Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 BAGIAN 15

Mampartahanhon Hakta Maragama

Mampartahanhon Hakta Maragama

NA DIULAS DI PASAL ON

Diurupi Kristus do siihuthon ibana mampartahanhon hakta sian pamarenta laho mangoloi patik ni Debata

1, 2. (a) Aha do na patuduhon molo hamu rayat ni Harajaon ni Debata? (b) Boasa sipata ingkon marungkil naposo ni Debata mampartahanhon hak nasida maragama?

PARSIDOHOT do hamu rayat ni Harajaon ni Debata? Molo hamu sahalak Sitindangi Ni Jahowa tontu alusmu, i do. Aha do na patuduhon hamu rayat ni Harajaon ni Debata? Ndang Paspor manang angka surat na asing, alai sian pangoloionta tu Debata Jahowa. Manomba Debata ndang holan marhaporseaon, alai tarida marhite parniulaonta dohot pangoloionta tu uhum ni Harajaon ni Debata. Mangkorhon do ulaonta songon mangurus keluarga manang mamillit parubatan tu panombaonta na sintong.

2 Alai, jotjot do halak ndang mangargai hakta laho mangoloi uhum ni Harajaon ni Debata. Adong do pamarenta na mangorai panombaonta tu Debata. Sipata, ingkon marungkil do hita mampartahanhon hak laho mangihuthon uhum ni Kristus. Sungkunsungkun do rohanta alani i? Ndang pola. Angka naposo ni Debata na disurat di Bibel, jotjot do marungkil mampartahanhon hak ni nasida manomba Jahowa.

3. Aha do na masa di tingki ni Ratu Ester?

3 Marungkil do naposo ni Debata di tingki ni Ratu Ester mampartahanhon ngolu ni nasida. Boasa? Si Haman, sahalak Perdana Menteri mangido tu Raja Serses laho pamatehon halak Jahudi na adong di harajaonna. Didok ibana, patik ni halak Jahudi i ”asing do sian patik ni saluhut bangso”. (Est. 3:8, 9, 13) Dipasombu Jahowa do naposoNa tingki i? Ndang dipasombu. Diurupi jala dipasupasu Jahowa do habaranion ni si Ester dohot si Mordahai laho mangondingi naposoNa.​—Est. 9:20-22.

4. Aha do na laho taparsiajari di pasal on?

4 Songon dia do saonari? Nunga taboto, olo do pamarenta mangorai ulaon ni Sitindangi Ni Jahowa. Di pasal on, taida ma cara ni pamarenta mangorai hita mandalanhon haporseaonta. Adong tolu: (1) hakta marorganisasi dohot maragama, (2) hakta mamillit parubatan hombar tu  prinsip ni Bibel, jala (3) hak ni natuatua pagodanggodangkon ianakhonna hombar tu patik ni Jahowa. Taparrohahon ma angka na niulahon ni rayat ni Harajaon ni Debata mampartahanhon hak ni nasida. Jala taida ma pangurupion ni Jahowa tu nasida.

Mampartahanhon Hak di Jolo ni Uhum dohot Hak Asasi

5. Aha do labana molo diangkui pamarenta hakta maragama?

5 Ingkon jolo diangkui pamarenta do hakta maragama asa tasomba Jahowa? Ndang songon i. Tutu, molo diangkui pamarenta hakta maragama, mura ma hita mandalanhon agamanta. Umpamana, boi ma hita marpungu di Bale Harajaon dohot di Bale Kebaktian, marbarita na uli, mancetak dohot manjalo buku sian luar negeri. Di godang negara, agama na diangkui do Sitindangi Ni Jahowa. Alai, songon dia do bahenonta molo ndang diangkui jala ndang diargai hak asasinta?

6. Aha do hasusaan na masa tu Sitindangi Ni Jahowa di Australia di mula ni taon 1940-an?

6 Australia. Di mula ni taon 1940-an, didok gubernur Jenderal Australia do haporseaonta ”mangambati” ulaon laho marporang. Ujungna, diorai ma ulaon ni Sitindangi Ni Jahowa. Ingkon martabunitabuni do Sitindangi marpungu dohot marbarita. Ditutup ma Betel, jala disita Bale Harajaon. Ndang diloas manang ise manjaha bukunta. Dung diorai martaontaon, dicabut Mahkamah Agung Australia ma pelarangan i tanggal 14 Juni 1943.

7, 8. Aha do na dipartahanhon angka donganta di Rusia saleleng martaontaon?

7 Rusia. Diorai pamarentaon ni komunis do ulaon ni Sitindangi Ni Jahowa saleleng martaontaon di Rusia. Alai diloas pamarenta ma nasida tardaftar taon 1991. Taon 1992, dung bubar pamarentaon ni Uni Soviet diangkui Federasi Rusia ma hakta maragama. Alai, ndang sadia leleng, sogo ma roha ni anggota na dohot tu Gareja Ortodoks Rusia ala diida hita lam martambatamba. Sian taon 1995 sahat tu 1998, lima hali ma Sitindangi ni Jahowa diaduhon marhite tuduhan pidana. Di persidangan i, ndang adong diida jaksa na sala ulaon ni Sitindangi. Alai, marsitutu do musu ni hasintongan mangalo Sitindangi, dung i dibahen nasida ma gugatan perdata taon 1998. Mulana, dipamonang do Sitindangi, alai ndang olo musu mangangkui surat putusan i. Bulan Mei 2001, talu ma Sitindangi di persidangan banding. Dibahen ma muse persidangan ulang bulan Oktober taon i. Ujungna, diorai ma ulaon ni Sitindangi Ni Jahowa di Moskwa dung dicabut badan hukum ni nasida taon 2004.

8 Masa ma sitaonon alani haporseaon. (Jaha 2 Timoteus 3:12.) dipaburuburu ma Sitindangi Ni Jahowa jala disusai. Disita ma angka buku ni nasida, ndang dipaloas laho  pajongjongkon manang manewa inganan parpunguan. Tapingkirhon ma songon dia pangkilalaan ni angka donganta alani hasusaan i! Taon 2001, naik banding ma Sitindangi Ni Jahowa tu Mahkamah Eropa na Mangaradoti Hak Asasi Manusia (ECHR). Dilehon nasida ma muse hatorangan na gumodang tu Mahkamah i taon 2004. Taon 2010, ditontuhon ECHR ma putusan taringot tu parsoalan on. Tangkas do diida Mahkamah i, sogo ni roha tu sadasada agama do umbahen na dihasogohon ulaon ni Sitindangi Ni Jahowa. Dipaboa do muse ndang adong ulaon ni Sitindangi na sala, na mambahen pengadilan daerah mangorai ulaon ni nasida. Asing ni i didok Mahkamah i, dibahen pe pelarangan i asa boi do dicabut hak ni Sitindangi Ni Jahowa mamangke undang-undang. Putusan ni Mahkamah on mangalehon hak maragama tu Sitindangi Ni Jahowa. Nang pe ndang sude pejabat di Rusia mangoloi putusan ni ECHR, alai on mangalehon habaranion tu naposo ni Debata.

Si Titos Manoussakis (Ida paragraf 9)

9-11. Songon dia do naposo ni Jahowa mampartahanhon hak ni nasida maragama di Junani, jala aha do dapot ni nasida?

9 Junani. Taon 1983, disewa si Titos Manoussakis ma sada inganan di Heraklion, Kreta, asa boi marpungu Sitindangi Ni Jahowa disi. (Heb. 10:24, 25) Alai, diaduhon sahalak pastor ni gareja ortodoks ma Sitindangi tu pamarenta. Boasa? Ala ndang dos na dihaporseai Sitindangi dohot gareja ortodoks! Dijou ma si Titos Manoussakis dohot tolu donganna tu pengadilan. Didenda ma nasida jala ditontuhon asa dipenjara dua bulan. Ala marsihohot tu Harajaon ni Debata, diboto nasida do molo putusan on mangambati hak ni nasida laho mandalanhon agamana. Alani i, diboan ma parsoalan on tu pengadilan dohot tu ECHR.

10 Ujungna, taon 1996 tarsonggot ma musu ni hasintongan ala dipamonang ECHR Sitindangi. Mahkamah i paboahon, ”Hombar tu undang-undang ni Junani, sada ’agama na diangkui’ do Sitindangi Ni Jahowa.” Didok muse, putusan na binahen ni pengadilan daerah nunga manggugai hak ni Sitindangi maragama. Dipaboa do muse, ndang adong hak ni pamarenta ”manontuhon sintong manang ndang haporseaon dohot cara ni sasahalak mandalanhon agamana”. Sundat ma Sitindangi diuhum, jala diloas ma nasida mandalanhon agamana!

11 Pintor diangkui do hak ni Sitindangi di sude inganan di Junani dung monang nasida? Ndang pintor diangkui. Taon 2012, adong do parsoalan na dipasae dungkon 12 taon. Masa parsoalan on alani sahalak uskup Ortodoks. Alai, dipamonang Mahkamah Agung do Sitindangi Ni Jahowa. Dienet do di surat putusan i undang-undang  ni Junani na paloashon sasahalak mamillit agamana, jala didok do na so sintong tuduhan na dibahen tu Sitindangi Ni Jahowa. Didok Mahkamah i, ”Ndang adong na sala sian ajaran ni Sitindangi Ni Jahowa. Alani i, agama ni nasida boi diangkui.” Saonari, angka donganta na adong di Kassandreia boi marpungu mamangke Bale Harajaon.

12, 13. Songon dia do musu ni hasintongan mamangke undang-undang laho parohon hasusaan tu naposo ni Debata di Prancis, jala songon dia do ujungna?

12 Prancis. Dipangke musu ni hasintongan do undang-undang mambahen susa naposo ni Debata. (Jaha Psalmen 94:20.) Umpamana, di parsitongaan ni taon 1990-an, dipareso pejabat pajak di Prancis ma parhepengon ni Association Les Témoins de Jéhovah (ATJ), i ma badan hukum na dipangke Sitindangi Ni Jahowa di Prancis. Tarida do na tinuju ni audit i sian hata ni sahalak menteri na mandok, ”Audit on boi pasohon ulaon ni organisasi on manang dipidana . . . , jala on mangambati parpunguan ni organisasi i, asa unang adong be nasida di negara on.” Nang pe ndang adong dapot ni pejabat pajak i sala ni Sitindangi Ni Jahowa, alai ditontuhon do pajak na timbo gararon ni Sitindangi. Molo saut do sangkap ni pejabat pajak i, on boi mambahen kantor cabang ditutup manang digadis asa boi manggarar pajak. Alai, dilului naposo ni Debata do cara mampartahanhon hak ni nasida. Ujungna, diboan nasida ma parsoalan on tu ECHR taon 2005.

13 Ditontuhon Mahkamah ma surat putusan tanggal 30 Juni 2011. Mahkamah i patorangkon, molo ndang parohon hasusaan tu negara, ndang boi pamarenta mamparsoalhon haporseaon dohot ulaon ni sada agama ala dilehon do hak maragama tu sasahalak. Didok Mahkamah i muse, ”Pajak na ingkon digarar . . . mambahen habis hepeng ni organisasi i, jala mambahen anggotana tarambat mandalanhon agama ni nasida.” Dung i, dipamonang Mahkamah i ma Sitindangi Ni Jahowa! Ujungna, disundati pamarenta Prancis ma pajak na mansai timbo na ingkon gararon ni ATJ dohot bunga naung ditontuhon hian. Dipaulak ma muse properti cabang tu Sitindangi Ni Jahowa.

Hita boi tongtong manangiangkon angka donganta na mangadopi hasusaan alani uhum na so tigor

14. Songon dia do hita boi parsidohot mampartahanhon hakta maragama?

14 Songon si Ester dohot si Mordahai, saonari marsitutu do naposo ni Debata mampartahanhon hak ni nasida manomba Jahowa. (Est. 4:13-16) Parsidohot do hita tusi? I do. Marhite manangiangkon angka donganta na diorai pamarenta mandalanhon haporseaon ni nasida. Tangiang sisongon on, boi mangalehon pangurupion tu angka donganta na manaon hasusaan. (Jaha Jakobus 5:16.) Ditangihon Jahowa do tangiang sisongon i? Hamonangan ni Sitindangi di pengadilan, patuduhon molo Jahowa manangihon tangiangta!​—Heb. 13:18, 19.

 Hak Mamillit Parubatan na Hombar tu Haporseaonta

15. Hasintongan aha do na binoto ni Sitindangi taringot tu mudar?

15 Songon di Pasal 11, diihuthon rayat ni Harajaon ni Debata do tudutudu sian Bibel asa unang mamangke mudar. (1 Mus. 9:5, 6; 3 Mus. 17:11; jaha Ulaon ni Apostel 15:28, 29.) Nang pe ndang tajalo transfusi darah, olo do hita mamangke parubatan na dumenggan asing ni mamangke mudar. Di godang negara diangkui pengadilan do hak ni sasahalak manjalo perawatan medis mangihuthon panggora ni rohana dohot agama ni nasida. Alai, di pigapiga negara, marungkil do naposo ni Debata mampartahanhon hak ni nasida mamillit parubatan. Taparrohahon ma pigapiga pengalaman.

16, 17. Aha do na masa tu sahalak donganta di Jepang, jala songon dia do tangiangna dialusi?

16 Jepang. Si Misae Takeda sahalak tungganeboru na marumur 63 taon naeng dioperasi. Ibana rayat ni Harajaon ni Debata na marsihohot, alani i dipatorang ma tu dokter na so dijalo ibana transfusi darah. Alai dung marbulanbulan, diboto ma, molo ibana ditransfusi tingki dioperasi. Ala ndang diargai hakna jala digabusi, diaduhon donganta si Takeda ma angka dokter dohot rumah sakit i bulan Juni 1993. Togu do haporseaon ni donganta na lambok roha on. Jongjong do ibana saleleng sajom di pengadilan di jolo ni godang halak laho mangkatindangkon haporseaonna. Sabulan andorang so marujung ngolu, ro dope ibana tu pengadilan. Tontu balga do pangkorhon ni habaranion dohot haporseaonna tu hita. Sai martangiang do si Takeda mangido pasupasu ni Jahowa laho mampartahanhon hak dohot haporseaonna. Pos do rohana alusan ni Jahowa tangiangna. Ditangihon Jahowa do tangiangna i?

17 Tolu taon dung marujung ngolu si Takeda, dibahen Mahkamah Agung Jepang ma surat putusan na pamonangkon ibana. Mahkamah i mandok nunga sala rumah sakit ala ndang mangargai hak ni si Takeda asa unang ditransfusi. Surat putusan ni Mahkamah tanggal 29 Februari 2000 mandok, molo adong parsoalan sisongon i, ”ingkon diargai do hak ni sasahalak laho mamillit”. Ala marsitutu do si Takeda mampartahanhon hakna laho mamillit parubatan mangihuthon panggora ni rohana na hombar tu Bibel, mura ma saonari Sitindangi Ni Jahowa di Jepang mamillit parubatan na so mamangke mudar.

Si Pablo Albarracini (Ida paragraf 18 sahat tu 20)

18-20. (a) Songon dia do pengadilan banding di Argentina mangargai hak ni sasahalak mamillit parubatan ndang mamangke mudar? (b) Songon dia do hita patuduhon na unduk tu Harajaon ni Debata taringot tu mamangke mudar?

18 Argentina. Songon dia do sahalak rayat ni Harajaon ni Debata mampartahanhon hakna tingki ndang sadar? Kartu keterangan medis boi mangurupi hita paboahon parubatan na tapillit. Alani i, sai taboan ma kartu on songon na binahen ni si Pablo Albarracini. Bulan Mei 2012, tartembak ma ibana dibahen pangarampok. Ndang sadar  be ibana tingki diboan tu rumah sakit. Alai, diboan do kartu keterangan medis naung ditandatangani opat taon andorang so masa i. Nang pe adong dokter na mandok ingkon ditransfusi do si Pablo ala nunga naeng mate ibana, alai diargai staf medis ni rumah sakit i do parubatan na dipillit si Pablo. Alai, bapak ni si Pablo na so Sitindangi Ni Jahowa mangido tu pengadilan asa dibatalhon surat keterangan medis i.

19 Naik banding ma pengacara na mangurupi tungganeboru ni si Pablo. Di bagasan pigapiga jom, dibatalhon pengadilan ma surat putusan ni pengadilan daerah. Jala didok pengadilan i, ingkon diargai do parubatan na pinillit ni si Pablo. Naik banding ma muse bapak ni si Pablo tu Mahkamah Agung Argentina. Alai, Mahkamah Agung mandok, ”Ndang boi dibatalhon kartu medis na binahen ni si Pablo ala kartu medis i dibahen hombar tu lomo ni roha ni si Pablo, pangantusionna, jala ndang adong na mamaksa ibana mambahen i.” Didok Mahkamah i muse, ”Marhak do halak naung dewasa jala sehat, mamillit parubatanna jala diloas do ibana mangihuthon manang ndang sada jenis ni parubatan . . . Ingkon diihuthon dokter do hatorangan on.”

Nunga diisi hamu kartu keterangan medismuna?

20 Saonari nunga sehat be donganta si Pablo Albarracini. Las do roha ni nasida ala diihuthon do tudutudu ni organisasi mangisi kartu keterangan medis. Ala dioloi ibana tudutudu i, on patuduhon ibana unduk tu pamarentaon ni Kristus. Nunga diisi hamu dohot keluargamu kartu medis i?

Si April Cadoreth (Ida paragraf 21 sahat tu 24)

21-24. (a) Aha do na ditontuhon ni Mahkamah Agung Kanada taringot tu transfusi darah tu dakdanak na marumur di toru ni 16 taon? (b) Songon dia do parsoalan on boi patoguhon angka Sitindangi ni Jahowa na poso?

21 Kanada. Jotjot do diangkui pengadilan hak ni natuatua mamillit parubatan na laho dipangke ianakhon ni nasida. Alai sipata, dipaloas pengadilan do sahalak dakdanak naung toras pingkiranna mamillit parubatanna sandiri. Umpamana, si April Cadoreth. Tingki marumur 14 taon, diopname ma ibana di rumah sakit ala pendarahan. Nunga diisi ibana hian kartu keterangan medis na paboahon molo ibana ndang manjalo transfusi darah. Ndang olo dokter na mangubati si April mangihuthon hatorangan na adong di kartu medis i, jala dipangido dokter i do surat sian pengadilan asa ditransfusi ibana. Dipaksa ma ibana ditransfusi mamangke tolu kantong sel darah merah. Dipatudos si April do na masa on songon pemerkosaan.

22 Diboan si April dohot natuatuana ma parsoalan on tu pengadilan. Dung dua taon, dipareso ma parsoalan on di Mahkamah Agung Kanada. Nang pe talu si April di pengadilan, dibayar Mahkamah i do biaya ni parkaro i.  Dibahen ma surat putusan na mangalehon hak tu ibana dohot tu dakdanak na asing mamillit parubatan na laho dipangke nasida. Didok Mahkamah i muse, ”Taringot tu parubatan, molo nunga toras pamingkirionna, boi na marumur di toru ni 16 taon mamillit parubatan ni nasida sandiri.”

23 Ringkot do pengalaman on, ala marhite on Mahkamah Agung mangangkui hak ni dakdanak naung toras pamingkirionna mamillit parubatanna sandiri. Andorang so i, pengadilan do na marhak manontuhon parubatan tu dakdanak na marumur di toru ni 16 taon. Alai dung adong surat putusan on, ndang marhak be pengadilan manontuhon parubatan tu sasahalak na marumur di toru ni 16 taon molo ndang jolo dilehon tingki tu nasida patuduhon naung toras pamingkirionna mamillit parubatan.

”Parsidohot laho pabadiahon goar ni Debata jala patuduhon Sibolis pargabus, mambahen las rohangku”

24 Adong do labana mampartahanhon hak saleleng tolu taon? Didok si April, ”Adong!” Nunga sehat ibana saonari jala sahalak perintis biasa. Didok ibana, ”Parsidohot laho  pabadiahon goar ni Debata jala patuduhon Sibolis pargabus, mambahen las rohangku.” Pengalaman ni si April on patuduhon molo angka na poso boi mamillit na dumenggan tu dirina, jala i patuduhon nasida rayat ni Harajaon ni Debata na marsihohot.​—Mat. 21:16.

Hak laho Pagodanggodangkon Dakdanak Hombar tu Patik ni Jahowa

25, 26. Aha do na boi masa molo adong parsirangan di parsaripeon?

25 Dilehon Jahowa do tanggung jawab tu natuatua laho pagodanggodangkon ianakhonna. (5 Mus. 6:6-8; Eps. 6:4) Ndang mura mangulahon on tarlumobi molo natuatua padaodao manang marsirang. Olo do gabe marasingasing pandapot ni nasida laho mangajari ianakhonna. Umpamana, lomo do roha ni sahalak natuatua Sitindangi mangajari ianakhonna mangihuthon prinsip ni Bibel, alai olo do asing pandapot ni dongan saripena na so Sitindangi. Nang pe marsirang na mardongan saripe, alai ringkot botoon ni sahalak Sitindangi dos do hak ni nasida maradophon ianakhonna.

26 Olo do sahalak natuatua na so sitindangi mangido petisi tu pengadilan, asa dilehon hak laho mangajari ianakhonna mangihuthon agamana. Adong na mandok ndang denggan molo anak ni nasida diajari mangihuthon haporseaon ni Sitindangi Ni Jahowa. Didok do Sitindangi ndang paloashon sasahalak mangarayahon ulang tahun, angka ari raya jala ndang dijalo transfusi darah na boi ”paluahon hangoluan”. Nang pe songon i, mandok mauliate do hita ala adong pengadilan na mamingkirhon na dumenggan tu dakdanak ndang mamparsoalhon agama ni natuatuana na hurang denggan. Taparrohahon ma pigapiga na masa.

27, 28. Songon dia do Pengadilan Tinggi Ohio mambahen putusan taringot tu ajaran ni Sitindangi Ni Jahowa na boi manegai pamatang dohot pingkiran ni dakdanak?

27 Amerika Serikat. Taon 1992, Pengadilan Tinggi di Ohio mamareso parsoalan ni sahalak ama na so Sitindangi na mandok ndang denggan molo ianakhonna diajari mangihuthon haporseaon ni Sitindangi Ni Jahowa. Monang ma ibana di pengadilan daerah jala ibana ma na marhak mangajari anakna si Bobby. Nang pe boi omakna si Jennifer Pater manjumpangi si Bobby, alai ndang boi ibana ”mangajarhon haporseaon ni Sitindangi Ni Jahowa”. Na ditontuhon pengadilan daerah on, boi mangambati si Jennifer mangajarhon isi ni Bibel tu ianakhonna si Bobby! Boi do tapingkirhon songon dia pangkilalaan ni si Jennifer? Lungun do rohana, alai sabar do ibana mangido pangurupion sian Jahowa. Ibana mandok, ”Tongtong do ahu didongani Jahowa.” Diurupi organisasi ni Jahowa do pengacarana naik banding tu Pengadilan Tinggi Ohio.

 28 Ndang diangkui pengadilan i surat putusan na binahen ni pengadilan daerah. Pengadilan tinggi i mandok, ”Marhak do natuatua mangajari ianakhonna, dohot ma i mangajarhon taringot tu marparange dohot maragama tu nasida.” Molo so adong ajaran ni Sitindangi Ni Jahowa na manegai pamatang dohot pingkiran ni dakdanak i, ndang adong hak ni pengadilan laho mangorai hak ni natuatua mangajari ianakhonna alani agamana. Ndang adong dapot ni pengadilan i ajaran ni Sitindangi Ni Jahowa na boi manegai pamatang dohot pingkiran ni dakdanak.

Godang do pengadilan na mangalehon hak pagodanggodangkon ianakhon tu natuatua na Sitindangi

29-31. Boasa ndang dilehon hak ni donganta si Anita di Denmark laho pagodanggodangkon ianakhonna, jala aha do na ditontuhon Mahkamah Agung di Denmark taringot tu parsoalan on?

29 Denmark. Songon i do na masa tu donganta si Anita Hansen. Tungganedolina hian mambahen petisi tu pengadilan laho mandapot hak pagodanggodangkon ianakhonna, si Amanda na marumur pitu taon. Nang pe pengadilan distrik mangalehon hak tu si Anita taon 2000, naik banding ma bapak ni si Amanda tu pengadilan tinggi. Ujungna, disundati ma hak na dilehon tu si Anita. Pengadilan Tinggi i mandok, ala marimbar do na tinuju ni natuatuana mangihuthon haporseaonna be, sahalak ama ma na marhak mangurus anakna. Alai dibahen pe songon i ala Sitindangi Ni Jahowa do si Anita.

30 Saleleng masa parsoalan i, jotjot do lungun roha ni si Anita jala ndang diboto ibana sibahenon dohot  sitangiangkononna. Ibana mandok, ”Alai tarapul do rohangku manjaha ayat di Rom 8:26 dohot 27. Huboto, na diantusi Jahowa do sude na di rohangku. Diparateatehon jala sai didongani Ibana do ahu.”​—Jaha Psalmen 32:8; Jesaya 41:10.

31 Naik banding ma si Anita tu Mahkamah Agung Denmark. Didok Mahkamah i ma, ”Hak laho pagodanggodangkon dakdanak dilehon tu sasahalak mangihuthon na dumenggan tu dakdanak i, jala ditontuhon marhite alus ni natuatuana tu pigapiga sungkunsungkun.” Jala didok Mahkamah i ma muse, hak laho manjaga ditontuhon sian cara ni natuatua pasaehon parsoalan, ndang alani ”ajaran dohot haporseaon” ni Sitindangi Ni Jahowa. Ujungna, si Anita Hansen ma na marhak laho pagodanggodangkon ianakhonna.

32. Songon dia do Mahkamah Eropa na Mangaradoti Hak Asasi Manusia mangurupi sahalak natuatua na Sitindangi mampartahanhon hakna?

32 Angka negara di Eropa. Di pigapiga parsoalan, jotjot do hak laho pagodanggodangkon dakdanak diboan sahat tu pengadilan tinggi nasional. Denggan do dipareso Mahkamah Eropa na Mangaradoti Hak Asasi Manusia (ECHR) sisongon on. Adong dua kasus na dipareso ni ECHR na patuduhon molo angka pengadilan rendah tingkat nasional paimbarhon natuatua Sitindangi dohot na so Sitindangi mangihuthon agamana. Pengadilan ECHR mandok ndang sintong putusan sisongon i. Didok ECHR muse, surat putusan ”ndang boi ditontuhon mangihuthon agama na marimbar”. Sahalak tungganeboru na diurupi ECHR laho mampartahanhon hakna mandok, ”Hansit situtu do rohangku ala ditudu manegai pingkiran ni ianakhonku, hape marsitutu do ahu mangajari ibana mangihuthon hasintongan sian Bibel.”

33. Songon dia do natuatua Sitindangi mangihuthon poda na disurat di Pilippi 4:5?

33 Ingkon marpangantusion do natuatua na Sitindangi na mangkalomohon mangajarhon prinsip ni Bibel tu ianakhonna. (Jaha Pilippi 4:5.) Nang pe marhak ibana mangajari ianakhonna taringot tu prinsip ni Bibel, alai marhak do tongtong dongan saripena na so Sitindangi Ni Jahowa tu ianakhon ni nasida i. Sadia ringkot do di natuatua Sitindangi mangajari ianakhonna?

34. Songon dia do angka natuatua boi maniru halak Jahudi di tingki ni si Nehemia?

34 Na masa di tingki ni si Nehemia gabe sitiruon. Marsitutu do halak Jahudi paulihon dohot pajongjongkon muse tembok ni Jerusalem. Diboto nasida do on boi mangondingi nasida dohot keluargana sian angka musu. Alani i, dijujui si Nehemia do nasida, ”Marporang ma hamu humongkop hahaanggimuna, angka anakmuna dohot borumuna, jolmamuna dohot bagasmuna.” (Neh. 4:8) Nang pe marungkil, alai ndang marisuang halojaon ni nasida.  Saonari, ingkon marsitutu do angka natuatua Sitindangi pagodanggodangkon ianakhonna di bagasan hasintongan. Diboto nasida do godang elaela na diadopi ianakhon nasida di singkola dohot di humaliangnasida. Pangkorhon ni parange na roa pe boi do sahat tu jabu marhite Internet manang siaran TV. Ringkot ingoton ni natuatua, sude na niulahonmuna humongkop ianakhonmuna mangurupi nasida togu di partondion. Alani i, ndang marisuang sude halojaonmuna i.

Pos ma Rohanta di Pangurupion ni Jahowa

35, 36. Aha do labana di Sitindangi ala marsitutu nasida mampartahanhon hak ni nasida di pengadilan, jala aha do na ringkot taulahon?

35 Pasupasuon ni Jahowa do sude ulaon ni organisasi laho mampartahanhon hak ni Sitindangi di pengadilan. Tingki mampartahanhon hakta di pengadilan, jotjot do on gabe dalan tu naposo ni Debata laho marbarita di pengadilan dohot di adopan ni torop halak. (Rom 1:8) Parsoalan naung dipamonang ni Sitindangi parohon laba tu na asing, ala marhite surat putusan i sude halak boi mampartahanhon hak ni nasida. Alai, ndang na laho mambahen hamubaon sosial na tinuju ni naposo ni Debata, manang laho mangalului sangap. Na rumingkot, na tinuju ni Sitindangi mampartahanhon hakna di pengadilan, i ma mambahen hamajuon di ulaon partondion.​—Jaha Pilippi 1:7.

36 Anggiat ma sai tatiru haporseaon ni angka donganta naung marsitutu mampartahanhon hak ni nasida maragama di pengadilan! Tongtong ma hita marsihohot tu Jahowa, jala marpos ni roha tu Ibana na urupanNa hita jala lehononNa gogo asa boi hita mangulahon lomo ni rohaNa.​—Jes. 54:17.