Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PASAL 7

Cara Marbarita​—Dipangke do Marragam Cara Asa Torop Jolma Manangihon Barita na Uli

Cara Marbarita​—Dipangke do Marragam Cara Asa Torop Jolma Manangihon Barita na Uli

NA DIULAS DI PASAL ON

Naposo ni Debata mamangke marragam cara laho marbarita asa sude jolma manangihon barita na uli

1, 2. (a) Aha do cara na dipangke Jesus asa boi mangkatai tu torop halak? (b) Songon dia do angka siihuthon Jesus maniru ibana jala boasa?

DUNG lam torop halak na ro laho manangihon Jesus di topi ni tao, gabe nangkok ma Jesus tu sada parao jala dipadao ma sian topi ni tao i. Boasa diulahon Jesus songon i? Ala diboto Jesus, boi do tangkas soarana begeon ni halak molo mangkatai ibana sian ginjang ni aek i.​—Jaha Markus 4:1, 2.

2 Andorang so jongjong jala dungkon jongjong Harajaon ni Debata, marsitutu do siihuthon Jesus mamangke cara na baru asa boi marbarita tu torop halak. Marhite tudutudu sian Jesus, dipahombar naposo ni Debata do cara ni nasida marbarita mamangke teknologi na imbaru. Lomo do rohanta asa sude jolma manangihon barita na uli andorang so ro ari i. (Mat. 24:14) Taparsiajari ma angka cara na dipangke marbarita asa sude jolma manangihon barita na uli. Dung i, tapingkirhon ma muse songon dia hita maniru haporseaon ni angka parbarita di tingki naung salpu.

Marbarita tu Torop Jolma

3. Songon dia do caranta marbarita mamangke koran mambahen lam sogo roha ni halak tu hasintongan?

3 Koran. Sian taon 1879, nunga dipabinsar si Russell dohot angka donganna majalah Watch Tower, na dipangke laho marbarita tu torop jolma. Alai, andorang so taon 1914, nunga tarida na diurupi Jesus do angka siihuthon ibana asa boi mangurupi torop halak manangihon barita na uli. Tarida ma on sian taon 1903. Di tingki i, Dr. E. L. Eaton sahalak juru bicara sian gareja Protestan di Pennsylvania manogihon si Russell asa masisungkunan (debat) nasida taringot tu ajaran ni Bibel. Didok si Eaton ma di suratna tu si Russell, ”Huhilala godang do halak na marlomo ni roha laho mamboto taringot tu pangantusionta na marimbar tu ajaran ni Bibel.” Si Russell dohot angka donganna mangkilala cara na denggan do on laho  marbarita tu godang halak. Alani i, dipabinsar nasida ma isi ni pangkataion ni si Russell dohot si Eaton di koran na tarbarita di tingki i, i ma The Pittsburgh Gazette. Jala tutu do dihalomohon godang halak artikel taringot tu hatorangan ni si Russell na mansai tangkas taringot tu Bibel. Alani i, dipangido koran i ma asa dipabinsar jamita ni si Russell ganup minggu. Tontu, on mambahen lam sogo roha ni halak na so marlomo ni roha tu hasintongan!

Taon 1914, lobi sian 2.000 koran pabinsarhon jamita ni si Russell

4, 5. Aha do parange na dipatudu si Russell, jala songon dia do angka na mangaradoti ulaon di organisasi boi maniru parangena i?

4 Angka na mancetak koran na asing lomo do roha ni nasida pabinsarhon jamita ni si Russell. Taon 1908, dipaboa ma di Watch Tower nunga adong ”sampulusada koran na tongtong” pabinsarhon jamita ni si Russell. Adong ma angka donganta na manjujui si Russell asa dipapinda kantor lembaga di Pittsburgh tu kota na umbalga, asa lam gumodang koran na pabinsarhon jamitana. Dung dipingkiri si Russell pandapot ni angka donganta on, dipapinda ma kantor i tu Brooklyn, New York, taon 1909. Aha do pangkorhonna? Ndang leleng dung pinda, adong ma hirahira 400 koran na pabinsarhon jamita ni si Russell jala tongtong dope lam martambatamba. Dung jongjong Harajaon i taon 1914, adong lobi sian 2.000 koran di bagasan opat bahasa pabinsarhon artikel dohot jamita ni si Russell!

5 Aha do na boi taparsiajari sian on? Denggan ma molo serep ni roha ni si Russell, gabe sitiruon ni angka na mangaradoti ulaon di organisasi saonari on. Umpamana, tingki manontuhon na dumenggan tu organisasi, denggan ma molo dijalo nasida pandapot ni na asing taringot tu ulaon i.​—Jaha Poda 15:22.

6. Songon dia do artikel taringot tu Harajaon ni Debata na dipabinsar di koran mangkorhon tu si Ora?

6 Artikel taringot tu Harajaon ni Debata na dipabinsar di angka koran mambahen torop halak boi mananda hasintongan. (Heb. 4:12) Umpamana, si Ora Hetzel na tardidi taon 1917 marsiajar hasintongan marhite artikel na dipabinsar di koran. Didok si Ora ma, ”Dung marhasohotan, laho ma ahu tu jabu ni omakku di Rochester, Minnesota. Huida ma digunting omakku artikel taringot tu jamita ni si Russell sian sada koran. Dipaboa omakku ma tu ahu angka parsiajaran na nidapotna sian artikel di koran i.” Dijangkon si Ora ma hasintongan na pinarsiajaranna, jala gabe parbarita na uli na marsihohot ma ibana saleleng 60 taon.

7. Boasa ndang dipangke angka donganta na mangaradoti ulaon di organisasi be koran laho marbarita?

7 Taon 1916, adong dua na masa na mambahen hamubaon. Alani i, ringkot pingkirhonon ni na mangaradoti organisasi taringot tu ulaon marbarita na uli mamangke koran. Na parjolo, maol do mandapot angka bahan  percetakan ala masa porang di tingki i. Taon 1916, didok departemen koran di Inggris ma, ”Saonari, holan lobi sian 30 koran do na pabinsarhon angka Jamita. Ra, lam tu otikna do na pabinsarhon ala lam arga harotas.” Na paduahon, tanggal 31 Oktober 1916 marujung ngolu ma si Russell. Dipaboa ma di The Watch Tower 15 Desember 1916, ”Ala nunga marujung ngolu si Russell ndang be dipabinsar angka jamita [di koran].” Nang pe ndang dipangke be cara on, alai adong cara na asing, i ma ”Drama-Foto Penciptaan”. Drama on, dihalomohon godang halak.

8. Aha do na diulahon asa boi dibahen ”Drama-Foto Penciptaan”?

8 Patuduhon video. Hirahira saleleng tolu taon, dipatupa si Russell dohot angka donganna do ”Drama-Foto Penciptaan” jala dipatandahon taon 1914. (Poda 21:5)  Drama on, i ma sada karya seni na margombar, ditambai dohot rekaman ni soara, jala adong slide kaca na margombar. Marratus halak maniruhon angka na masa di ngolu ni halak na disurat di Bibel, dung i, direkam mamangke pita film. Diboan do muse angka binatang laho dipangke tu video i. Sada laporan taon 1913 mandok, ”Godang do binatang na adong di taman hewan dipangke mambahen gambar bergerak na marsoara na patuduhon na masa di tingki ni si Noak.” Dipangke do marratus slide kaca na margombar di drama on, na diwarnai angka seniman di London, New York, Paris, dohot di Philadelphia.

9. Boasa godang tingki dohot hepeng na dipangke laho mambahen ”Drama-Foto”?

9 Boasa dipangke godang tingki dohot hepeng laho mambahen ”Drama-Foto”? Sada resolusi taon 1913 mandok, ”Gombar kartun dohot angka gombar na asing dibahen di koran Amerika. On mambahen godang halak mura mangantusi na tinuju ni koran i, jala lomo roha ni nasida. Nunga somal halak mangida gambar bergerak. Alani i, pos do rohanta lam godang do halak manangihon barita na uli molo tapangke gambar bergerak dohot pemutar slide tingki mangajarhon isi ni Bibel tu angka jolma.”

Anjungan proyektor ”Drama-Foto”; bottom: Slide kaca na margombar ”Drama-Foto”

10. Songon dia do ”Drama-Foto” boi diida godang halak?

10 Taon 1914, diputar do ”Drama-Foto” ganup ari di 80 kota na marasingasing. Di Amerika Serikat dohot di Kanada, adong hirahira ualu juta halak na mangida video on. Di tingki i, diputar do muse ”Drama-Foto” di Australia, Denmark, Finlandia, Inggris, Jerman, Norwegia, Selandia Baru, Swedia, dohot Swiss. Dipatudu do muse ”Drama-Foto” na so adong gambar bergerakna di angka kota na gelleng, digoari ma on ”Drama Eureka”. Ndang sadia godang hepeng laho mambahen drama on, jala ummura do diboan tu inganan na asing laho marbarita. Taon 1916, diterjemahon ma ”Drama-Foto” dohot ”Drama Eureka” tu bahasa Armenia, Denmark-Norwegia, Italia, Jerman, Junani, Polandia, Prancis, Spanyol, dohot Swedia.

Saleleng taon 1914, diputar ma ”Drama-Foto” di angka auditorium

11, 12. Songon dia do pangkorhon ni ”Drama-Foto” tu sahalak baoa jala aha do na boi tatiru sian ibana?

11 Balga do pangkorhon ni ”Drama-Foto” na diterjemahon di bahasa Prancis tu si Charles Rohner sahalak baoa na marumur 18 taon. Ibana mandok, ”Hutonton ma video on di huta hatubuanku di Colmar, Alsace, Prancis. Sian parjolo diputar, longang do rohangku mangida hasintongan dipapatar sian Bibel.”

12 Dung tardidi si Charles, gabe pelayan sepenuh waktu ma ibana taon 1922. Sada sian ulaon ni ibana na parjolo, i ma mamutar ”Drama-Foto” di Prancis. Ibana mandok, ”Marragam do ulaonku tingki mamutar video on. Mamangke biola, gabe hamba pembukuan, dohot hamba  lektur. Ahu do muse disuru mangido tu angka na ro asa hohom andorang so dipungka ulaon i. Tingki istirahat, dilehon hami ma angka buku tu na ro. Ditugashon ma sahalak donganta baoa manang borua tu ganup blok na adong di gedung i. Diboan nasida ma lektur huhut disungkun ma na ro olo manang ndang nasida manjalo lektur i. Di pintu laho masuk tu gedung i, diparade do angka buku di ginjang ni meja.” Taon 1925, karejo ma si Charles di Betel Brooklyn, New York. Dipangido ma ibana gabe dirigen orkestra ni stasiun radio WBBR na baru dipajongjong. Sian pengalaman ni si Rohner on, boi ma tasungkun dirinta, ’Rade do ahu manjalo sude ulaon na dilehon laho pasahathon barita na uli?’​—Jaha Jesaya 6:8.

13, 14. Songon dia do radio dipangke laho pararathon barita na uli? (Ida ma kotak ” Program di WBBR” dohot ” Kebaktian na Bersejarah”.)

13 Radio. Taon 1920-an ndang jotjot be dipangke ”Drama-Foto” tingki marbarita, alai dipangke do cara na dumenggan marbarita marhite radio. Tanggal 16 April 1922, dipasahat si Rutherford ma jamita na parjolo sian Metropolitan Opera House di Philadelphia, Pennsylvania. Hirahira 50.000 halak manangihon jamita na marjudul ”Marjuta Halak na Mangolu Saonari Ndang Mangkilala Hamatean”. Jala taon 1923 ma parjolo sahali acara kebaktian dibahen marhite radio. Asing ni mamangke stasiun radio komersial, didok angka na mangaradoti ulaon di organisasi ma asa dipatupa di Staten Island, New York stasiun radio na didaftarhon gabe WBBR. Siaran na parjolo, i ma tanggal 24 Februari 1924.

Taon 1922, hirahira 50.000 halak manangihon jamita na marjudul ”Marjuta Halak na Mangolu Saonari Ndang Mangkilala Hamatean”

14 Dipaboa do di The Watch Tower 1 Desember 1924 taringot tu boasa tapangke WBBR. Didok, ”Pos do rohanta, cara na dumenggan marbarita saleleng on, i ma marhite radio. Alani i, molo lomo do roha ni Tuan tapajongjong stasiun radio na asing laho pararathon hasintongan, paradeonna do hepeng marhite cara na dumenggan.” (Ps. 127:1) Taon 1926, nunga adong onom stasiun radio, dua stasiun di Amerika Serikat, i ma WBBR di New York dohot radio WORD di jonok ni Chicago. Opat stasiun radio dipatupa di Kanada, i ma di Alberta, British Columbia, Ontario, dohot Saskatchewan.

15, 16. (a) Songon dia do pangkilalaan ni pamimpin gareja tu siaran ni radio na adong di Kanada? (b) Songon dia do jamita di radio boi mangurupi ulaon marbarita sian jabu tu jabu?

15 Diparrohahon angka pamimpin ni gareja do na lam rarat hasintongan tu sude jolma marhite radio. Si Albert Hoffman na karejo di stasiun radio di Saskatchewan, Kanada mandok, ”Lam torop do halak na mamboto Parsiajar Bibel [goar ni Sitindangi Ni Jahowa di tingki i]. Jala lam torop do halak na mananda hasintongan sahat tu taon 1928. Alani i, dijujui angka pamimpin gareja ma asa  dicabut angka pejabat izin ni stasiun radio ni Parsiajar Bibel di Kanada.”

16 Nang pe ditutup stasiun radio di Kanada, alai tongtong do dipasahat jamita marhite stasiun radio komersial. (Mat. 10:23) Asa lam godang na manangihon program on marhite radio, dipaboa ma daftar ni stasiun radio di The Watch Tower dohot di The Golden Age (saonari didok Awake! manang Sadarlah!). On mangurupi angka parbarita manjujui halak sian jabu tu jabu manangihon jamita di stasiun radio na adong di inganan ni nasida. Aha do labana? Bulletin Januari 1931 mandok, ”Ala dipangke do radio laho marbarita, lam hiras do roha ni angka donganta marbarita na uli sian jabu tu jabu. Godang laporan na paboahon, dibege nasida ma jamita ni si Rutherford marhite radio, jala dipangido ma bukunta.” Dipaboa muse di Bulletin i, marbarita marhite radio dohot sian jabu tu jabu gabe ”dua cara na denggan laho marbarita na uli di organisasi ni Tuan”.

17, 18. Songon dia do radio tongtong dipangke nang pe godang na ditutup?

17 Taon 1930 sahat tu 1939, lam godang ma na mangorai ulaon marbarita mamangke stasiun radio komersial. Di ujung ni taon 1937 ndang dipangke be radio laho marbarita. Alai, dilului ma cara asa lam denggan marbarita sian jabu tu jabu. * Nang pe songon i, di inganan na pinjil dipangke do radio laho marbarita na uli. Umpamana sian taon 1951 sahat tu 1991, adong sada stasiun radio di Berlin Barat, Jerman, na tongtong paboahon jamita. Pangkorhon ni i, halak na tading di Jerman Timur boi manangihon barita na uli. Lobi 30 taon sian taon 1961, sada stasiun radio nasional di Suriname, Amerika Selatan mambahen program ganup minggu saleleng sampulu lima minut laho pasahathon hasintongan sian Bibel. Sian taon 1969 sahat tu 1977, dipatupa organisasi do lobi sian 350 rekaman program radio na dibahen di seri ”Marlaba do Sude Isi ni Bibel”. Di Amerika Serikat, 291 stasiun radio na adong di 48 negara pasahathon program on. Taon 1996, sada stasiun radio di Apia, ibukota ni Samoa di Pasifik Selatan, mambahen program ganup minggu na marjudul ”Alus ni Sungkunsungkunmu taringot tu Isi ni Bibel”.

18 Di ujung ni abad 20, ndang dipangke be radio laho pasahathon barita na uli. Alai, dipangke ma teknologi na terbaru na mambahen lam torop halak boi mananda hasintongan.

19, 20. Boasa dipatupa naposo ni Jahowa situs jw.org, jala songon dia do i mangkorhon tu na asing? (Ida ma kotak ” JW.ORG”.)

19 Internet. Taon 2013, 40 persen sian penduduk ni portibi on manang lobi sian 2,7 miliar halak mamangke internet. Sada laporan paboahon, hirahira dua miliar  halak mamangke internet marhite ponsel pintar dohot tablet. Lam godang do halak na mamangke internet. Songon di Afrika, adong lobi sian 90 juta paket laho marlangganan internet. Angka hamajuon on patuduhon nunga muba cara ni halak laho mandapot barita.

20 Sian taon 1997, diihuthon naposo ni Debata do cara on. Taon 2013, torop halak boi mambungka situs web jw.org, hirahira di bagasan 300 bahasa. Jala hatorangan taringot tu isi ni Bibel, diparade lobi sian 520 bahasa. Ganup ari lobi sian 750.000 halak mambungka situs on. Ganup bulan asing ni manonton video, lobi sian 3 juta buku, 4 juta majalah, jala 22 juta fail audio diunduh.

21. Aha do na boi taparsiajari sian si Sina?

21 Situs web mangurupi halak mamboto hasintongan nang pe ulaon marbarita diorai di inganan ni nasida. Umpamana, di mula ni taon 2013 sahalak baoa na margoar si Sina mambungka situs jw.org. Dung i, disungkun ibana ma tu kantor pusat angka hatorangan taringot tu isi ni Bibel. Si Sina sahalak Muslim na tading di sada huta na pinjil di sada negara, jala diorai do ulaon marbarita di inganan i. Ujungna, diurupi ma si Sina marsiajar Bibel dua hali saminggu dohot sahalak Sitindangi di Amerika Serikat. Parsiajaran on, dibahen marhite video internet.

Diajari do Ganup Halak

22, 23. (a) Boasa ringkot marbarita sian jabu tu jabu nang pe godang cara na tapangke laho marbarita? (b) Songon dia do ganup cara na tapangke dipasupasu Jesus?

22 Nang pe tapangke cara marbarita marhite koran, ”Drama-Foto”, program radio, dohot situs web, alai  tongtong do ringkot cara marbarita sian jabu tu jabu. Boasa? Ala naposo ni Jahowa mangihuthon cara ni Jesus. Na rumingkot di Jesus, i ma mangurupi ganup halak, ndang holan marbarita tu torop halak. (Luk. 19:1-5) Diurupi Jesus do angka siseanna mangulahon on, jala dipaboa do tu nasida aha barita na laho dipasahat. (Jaha Lukas 10:1, 8-11.) Songon naung taparsiajari di Pasal 6, angka na mangaradoti ulaon di organisasi, ingkon manjujui ganup naposo ni Jahowa asa marbarita na uli.​—Ul. 5:42; 20:20.

23 Saratus taon dung jongjong Harajaon i, lobi sian 7,9 juta penyiar parsidohot tu ulaon marbarita. On patuduhon dipasupasu Jesus do ganup cara na tapangke laho marbarita. Songon na taparsiajari di pasal na mangihut, dilehon do tu hita alat laho marbarita asa ganup bangso dohot bahasa boi manangihon barita na uli.​—Pgk. 14:6.

^ par. 17 Taon 1957, ditutup angka na mangaradoti ulaon di organisasi ma stasiun radio na parpudi, i ma WBBR di New York.