Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Harajaon ni Debata Mamarenta!

 PASAL 6

Halak na Pasahathon Barita na Uli​—Parbarita na Rade Mangalehon Diri

Halak na Pasahathon Barita na Uli​—Parbarita na Rade Mangalehon Diri

NA DIULAS DI PASAL ON

Diparade Raja i ma bangso na laho marbarita

1, 2. Aha do ulaon na disurirangkon Jesus, jala aha do sungkunsungkun na porlu taboto?

JOTJOT pamimpin politik ndang pasauthon janji ni nasida. Nang pe burju sahalak pamimpin, boi do ndang tolapna pasauthon janjina. Alai molo Raja Messias, i ma Jesus sai dipasaut do janjina. Imbar do ibana sian angka pamimpin na asing.

2 Dung mamarenta Jesus taon 1914, digohi ma surirang na pinaboana hirahira 1.900 taon andorang so taon i. Nunga disurirangkon Jesus hian, ”Laos baritahononhon do barita na uli on na taringot tu Harajaon i di liat portibi on.” (Mat. 24:14) Tingki digohi surirang on, i ma sada tanda naung mamarenta ibana. Di tingki parpudi, godang do halak ndang marholong ni roha, nasida mangkaringkothon dirina sandiri jala ndang mangkaringkothon partondion. Alani i, songon dia do Raja i boi papunguhon bangso na rade marbarita di tingki parpudi? (Mat. 24:12; 2 Tim. 3:1-5) Porlu do taboto alus ni sungkunsungkun on, ala mangkorhon do on tu sude halak Kristen.

3. Aha do na pinatudu ni hata ”laos baritahononhon” jala boasa boi pos roha ni Jesus?

3 Taingot ma muse surirang i. Hata ”laos baritahononhon” patuduhon, pos do roha ni Jesus na rade torop halak marbarita na uli di tingki parpudi. Boasa boi pos roha ni Jesus? Ala ditiru ibana do Jahowa. (Joh. 12:45; 14:9) Andorang so ro tu tano on, diida ibana do songon dia pos ni roha ni Jahowa tu angka naposoNa. Taparrohahon ma songon dia Jahowa patuduhon pos ni rohaNa.

Rade do BangsoM

4. Aha do ulaon na pinangido ni Jahowa asa diulahon bangso Israel, jala aha do na diulahon bangso i?

4 Taingot ma tingki si Musa disuru Jahowa pajongjongkon tabernakel manang tenda, inganan parpunguan ni bangso Israel laho manomba Jahowa. Marhite si Musa, dipangido Jahowa do halak Israel parsidohot tu ulaon i. Si Musa mandok, ”Ganup sian lomo ni rohana mamboan pelean tatingan di Jahowa.” Ujungna, marroan ma  bangso i ”ganup sogot mamboan silehonlehon guguan lomo ni rohana” tu si Musa. Ala nunga lobi silehonlehon i sian na dihaporluhon, disuru si Musa ma asa unang ditorushon bangso i mamboan silehonlehon! (2 Mus. 35:5; 36:3, 6) Sian haradeon ni bangso Israel, boi ma tadok, sintong do pos ni roha ni Jahowa tu bangso i.

5, 6. Hombar tu Psalmen 110:1-3, songon dia do pos ni roha ni Jahowa dohot Jesus taringot tu torop halak na parsidohot tu ulaon i?

5 Pos do roha ni Jahowa na rade naposoNa di tingki parpudi on? I do! Lobi sian 1.000 taon andorang so ro Jesus tu tano on, marhite si Daud nunga dipaboa Jahowa hian, andigan tingkina Jesus mamarenta gabe Raja. (Jaha Psalmen 110:1-3.) Ala Raja na baru, adong musu na mangalo Jesus. Alai, torop do halak na rade mangurupi ibana. Ndang ala na dipaksa nasida umbahen na olo marhobas tu Raja i. Torop sian nasida, i ma angka na poso na dipatudos songon nambur di tingki manogot. *

Dipatudos do tu nambur torop ni halak na rade dohot tu ulaon na hombar tu Harajaon ni Debata (Ida paragraf 5)

6 Nunga diboto Jesus hian laho masa do tu dirina surirang di Psalmen 110. (Mat. 22:42-45) Jala surirang i, paposhon rohana adong halak na rade pasahathon barita na uli di liat portibi on. Aha do na boi taida sian sejarah? Tutu do godang halak na rade marbarita di tingki parpudi on?

”Hak na Sumurung dohot Ulaon na Ringkot do di Ahu Pasahathon Barita I”

7. Dung gabe Raja, aha do na diulahon Jesus laho paradehon siihuthon ibana tu ulaon na balga?

7 Dung gabe Raja Jesus, diparade ma siihuthon ibana laho mangulahon ulaon na balga. Nunga taparsiajari di Pasal 2 songon dia naposo ni Debata dipareso jala dipabadia taon 1914 sahat tu mula ni taon 1919. (Mal. 3:1-4) Taon 1919, dipillit Jesus ma naposo haposan laho  mangaradoti siihuthon ibana. (Mat. 24:45) Mulai sian i, diparade naposo haposan ma sipanganon partondion marhite jamita di kebaktian dohot publikasi na dicetak. On paingothon ganup halak Kristen taringot tu tanggung jawab ni nasida marbarita na uli.

8-10. Songon dia do kebaktian mangonjar roha ni naposo ni Debata marbarita? Lehon ma tudosan. (Ida ma kotak ” Kebaktian na Mangonjar Roha ni Naposo ni Debata Marbarita”.)

8 Jamita di kebaktian. Ala las roha ni Parsiajar Bibel manangihon tudutudu i, marpungu ma nasida di Cedar Point, Ohio, AS, tanggal 1 sahat tu 8 September 1919. On ma kebaktian na parjolo na dipatupa dung Porang Dunia I. Di ari paduahon, dipasahat si Rutherford ma jamita na tangkas mandok, ”Ulaon ni sahalak Kristen di tano on, i ma . . . pasahathon barita taringot tu harajaon ni Tuan.”

9 Di ari patoluhon, dipasahat si Rutherford ma jamita na marjudul ”Sipaingot tu Dongan Parbarita” (Address to Co-laborers), na dipabinsar di The Watch Tower, judulna ”Mamaritahon Harajaon” (Announcing the Kingdom). Didok ibana, ”Molo sungkunsungkun roha ni sahalak Kristen, aha do siulahononku di tano on? Alus na sintong, i ma, nunga dipillit Tuan ahu gabe suruanna (duta) pasahathon barita sian Debata laho padengganhon paralealeon ni jolma tu Jahowa. Hak na sumurung dohot ulaon na ringkot do di ahu pasahathon barita i.”

10 Tingki pasahathon jamita i, dipaboa si Rutherford ma adong majalah na baru, i ma The Golden Age (saonari didok Awake! manang Sadarlah!). On mangurupi halak mangantusi holan Harajaon ni Debata do na mangalehon pangkirimon tu ari na naeng ro. Disungkun ibana ma tu na ro ise sian nasida na olo mansarhon majalah on. Sada laporan sian kebaktian mandok, ”Longang do roha mangida godang ni na manjangkon. Rap jongjong ma onom ribu halak sian na ro i.” * Tarida ma godang do na rade jala marlas ni roha laho mamaritahon Harajaon ni Debata!

11, 12. Aha do na dipaboa di The Watch Tower taon 1920 taringot tu andigan tingkina laho pasahathon barita na disurirangkon Jesus?

11 Publikasi na dicetak. Angka hatorangan di halaman ni The Watch Tower lam tangkas patorangkon na ringkot mamaritahon Harajaon ni Debata songon na disurirangkon Jesus. Taida ma pengalaman na masa di mula ni taon 1920-an.

12 Aha do barita na laho dipasahat na disurat di Mateus 24:14? Artikel na marjudul ”Barita na Uli taringot tu Harajaon ni Debata” (Gospel of the Kingdom) na adong di The Watch Tower 1 Juli 1920 patorangkon songon na mangihut, ”Barita na uli on taringot tu ujung ni portibi  ni Sibolis dohot parjongjong ni harajaon ni Messias.” Dipaboa do tangkas di artikel i, andigan disarhon barita on. Didok ma, ”Ingkon dipasahat do barita on saleleng porang [Porang Dunia I] sahat tu na ro ’hasusaan bolon’.” Dipaboa muse, ”Saonari ma tingkina . . . pasahathon barita na uli di sude inganan tu halak Kristen palsu.”

13. Songon dia do The Watch Tower 1921 mangonjar roha ni halak Kristen na miniahan?

13 Dipaksa Jahowa do naposoNa mangulahon ulaon na disurirangkon on? Ndang dipaksa. Artikel na marjudul ”Patogu ma Rohamuna” (Be of Good Courage) na adong di The Watch Tower 15 Maret 1921, mangonjar roha ni halak Kristen na miniahan asa rade marbarita. Dijujui do nasida mangarimangi sungkunsungkun on, ”Hak na sumurung jala ulaon na ringkot do di ahu marbarita na uli?” Artikel i muse paboahon, ”Pos do rohanami hilalaonmuna ma songon na dihilala si Jeremia molo dijangkon hamu [ulaon on hak na sumurung]. Dos songon api na marsigorgor do hata ni Debata di bagasan roha ni si Jeremia, alani i hiras do rohana laho marbarita.” (Jer. 20:9) Sipaingot i patuduhon pos ni roha ni Jahowa dohot Jesus tu angka na parsidohot tu ulaon i.

14, 15. Sipaingot aha do na dipaboa tu halak Kristen na miniahan marhite The Watch Tower 1922?

14 Songon dia do halak Kristen na marsihohot pasahathon barita na uli taringot tu Harajaon? Sada artikel na jempek alai tangkas na marjudul, ”Ringkot do Marbarita na Uli” (Service Essential) adong di The Watch Tower 15 Agustus 1922. Dijujui do halak Kristen na miniahan asa ”ringgas mansarhon publikasi na dicetak, jala marsitutu marbarita di jolo ni pintu laho paboahon naung jonok Harajaon ni Debata”.

15 Taboto ma sian taon 1919 sahat tu saonari, marhite naposo haposan dipaboa Jesus do tu sude halak Kristen ulaon na ringkot jala hak na sumurung di nasida, i ma mamaritahon Harajaon ni Debata. Aha do na diulahon Parsiajar Bibel tingki dijujui nasida marbarita na uli?

”Rade do naposo ni Debata na Marsihohot”

16. Songon dia do pangkilalaan ni deba sian angka sintua mangihuthon tudutudu laho marbarita?

16 Taon 1920-an dohot taon 1930-an, adong do na so manjangkon tudutudu na ingkon dohot sude halak Kristen na miniahan marbarita na uli. Watch Tower 1 November 1927 patorangkon, ”Saonari adong do di gareja [huria] angka sintua . . . na so olo manjujui dongan sahaporseaon marbarita na uli, jala nasida sandiri ndang olo marbarita. . . . Direhei nasida do ulaon marbarita sian jabu tu jabu laho paboahon hasintongan taringot tu Debata, Raja  dohot harajaonna tu sude jolma.” Tangkas do dipaboa di artikel i, ”Ingkon manat do naposo ni Debata tu halak sisongon i, unang marsaor dohot nasida, jala paboahon na so olo hita unduk tu sintua sisongon i.” *

17, 18. Songon dia do pangkilalaan ni godang dongan sahaporseaonta mangihuthon tudutudu sian kantor pusat, jala songon dia do i diulahon donganta saleleng 100 taon on?

17 Torop dongan sahaporseaonta marlas ni roha manjangkon tudutudu ni kantor pusat. Hak na sumurung do dihilala nasida ulaon marbarita na uli. The Watch Tower 15 Maret 1926 mandok, ”Rade do naposo ni Debata na marsihohot . . . pasahathon barita on tu halak na asing.” Songon na disurirangkon di Psalmen 110:3, rade do naposo ni Debata na marsihohot on mangurupi Raja Messias.

18 Saleleng 100 taon, marjuta halak rade tu ulaon marbarita. Di angka pasal na mangihut, taparsiajari ma cara dohot alat na dipangke marbarita jala laba na dapot ni nasida. Alai, taparsiajari ma parjolo boasa marjuta halak rade tu ulaon marbarita na uli nang pe mangolu di tongatonga ni jolma na mangkaholongi dirina sandiri. Huhut tapingkiri on, tasungkun ma dirinta, ’Boasa olo ahu marbarita na uli?’

”Sai Jumolo ma Lului . . . Harajaon ni Debata”

19. Boasa ingkon taoloi poda ni Jesus asa ’jumolo mangalului Harajaon ni Debata’?

19 Dijujui Jesus do siihuthon ibana asa sai ’jumolo mangalului Harajaon ni Debata’. (Mat. 6:33) Boasa ringkot mangoloi poda on? Ala nunga taboto Harajaon i do na laho manggohi sangkap ni Debata. Songon naung taparsiajari, dipapatar tondi parbadia do hasintongan i sian tingki tu tingki. Dung taboto hasintongan taringot tu Harajaon ni Debata, taronjar ma rohanta patujolohon i di ngolunta.

Songon sasahalak na marlas ni roha ala mandapot arta na buni, halak Kristen marlas ni roha mandapot hasintongan taringot tu Harajaon (Ida paragraf 20)

20. Songon dia do tudosan ni Jesus taringot tu arta na buni patuduhon na rade do siihuthon ibana patujolohon Harajaon i di ngolu ni nasida?

20 Nunga diboto Jesus na laho jangkonon ni siihuthon ibana do podana taringot tu patujolohon Harajaon ni Debata. Taparrohahon ma tudosan taringot tu arta na buni. (Jaha Mateus 13:44.) Di tudosan i dipaboa, adong ma sahalak baoa na mandapot arta na buni di sada ladang. Aha do na diulahon ibana? ”Dung i laho ma ibana di las ni rohana i manggadisi nasa na di ibana, laos dituhor ma ladang i.” Aha do na boi taparsiajari? Dung tadapot hasintongan na arga taringot tu Harajaon ni Debata, taronjar ma rohanta asa rade patujolohon Harajaon i di ngolunta. *

21, 22. Songon dia do halak na rade marbarita na uli patuduhon molo nasida patujolohon Harajaon? Paboa ma pengalaman.

21 Halak na patujolohon Harajaon ni Debata, rade marbarita na uli jala i do ulaon na rumingkot di ngoluna. Dilehon do tingki, pingkiran, dohot gogonasida asa boi marbarita na uli. Godang do na marsitutu mangulahon on asa boi gabe pelayan sepenuh waktu. Dihilala nasida do  pangurupion ni Jahowa ala patujolohon Harajaon ni Debata. Parrohahon ma pengalaman on.

22 Si Avery dohot si Lovenia Bristow, marhobas gabe kolportir (perintis) di Amerika Serikat bagian selatan di ujung ni taon 1920-an. Martaontaon dungkon i, didok si Lovenia ma, ”Las do rohangku dohot si Avery martaontaon merintis. Jotjot do ndang huboto hami sian dia hepeng laho manuhor sipanganon dohot bensin. Alai, sai diurupi Jahowa do hami. Boi ma hami torus merintis. Jala sai digohi do sude na porlu di hami.” Diingot si Lovenia ma tingki merintis nasida di Pensacol, Florida. Di tingki i, ndang sadia godang be sipanganon dohot hepeng ni nasida. Alai dung mulak tu inganan ni nasida, adong ma dua tas na balga na marisi sipanganon dohot surat na mandok, ”Nionjar ni holong ni roha ni Paguyuban Pensacola.” * Dung martaontaon nasida merintis, didok si Lovenia ma, ”Ndang hea ditadingkon Jahowa hami. Jala ndang hea mago pos ni rohanami tu Ibana.”

23. Songon dia do pangkilalaanmu tu hasintongan taringot tu Harajaon, jala aha do na laho ulahononmu?

23 Ndang sai dos na boi taulahon dohot na diulahon ni donganta di ulaon marbarita. Alai, hak na sumurung do di hita sude molo dohot marbarita na uli. (Kol. 3:23) Ala arga do di hita hasintongan taringot tu Harajaon, rade jala marhiras ni roha do hita marbarita na uli. Songon i do dihilala hamu?

24. Aha do ulaon na balga na digohi di tingki parpudi on?

24 Saleleng 100 taon, nunga digohi Jesus janjina di Mateus 24:14. Jala ndang adong na dipaksa laho mangulahon i. Ala ndang mangihuthon parange ni portibi on, rade ma angka siihuthon ibana laho marbarita na uli. Ulaon marbarita di liat portibi on, sada sian tanda haroro ni Jesus na gabe Raja. Jala on ma sada ulaon na umbalga na digohi di tingki parpudi on.

^ par. 5 Di Bibel, dipatudos do nambur tu pasupasu.​—1 Mus. 27:28; Mik. 5:6.

^ par. 10 Pamflet To Whom the Work Is Entrusted patorangkon, ”Ulaon marbarita sian jabu tu jabu do na tinuju ni The Golden Age. . . . Asing ni i, ingkon ditadingkon do The Golden Age di ganup jabu nang pe ndang olo parjabu i marlangganan.” Martaontaon dungkon i, disuru ma angka donganta asa manogihon halak marlangganan The Golden Age dohot The Watch Tower. Sian tanggal 1 Februari 1940, dijujui ma naposo ni Debata mansarhon angka majalah on jala dipaboa ma sadia godang na disarhon nasida.

^ par. 16 Di tingki i, angka sintua dipillit marhite soara na gumodang di huria. Alani i, boi do huria ndang mamillit angka baoa na so olo dohot marbarita na uli. Di Pasal 12 taboto ma cara naung muba laho mamillit sintua.

^ par. 20 Hatorangan na sarupa dipaboa Jesus marhite tudosan taringot tu partigatiga na mangalului mutiara na arga. Dung dapot, digadis ma sude artana laho manuhor mutiara i. (Mat. 13:45, 46) Dua tudosan on mangajarhon tu hita, marragam do cara laho mandapot hasintongan taringot tu Harajaon ni Debata. Adong do na mangalului hasintongan, gabe dapotna. Alai na asing, ndang pola ingkon dilului. Songon dia pe hita mandapot hasintongan, rade do hita mangulahon manang aha pe laho patujolohon Harajaon di ngolunta.

^ par. 22 Najolo huria didok paguyuban.