Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Harajaon ni Debata Mamarenta!

 PASAL 19

Pajongjongkon Inganan Parpunguan

Pajongjongkon Inganan Parpunguan

NA DIULAS DI PASAL ON

Pajongjongkon inganan parpunguan hombar tu Harajaon ni Debata

1, 2. (a) Aha do ulaon na parohon las ni roha tu naposo ni Jahowa? (b) Aha do na arga di Jahowa?

LAS do roha ni naposo ni Debata pajongjongkon bangunan na parohon pujian tu goar ni Debata. Umpamana, marsitutu do halak Israel pajongjongkon tabernakel jala taronjar do rohanasida laho paradehon na ringkot tu ulaon i.​—2 Mus. 35:30-35; 36:1, 4-7.

2 Ndang bahan bangunan manang inganan na dipajongjong i na rumingkot parohon sangap tu Jahowa. (Mat. 23:16, 17) Na arga di Jahowa jala na parohon sangap tu Ibana, i ma haporseaon ni angka naposoNa, haradeon dohot gogo na nilehon ni nasida tu ulaon i. (2 Mus. 35:21; Mrk. 12:41-44; 1 Tim. 6:17-19) Ringkot do taboto on. Boasa? Alana sada inganan na hea dipajongjong boi do ndang adong be saonari. Nang pe tabernakel dohot bagas joro ndang adong be, alai ndang lupa Jahowa tu haradeon ni naposoNa tingki pajongjongkon inganan i.​—Jaha 1 Korint 15:58; Heber 6:10.

3. Aha do na laho taparsiajari di pasal on?

3 Saonari, marsitutu do naposo ni Jahowa pajongjongkon inganan parpunguan. Longang do rohanta mangida godang ni naung diulahon naposo ni Debata ala mangihuthon tudutudu ni Jesus! On patuduhon ulaonta dipasupasu Jahowa. (Ps. 127:1) Di pasal on, taparsiajari ma angka ulaon pajongjongkon inganan parpunguan na parohon sangap tu Jahowa. Taida ma muse pandapot ni angka donganta na dohot tu ulaon on.

Pajongjongkon Bale Harajaon

4. (a) Boasa dihaporluhon godang inganan parpunguan? (b) Boasa angka kantor cabang gabe dipasada? (Ida kotak ” Bangunan ni Cabang—Dipahombar tu na Dihaporluhon”.)

4 Songon na taparsiajari di Pasal 16, disuru Jahowa do hita marpungu laho manomba Ibana. (Heb. 10:25) Parpunguan patoguhon haporseaonta, jala mangonjar rohanta laho marbarita. Di tingki parpudi on, diurupi Jahowa do naposoNa marbarita, asa gira barita i sahat tu torop halak. Alani i, ganup taon adong marratus ribu na ro tu organisasi ni Jahowa. (Jes. 60:22) Ala lam torop do rayat ni Harajaon  ni Debata, dihaporluhon ma godang inganan parpunguan dohot percetakan na umbalga asa boi paradehon godang sijahaon sian Bibel.

5. Boasa inganan parpunguanta digoari Bale Harajaon? (Ida ma kotak ” Gareja Baru na Marsinondang”.)

5 Sian mulana, nunga diboto Parsiajar Bibel, molo nasida mangkaporluhon inganan parpunguan. Ra, na parjolo dipajongjong, i ma inganan na adong di Virginia Barat, AS taon 1890. Dipajongjong jala dipature ma muse angka inganan parpunguan taon 1930-an, alai ndang dibahen dope goar ni inganan parpunguan i. Taon 1935 ro ma si Rutherford tu Hawaii. Tingki i, adong inganan parpunguan dipajongjong jonok tu kantor cabang na baru. Disungkun ma tu si Rutherford goar na laho dipangke tu inganan i, didok si Rutherford ma, ”Ala hita marbarita na uli taringot tu Harajaon ni Debata, denggan do didok rohamu inganan i digoari Bale Harajaon?” (Mat. 24:14) Mulai sian i, Bale Harajaon ma digoari inganan parpunguan ni Sitindangi di liat portibi on.

6, 7. Songon dia do pangkorhon ni Bale Harajaon na hatop dipajongjong tu halak na asing?

 6 Taon 1970-an, dihaporluhon ma lam godang Bale Harajaon. Alani i, angka donganta di Amerika Serikat marsitutu mangalului cara asa boi pajongjongkon Bale Harajaon di bagasan pigapiga ari. Taon 1983, dipajongjong ma hirahira 200 Bale Harajaon di Amerika Serikat dohot di Kanada mangihuthon cara na baru i. Asa hatop ulaon on, dibahen ma panitia pembangunan regional. Ala denggan do cara sisongon on, taon 1986 disetujui Punguan na Mangaradoti Organisasi ma cara on. Taon 1987, adong 60 Panitia Pembangunan Regional (RBC) di Amerika Serikat. * Dung i, taon 1992, dibahen ma muse RBC di Afrika Selatan, Argentina, Australia, Jepang, Jerman, Meksiko, Prancis, dohot Spanyol. Ulaon ni nasida hombar tu lomo ni roha ni Debata. Alani i, ringgas ma hita mangurupi angka donganta na marsitutu pajongjongkon Bale Harajaon dohot Bale Kebaktian.

7 Hatop ni Bale Harajaon dipajongjong parohon pujian sian halak na tading na jonok tu inganan i. Umpamana, halaman parjolo sian sada koran di Spanyol marjudul ”Haporseaon na Boi Papindahon Dolok” mangulas taringot tu Bale Harajaon na hatop dipajongjong di kota Martos. Dibahen do sungkunsungkun di koran i, ”Di tongatonga ni torop halak na mamingkirhon dirina sandiri, songon dia do boi godang halak rade ro tu Martos sian marragam inganan [di Spanyol] laho pajongjongkon  inganan parpunguan na denggan jala maratur di tingki na hatop?” Dipaboa koran i do muse alusna marhite hatorangan ni sahalak donganta, ”Boi diulahon hami on alani pangajarion ni Jahowa.”

Pajongjongkon Inganan Parpunguan di Negeri na Susa Parhepengonna

8. Taon 1999, aha do cara na baru na disetujui Punguan na Mangaradoti Organisasi, jala boasa songon i?

8 Di ujung ni abad 20, di negeri na susa parhepengonna, torop do halak ro tu organisasi ni Jahowa. Alani i, marsitutu do huria di inganan i pajongjongkon inganan parpunguan. Di pigapiga negeri, jotjot do direhei Bale Harajaonta ala ndang songon gareja na asing. Alai mulai sian taon 1999, disetujui Punguan na Mangaradoti Organisasi ma pahatophon ulaon pajongjongkon Bale Harajaon di angka negeri na mangkaporluhon inganan parpunguan. Rade do angka donganta di negeri na maju mangurupi pajongjongkon Bale Harajaon di negeri na maol di parhepengon. (Jaha 2 Korint 8:13-15.) Adong do muse donganta na rade ro sian negeri na asing laho mangurupi ulaon on.

9. Aha do ulaon na mulana maol, alai songon dia do on boi diulahon?

9 Mulana, maol do idaon ulaon on. Laporan taon 2001 patuduhon, adong lobi sian 18.300 Bale Harajaon na dihaporluhon di 88 negeri na susa di parhepengon. Alai, marhite pangurupion ni Jahowa dohot Jesus, ndang adong na so boi diulahon. (Mat. 19:26) Di bagasan 15 taon, sian taon 1999 sahat tu taon 2013, nunga 26.849 Bale Harajaon  dipajongjong mamangke program on. * Dipasupasu Jahowa do ulaonta marbarita. Alani i, sahat tu taon 2013 dihaporluhon dope hirahira 6.500 Bale Harajaon di angka negeri na susa di parhepengon, jala marratus nai na porlu dipajongjong ganup taon.

Sipata, adong do na mambahen maol ulaon pajongjongkon Bale Harajaon di negeri na susa di parhepengon

10-12. Songon dia do ulaon pajongjongkon Bale Harajaon parohon sangap tu Jahowa?

10 Songon dia do ulaon pajongjongkon Bale Harajaon parohon sangap tu Jahowa? Laporan sian kantor cabang di Zimbabwe mandok, ”Sabulan dung dipajongjong Bale Harajaon, tamba do dua hali lompit bilangan ni halak na ro tu parpunguan.” Di godang negeri, torop do na olo ro tu parpunguan dung dipajongjong inganan parpunguanta. Alani i, porlu do dipajongjong muse Bale Harajaon na baru ala ndang siat be halak na ro tu inganan parpunguan na parjolo i. Jotjot do ndang holan denggan ni Bale Harajaon na mambahen torop halak ro tu organisasi ni Jahowa. Alai, godang do na taronjar rohana ala diida holong na pinatudu ni donganta na pajongjongkon Bale Harajaon i. Taida ma pigapiga tudosan.

11 Indonesia. Sahalak baoa jotjot mamparrohahon ulaon pajongjongkon Bale Harajaon. Dung diboto ibana ndang digaji halak na mangurupi ulaon i, didok ibana ma, ”Jago do hamu bah! Marsitutu do hamu di ulaonmuna jala marlas ni roha nang pe ndang digaji. Huhilala ndang adong agama na asing na songon hamu!”

12 Ukraina. Sahalak borua mamolus ganup ari sian jolo ni Bale Harajaon na baru dipajongjong. Pintor diboto ibana do molo inganan i Bale Harajaon jala na pajongjongkon i, Sitindangi Ni Jahowa. Ibana mandok, ”Sian anggingku do huboto taringot tu Sitindangi Ni Jahowa ala sahalak Sitindangi do ibana. Tingki huida ulaonmuna, taronjar do rohangku marsaor dohot hamu. Dipatuduhon hamu do holong.” Dung i, marsiajar ma ibana jala tardidi taon 2010.

13, 14. (a) Aha do na boi taparsiajari sian pangkilalaan ni dua halak na mardongan saripe na mamparrohahon Bale Harajaon dipajongjong? (b) Aha do na boi taulahon asa boi inganan parpunguanta parohon sangap tu Jahowa?

13 Argentina. Dua halak na mardongan saripe ro mandapothon donganta na mangaradoti ulaon pajongjongkon Bale Harajaon. Didok tungganedolina ma, ”Huparrohahon hami do ulaonmuna dison . . . taronjar do rohanami marsiajar dohot hamu di inganan on.” Disungkun ibana ma, ”Songon dia do hami asa boi dohot tu parpunguanmuna?” Didok muse, olo do nasida marsiajar asal ma sisolhot ni nasida pe boi dohot marsiajar. Las do roha ni angka donganta mambege i jala diurupi ma nasida.

14 Olo do ra ndang hea hamu dohot pajongjongkon Bale Harajaon. Alai, godang do na boi ulahononmu asa boi inganan parpunguanmuna parohon sangap tu Jahowa. Umpamana, marsitutu ma hamu manogihon parsiajar  Bibelmuna, na jinumpanganmu dohot na asing asa ro tu parpunguan. Boi do hamu parsidohot mangaradoti manang paiashon inganan parpunguanmuna. Boi do lehononmu sumbangan laho mangaradoti dohot pajongjongkon Bale Harajaon di inganan na asing. (Jaha 1 Korint 16:2.) Ulaon i parohon sangap tu Jahowa.

Angka Parkarejo na Rade Mangurupi

15-17. (a) Ise do na gumodang mangurupi ulaon pajongjongkon inganan parpunguan? (b) Aha do na taparsiajari sian pengalaman ni angka donganta na dohot tu proyek internasional?

15 Na jotjot mangurupi ulaon pajongjongkon Bale Harajaon, Bale Kebaktian, dohot fasilitas cabang, i ma angka donganta na tading di inganan i. Alai, jotjot do muse angka donganta na marpengalaman ro sian negara na asing mangurupi nasida. Adong do na mangatur tingkina asa boi parsidohot mangurupi proyek internasional saleleng pigapiga minggu. Adong do na rade mangurupi saleleng martaontaon jala rade pinda sian sada inganan tu inganan na asing.

Si Timo dohot si Lina Lappalainen (Ida ma paragraf 16

16 Nang pe sipata maol mangulahon proyek internasional, alai godang do pasupasuna. Taparrohahon ma na masa tu si Timo dohot si Lina. Laho do nasida tu Amerika Selatan, Asia, dohot tu Eropa mangurupi ulaon pajongjongkon Bale Harajaon, Bale Kebaktian, dohot fasilitas cabang. Si Timo mandok, ”Margantiganti do ingananku karejo di bagasan dua taon saleleng 30 taon na parpudi on.” Si Lina, naung marhasohotan saleleng 25 taon dohot si Timo mandok, ”Laho do hami tu sampulu inganan na marasingasing laho mangurupi ulaon pajongjongkon Bale Harajaon. Ndang mura pahombarhon dirinami tu sipanganon, iklim,  bahasa, inganan marbarita dohot dongan na baru tinanda.” * Adong do laba ni halojaon ni nasida? Si Lina mandok, ”Sude ulaon na maol dihilala hami, parohon pasupasu. Dihilala hami do holong dohot haburjuon ni dongan sahaporseaon, jala dihilala hami do muse pangurupion ni Jahowa. Dihilala hami do janji ni Jesus di Markus 10:29, 30. Dapotnami do saratus hali lompit godang ni hahaanggi dohot natuatuanami di partondion.” Si Timo mandok, ”Las situtu do rohanami ala boi dipangke hami gogonami tu ulaon na dumenggan jala parsidohot mangaradoti arta ni Jesus Rajanta.”

17 Diurupi si Darren dohot si Sarah do ulaon pajongjongkon inganan parpunguan di Afrika, Amerika Selatan, Amerika Tengah, Asia, Eropa, dohot di Pasifik Selatan. Dihilala nasida do pasupasu lobi sian na nilehon ni nasida. Nang pe sipata maol, alai didok si Darren, ”Hak na sumurung do boi rap karejo dohot dongan sahaporseaon di liat portibi on. Huhilala sandiri do holong ni Jahowa dohot holong ni dongan sahaporseaon songon tali na mangkaliangi portibi on na pasadahon hita.” Si Sara mandok, ”Godang do na huparsiajari sian dongan sahaporseaon na ro sian marragam budaya! Molo huida na niulahon ni nasida laho manomba Jahowa, taronjar do rohangku mangalehon na dumenggan tu Debata.”

18. Songon dia do surirang na disurat di Psalmen 110:1-3 digohi?

18 Songon naung sinurirangkon ni Raja Daud, nang pe rayat ni Harajaon i mangadopi hasusaan, alai rade do nasida mangalehon dirinasida mangurupi ulaon na hombar tu Harajaon. (Jaha Psalmen 110:1-3.) Hita parsidohot manggohi surirang on molo taurupi ulaon na hombar tu Harajaon i. (1 Kor. 3:9) Godang ni kantor cabang, marratus Bale Kebaktian jala marribu Bale Harajaon dipajongjong di liat portibi on, na patuduhon na tutu jala naung mamarenta do Harajaon ni Debata. Hak na sumurung do di hita mangurupi Jesus Raja ni Harajaon i, jala mangulahon ulaon na parohon sangap tu Jahowa!

^ par. 6 Taon 2013, lobi sian 230. 000 sukarelawan na disetujui karejo di 132 RBC di Amerika Serikat. Di negeri i, ganup taon panitia on mangaradoti hirahira 75 ulaon pajongjongkon Bale Harajaon na baru jala mangurupi ulaon padengganhon hirahira  900 Bale Harajaon.

^ par. 9 Ndang dohot dope dietong angka Bale Harajaon na dipajongjong di angka negeri na so dohot tu program on.

^ par. 16 Angka hamba dohot sukarelawan internasional mangalehon gumodang tingkina laho mangurupi ulaon pajongjongkon inganan parpunguan, alai dilehon nasida do tingkina mangurupi huria di ulaon marbarita di ujung ni minggu manang tingki botari.