundati parenta taringot tu pakaluarhon angka ianakhon ni Sitindangi sian singkola. Sahali nai, ndang saut sangkap ni jolma laho manegai haporseaon ni naposo ni Jahowa.

Marsada Ala Ndang Marpihak tu Portibi On

22, 23. (a) Aha do na mambahen naposo ni Debata boi monang di pengadilan? (b) Aha do na pinatudu ni paralealeonta di liat portibi on?

22 Taboto do hita ndang parsidohot tu politik. Alani i, aha do na mambahen naposo ni Debata boi monang di pengadilan? Di ganup negeri dohot pengadilan, adong do hakim na mangurupi hita mangadopi parsoalan na ro sian musu. Surat putusan na dibahen jotjot gabe ojahan na dipangke di sada negara. On patuduhon diurupi Kristus do hita mampartahanhon haporseaonta di pengadilan. (Jaha Pangungkapon 6:2.) Boasa ingkon taboan parsoalan on tu pengadilan? Na tinuju ni organisasi ndang laho padengganhon uhum. Alai, laho patuduhon ndang adong na boi mangambati hita mangulahon lomo ni roha ni Rajanta, Jesus.​—Ul. 4:29.

23 Nang pe sursar portibi dibahen politik dohot hosom, diurupi Rajanta do angka siihuthon ibana asa tongtong ndang marpihak tu ulaon ni portibi on. Sibolis ndang marhasil mambahen sursar paralealeonta. Harajaon ni Debata papunguhon marjuta halak na so olo marsiajar porang. Halongangan do sada ni rohanta di liat portibi on, jala on patuduhon na mamarenta do Harajaon ni Debata!​—Jes. 2:4.

^ par. 4 Jilid on didok do muse The New Creation. Di pudian ni ari, jilid Millennial Dawn digoari gabe Studies in the Scriptures.

^ par. 8 Hatorangan tu surirang on, boi taida di buku Wahyu—Klimaksnya yang Menakjubkan Sudah Dekat!, pasal 27 halaman 184-186.

^ par. 13 Putusan on mambahen pamarenta ni Bulgaria paloashon sude na so parsidohot tu wajib militer alani panggora ni roha, boi mamillit dinas sipil alternatif na diradoti ni administrasi sipil.

^ par. 14 Laho mandapot gumodang hatorangan, ida ma Menara Pengawal 1 November 2012, halaman 29-31.

^ par. 14 Saleleng 20 taon, lobi sian 450 Sitindangi na poso dipenjarahon pamarenta ni Armenia. Bulan November 2013, dipalua ma angka donganta na di penjara.

^ par. 16 Marga ni keluargana ndang denggan dieja di angka berkas ni pengadilan.

^ par. 20 Marga ni keluargana ndang denggan dieja, dibahen gabe Ebralinag di angka berkas ni pengadilan.